Meaning, Multimedia
View this in:
| English | Devanagari | Telugu | Tamil | Kannada | Malayalam | Gujarati | Odia | Bengali  |
| Marathi | Assamese | Punjabi | Hindi | Samskritam | Konkani | Nepali | Sinhala | Grantha  |

2.𑍭4 𑌅𑌯𑍋𑌧𑍍𑌯𑌾𑌕𑌾𑌂𑌡 - 𑌚𑌤𑍁𑌃𑌸𑌪𑍍𑌤𑌤𑌿𑌤𑌮 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌚𑌤𑍁𑌃𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ।

𑌤𑌾𑌂 𑌤𑌥𑌾 𑌗𑌰𑍍𑌹𑌯𑌿𑌤𑍍𑌵𑌾 𑌤𑍁 𑌮𑌾𑌤𑌰𑌂 𑌭𑌰𑌤𑌸𑍍𑌤𑌦𑌾 ।
𑌰𑍋𑌷𑍇𑌣 𑌮𑌹𑌤𑌾𑌽𑌵𑌿𑌷𑍍𑌟𑌃 𑌪𑍁𑌨𑌰𑍇𑌵𑌾𑌬𑍍𑌰𑌵𑍀𑌦𑍍𑌵𑌚𑌃 ॥ 1 ॥

𑌰𑌾𑌜𑍍𑌯𑌾𑌦𑍍𑌭𑍍𑌰𑌂𑌶𑌸𑍍𑌵 𑌕𑍈𑌕𑍇𑌯𑌿 𑌨𑍃𑌶𑌂𑌸𑍇 𑌦𑍁𑌷𑍍𑌟𑌚𑌾𑌰𑌿𑌣𑌿 ।
𑌪𑌰𑌿𑌤𑍍𑌯𑌕𑍍𑌤𑌾 𑌚 𑌧𑌰𑍍𑌮𑍇𑌣 𑌮𑌾 𑌮𑍃𑌤𑌂 𑌰𑍁𑌦𑌤𑍀 𑌭𑌵 ॥ 2 ॥

𑌕𑌿𑌨𑍍𑌨𑍁 𑌤𑍇𑌽𑌦𑍂𑌷𑌯𑌦𑍍𑌰𑌾𑌜𑌾 𑌰𑌾𑌮𑍋 𑌵𑌾 𑌭𑍃𑌶𑌧𑌾𑌰𑍍𑌮𑌿𑌕𑌃 ।
𑌯𑌯𑍋𑌰𑍍𑌮𑍃𑌤𑍍𑌯𑍁𑌰𑍍𑌵𑌿𑌵𑌾𑌸𑌶𑍍𑌚 𑌤𑍍𑌵𑌤𑍍𑌕𑍃𑌤𑍇 𑌤𑍁𑌲𑍍𑌯𑌮𑌾𑌗𑌤𑍌 ॥ 3 ॥

𑌭𑍍𑌰𑍂𑌣𑌹𑌤𑍍𑌯𑌾𑌮𑌸𑌿 𑌪𑍍𑌰𑌾𑌪𑍍𑌤𑌾 𑌕𑍁𑌲𑌸𑍍𑌯𑌾𑌸𑍍𑌯 𑌵𑌿𑌨𑌾𑌶𑌨𑌾𑌤𑍍 ।
𑌕𑍈𑌕𑍇𑌯𑌿 𑌨𑌰𑌕𑌂 𑌗𑌚𑍍𑌛 𑌮𑌾 𑌚 𑌭𑌰𑍍𑌤𑍁 𑌸𑍍𑌸𑌲𑍋𑌕𑌤𑌾𑌮𑍍 ॥ 4 ॥

𑌯𑌤𑍍𑌤𑍍𑌵𑌯𑌾 𑌹𑍀𑌦𑍃𑌶𑌂 𑌪𑌾𑌪𑌂 𑌕𑍃𑌤𑌂 𑌘𑍋𑌰𑍇𑌣 𑌕𑌰𑍍𑌮𑌣𑌾 ।
𑌸𑌰𑍍𑌵𑌲𑍋𑌕𑌪𑍍𑌰𑌿𑌯𑌂 𑌹𑌿𑌤𑍍𑌵𑌾 𑌮𑌮𑌾𑌪𑍍𑌯𑌾𑌪𑌾𑌦𑌿𑌤𑌂 𑌭𑌯𑌮𑍍 ॥ 5 ॥

