𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌅𑌷𑍍𑌟𑌨𑌵𑌤𑌿𑌤𑌮𑌸𑍍𑌸𑌰𑍍𑌗𑌃 ।
𑌨𑌿𑌵𑍇𑌶𑍍𑌯 𑌸𑍇𑌨𑌾𑌂 𑌤𑍁 𑌵𑌿𑌭𑍁𑌃 𑌪𑌦𑍍𑌭𑍍𑌯𑌾𑌂 𑌪𑌾𑌦𑌵𑌤𑌾𑌂 𑌵𑌰𑌃 ।
𑌅𑌭𑌿𑌗𑌂𑌤𑍁𑌂 𑌸 𑌕𑌾𑌕𑍁𑌤𑍍𑌥𑍍𑌸𑌮𑌿𑌯𑍇𑌷 𑌗𑍁𑌰𑍁𑌵𑌰𑍍𑌤𑌕𑌮𑍍 ॥ 1 ॥
𑌨𑌿𑌵𑌿𑌷𑍍𑌟𑌮𑌾𑌤𑍍𑌰𑍇 𑌸𑍈𑌨𑍍𑌯𑍇 𑌤𑍁 𑌯𑌥𑍋𑌦𑍍𑌦𑍇𑌶𑌂 𑌵𑌿𑌨𑍀𑌤𑌵𑌤𑍍 ।
𑌭𑌰𑌤𑍋 𑌭𑍍𑌰𑌾𑌤𑌰𑌂 𑌵𑌾𑌕𑍍𑌯𑌂 𑌶𑌤𑍍𑌰𑍁𑌘𑍍𑌨𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 2 ॥
𑌕𑍍𑌷𑌿𑌪𑍍𑌰𑌂 𑌵𑌨𑌮𑌿𑌦𑌂 𑌸𑍌𑌮𑍍𑌯 𑌨𑌰𑌸𑌂𑌘𑍈 𑌸𑍍𑌸𑌮𑌂𑌤𑌤𑌃 ।
𑌲𑍁𑌬𑍍𑌧𑍈𑌶𑍍𑌚 𑌸𑌹𑌿𑌤𑍈𑌰𑍇𑌭𑌿 𑌸𑍍𑌤𑍍𑌵𑌮𑌨𑍍𑌵𑍇𑌷𑌿𑌤𑍁𑌮𑌰𑍍𑌹𑌸𑌿 ॥ 3 ॥
𑌗𑍁𑌹𑍋 𑌜𑍍𑌞𑌾𑌤𑌿𑌸𑌹𑌸𑍍𑌰𑍇𑌣 𑌶𑌰𑌚𑌾𑌪𑌾𑌸𑌿𑌧𑌾𑌰𑌿𑌣𑌾 ।
𑌸𑌮𑌨𑍍𑌵𑍇𑌷𑌤𑍁 𑌕𑌾𑌕𑍁𑌤𑍍𑌸𑍍𑌥𑌮𑌸𑍍𑌮𑌿𑌨𑍍 𑌪𑌰𑌿𑌵𑍃𑌤𑌸𑍍𑌸𑍍𑌵𑌯𑌮𑍍 ॥ 4 ॥
𑌅𑌮𑌾𑌤𑍍𑌯𑍈 𑌸𑍍𑌸𑌹 𑌪𑍌𑌰𑍈𑌶𑍍𑌚 𑌗𑍁𑌰𑍁𑌭𑌿𑌶𑍍𑌚 𑌦𑍍𑌵𑌿𑌜𑌾𑌤𑌿𑌭𑌿𑌃 ।
𑌵𑌨𑌂 𑌸𑌰𑍍𑌵𑌂 𑌚𑌰𑌿𑌷𑍍𑌯𑌾𑌮𑌿 𑌪𑌦𑍍𑌭𑍍𑌯𑌾𑌂 𑌪𑌰𑌿𑌵𑍃𑌤 𑌸𑍍𑌸𑍍𑌵𑌯𑌮𑍍 ॥ 5 ॥
𑌯𑌾𑌵𑌨𑍍𑌨 𑌰𑌾𑌮𑌂 𑌦𑍍𑌰𑌕𑍍𑌷𑍍𑌯𑌾𑌮𑌿 𑌲𑌕𑍍𑌷𑍍𑌮𑌣𑌂 𑌵𑌾 𑌮𑌹𑌾𑌬𑌲𑌮𑍍 ।
