ଶ୍ରୀମଦ୍ଵାଲ୍ମୀକୀୟ ରାମାୟଣେ ଅୟୋଧ୍ୟାକାଂଡମ୍ ।
ଅଥ ଅଷ୍ଟନଵତିତମସ୍ସର୍ଗଃ ।
ନିଵେଶ୍ୟ ସେନାଂ ତୁ ଵିଭୁଃ ପଦ୍ଭ୍ୟାଂ ପାଦଵତାଂ ଵରଃ ।
ଅଭିଗଂତୁଂ ସ କାକୁତ୍ଥ୍ସମିୟେଷ ଗୁରୁଵର୍ତକମ୍ ॥ 1 ॥
ନିଵିଷ୍ଟମାତ୍ରେ ସୈନ୍ୟେ ତୁ ୟଥୋଦ୍ଦେଶଂ ଵିନୀତଵତ୍ ।
ଭରତୋ ଭ୍ରାତରଂ ଵାକ୍ୟଂ ଶତ୍ରୁଘ୍ନମିଦମବ୍ରଵୀତ୍ ॥ 2 ॥
କ୍ଷିପ୍ରଂ ଵନମିଦଂ ସୌମ୍ୟ ନରସଂଘୈ ସ୍ସମଂତତଃ ।
ଲୁବ୍ଧୈଶ୍ଚ ସହିତୈରେଭି ସ୍ତ୍ଵମନ୍ଵେଷିତୁମର୍ହସି ॥ 3 ॥
ଗୁହୋ ଜ୍ଞାତିସହସ୍ରେଣ ଶରଚାପାସିଧାରିଣା ।
ସମନ୍ଵେଷତୁ କାକୁତ୍ସ୍ଥମସ୍ମିନ୍ ପରିଵୃତସ୍ସ୍ଵୟମ୍ ॥ 4 ॥
ଅମାତ୍ୟୈ ସ୍ସହ ପୌରୈଶ୍ଚ ଗୁରୁଭିଶ୍ଚ ଦ୍ଵିଜାତିଭିଃ ।
ଵନଂ ସର୍ଵଂ ଚରିଷ୍ୟାମି ପଦ୍ଭ୍ୟାଂ ପରିଵୃତ ସ୍ସ୍ଵୟମ୍ ॥ 5 ॥
ୟାଵନ୍ନ ରାମଂ ଦ୍ରକ୍ଷ୍ୟାମି ଲକ୍ଷ୍ମଣଂ ଵା ମହାବଲମ୍ ।
ଵୈଦେହୀଂ ଚ ମହାଭାଗାଂ ନ ମେ ଶାଂତିର୍ଭଵିଷ୍ୟତି ॥ 6 ॥
ୟାଵନ୍ନ ଚଂଦ୍ରସଂକାଶଂ ଦ୍ରକ୍ଷ୍ୟାମି ଶୁଭମାନନମ୍ ।
ଭ୍ରାତୁଃ ପଦ୍ମପଲାଶାକ୍ଷଂ ନ ମେ ଶାଂତିର୍ଭଵିଷ୍ୟତି ॥ 7 ॥
ୟାଵନ୍ନ ଚରଣୌ ଭ୍ରାତୁଃ ପାର୍ଥିଵଵ୍ୟଂଜନାନ୍ଵିତୌ ।
ଶିରସା ଧାରୟିଷ୍ୟାମି ନ ମେ ଶାଂତିର୍ଭଵିଷ୍ୟତି ॥ 8 ॥
ୟାଵନ୍ନ ରାଜ୍ୟେ ରାଜ୍ୟାର୍ହଃ ପିତୃପୈତାମହେ ସ୍ଥିତଃ ।
ଅଭିଷେକଜଲକ୍ଲିନ୍ନୋ ନ ମେ ଶାଂତିର୍ଭଵିଷ୍ୟତି ॥ 9 ॥
ସିଦ୍ଧାର୍ଥଃ ଖଲୁ ସୌମିତ୍ରିର୍ୟଶ୍ଚଂଦ୍ରଵିମଲୋପମମ୍ ।
ମୁଖଂ ପଶ୍ୟତି ରାମସ୍ୟ ରାଜୀଵାକ୍ଷଂ ମହାଦ୍ୟୁତି ॥ 10 ॥
କୃତକୃତ୍ୟା ମହାଭାଗା ଵୈଦେହୀ ଜନକାତ୍ମଜା ।
ଭର୍ତାରଂ ସାଗରାଂତାୟାଃ ପୃଥିଵ୍ୟା ୟାନୁଗଚ୍ଛତି ॥ 11 ॥
ସୁଭଗଶ୍ଚିତ୍ରକୂଟୋଽସୌ ଗିରିରାଜୋପମୋ ଗିରିଃ ।
ୟସ୍ମିନ୍ଵସତି କାକୁତ୍ସ୍ଥଃ କୁବେର ଇଵ ନଂଦନେ ॥ 12 ॥
କୃତକାର୍ୟମିଦଂ ଦୁର୍ଗଂ ଵନଂ ଵ୍ୟାଲନିଷେଵିତମ୍ ।
ୟଦଧ୍ୟାସ୍ତେ ମହାତେଜା ରାମ ଶ୍ଶସ୍ତ୍ରଭୃତାଂ ଵରଃ ॥ 13 ॥
ଏଵମୁକ୍ତ୍ଵା ମହାତେଜା ଭରତଃ ପୁରଷର୍ଷଭଃ ।
ପଦ୍ଭ୍ୟାମେଵ ମହାବାହୁଃ ପ୍ରଵିଵେଶ ମହାଦ୍ଵନମ୍ ॥ 14 ॥
ସ ତାନି ଦ୍ରୁମଜାଲାନି ଜାତାନି ଗିରିସାନୁଷୁ ।
ପୁଷ୍ପିତାଗ୍ରାଣି ମଧ୍ୟେନ ଜଗାମ ଵଦତାଂ ଵରଃ ॥ 15 ॥
ସ ଗିରେଶ୍ଚିତ୍ରକୂଟସ୍ୟ ସାଲମାସାଦ୍ୟ ପୁଷ୍ପିତମ୍ ।
ରାମାଶ୍ରମଗତସ୍ୟାଗ୍ନେର୍ଦଦର୍ଶ ଧ୍ଵଜମୁଚ୍ଛ୍ରିତମ୍ ॥ 16 ॥
ତଂ ଦୃଷ୍ଟ୍ଵା ଭରତ ଶ୍ରୀମାନ୍ମୁମୋଦ ସହ ବାଂଧଵଃ ।
ଅତ୍ର ରାମ ଇତି ଜ୍ଞାତ୍ଵା ଗତଃ ପାରମିଵାଂଭସଃ ॥ 17 ॥
ସ ଚିତ୍ରକୂଟେ ତୁ ଗିରୌ ନିଶମ୍ୟଵ ରାମାଶ୍ରମଂ ପୁଣ୍ୟଜନୋପପନ୍ନମ୍ ।
ଗୁହେନ ସାର୍ଧଂ ତ୍ଵରିତୋ ଜଗାମ ପୁନର୍ନିଵେଶ୍ୟୈଵ ଚମୂଂ ମହାତ୍ମା ॥ 18 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅୟୋଧ୍ୟାକାଂଡେ ଅଷ୍ଟନଵତିତମସ୍ସର୍ଗଃ ॥