𑌤𑍍𑌵𑌤𑍍𑌕𑍃𑌤𑍇 𑌮𑍇 𑌪𑌿𑌤𑌾 𑌵𑍃𑌤𑍍𑌤𑍋 𑌰𑌾𑌮𑌶𑍍𑌚𑌾𑌰𑌣𑍍𑌯𑌮𑌾𑌶𑍍𑌰𑌿𑌤𑌃 ।
𑌅𑌯𑌶𑍋 𑌜𑍀𑌵𑌲𑍋𑌕𑍇 𑌚 𑌤𑍍𑌵𑌯𑌾𑌽𑌹𑌂 𑌪𑍍𑌰𑌤𑌿𑌪𑌾𑌦𑌿𑌤𑌃 ॥ 6 ॥

𑌮𑌾𑌤𑍃𑌰𑍂𑌪𑍇 𑌮𑌮𑌾𑌮𑌿𑌤𑍍𑌰𑍇 𑌨𑍃𑌶𑌂𑌸𑍇 𑌰𑌾𑌜𑍍𑌯𑌕𑌾𑌮𑍁𑌕𑍇 ।
𑌨 𑌤𑍇𑌽𑌹 𑌮𑌭𑌿𑌭𑌾𑌷𑍍𑌯𑍋𑌽𑌸𑍍𑌮𑌿 𑌦𑍁𑌰𑍍𑌵𑍃𑌤𑍍𑌤𑍇 𑌪𑌤𑌿𑌘𑌾𑌤𑌿𑌨𑌿 ॥ 𑍭 ॥

𑌕𑍌𑌸𑌲𑍍𑌯𑌾 𑌚 𑌸𑍁𑌮𑌿𑌤𑍍𑌰𑌾 𑌚 𑌯𑌾𑌶𑍍𑌚𑌾𑌨𑍍𑌯𑌾 𑌮𑌮 𑌮𑌾𑌤𑌰𑌃 ।
𑌦𑍁𑌃𑌖𑍇𑌨 𑌮𑌹𑌤𑌾𑌽𑌵𑌿𑌷𑍍𑌟𑌾𑌸𑍍𑌤𑍍𑌵𑌾𑌂 𑌪𑍍𑌰𑌾𑌪𑍍𑌯 𑌕𑍁𑌲𑌦𑍂𑌷𑌿𑌣𑍀𑌮𑍍 ॥ 𑍮 ॥

𑌨 𑌤𑍍𑌵𑌮𑌶𑍍𑌵𑌪𑌤𑍇𑌃 𑌕𑌨𑍍𑌯𑌾 𑌧𑌰𑍍𑌮𑌰𑌾𑌜𑌸𑍍𑌯 𑌧𑍀𑌮𑌤𑌃 ।
𑌰𑌾𑌕𑍍𑌷𑌸𑍀 𑌤𑌤𑍍𑌰 𑌜𑌾𑌤𑌾𑌽𑌸𑌿 𑌕𑍁𑌲𑌪𑍍𑌰𑌧𑍍𑌵𑌂𑌸𑌿𑌨𑍀 𑌪𑌿𑌤𑍁𑌃 ॥ 𑍯 ॥

𑌯𑌤𑍍𑌤𑍍𑌵𑌯𑌾 𑌧𑌾𑌰𑍍𑌮𑌿𑌕𑍋 𑌰𑌾𑌮𑍋 𑌨𑌿𑌤𑍍𑌯𑌂 𑌸𑌤𑍍𑌯𑌪𑌰𑌾𑌯𑌣𑌃 ।
𑌵𑌨𑌂 𑌪𑍍𑌰𑌸𑍍𑌥𑌾𑌪𑌿𑌤𑍋 𑌦𑍁𑌃𑌖𑌾𑌤𑍍𑌪𑌿𑌤𑌾 𑌚 𑌤𑍍𑌰𑌿𑌦𑌿𑌵𑌂 𑌗𑌤𑌃 ॥ 10 ॥

