શ્રીમદ્વાલ્મીકીય રામાયણે અયોધ્યાકાંડમ્ ।
અથ અષ્ટનવતિતમસ્સર્ગઃ ।
નિવેશ્ય સેનાં તુ વિભુઃ પદ્ભ્યાં પાદવતાં વરઃ ।
અભિગંતું સ કાકુત્થ્સમિયેષ ગુરુવર્તકમ્ ॥ 1 ॥
નિવિષ્ટમાત્રે સૈન્યે તુ યથોદ્દેશં વિનીતવત્ ।
ભરતો ભ્રાતરં વાક્યં શત્રુઘ્નમિદમબ્રવીત્ ॥ 2 ॥
ક્ષિપ્રં વનમિદં સૌમ્ય નરસંઘૈ સ્સમંતતઃ ।
લુબ્ધૈશ્ચ સહિતૈરેભિ સ્ત્વમન્વેષિતુમર્હસિ ॥ 3 ॥
ગુહો જ્ઞાતિસહસ્રેણ શરચાપાસિધારિણા ।
સમન્વેષતુ કાકુત્સ્થમસ્મિન્ પરિવૃતસ્સ્વયમ્ ॥ 4 ॥
અમાત્યૈ સ્સહ પૌરૈશ્ચ ગુરુભિશ્ચ દ્વિજાતિભિઃ ।
વનં સર્વં ચરિષ્યામિ પદ્ભ્યાં પરિવૃત સ્સ્વયમ્ ॥ 5 ॥
યાવન્ન રામં દ્રક્ષ્યામિ લક્ષ્મણં વા મહાબલમ્ ।
વૈદેહીં ચ મહાભાગાં ન મે શાંતિર્ભવિષ્યતિ ॥ 6 ॥
યાવન્ન ચંદ્રસંકાશં દ્રક્ષ્યામિ શુભમાનનમ્ ।
ભ્રાતુઃ પદ્મપલાશાક્ષં ન મે શાંતિર્ભવિષ્યતિ ॥ 7 ॥
યાવન્ન ચરણૌ ભ્રાતુઃ પાર્થિવવ્યંજનાન્વિતૌ ।
શિરસા ધારયિષ્યામિ ન મે શાંતિર્ભવિષ્યતિ ॥ 8 ॥
યાવન્ન રાજ્યે રાજ્યાર્હઃ પિતૃપૈતામહે સ્થિતઃ ।
અભિષેકજલક્લિન્નો ન મે શાંતિર્ભવિષ્યતિ ॥ 9 ॥
સિદ્ધાર્થઃ ખલુ સૌમિત્રિર્યશ્ચંદ્રવિમલોપમમ્ ।
મુખં પશ્યતિ રામસ્ય રાજીવાક્ષં મહાદ્યુતિ ॥ 10 ॥
કૃતકૃત્યા મહાભાગા વૈદેહી જનકાત્મજા ।
ભર્તારં સાગરાંતાયાઃ પૃથિવ્યા યાનુગચ્છતિ ॥ 11 ॥
સુભગશ્ચિત્રકૂટોઽસૌ ગિરિરાજોપમો ગિરિઃ ।
યસ્મિન્વસતિ કાકુત્સ્થઃ કુબેર ઇવ નંદને ॥ 12 ॥
કૃતકાર્યમિદં દુર્ગં વનં વ્યાલનિષેવિતમ્ ।
યદધ્યાસ્તે મહાતેજા રામ શ્શસ્ત્રભૃતાં વરઃ ॥ 13 ॥
એવમુક્ત્વા મહાતેજા ભરતઃ પુરષર્ષભઃ ।
પદ્ભ્યામેવ મહાબાહુઃ પ્રવિવેશ મહાદ્વનમ્ ॥ 14 ॥
સ તાનિ દ્રુમજાલાનિ જાતાનિ ગિરિસાનુષુ ।
પુષ્પિતાગ્રાણિ મધ્યેન જગામ વદતાં વરઃ ॥ 15 ॥
સ ગિરેશ્ચિત્રકૂટસ્ય સાલમાસાદ્ય પુષ્પિતમ્ ।
રામાશ્રમગતસ્યાગ્નેર્દદર્શ ધ્વજમુચ્છ્રિતમ્ ॥ 16 ॥
તં દૃષ્ટ્વા ભરત શ્રીમાન્મુમોદ સહ બાંધવઃ ।
અત્ર રામ ઇતિ જ્ઞાત્વા ગતઃ પારમિવાંભસઃ ॥ 17 ॥
સ ચિત્રકૂટે તુ ગિરૌ નિશમ્યવ રામાશ્રમં પુણ્યજનોપપન્નમ્ ।
ગુહેન સાર્ધં ત્વરિતો જગામ પુનર્નિવેશ્યૈવ ચમૂં મહાત્મા ॥ 18 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અયોધ્યાકાંડે અષ્ટનવતિતમસ્સર્ગઃ ॥
