𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ।
𑌤𑌤𑍋 𑌭𑍂𑌤𑍋𑌪𑌸𑍃𑌷𑍍𑌟𑍇𑌵 𑌵𑍇𑌪𑌮𑌾𑌨𑌾 𑌪𑍁𑌨𑌃 𑌪𑍁𑌨𑌃 ।
𑌧𑌰𑌣𑍍𑌯𑌾𑌂 𑌗𑌤𑌸𑌤𑍍𑌤𑍍𑌵𑍇𑌵 𑌕𑍌𑌸𑌲𑍍𑌯𑌾 𑌸𑍂𑌤𑌮𑌬𑍍𑌰𑌵𑍀𑌤𑍍 ॥ 1 ॥
𑌨𑌯 𑌮𑌾𑌂 𑌯𑌤𑍍𑌰 𑌕𑌾𑌕𑍁𑌤𑍍𑌸𑍍𑌥𑌸𑍍𑌸𑍀𑌤𑌾 𑌯𑌤𑍍𑌰 𑌚 𑌲𑌕𑍍𑌷𑍍𑌮𑌣𑌃 ।
𑌤𑌾𑌨𑍍𑌵𑌿𑌨𑌾 𑌕𑍍𑌷𑌣𑌮𑌪𑍍𑌯𑌤𑍍𑌰 𑌜𑍀𑌵𑌿𑌤𑍁𑌂 𑌨𑍋𑌤𑍍𑌸𑌹𑍇𑌹𑍍𑌯𑌹𑌮𑍍 ॥ 2 ॥
𑌨𑌿𑌵𑌰𑍍𑌤𑌯 𑌰𑌥𑌂 𑌶𑍀𑌘𑍍𑌰𑌂 𑌦𑌂𑌡𑌕𑌾𑌨𑍍𑌨𑌯 𑌮𑌾𑌮𑌪𑌿 ।
𑌅𑌥 𑌤𑌾𑌨𑍍𑌨𑌾𑌨𑍁𑌗𑌚𑍍𑌛𑌾𑌮𑌿 𑌗𑌮𑌿𑌷𑍍𑌯𑌾𑌮𑌿 𑌯𑌮𑌕𑍍𑌷𑌯𑌮𑍍 ॥ 3 ॥
𑌬𑌾𑌷𑍍𑌪𑌵𑍇𑌗𑍋𑌪𑌹𑌤𑌯𑌾 𑌸 𑌵𑌾𑌚𑌾 𑌸𑌜𑍍𑌜𑌮𑌾𑌨𑌯𑌾 ।
𑌇𑌦𑌮𑌾𑌶𑍍𑌵𑌾𑌸𑌯𑌂𑌦𑍇𑌵𑍀𑌂 𑌸𑍂𑌤𑌃 𑌪𑍍𑌰𑌾𑌂𑌜𑌲𑌿𑌰𑌬𑍍𑌰𑌵𑍀𑌤𑍍 ॥ 4 ॥
𑌤𑍍𑌯𑌜 𑌶𑍋𑌕𑌂 𑌚 𑌮𑍋𑌹𑌂 𑌚 𑌸𑌂𑌭𑍍𑌰𑌮𑌂 𑌦𑍁𑌃𑌖𑌜𑌂 𑌤𑌥𑌾 ।
𑌵𑍍𑌯𑌵𑌧𑍂𑌯 𑌚 𑌸𑌂𑌤𑌾𑌪𑌂 𑌵𑌨𑍇 𑌵𑌤𑍍𑌸𑍍𑌯𑌤𑌿 𑌰𑌾𑌘𑌵𑌃 ॥ 5 ॥
𑌲𑌕𑍍𑌷𑍍𑌮𑌣𑌶𑍍𑌚𑌾𑌪𑌿 𑌰𑌾𑌮𑌸𑍍𑌯 𑌪𑌾𑌦𑍌 𑌪𑌰𑌿𑌚𑌰𑌨𑍍𑌵𑌨𑍇 ।
𑌆𑌰𑌾𑌧𑌯𑌤𑌿 𑌧𑌰𑍍𑌮𑌜𑍍𑌞𑌃 𑌪𑌰𑌲𑍋𑌕𑌂 𑌜𑌿𑌤𑍇𑌂𑌦𑍍𑌰𑌿𑌯𑌃 ॥ 6 ॥