𑌯𑌤𑍍𑌪𑍍𑌰𑌧𑌾𑌨𑌾𑌽𑌸𑌿 𑌤𑌤𑍍𑌪𑌾𑌪𑌂 𑌮𑌯𑌿 𑌪𑌿𑌤𑍍𑌰𑌾 𑌵𑌿𑌨𑌾𑌕𑍃𑌤𑍇 ।
𑌭𑍍𑌰𑌾𑌤𑍃𑌭𑍍𑌯𑌾𑌂 𑌚 𑌪𑌰𑌿𑌤𑍍𑌯𑌕𑍍𑌤𑍇 𑌸𑌰𑍍𑌵𑌲𑍋𑌕𑌸𑍍𑌯 𑌚𑌾𑌪𑍍𑌰𑌿𑌯𑍇 ॥ 11 ॥

𑌕𑍌𑌸𑌲𑍍𑌯𑌾𑌂 𑌧𑌰𑍍𑌮𑌸𑌂𑌯𑍁𑌕𑍍𑌤𑌾𑌂 𑌵𑌿𑌯𑍁𑌕𑍍𑌤𑌾𑌂 𑌪𑌾𑌪𑌨𑌿𑌶𑍍𑌚𑌯𑍇 ।
𑌕𑍃𑌤𑍍𑌵𑌾 𑌕𑌂 𑌪𑍍𑌰𑌾𑌪𑍍𑌸𑍍𑌯𑌸𑍇 𑌤𑍍𑌵𑌦𑍍𑌯 𑌲𑍋𑌕𑌂 𑌨𑌿𑌰𑌯𑌗𑌾𑌮𑌿𑌨𑌿 ॥ 12 ॥

𑌕𑌿𑌂 𑌨𑌾𑌵𑌬𑍁𑌧𑍍𑌯𑌸𑍇 𑌕𑍍𑌰𑍂𑌰𑍇 𑌨𑌿𑌯𑌤𑌂 𑌬𑌂𑌧𑍁𑌸𑌂𑌶𑍍𑌰𑌯𑌮𑍍 ।
𑌜𑍍𑌯𑍇𑌷𑍍𑌠𑌂 𑌪𑌿𑌤𑍃𑌸𑌮𑌂 𑌰𑌾𑌮𑌂 𑌕𑍌𑌸𑌲𑍍𑌯𑌾𑌯𑌾𑌽𑌤𑍍𑌮𑌸𑌂𑌭𑌵𑌮𑍍 ॥ 13 ॥

𑌅𑌙𑌗𑌪𑍍𑌰𑌤𑍍𑌯𑌙𑌗𑌜𑌃 𑌪𑍁𑌤𑍍𑌰𑍋 𑌹𑍃𑌦𑌯𑌾𑌚𑍍𑌚𑌾𑌪𑌿 𑌜𑌾𑌯𑌤𑍇 ।
𑌤𑌸𑍍𑌮𑌾𑌤𑍍𑌪𑍍𑌰𑌿𑌯𑌤𑌮𑍋 𑌮𑌾𑌤𑍁𑌃 𑌪𑍍𑌰𑌿𑌯𑌾 𑌏𑌵 𑌤𑍁 𑌬𑌾𑌂𑌧𑌵𑌾𑌃 ॥ 14 ॥

𑌅𑌨𑍍𑌯𑌦𑌾 𑌕𑌿𑌲 𑌧𑌰𑍍𑌮𑌜𑍍𑌞𑌾 𑌸𑍁𑌰𑌭𑌿 𑌸𑍍𑌸𑍁𑌰𑌸𑌮𑍍𑌮𑌤𑌾 ।
𑌵𑌹𑌮𑌾𑌨𑍌 𑌦𑌦𑌰𑍍𑌶𑍋𑌰𑍍𑌵𑍍𑌯𑌾𑌂 𑌪𑍁𑌤𑍍𑌰𑍌 𑌵𑌿𑌗𑌤𑌚𑍇𑌤𑌸𑍌 ॥ 15 ॥