𑌵𑍈𑌦𑍇𑌹𑍀𑌂 𑌚 𑌮𑌹𑌾𑌭𑌾𑌗𑌾𑌂 𑌨 𑌮𑍇 𑌶𑌾𑌂𑌤𑌿𑌰𑍍𑌭𑌵𑌿𑌷𑍍𑌯𑌤𑌿 ॥ 6 ॥
𑌯𑌾𑌵𑌨𑍍𑌨 𑌚𑌂𑌦𑍍𑌰𑌸𑌂𑌕𑌾𑌶𑌂 𑌦𑍍𑌰𑌕𑍍𑌷𑍍𑌯𑌾𑌮𑌿 𑌶𑍁𑌭𑌮𑌾𑌨𑌨𑌮𑍍 ।
𑌭𑍍𑌰𑌾𑌤𑍁𑌃 𑌪𑌦𑍍𑌮𑌪𑌲𑌾𑌶𑌾𑌕𑍍𑌷𑌂 𑌨 𑌮𑍇 𑌶𑌾𑌂𑌤𑌿𑌰𑍍𑌭𑌵𑌿𑌷𑍍𑌯𑌤𑌿 ॥ ॥
𑌯𑌾𑌵𑌨𑍍𑌨 𑌚𑌰𑌣𑍌 𑌭𑍍𑌰𑌾𑌤𑍁𑌃 𑌪𑌾𑌰𑍍𑌥𑌿𑌵𑌵𑍍𑌯𑌂𑌜𑌨𑌾𑌨𑍍𑌵𑌿𑌤𑍌 ।
𑌶𑌿𑌰𑌸𑌾 𑌧𑌾𑌰𑌯𑌿𑌷𑍍𑌯𑌾𑌮𑌿 𑌨 𑌮𑍇 𑌶𑌾𑌂𑌤𑌿𑌰𑍍𑌭𑌵𑌿𑌷𑍍𑌯𑌤𑌿 ॥ ॥
𑌯𑌾𑌵𑌨𑍍𑌨 𑌰𑌾𑌜𑍍𑌯𑍇 𑌰𑌾𑌜𑍍𑌯𑌾𑌰𑍍𑌹𑌃 𑌪𑌿𑌤𑍃𑌪𑍈𑌤𑌾𑌮𑌹𑍇 𑌸𑍍𑌥𑌿𑌤𑌃 ।
𑌅𑌭𑌿𑌷𑍇𑌕𑌜𑌲𑌕𑍍𑌲𑌿𑌨𑍍𑌨𑍋 𑌨 𑌮𑍇 𑌶𑌾𑌂𑌤𑌿𑌰𑍍𑌭𑌵𑌿𑌷𑍍𑌯𑌤𑌿 ॥ ॥
𑌸𑌿𑌦𑍍𑌧𑌾𑌰𑍍𑌥𑌃 𑌖𑌲𑍁 𑌸𑍌𑌮𑌿𑌤𑍍𑌰𑌿𑌰𑍍𑌯𑌶𑍍𑌚𑌂𑌦𑍍𑌰𑌵𑌿𑌮𑌲𑍋𑌪𑌮𑌮𑍍 ।
𑌮𑍁𑌖𑌂 𑌪𑌶𑍍𑌯𑌤𑌿 𑌰𑌾𑌮𑌸𑍍𑌯 𑌰𑌾𑌜𑍀𑌵𑌾𑌕𑍍𑌷𑌂 𑌮𑌹𑌾𑌦𑍍𑌯𑍁𑌤𑌿 ॥ 10 ॥
𑌕𑍃𑌤𑌕𑍃𑌤𑍍𑌯𑌾 𑌮𑌹𑌾𑌭𑌾𑌗𑌾 𑌵𑍈𑌦𑍇𑌹𑍀 𑌜𑌨𑌕𑌾𑌤𑍍𑌮𑌜𑌾 ।
𑌭𑌰𑍍𑌤𑌾𑌰𑌂 𑌸𑌾𑌗𑌰𑌾𑌂𑌤𑌾𑌯𑌾𑌃 𑌪𑍃𑌥𑌿𑌵𑍍𑌯𑌾 𑌯𑌾𑌨𑍁𑌗𑌚𑍍𑌛𑌤𑌿 ॥ 11 ॥
𑌸𑍁𑌭𑌗𑌶𑍍𑌚𑌿𑌤𑍍𑌰𑌕𑍂𑌟𑍋𑌽𑌸𑍌 𑌗𑌿𑌰𑌿𑌰𑌾𑌜𑍋𑌪𑌮𑍋 𑌗𑌿𑌰𑌿𑌃 ।
𑌯𑌸𑍍𑌮𑌿𑌨𑍍𑌵𑌸𑌤𑌿 𑌕𑌾𑌕𑍁𑌤𑍍𑌸𑍍𑌥𑌃 𑌕𑍁𑌬𑍇𑌰 𑌇𑌵 𑌨𑌂𑌦𑌨𑍇 ॥ 12 ॥