𑌵𑌿𑌜𑌨𑍇𑌽𑌪𑌿 𑌵𑌨𑍇 𑌸𑍀𑌤𑌾 𑌵𑌾𑌸𑌂 𑌪𑍍𑌰𑌾𑌪𑍍𑌯 𑌗𑍃𑌹𑍇𑌷𑍍𑌵𑌿𑌵 ।
𑌵𑌿𑌸𑍍𑌰𑌂𑌭𑌂 𑌲𑌭𑌤𑍇𑌽𑌭𑍀𑌤𑌾 𑌰𑌾𑌮𑍇 𑌸𑌨𑍍𑌨𑍍𑌯𑌸𑍍𑌤𑌮𑌾𑌨𑌸𑌾 ॥ ॥
𑌨𑌾𑌸𑍍𑌯𑌾 𑌦𑍈𑌨𑍍𑌯𑌂 𑌕𑍃𑌤𑌂 𑌕𑌿𑌂𑌚𑌿𑌤𑍍𑌸𑍁𑌸𑍂𑌕𑍍𑌷𑍍𑌮𑌮𑌪𑌿 𑌲𑌕𑍍𑌷𑍍𑌯𑌤𑍇 ।
𑌉𑌚𑌿𑌤𑍇𑌵 𑌪𑍍𑌰𑌵𑌾𑌸𑌾𑌨𑌾𑌂 𑌵𑍈𑌦𑍇𑌹𑍀 𑌪𑍍𑌰𑌤𑌿𑌭𑌾𑌤𑌿 𑌮𑌾 ॥ ॥
𑌨𑌗𑌰𑍋𑌪𑌵𑌨𑌂 𑌗𑌤𑍍𑌵𑌾 𑌯𑌥𑌾 𑌸𑍍𑌮𑌰𑌮𑌤𑍇 𑌪𑍁𑌰𑌾 ।
𑌤𑌥𑍈𑌵 𑌰𑌮𑌤𑍇 𑌸𑍀𑌤𑌾 𑌨𑌿𑌰𑍍𑌜𑌨𑍇𑌷𑍁 𑌵𑌨𑍇𑌷𑍍𑌵𑌪𑌿 ॥ ॥
𑌬𑌾𑌲𑍇𑌵 𑌰𑌮𑌤𑍇 𑌸𑍀𑌤𑌾𑌽𑌬𑌾𑌲𑌚𑌂𑌦𑍍𑌰𑌨𑌿𑌭𑌾𑌨𑌨𑌾 ।
𑌰𑌾𑌮𑌾 𑌰𑌾𑌮𑍇 𑌹𑍍𑌯𑌧𑍀𑌨𑌾𑌤𑍍𑌮𑌾 𑌵𑌿𑌜𑌨𑍇𑌽𑌪𑌿 𑌵𑌨𑍇 𑌸𑌤𑍀 ॥ 10 ॥
𑌤𑌦𑍍𑌗𑌤𑌂 𑌹𑍃𑌦𑌯𑌂 𑌹𑍍𑌯𑌸𑍍𑌯𑌾𑌸𑍍𑌤𑌦𑌧𑍀𑌨𑌂 𑌚 𑌜𑍀𑌵𑌿𑌤𑌮𑍍 ।
𑌅𑌯𑍋𑌧𑍍𑌯𑌾𑌪𑌿 𑌭𑌵𑍇𑌽𑌤𑍍𑌤𑌸𑍍𑌯𑌾 𑌰𑌾𑌮𑌹𑍀𑌨𑌾 𑌤𑌦𑌾 𑌵𑌨𑌮𑍍 ॥ 11 ॥
𑌪𑌰𑌿𑌪𑍃𑌚𑍍𑌛𑌤𑌿 𑌵𑍈𑌦𑍇𑌹𑍀 𑌗𑍍𑌰𑌾𑌮𑌾𑌂𑌶𑍍𑌚 𑌨𑌗𑌰𑌾𑌣𑌿 𑌚 ।
𑌗𑌤𑌿𑌂 𑌦𑍃𑌷𑍍𑌟𑍍𑌵𑌾 𑌨𑌦𑍀𑌨𑌾𑌂 𑌚 𑌪𑌾𑌦𑌪𑌾𑌨𑍍𑌵𑌿𑌵𑌿𑌧𑌾𑌨𑌪𑌿 ॥ 12 ॥
