ශ්රීමද්වාල්මීකීය රාමායණේ අයෝධ්යාකාංඩම් ।
අථ ෂෂ්ටිතමස්සර්ගඃ ।
තතෝ භූතෝපසෘෂ්ටේව වේපමානා පුනඃ පුනඃ ।
ධරණ්යාං ගතසත්ත්වේව කෞසල්යා සූතමබ්රවීත් ॥ 1 ॥
නය මාං යත්ර කාකුත්ස්ථස්සීතා යත්ර ච ලක්ෂ්මණඃ ।
තාන්විනා ක්ෂණමප්යත්ර ජීවිතුං නෝත්සහේහ්යහම් ॥ 2 ॥
නිවර්තය රථං ශීඝ්රං දංඩකාන්නය මාමපි ।
අථ තාන්නානුගච්ඡාමි ගමිෂ්යාමි යමක්ෂයම් ॥ 3 ॥
බාෂ්පවේගෝපහතයා ස වාචා සජ්ජමානයා ।
ඉදමාශ්වාසයංදේවීං සූතඃ ප්රාංජලිරබ්රවීත් ॥ 4 ॥
ත්යජ ශෝකං ච මෝහං ච සංභ්රමං දුඃඛජං තථා ।
ව්යවධූය ච සංතාපං වනේ වත්ස්යති රාඝවඃ ॥ 5 ॥
ලක්ෂ්මණශ්චාපි රාමස්ය පාදෞ පරිචරන්වනේ ।
ආරාධයති ධර්මජ්ඤඃ පරලෝකං ජිතේංද්රියඃ ॥ 6 ॥
විජනේऽපි වනේ සීතා වාසං ප්රාප්ය ගෘහේෂ්විව ।
විස්රංභං ලභතේऽභීතා රාමේ සන්න්යස්තමානසා ॥ 7 ॥
නාස්යා දෛන්යං කෘතං කිංචිත්සුසූක්ෂ්මමපි ලක්ෂ්යතේ ।
උචිතේව ප්රවාසානාං වෛදේහී ප්රතිභාති මා ॥ 8 ॥
නගරෝපවනං ගත්වා යථා ස්මරමතේ පුරා ।
තථෛව රමතේ සීතා නිර්ජනේෂු වනේෂ්වපි ॥ 9 ॥
බාලේව රමතේ සීතාऽබාලචංද්රනිභානනා ।
රාමා රාමේ හ්යධීනාත්මා විජනේऽපි වනේ සතී ॥ 10 ॥
තද්ගතං හෘදයං හ්යස්යාස්තදධීනං ච ජීවිතම් ।
අයෝධ්යාපි භවේऽත්තස්යා රාමහීනා තදා වනම් ॥ 11 ॥
පරිපෘච්ඡති වෛදේහී ග්රාමාංශ්ච නගරාණි ච ।
ගතිං දෘෂ්ට්වා නදීනාං ච පාදපාන්විවිධානපි ॥ 12 ॥
රාමං හි ලක්ෂ්මණං වාපි පෘෂ්ට්වා ජානාති ජානකී ।
අයෝධ්යා ක්රෝශමාත්රේ තු විහාරමිව සංශ්රිතා ॥ 13 ॥
ඉදමේව ස්මරාම්යස්යාස්සහසෛවෝපජල්පිතම් ।
කෛකේයී සංශ්රිතං වාක්යං නේදානීං ප්රතිභාති මා ॥ 14 ॥
ධ්වංසයිත්වා තු තද්වාක්යං ප්රමාදාත්පර්යුපත්ස්ථිතම් ।
හ්ලාදනං වචනං සූතෝ දේව්යා මධුරමබ්රවීත් ॥ 15 ॥
අධ්වනා වාතවේගේන සංභ්රමේණාऽऽතපේන ච ।
න විගච්ඡති වෛදේහ්යාශ්චංද්රාංශු සදෘශී ප්රභා ॥ 16 ॥
සදෘශං ශතපත්රස්ය පූර්ණචංද්රෝපමප්රභම් ।
වදනං තද්වදාන්යායා වෛදේහ්යා න විකංපතේ ॥ 17 ॥
අලක්තරසරක්තාභාවලක්තරසවර්ජිතෞ ।
අද්යාපි චරණෞ තස්යාඃ පද්මකෝශසමප්රභෞ ॥ 18 ॥
නූපුරෝද්ඝුෂ්ටහේලේව ඛේලං ගච්ඡති භාමිනී ।
ඉදානීමපි වෛදේහී තද්රාගාන්නයස්ත භූෂණා ॥ 19 ॥
ගජං වා වීක්ෂ්ය සිංහං වා ව්යාඝ්රං වා වනමාශ්රිතා ।
නාऽහාරයති සංත්රාසං බාහූ රාමස්ය සංශ්රිතා ॥ 20 ॥
න ශෝච්යාස්තේ න චාත්මනශ්ශෝච්යෝ නාපි ජනාධිපඃ ।
ඉදං හි චරිතං ලෝකේ ප්රතිෂ්ඨාස්යති ශාශ්වතම් ॥ 21 ॥
විධූය ශෝකං පරිහෘෂ්ටමානසා මහර්ෂියාතේ පථි සුව්යවත්ස්ථිතාඃ ।
වනේරතා වන්යඵලාශනාඃ පිතුශ්ශුභාං ප්රතිජ්ඤාං පරිපාලයංති තේ ॥ 22 ॥
තථාපි සූතේන සුයුක්තවාදිනා නිවාර්යමාණා සුතශෝකකර්ශිතා ।
න චෛව දේවී විරරාම කූජිතාත්ප්රියේති පුත්රේති ච රාඝවේති ච ॥ 23 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ ෂෂ්ටිතමස්සර්ගඃ ॥