𑌤𑌾𑌵𑌰𑍍𑌧𑌦𑌿𑌵𑌸𑍇 𑌶𑍍𑌰𑌾𑌂𑌤𑍌 𑌦𑍃𑌷𑍍𑌟𑍍𑌵𑌾 𑌪𑍁𑌤𑍍𑌰𑍌 𑌮𑌹𑍀𑌤𑌲𑍇 ।
𑌰𑍁𑌰𑍋𑌦 𑌪𑍁𑌤𑍍𑌰𑌶𑍋𑌕𑍇𑌨 𑌬𑌾𑌷𑍍𑌪𑌪𑌰𑍍𑌯𑌾𑌕𑍁𑌲𑍇𑌕𑍍𑌷𑌣𑌾 ॥ 16 ॥

𑌅𑌧𑌸𑍍𑌤𑌾𑌦𑍍𑌵𑍍𑌰𑌜𑌤𑌸𑍍𑌤𑌸𑍍𑌯𑌾𑌃 𑌸𑍁𑌰𑌰𑌾𑌜𑍍𑌞𑍋 𑌮𑌹𑌾𑌤𑍍𑌮𑌨𑌃 ।
𑌬𑌿𑌂𑌦𑌵𑌃 𑌪𑌤𑌿𑌤𑌾 𑌗𑌾𑌤𑍍𑌰𑍇 𑌸𑍂𑌕𑍍𑌷𑍍𑌮𑌾 𑌸𑍍𑌸𑍁𑌰𑌭𑌿𑌗𑌂𑌧𑌿𑌨𑌃 ॥ 1𑍭 ॥

𑌇𑌂𑌦𑍍𑌰𑍋𑌽𑌪𑍍𑌯𑌶𑍍𑌰𑍁𑌨𑌿𑌪𑌾𑌤𑌂 𑌤𑌂 𑌸𑍍𑌵𑌗𑌾𑌤𑍍𑌰𑍇 𑌪𑍁𑌣𑍍𑌯𑌗𑌂𑌧𑌿𑌨𑌮𑍍 ।
𑌸𑍁𑌰𑌭𑌿𑌂 𑌮𑌨𑍍𑌯𑌤𑍇 𑌦𑍃𑌷𑍍𑌟𑍍𑌵𑌾 𑌭𑍂𑌯𑌸𑍀𑌂 𑌤𑌾𑌂 𑌸𑍁𑌰𑍇𑌶𑍍𑌵𑌰𑌃 ॥ 1𑍮 ॥

𑌨𑌿𑌰𑍀𑌕𑍍𑌷𑌮𑌾𑌣 𑌶𑍍𑌶𑌕𑍍𑌰𑌸𑍍𑌤𑌾𑌂 𑌦𑌦𑌰𑍍𑌶 𑌸𑍁𑌰𑌭𑌿𑌂 𑌸𑍍𑌥𑌿𑌤𑌾𑌮𑍍 ।
𑌆𑌕𑌾𑌶𑍇 𑌵𑌿𑌷𑍍𑌠𑌿𑌤𑌾𑌂 𑌦𑍀𑌨𑌾𑌂 𑌰𑍁𑌦𑌂𑌤𑍀𑌂 𑌭𑍃𑌶𑌦𑍁𑌃𑌖𑌿𑌤𑌾𑌮𑍍 ॥ 1𑍯 ॥

𑌤𑌾𑌂 𑌦𑍃𑌷𑍍𑌟𑍍𑌵𑌾 𑌶𑍋𑌕𑌸𑌂𑌤𑌪𑍍𑌤𑌾𑌂 𑌵𑌜𑍍𑌰𑌪𑌾𑌣𑌿𑌰𑍍𑌯𑌶𑌸𑍍𑌵𑌿𑌨𑍀𑌮𑍍 ।
𑌇𑌂𑌦𑍍𑌰𑌃 𑌪𑍍𑌰𑌾𑌂𑌜𑌲𑌿𑌰𑍁𑌦𑍍𑌵𑌿𑌗𑍍𑌨 𑌸𑍍𑌸𑍁𑌰𑌰𑌾𑌜𑍋𑌽𑌬𑍍𑌰𑌵𑍀𑌦𑍍𑌵𑌚𑌃 ॥ 20 ॥