𑌰𑌾𑌮𑌂 𑌹𑌿 𑌲𑌕𑍍𑌷𑍍𑌮𑌣𑌂 𑌵𑌾𑌪𑌿 𑌪𑍃𑌷𑍍𑌟𑍍𑌵𑌾 𑌜𑌾𑌨𑌾𑌤𑌿 𑌜𑌾𑌨𑌕𑍀 ।
𑌅𑌯𑍋𑌧𑍍𑌯𑌾 𑌕𑍍𑌰𑍋𑌶𑌮𑌾𑌤𑍍𑌰𑍇 𑌤𑍁 𑌵𑌿𑌹𑌾𑌰𑌮𑌿𑌵 𑌸𑌂𑌶𑍍𑌰𑌿𑌤𑌾 ॥ 13 ॥
𑌇𑌦𑌮𑍇𑌵 𑌸𑍍𑌮𑌰𑌾𑌮𑍍𑌯𑌸𑍍𑌯𑌾𑌸𑍍𑌸𑌹𑌸𑍈𑌵𑍋𑌪𑌜𑌲𑍍𑌪𑌿𑌤𑌮𑍍 ।
𑌕𑍈𑌕𑍇𑌯𑍀 𑌸𑌂𑌶𑍍𑌰𑌿𑌤𑌂 𑌵𑌾𑌕𑍍𑌯𑌂 𑌨𑍇𑌦𑌾𑌨𑍀𑌂 𑌪𑍍𑌰𑌤𑌿𑌭𑌾𑌤𑌿 𑌮𑌾 ॥ 14 ॥
𑌧𑍍𑌵𑌂𑌸𑌯𑌿𑌤𑍍𑌵𑌾 𑌤𑍁 𑌤𑌦𑍍𑌵𑌾𑌕𑍍𑌯𑌂 𑌪𑍍𑌰𑌮𑌾𑌦𑌾𑌤𑍍𑌪𑌰𑍍𑌯𑍁𑌪𑌤𑍍𑌸𑍍𑌥𑌿𑌤𑌮𑍍 ।
𑌹𑍍𑌲𑌾𑌦𑌨𑌂 𑌵𑌚𑌨𑌂 𑌸𑍂𑌤𑍋 𑌦𑍇𑌵𑍍𑌯𑌾 𑌮𑌧𑍁𑌰𑌮𑌬𑍍𑌰𑌵𑍀𑌤𑍍 ॥ 15 ॥
𑌅𑌧𑍍𑌵𑌨𑌾 𑌵𑌾𑌤𑌵𑍇𑌗𑍇𑌨 𑌸𑌂𑌭𑍍𑌰𑌮𑍇𑌣𑌾𑌽𑌽𑌤𑌪𑍇𑌨 𑌚 ।
𑌨 𑌵𑌿𑌗𑌚𑍍𑌛𑌤𑌿 𑌵𑍈𑌦𑍇𑌹𑍍𑌯𑌾𑌶𑍍𑌚𑌂𑌦𑍍𑌰𑌾𑌂𑌶𑍁 𑌸𑌦𑍃𑌶𑍀 𑌪𑍍𑌰𑌭𑌾 ॥ 16 ॥
𑌸𑌦𑍃𑌶𑌂 𑌶𑌤𑌪𑌤𑍍𑌰𑌸𑍍𑌯 𑌪𑍂𑌰𑍍𑌣𑌚𑌂𑌦𑍍𑌰𑍋𑌪𑌮𑌪𑍍𑌰𑌭𑌮𑍍 ।
𑌵𑌦𑌨𑌂 𑌤𑌦𑍍𑌵𑌦𑌾𑌨𑍍𑌯𑌾𑌯𑌾 𑌵𑍈𑌦𑍇𑌹𑍍𑌯𑌾 𑌨 𑌵𑌿𑌕𑌂𑌪𑌤𑍇 ॥ 1 ॥
𑌅𑌲𑌕𑍍𑌤𑌰𑌸𑌰𑌕𑍍𑌤𑌾𑌭𑌾𑌵𑌲𑌕𑍍𑌤𑌰𑌸𑌵𑌰𑍍𑌜𑌿𑌤𑍌 ।
𑌅𑌦𑍍𑌯𑌾𑌪𑌿 𑌚𑌰𑌣𑍌 𑌤𑌸𑍍𑌯𑌾𑌃 𑌪𑌦𑍍𑌮𑌕𑍋𑌶𑌸𑌮𑌪𑍍𑌰𑌭𑍌 ॥ 1 ॥
𑌨𑍂𑌪𑍁𑌰𑍋𑌦𑍍𑌘𑍁𑌷𑍍𑌟𑌹𑍇𑌲𑍇𑌵 𑌖𑍇𑌲𑌂 𑌗𑌚𑍍𑌛𑌤𑌿 𑌭𑌾𑌮𑌿𑌨𑍀 ।
