ശ്രീമദ്വാല്മീകീയ രാമായണേ അരണ്യകാംഡമ് ।
അഥ അഷ്ടാദശസ്സര്ഗഃ ।
തതശ്ശൂര്പണഖാം രാമഃ കാമപാശാവപാശിതാമ് ।
സ്വച്ഛയാ ശ്ലക്ഷ്ണയാ വാചാ സ്മിതപൂർവമഥാബ്രവീത് ॥ 1 ॥
കൃതദാരോഽസ്മി ഭവതി ഭാര്യേയം ദയിതാ മമ ।
ത്വദ്വിധാനാം തു നാരീണാം സുദുഃഖാ സസപത്നതാ ॥ 2 ॥
അനുജസ്ത്വേഷ മേ ഭ്രാതാ ശീലവാന്പ്രിയദര്ശനഃ ।
ശ്രീമാനകൃതദാരശ്ച ലക്ഷ്മണോ നാമ വീര്യവാന് ॥ 3 ॥
അപൂർവീ ഭാര്യയാ ചാര്ഥീ തരുണഃ പ്രിയദര്ശനഃ ।
അനുരൂപശ്ച തേ ഭര്താ രൂപസ്യാസ്യ ഭവിഷ്യതി ॥ 4 ॥
ഏനം ഭജ വിശാലാക്ഷി ഭര്താരം ഭ്രാതരം മമ ।
അസപത്നാ വരാരോഹേ മേരുമര്കപ്രഭാ യഥാ ॥ 5 ॥
ഇതി രാമേണ സാ പ്രോക്താ രാക്ഷസീ കാമമോഹിതാ ।
വിസൃജ്യ രാമം സഹസാ തതോ ലക്ഷ്മണമബ്രവീത് ॥ 6 ॥
അസ്യ രൂപസ്യ തേ യുക്താ ഭാര്യാഹം വരവര്ണിനീ ।
മയാ സഹ സുഖം സർവാംദംഡകാന്വിചരിഷ്യസി ॥ 7 ॥
ഏവമുക്തസ്തു സൌമിത്രീ രാക്ഷസ്യാ വാക്യകോവിദഃ ।
തതശ്ശൂര്പണഖീം സ്മിത്വാ ലക്ഷ്മണോ യുക്തമബ്രവീത് ॥ 8 ॥
കഥം ദാസസ്യ മേ ദാസീ ഭാര്യാ ഭവിതുമിച്ഛസി ।
സോഽഹമാര്യേണ പരവാന്ഭ്രാത്രാ കമലവര്ണിനി ॥ 9 ॥
സമൃദ്ധാര്ഥസ്യ സിദ്ധാര്ഥാ മുദിതാമലവര്ണിനീ ।
ആര്യസ്യ ത്വം വിശാലാക്ഷി ഭാര്യാ ഭവ യവീയസീ ॥ 10 ॥
ഏനാം വിരൂപാമസതീം കരാലാം നിര്ണതോദരീമ് ।
ഭാര്യാം വൃദ്ധാം പരിത്യജ്യ ത്വാമേവൈഷ ഭജിഷ്യതി ॥ 11 ॥
കോ ഹി രൂപമിദം ശ്രേഷ്ഠം സംത്യജ്യ വരവര്ണിനി ।
മാനുഷീഷു വരാരോഹേ കുര്യാദ്ഭാവം വിചക്ഷണഃ ॥ 12 ॥
ഇതി സാ ലക്ഷ്മണേനോക്താ കരാലാ നിര്ണതോദരീ ।
മന്യതേ തദ്വചസ്തഥ്യം പരിഹാസാവിചക്ഷണാ ॥ 13 ॥
സാ രാമം പര്ണശാലായാമുപവിഷ്ടം പരംതപമ് ।
സീതയാ സഹ ദുര്ദര്ഷമബ്രവീത്കാമമോഹിതാ ॥ 14 ॥
ഏനാം വിരൂപാമസതീം കരാലാം നിര്ണതോദരീമ് ।
വൃദ്ധാം ഭാര്യാമവഷ്ടഭ്യ മാം ന ത്വം ബഹുമന്യസേ ॥ 15 ॥
അദ്യേമാം ഭക്ഷയിഷ്യാമി പശ്യതസ്തവ മാനുഷീമ് ।
ത്വയാ സഹ ചരിഷ്യാമി നിസ്സപത്നാ യഥാസുഖമ് ॥ 16 ॥
ഇത്യുക്ത്വാ മൃഗശാബാക്ഷീമലാതസദൃശേക്ഷണാ ।
അഭ്യധാവത്സുസംകൃദ്ധാ മഹോല്കാം രോഹിണീമിവ ॥ 17 ॥
താം മൃത്യുപാശപ്രതിമാമാപതംതീം മഹാബലഃ ।
നിഗൃഹ്യ രാമഃ കുപിത സ്തതോ ലക്ഷ്മണമബ്രവീത് ॥ 18 ॥
ക്രൂരൈരനാര്യൈ സ്സൌമിത്രേ പരിഹാസഃ കഥംചന ।
ന കാര്യഃ പശ്യവൈദേഹീം കഥംചിത്സൌമ്യ ജീവതീമ് ॥ 19 ॥
ഇമാം വിരൂപാമസതീമതിമത്താം മഹോദരീമ് ।
രാക്ഷസീം പുരുഷവ്യാഘ്ര വിരൂപയിതുമര്ഹസി ॥ 20 ॥
ഇത്യുക്തോ ലക്ഷ്മണസ്തസ്യാഃ ക്രുദ്ധോ രാമസ്യ പാര്ശ്വതഃ ।
ഉദ്ധൃത്യ ഖംഗം ചിച്ഛേദ കര്ണനാസം മഹാബലഃ ॥ 21 ॥
നികൃത്തകര്ണനാസാ തു വിസ്വരം സാ വിനദ്യ ച ।
യഥാഗതം പ്രദുദ്രാവ ഘോരാ ശൂര്പണഖാ വനമ് ॥ 22 ॥
സാ വിരൂപാ മഹാഘോരാ രാക്ഷസീ ശോണിതോക്ഷിതാ ।
നനാദ വിവിധാന്നാദാന്യഥാ പ്രാവൃഷി തോയദഃ ॥ 23 ॥
സാ വിക്ഷരംതീ രുധിരം ബഹുധാ ഘോരദര്ശനാ ।
പ്രഗൃഹ്യ ബാഹൂ ഗര്ജംതീ പ്രവിവേശ മഹാവനമ് ॥ 24 ॥
തതസ്തു സാ രാക്ഷസസംഘസംവൃതം ഖരം ജനസ്ഥാനഗതം വിരൂപിതാ ।
ഉപേത്യ തം ഭ്രാതരമുഗ്രദര്ശനം പപാത ഭൂമൌ ഗഗനാദ്യഥാഽശനിഃ ॥ 25 ॥
തതസ്സഭാര്യം ഭയമോഹമൂര്ഛിതാ സലക്ഷ്മണം രാഘവമാഗതം വനമ് ।
വിരൂപണം ചാത്മനി ശോണിതോക്ഷിതാ ശശംസ സർവം ഭഗിനീ ഖരസ്യ സാ ॥ 26 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ അഷ്ടാദശസ്സര്ഗഃ ॥
