ശ്രീമദ്വാല്മീകീയ രാമായണേ അയോധ്യാകാംഡമ് ।
അഥ അഷ്ടനവതിതമസ്സര്ഗഃ ।
നിവേശ്യ സേനാം തു വിഭുഃ പദ്ഭ്യാം പാദവതാം വരഃ ।
അഭിഗംതും സ കാകുത്ഥ്സമിയേഷ ഗുരുവര്തകമ് ॥ 1 ॥
നിവിഷ്ടമാത്രേ സൈന്യേ തു യഥോദ്ദേശം വിനീതവത് ।
ഭരതോ ഭ്രാതരം വാക്യം ശത്രുഘ്നമിദമബ്രവീത് ॥ 2 ॥
ക്ഷിപ്രം വനമിദം സൌമ്യ നരസംഘൈ സ്സമംതതഃ ।
ലുബ്ധൈശ്ച സഹിതൈരേഭി സ്ത്വമന്വേഷിതുമര്ഹസി ॥ 3 ॥
ഗുഹോ ജ്ഞാതിസഹസ്രേണ ശരചാപാസിധാരിണാ ।
സമന്വേഷതു കാകുത്സ്ഥമസ്മിന് പരിവൃതസ്സ്വയമ് ॥ 4 ॥
അമാത്യൈ സ്സഹ പൌരൈശ്ച ഗുരുഭിശ്ച ദ്വിജാതിഭിഃ ।
വനം സർവം ചരിഷ്യാമി പദ്ഭ്യാം പരിവൃത സ്സ്വയമ് ॥ 5 ॥
യാവന്ന രാമം ദ്രക്ഷ്യാമി ലക്ഷ്മണം വാ മഹാബലമ് ।
വൈദേഹീം ച മഹാഭാഗാം ന മേ ശാംതിര്ഭവിഷ്യതി ॥ 6 ॥
യാവന്ന ചംദ്രസംകാശം ദ്രക്ഷ്യാമി ശുഭമാനനമ് ।
ഭ്രാതുഃ പദ്മപലാശാക്ഷം ന മേ ശാംതിര്ഭവിഷ്യതി ॥ 7 ॥
യാവന്ന ചരണൌ ഭ്രാതുഃ പാര്ഥിവവ്യംജനാന്വിതൌ ।
ശിരസാ ധാരയിഷ്യാമി ന മേ ശാംതിര്ഭവിഷ്യതി ॥ 8 ॥
യാവന്ന രാജ്യേ രാജ്യാര്ഹഃ പിതൃപൈതാമഹേ സ്ഥിതഃ ।
അഭിഷേകജലക്ലിന്നോ ന മേ ശാംതിര്ഭവിഷ്യതി ॥ 9 ॥
സിദ്ധാര്ഥഃ ഖലു സൌമിത്രിര്യശ്ചംദ്രവിമലോപമമ് ।
മുഖം പശ്യതി രാമസ്യ രാജീവാക്ഷം മഹാദ്യുതി ॥ 10 ॥
കൃതകൃത്യാ മഹാഭാഗാ വൈദേഹീ ജനകാത്മജാ ।
ഭര്താരം സാഗരാംതായാഃ പൃഥിവ്യാ യാനുഗച്ഛതി ॥ 11 ॥
സുഭഗശ്ചിത്രകൂടോഽസൌ ഗിരിരാജോപമോ ഗിരിഃ ।
യസ്മിന്വസതി കാകുത്സ്ഥഃ കുബേര ഇവ നംദനേ ॥ 12 ॥
കൃതകാര്യമിദം ദുര്ഗം വനം വ്യാലനിഷേവിതമ് ।
യദധ്യാസ്തേ മഹാതേജാ രാമ ശ്ശസ്ത്രഭൃതാം വരഃ ॥ 13 ॥
ഏവമുക്ത്വാ മഹാതേജാ ഭരതഃ പുരഷര്ഷഭഃ ।
പദ്ഭ്യാമേവ മഹാബാഹുഃ പ്രവിവേശ മഹാദ്വനമ് ॥ 14 ॥
സ താനി ദ്രുമജാലാനി ജാതാനി ഗിരിസാനുഷു ।
പുഷ്പിതാഗ്രാണി മധ്യേന ജഗാമ വദതാം വരഃ ॥ 15 ॥
സ ഗിരേശ്ചിത്രകൂടസ്യ സാലമാസാദ്യ പുഷ്പിതമ് ।
രാമാശ്രമഗതസ്യാഗ്നേര്ദദര്ശ ധ്വജമുച്ഛ്രിതമ് ॥ 16 ॥
തം ദൃഷ്ട്വാ ഭരത ശ്രീമാന്മുമോദ സഹ ബാംധവഃ ।
അത്ര രാമ ഇതി ജ്ഞാത്വാ ഗതഃ പാരമിവാംഭസഃ ॥ 17 ॥
സ ചിത്രകൂടേ തു ഗിരൌ നിശമ്യവ രാമാശ്രമം പുണ്യജനോപപന്നമ് ।
ഗുഹേന സാര്ധം ത്വരിതോ ജഗാമ പുനര്നിവേശ്യൈവ ചമൂം മഹാത്മാ ॥ 18 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അയോധ്യാകാംഡേ അഷ്ടനവതിതമസ്സര്ഗഃ ॥