𑌭𑌯𑌂 𑌕𑌚𑍍𑌛𑌿𑌨𑍍𑌨 𑌚𑌾𑌸𑍍𑌮𑌾𑌸𑍁 𑌕𑍁𑌤𑌶𑍍𑌚𑌿𑌦𑍍𑌵𑌿𑌦𑍍𑌯𑌤𑍇 𑌮𑌹𑌤𑍍 ।
𑌕𑍁𑌤𑍋𑌨𑌿𑌮𑌤𑍍𑌤𑌶𑍍𑌶𑍋𑌕𑌸𑍍𑌤𑍇 𑌬𑍍𑌰𑍂𑌹𑌿 𑌸𑌰𑍍𑌵𑌹𑌿𑌤𑍈𑌷𑌿𑌣𑌿 ॥ 21 ॥

𑌏𑌵𑌮𑍁𑌕𑍍𑌤𑌾 𑌤𑍁 𑌸𑍁𑌰𑌭𑌿 𑌸𑍍𑌸𑍁𑌰𑌰𑌾𑌜𑍇𑌨 𑌧𑍀𑌮𑌤𑌾 ।
𑌪𑍍𑌰𑌤𑍍𑌯𑍁𑌵𑌾𑌚 𑌤𑌤𑍋 𑌧𑍀𑌰𑌾 𑌵𑌾𑌕𑍍𑌯𑌂 𑌵𑌾𑌕𑍍𑌯𑌵𑌿𑌶𑌾𑌰𑌦𑌾 ॥ 22 ॥

𑌶𑌾𑌂𑌤𑌂 𑌪𑌾𑌪𑌂 𑌨 𑌵𑌃 𑌕𑌿𑌂𑌚𑌿𑌤𑍍𑌕𑍁𑌤𑌶𑍍𑌚𑌿𑌦𑌮𑌰𑌾𑌧𑌿𑌪𑌃 ।
𑌅𑌹𑌂 𑌮𑌗𑍍𑌨𑍌 𑌤𑍁 𑌶𑍋𑌚𑌾𑌮𑌿 𑌸𑍍𑌵𑌪𑍁𑌤𑍍𑌰𑍌 𑌵𑌿𑌷𑌮𑍇 𑌸𑍍𑌥𑌿𑌤𑍌 ॥ 23 ॥

𑌏𑌤𑍌 𑌦𑍃𑌷𑍍𑌟𑍍𑌵𑌾 𑌕𑍃𑌶𑍌 𑌦𑍀𑌨𑍌 𑌸𑍂𑌰𑍍𑌯𑌰𑌶𑍍𑌮𑌿𑌪𑍍𑌰𑌤𑌾𑌪𑌿𑌤𑍌 ।
𑌬𑌾𑌧𑍍𑌯𑌮𑌾𑌨𑍌 𑌬𑌲𑍀𑌵𑌰𑍍𑌧𑍌 𑌕𑌰𑍍𑌷𑌕𑍇𑌣 𑌸𑍁𑌰𑌾𑌧𑌿𑌪 ॥ 24 ॥

𑌮𑌮𑌕𑌾𑌯𑌾𑌤𑍍𑌪𑍍𑌰𑌸𑍂𑌤𑍌 𑌹𑌿 𑌦𑍁𑌃𑌖𑌿𑌤𑍌 𑌭𑌾𑌰𑌪𑍀𑌡𑌿𑌤𑍌 ।
𑌯𑍌 𑌦𑍃𑌷𑍍𑌟𑍍𑌵𑌾 𑌪𑌰𑌿𑌤𑌪𑍍𑌯𑍇𑌽𑌹𑌂 𑌨𑌾𑌸𑍍𑌤𑌿 𑌪𑍁𑌤𑍍𑌰𑌸𑌮𑌃 𑌪𑍍𑌰𑌿𑌯𑌃 ॥ 25 ॥