𑌕𑍃𑌤𑌕𑌾𑌰𑍍𑌯𑌮𑌿𑌦𑌂 𑌦𑍁𑌰𑍍𑌗𑌂 𑌵𑌨𑌂 𑌵𑍍𑌯𑌾𑌲𑌨𑌿𑌷𑍇𑌵𑌿𑌤𑌮𑍍 ।
𑌯𑌦𑌧𑍍𑌯𑌾𑌸𑍍𑌤𑍇 𑌮𑌹𑌾𑌤𑍇𑌜𑌾 𑌰𑌾𑌮 𑌶𑍍𑌶𑌸𑍍𑌤𑍍𑌰𑌭𑍃𑌤𑌾𑌂 𑌵𑌰𑌃 ॥ 13 ॥
𑌏𑌵𑌮𑍁𑌕𑍍𑌤𑍍𑌵𑌾 𑌮𑌹𑌾𑌤𑍇𑌜𑌾 𑌭𑌰𑌤𑌃 𑌪𑍁𑌰𑌷𑌰𑍍𑌷𑌭𑌃 ।
𑌪𑌦𑍍𑌭𑍍𑌯𑌾𑌮𑍇𑌵 𑌮𑌹𑌾𑌬𑌾𑌹𑍁𑌃 𑌪𑍍𑌰𑌵𑌿𑌵𑍇𑌶 𑌮𑌹𑌾𑌦𑍍𑌵𑌨𑌮𑍍 ॥ 14 ॥
𑌸 𑌤𑌾𑌨𑌿 𑌦𑍍𑌰𑍁𑌮𑌜𑌾𑌲𑌾𑌨𑌿 𑌜𑌾𑌤𑌾𑌨𑌿 𑌗𑌿𑌰𑌿𑌸𑌾𑌨𑍁𑌷𑍁 ।
𑌪𑍁𑌷𑍍𑌪𑌿𑌤𑌾𑌗𑍍𑌰𑌾𑌣𑌿 𑌮𑌧𑍍𑌯𑍇𑌨 𑌜𑌗𑌾𑌮 𑌵𑌦𑌤𑌾𑌂 𑌵𑌰𑌃 ॥ 15 ॥
𑌸 𑌗𑌿𑌰𑍇𑌶𑍍𑌚𑌿𑌤𑍍𑌰𑌕𑍂𑌟𑌸𑍍𑌯 𑌸𑌾𑌲𑌮𑌾𑌸𑌾𑌦𑍍𑌯 𑌪𑍁𑌷𑍍𑌪𑌿𑌤𑌮𑍍 ।
𑌰𑌾𑌮𑌾𑌶𑍍𑌰𑌮𑌗𑌤𑌸𑍍𑌯𑌾𑌗𑍍𑌨𑍇𑌰𑍍𑌦𑌦𑌰𑍍𑌶 𑌧𑍍𑌵𑌜𑌮𑍁𑌚𑍍𑌛𑍍𑌰𑌿𑌤𑌮𑍍 ॥ 16 ॥
𑌤𑌂 𑌦𑍃𑌷𑍍𑌟𑍍𑌵𑌾 𑌭𑌰𑌤 𑌶𑍍𑌰𑍀𑌮𑌾𑌨𑍍𑌮𑍁𑌮𑍋𑌦 𑌸𑌹 𑌬𑌾𑌂𑌧𑌵𑌃 ।
𑌅𑌤𑍍𑌰 𑌰𑌾𑌮 𑌇𑌤𑌿 𑌜𑍍𑌞𑌾𑌤𑍍𑌵𑌾 𑌗𑌤𑌃 𑌪𑌾𑌰𑌮𑌿𑌵𑌾𑌂𑌭𑌸𑌃 ॥ 1 ॥
𑌸 𑌚𑌿𑌤𑍍𑌰𑌕𑍂𑌟𑍇 𑌤𑍁 𑌗𑌿𑌰𑍌 𑌨𑌿𑌶𑌮𑍍𑌯𑌵 𑌰𑌾𑌮𑌾𑌶𑍍𑌰𑌮𑌂 𑌪𑍁𑌣𑍍𑌯𑌜𑌨𑍋𑌪𑌪𑌨𑍍𑌨𑌮𑍍 ।
𑌗𑍁𑌹𑍇𑌨 𑌸𑌾𑌰𑍍𑌧𑌂 𑌤𑍍𑌵𑌰𑌿𑌤𑍋 𑌜𑌗𑌾𑌮 𑌪𑍁𑌨𑌰𑍍𑌨𑌿𑌵𑍇𑌶𑍍𑌯𑍈𑌵 𑌚𑌮𑍂𑌂 𑌮𑌹𑌾𑌤𑍍𑌮𑌾 ॥ 1 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌅𑌷𑍍𑌟𑌨𑌵𑌤𑌿𑌤𑌮𑌸𑍍𑌸𑌰𑍍𑌗𑌃 ॥
