śrīmadvālmīkīya rāmāyaṇē ayōdhyākāṇḍam ।
atha aṣṭanavatitamassargaḥ ।
nivēśya sēnāṃ tu vibhuḥ padbhyāṃ pādavatāṃ varaḥ ।
abhigantuṃ sa kākutthsamiyēṣa guruvartakam ॥ 1 ॥
niviṣṭamātrē sainyē tu yathōddēśaṃ vinītavat ।
bharatō bhrātaraṃ vākyaṃ śatrughnamidamabravīt ॥ 2 ॥
kṣipraṃ vanamidaṃ saumya narasaṅghai ssamantataḥ ।
lubdhaiścha sahitairēbhi stvamanvēṣitumarhasi ॥ 3 ॥
guhō jñātisahasrēṇa śarachāpāsidhāriṇā ।
samanvēṣatu kākutsthamasmin parivṛtassvayam ॥ 4 ॥
amātyai ssaha pauraiścha gurubhiścha dvijātibhiḥ ।
vanaṃ sarvaṃ chariṣyāmi padbhyāṃ parivṛta ssvayam ॥ 5 ॥
yāvanna rāmaṃ drakṣyāmi lakṣmaṇaṃ vā mahābalam ।
vaidēhīṃ cha mahābhāgāṃ na mē śāntirbhaviṣyati ॥ 6 ॥
yāvanna chandrasaṅkāśaṃ drakṣyāmi śubhamānanam ।
bhrātuḥ padmapalāśākṣaṃ na mē śāntirbhaviṣyati ॥ 7 ॥
yāvanna charaṇau bhrātuḥ pārthivavyañjanānvitau ।
śirasā dhārayiṣyāmi na mē śāntirbhaviṣyati ॥ 8 ॥
yāvanna rājyē rājyārhaḥ pitṛpaitāmahē sthitaḥ ।
abhiṣēkajalaklinnō na mē śāntirbhaviṣyati ॥ 9 ॥
siddhārthaḥ khalu saumitriryaśchandravimalōpamam ।
mukhaṃ paśyati rāmasya rājīvākṣaṃ mahādyuti ॥ 10 ॥
kṛtakṛtyā mahābhāgā vaidēhī janakātmajā ।
bhartāraṃ sāgarāntāyāḥ pṛthivyā yānugachChati ॥ 11 ॥
subhagaśchitrakūṭō'sau girirājōpamō giriḥ ।
yasminvasati kākutsthaḥ kubēra iva nandanē ॥ 12 ॥
kṛtakāryamidaṃ durgaṃ vanaṃ vyālaniṣēvitam ।
yadadhyāstē mahātējā rāma śśastrabhṛtāṃ varaḥ ॥ 13 ॥
ēvamuktvā mahātējā bharataḥ puraṣarṣabhaḥ ।
padbhyāmēva mahābāhuḥ pravivēśa mahādvanam ॥ 14 ॥
sa tāni drumajālāni jātāni girisānuṣu ।
puṣpitāgrāṇi madhyēna jagāma vadatāṃ varaḥ ॥ 15 ॥
sa girēśchitrakūṭasya sālamāsādya puṣpitam ।
rāmāśramagatasyāgnērdadarśa dhvajamuchChritam ॥ 16 ॥
taṃ dṛṣṭvā bharata śrīmānmumōda saha bāndhavaḥ ।
atra rāma iti jñātvā gataḥ pāramivāmbhasaḥ ॥ 17 ॥
sa chitrakūṭē tu girau niśamyava rāmāśramaṃ puṇyajanōpapannam ।
guhēna sārdhaṃ tvaritō jagāma punarnivēśyaiva chamūṃ mahātmā ॥ 18 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē aṣṭanavatitamassargaḥ ॥