𑌯𑌸𑍍𑌯𑌾𑌃 𑌪𑍁𑌤𑍍𑌰𑌸𑌹𑌸𑍍𑌰𑍈𑌸𑍍𑌤𑍁 𑌕𑍃𑌤𑍍𑌸𑍍𑌨𑌂 𑌵𑍍𑌯𑌾𑌪𑍍𑌤𑌮𑌿𑌦𑌂 𑌜𑌗𑌤𑍍 ।
𑌤𑌾𑌂 𑌦𑍃𑌷𑍍𑌟𑍍𑌵𑌾 𑌰𑍁𑌦𑌤𑍀𑌂 𑌶𑌕𑍍𑌰𑍋 𑌨 𑌸𑍁𑌤𑌾𑌨𑍍𑌮𑌨𑍍𑌯𑌤𑍇 𑌪𑌰𑌮𑍍 ॥ 26 ॥

𑌸𑌦𑌾𑌽𑌪𑍍𑌰𑌤𑌿𑌮𑌵𑍃𑌤𑍍𑌤𑌾𑌯𑌾𑌃 𑌲𑍋𑌕𑌧𑌾𑌰𑌣𑌕𑌾𑌮𑍍𑌯𑌯𑌾 ।
𑌶𑍍𑌰𑍀𑌮𑌤𑍍𑌯𑌾 𑌗𑍁𑌣𑌨𑌿𑌤𑍍𑌯𑌾𑌯𑌾 𑌸𑍍𑌸𑍍𑌵𑌭𑌾𑌵𑌪𑌰𑌿𑌚𑍇𑌷𑍍𑌟𑌯𑌾 ॥ 2𑍭 ॥

𑌯𑌸𑍍𑌯𑌾𑌃 𑌪𑍁𑌤𑍍𑌰𑌸𑌹𑌸𑍍𑌰𑌾𑌣𑌿 𑌸𑌾𑌽𑌪𑌿 𑌶𑍋𑌚𑌤𑌿 𑌕𑌾𑌮𑌧𑍁𑌕𑍍 ।
𑌕𑌿𑌂 𑌪𑍁𑌨𑌰𑍍𑌯𑌾 𑌵𑌿𑌨𑌾 𑌰𑌾𑌮𑌂 𑌕𑍌𑌸𑌲𑍍𑌯𑌾 𑌵𑌰𑍍𑌤𑌯𑌿𑌷𑍍𑌯𑌤𑌿 ॥ 2𑍮 ॥

𑌏𑌕𑌪𑍁𑌤𑍍𑌰𑌾 𑌚 𑌸𑌾𑌧𑍍𑌵𑍀 𑌚 𑌵𑌿𑌵𑌤𑍍𑌸𑍇𑌯𑌂 𑌤𑍍𑌵𑌯𑌾 𑌕𑍃𑌤𑌾 ।
𑌤𑌸𑍍𑌮𑌾𑌤𑍍𑌤𑍍𑌵𑌂 𑌸𑌤𑌤𑌂 𑌦𑍁𑌃𑌖𑌂 𑌪𑍍𑌰𑍇𑌤𑍍𑌯 𑌚𑍇𑌹 𑌚 𑌲𑌪𑍍𑌸𑍍𑌯𑌸𑍇 ॥ 2𑍯 ॥

𑌅𑌹𑌂 𑌹𑍍𑌯𑌪𑌚𑌿𑌤𑌿𑌂 𑌭𑍍𑌰𑌾𑌤𑍁𑌃 𑌪𑌿𑌤𑍁𑌶𑍍𑌚 𑌸𑌕𑌲𑌾𑌮𑌿𑌮𑌾𑌮𑍍 ।
𑌵𑌰𑍍𑌧𑌨𑌂 𑌯𑌶𑌸𑌶𑍍𑌚𑌾𑌪𑌿 𑌕𑌰𑌿𑌷𑍍𑌯𑌾𑌮𑌿 𑌨 𑌸𑌂𑌶𑌯𑌃 ॥ 30 ॥

𑌅𑌨𑌾𑌯𑌯𑌿𑌤𑍍𑌵𑌾 𑌤𑌨𑌯𑌂 𑌕𑍌𑌸𑌲𑍍𑌯𑌾𑌯𑌾 𑌮𑌹𑌾𑌬𑌲𑌮𑍍 ।
𑌸𑍍𑌵𑌯𑌮𑍇𑌵 𑌪𑍍𑌰𑌵𑍇𑌕𑍍𑌷𑍍𑌯𑌾𑌮𑌿 𑌵𑌨𑌂 𑌮𑍁𑌨𑌿𑌨𑌿𑌷𑍇𑌵𑌿𑌤𑌮𑍍 ॥ 31 ॥