𑌇𑌦𑌾𑌨𑍀𑌮𑌪𑌿 𑌵𑍈𑌦𑍇𑌹𑍀 𑌤𑌦𑍍𑌰𑌾𑌗𑌾𑌨𑍍𑌨𑌯𑌸𑍍𑌤 𑌭𑍂𑌷𑌣𑌾 ॥ 1 ॥
𑌗𑌜𑌂 𑌵𑌾 𑌵𑍀𑌕𑍍𑌷𑍍𑌯 𑌸𑌿𑌂𑌹𑌂 𑌵𑌾 𑌵𑍍𑌯𑌾𑌘𑍍𑌰𑌂 𑌵𑌾 𑌵𑌨𑌮𑌾𑌶𑍍𑌰𑌿𑌤𑌾 ।
𑌨𑌾𑌽𑌹𑌾𑌰𑌯𑌤𑌿 𑌸𑌂𑌤𑍍𑌰𑌾𑌸𑌂 𑌬𑌾𑌹𑍂 𑌰𑌾𑌮𑌸𑍍𑌯 𑌸𑌂𑌶𑍍𑌰𑌿𑌤𑌾 ॥ 20 ॥
𑌨 𑌶𑍋𑌚𑍍𑌯𑌾𑌸𑍍𑌤𑍇 𑌨 𑌚𑌾𑌤𑍍𑌮𑌨𑌶𑍍𑌶𑍋𑌚𑍍𑌯𑍋 𑌨𑌾𑌪𑌿 𑌜𑌨𑌾𑌧𑌿𑌪𑌃 ।
𑌇𑌦𑌂 𑌹𑌿 𑌚𑌰𑌿𑌤𑌂 𑌲𑍋𑌕𑍇 𑌪𑍍𑌰𑌤𑌿𑌷𑍍𑌠𑌾𑌸𑍍𑌯𑌤𑌿 𑌶𑌾𑌶𑍍𑌵𑌤𑌮𑍍 ॥ 21 ॥
𑌵𑌿𑌧𑍂𑌯 𑌶𑍋𑌕𑌂 𑌪𑌰𑌿𑌹𑍃𑌷𑍍𑌟𑌮𑌾𑌨𑌸𑌾 𑌮𑌹𑌰𑍍𑌷𑌿𑌯𑌾𑌤𑍇 𑌪𑌥𑌿 𑌸𑍁𑌵𑍍𑌯𑌵𑌤𑍍𑌸𑍍𑌥𑌿𑌤𑌾𑌃 ।
𑌵𑌨𑍇𑌰𑌤𑌾 𑌵𑌨𑍍𑌯𑌫𑌲𑌾𑌶𑌨𑌾𑌃 𑌪𑌿𑌤𑍁𑌶𑍍𑌶𑍁𑌭𑌾𑌂 𑌪𑍍𑌰𑌤𑌿𑌜𑍍𑌞𑌾𑌂 𑌪𑌰𑌿𑌪𑌾𑌲𑌯𑌂𑌤𑌿 𑌤𑍇 ॥ 22 ॥
𑌤𑌥𑌾𑌪𑌿 𑌸𑍂𑌤𑍇𑌨 𑌸𑍁𑌯𑍁𑌕𑍍𑌤𑌵𑌾𑌦𑌿𑌨𑌾 𑌨𑌿𑌵𑌾𑌰𑍍𑌯𑌮𑌾𑌣𑌾 𑌸𑍁𑌤𑌶𑍋𑌕𑌕𑌰𑍍𑌶𑌿𑌤𑌾 ।
𑌨 𑌚𑍈𑌵 𑌦𑍇𑌵𑍀 𑌵𑌿𑌰𑌰𑌾𑌮 𑌕𑍂𑌜𑌿𑌤𑌾𑌤𑍍𑌪𑍍𑌰𑌿𑌯𑍇𑌤𑌿 𑌪𑍁𑌤𑍍𑌰𑍇𑌤𑌿 𑌚 𑌰𑌾𑌘𑌵𑍇𑌤𑌿 𑌚 ॥ 23 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ॥
