ශ්රීමද්වාල්මීකීය රාමායණේ අයෝධ්යාකාංඩම් ।
අථ අෂ්ටනවතිතමස්සර්ගඃ ।
නිවේශ්ය සේනාං තු විභුඃ පද්භ්යාං පාදවතාං වරඃ ।
අභිගංතුං ස කාකුත්ථ්සමියේෂ ගුරුවර්තකම් ॥ 1 ॥
නිවිෂ්ටමාත්රේ සෛන්යේ තු යථෝද්දේශං විනීතවත් ।
භරතෝ භ්රාතරං වාක්යං ශත්රුඝ්නමිදමබ්රවීත් ॥ 2 ॥
ක්ෂිප්රං වනමිදං සෞම්ය නරසංඝෛ ස්සමංතතඃ ।
ලුබ්ධෛශ්ච සහිතෛරේභි ස්ත්වමන්වේෂිතුමර්හසි ॥ 3 ॥
ගුහෝ ජ්ඤාතිසහස්රේණ ශරචාපාසිධාරිණා ।
සමන්වේෂතු කාකුත්ස්ථමස්මින් පරිවෘතස්ස්වයම් ॥ 4 ॥
අමාත්යෛ ස්සහ පෞරෛශ්ච ගුරුභිශ්ච ද්විජාතිභිඃ ।
වනං සර්වං චරිෂ්යාමි පද්භ්යාං පරිවෘත ස්ස්වයම් ॥ 5 ॥
යාවන්න රාමං ද්රක්ෂ්යාමි ලක්ෂ්මණං වා මහාබලම් ।
වෛදේහීං ච මහාභාගාං න මේ ශාංතිර්භවිෂ්යති ॥ 6 ॥
යාවන්න චංද්රසංකාශං ද්රක්ෂ්යාමි ශුභමානනම් ।
භ්රාතුඃ පද්මපලාශාක්ෂං න මේ ශාංතිර්භවිෂ්යති ॥ 7 ॥
යාවන්න චරණෞ භ්රාතුඃ පාර්ථිවව්යංජනාන්විතෞ ।
ශිරසා ධාරයිෂ්යාමි න මේ ශාංතිර්භවිෂ්යති ॥ 8 ॥
යාවන්න රාජ්යේ රාජ්යාර්හඃ පිතෘපෛතාමහේ ස්ථිතඃ ।
අභිෂේකජලක්ලින්නෝ න මේ ශාංතිර්භවිෂ්යති ॥ 9 ॥
සිද්ධාර්ථඃ ඛලු සෞමිත්රිර්යශ්චංද්රවිමලෝපමම් ।
මුඛං පශ්යති රාමස්ය රාජීවාක්ෂං මහාද්යුති ॥ 10 ॥
කෘතකෘත්යා මහාභාගා වෛදේහී ජනකාත්මජා ।
භර්තාරං සාගරාංතායාඃ පෘථිව්යා යානුගච්ඡති ॥ 11 ॥
සුභගශ්චිත්රකූටෝऽසෞ ගිරිරාජෝපමෝ ගිරිඃ ।
යස්මින්වසති කාකුත්ස්ථඃ කුබේර ඉව නංදනේ ॥ 12 ॥
කෘතකාර්යමිදං දුර්ගං වනං ව්යාලනිෂේවිතම් ।
යදධ්යාස්තේ මහාතේජා රාම ශ්ශස්ත්රභෘතාං වරඃ ॥ 13 ॥
ඒවමුක්ත්වා මහාතේජා භරතඃ පුරෂර්ෂභඃ ।
පද්භ්යාමේව මහාබාහුඃ ප්රවිවේශ මහාද්වනම් ॥ 14 ॥
ස තානි ද්රුමජාලානි ජාතානි ගිරිසානුෂු ।
පුෂ්පිතාග්රාණි මධ්යේන ජගාම වදතාං වරඃ ॥ 15 ॥
ස ගිරේශ්චිත්රකූටස්ය සාලමාසාද්ය පුෂ්පිතම් ।
රාමාශ්රමගතස්යාග්නේර්දදර්ශ ධ්වජමුච්ඡ්රිතම් ॥ 16 ॥
තං දෘෂ්ට්වා භරත ශ්රීමාන්මුමෝද සහ බාංධවඃ ।
අත්ර රාම ඉති ජ්ඤාත්වා ගතඃ පාරමිවාංභසඃ ॥ 17 ॥
ස චිත්රකූටේ තු ගිරෞ නිශම්යව රාමාශ්රමං පුණ්යජනෝපපන්නම් ।
ගුහේන සාර්ධං ත්වරිතෝ ජගාම පුනර්නිවේශ්යෛව චමූං මහාත්මා ॥ 18 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ අෂ්ටනවතිතමස්සර්ගඃ ॥