𑌨 𑌹𑍍𑌯𑌹𑌂 𑌪𑌾𑌪𑌸𑌂𑌕𑌲𑍍𑌪𑍇 𑌪𑌾𑌪𑍇 𑌪𑌾𑌪𑌂 𑌤𑍍𑌵𑌯𑌾 𑌕𑍃𑌤𑌮𑍍 ।
𑌶𑌕𑍍𑌤𑍋 𑌧𑌾𑌰𑌯𑌿𑌤𑍁𑌂 𑌪𑍌𑌰𑍈𑌰𑌶𑍍𑌰𑍁𑌕𑌂𑌠𑍈 𑌰𑍍𑌨𑌿𑌰𑍀𑌕𑍍𑌷𑌿𑌤𑌃 ॥ 32 ॥

𑌸𑌾 𑌤𑍍𑌵𑌮𑌗𑍍𑌨𑌿𑌂 𑌪𑍍𑌰𑌵𑌿𑌶 𑌵𑌾 𑌸𑍍𑌵𑌯𑌂 𑌵𑌾 𑌦𑌂𑌡𑌕𑌾𑌨𑍍𑌵𑌿𑌶 ।
𑌰𑌜𑍍𑌜𑍁𑌂 𑌬𑌧𑌾𑌨 𑌵𑌾 𑌕𑌂𑌠𑍇 𑌨 𑌹𑌿 𑌤𑍇𑌽𑌨𑍍𑌯𑌤𑍍𑌪𑌰𑌾𑌯𑌣𑌮𑍍 ॥ 33 ॥

𑌅𑌹𑌮𑌪𑍍𑌯𑌵𑌨𑍀𑌂 𑌪𑍍𑌰𑌾𑌪𑍍𑌤𑍇 𑌰𑌾𑌮𑍇 𑌸𑌤𑍍𑌯𑌪𑌰𑌾𑌕𑍍𑌰𑌮𑍇 ।
𑌕𑍃𑌤𑌕𑍃𑌤𑍍𑌯𑍋 𑌭𑌵𑌿𑌷𑍍𑌯𑌾𑌮𑌿 𑌵𑌿𑌪𑍍𑌰𑌵𑌾𑌸𑌿𑌤𑌕𑌲𑍍𑌮𑌷𑌃 ॥ 34 ॥

𑌇𑌤𑌿 𑌨𑌾𑌗 𑌇𑌵𑌾𑌰𑌣𑍍𑌯𑍇 𑌤𑍋𑌮𑌰𑌾𑌂𑌕𑍁𑌶𑌚𑍋𑌦𑌿𑌤𑌃 ।
𑌪𑌪𑌾𑌤 𑌭𑍁𑌵𑌿 𑌸𑌂𑌕𑍃𑌦𑍍𑌧𑍋 𑌨𑌿𑌶𑍍𑌶𑍍𑌵𑌸𑌨𑍍𑌨𑌿𑌵 𑌪𑌨𑍍𑌨𑌗𑌃 ॥ 35 ॥

𑌸𑌂𑌰𑌕𑍍𑌤𑌨𑍇𑌤𑍍𑌰 𑌶𑍍𑌶𑌿𑌥𑌿𑌲𑌾𑌂𑌭𑌰𑌸𑍍𑌤𑌦𑌾 𑌵𑌿𑌧𑍂𑌤𑌸𑌰𑍍𑌵𑌾𑌭𑌰𑌣𑌃 𑌪𑌰𑌂𑌤𑌪𑌃 ।
𑌬𑌭𑍂𑌵 𑌭𑍂𑌮𑍌 𑌪𑌤𑌿𑌤𑍋 𑌨𑍃𑌪𑌾𑌤𑍍𑌮𑌜𑌶𑍍𑌶𑌚𑍀𑌪𑌤𑍇𑌃 𑌕𑍇𑌤𑍁𑌰𑌿𑌵𑍋𑌤𑍍𑌸𑌵𑌕𑍍𑌷𑌯𑍇 ॥ 36 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌚𑌤𑍁𑌃𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ॥


Browse Related Categories: