ශ්රීමද්වාල්මීකීය රාමායණේ අරණ්යකාංඩම් ।
අථ අෂ්ටාදශස්සර්ගඃ ।
තතශ්ශූර්පණඛාං රාමඃ කාමපාශාවපාශිතාම් ।
ස්වච්ඡයා ශ්ලක්ෂ්ණයා වාචා ස්මිතපූර්වමථාබ්රවීත් ॥ 1 ॥
කෘතදාරෝऽස්මි භවති භාර්යේයං දයිතා මම ।
ත්වද්විධානාං තු නාරීණාං සුදුඃඛා සසපත්නතා ॥ 2 ॥
අනුජස්ත්වේෂ මේ භ්රාතා ශීලවාන්ප්රියදර්ශනඃ ।
ශ්රීමානකෘතදාරශ්ච ලක්ෂ්මණෝ නාම වීර්යවාන් ॥ 3 ॥
අපූර්වී භාර්යයා චාර්ථී තරුණඃ ප්රියදර්ශනඃ ।
අනුරූපශ්ච තේ භර්තා රූපස්යාස්ය භවිෂ්යති ॥ 4 ॥
ඒනං භජ විශාලාක්ෂි භර්තාරං භ්රාතරං මම ।
අසපත්නා වරාරෝහේ මේරුමර්කප්රභා යථා ॥ 5 ॥
ඉති රාමේණ සා ප්රෝක්තා රාක්ෂසී කාමමෝහිතා ।
විසෘජ්ය රාමං සහසා තතෝ ලක්ෂ්මණමබ්රවීත් ॥ 6 ॥
අස්ය රූපස්ය තේ යුක්තා භාර්යාහං වරවර්ණිනී ।
මයා සහ සුඛං සර්වාංදංඩකාන්විචරිෂ්යසි ॥ 7 ॥
ඒවමුක්තස්තු සෞමිත්රී රාක්ෂස්යා වාක්යකෝවිදඃ ।
තතශ්ශූර්පණඛීං ස්මිත්වා ලක්ෂ්මණෝ යුක්තමබ්රවීත් ॥ 8 ॥
කථං දාසස්ය මේ දාසී භාර්යා භවිතුමිච්ඡසි ।
සෝऽහමාර්යේණ පරවාන්භ්රාත්රා කමලවර්ණිනි ॥ 9 ॥
සමෘද්ධාර්ථස්ය සිද්ධාර්ථා මුදිතාමලවර්ණිනී ।
ආර්යස්ය ත්වං විශාලාක්ෂි භාර්යා භව යවීයසී ॥ 10 ॥
ඒනාං විරූපාමසතීං කරාලාං නිර්ණතෝදරීම් ।
භාර්යාං වෘද්ධාං පරිත්යජ්ය ත්වාමේවෛෂ භජිෂ්යති ॥ 11 ॥
කෝ හි රූපමිදං ශ්රේෂ්ඨං සංත්යජ්ය වරවර්ණිනි ।
මානුෂීෂු වරාරෝහේ කුර්යාද්භාවං විචක්ෂණඃ ॥ 12 ॥
ඉති සා ලක්ෂ්මණේනෝක්තා කරාලා නිර්ණතෝදරී ।
මන්යතේ තද්වචස්තථ්යං පරිහාසාවිචක්ෂණා ॥ 13 ॥
සා රාමං පර්ණශාලායාමුපවිෂ්ටං පරංතපම් ।
සීතයා සහ දුර්දර්ෂමබ්රවීත්කාමමෝහිතා ॥ 14 ॥
ඒනාං විරූපාමසතීං කරාලාං නිර්ණතෝදරීම් ।
වෘද්ධාං භාර්යාමවෂ්ටභ්ය මාං න ත්වං බහුමන්යසේ ॥ 15 ॥
අද්යේමාං භක්ෂයිෂ්යාමි පශ්යතස්තව මානුෂීම් ।
ත්වයා සහ චරිෂ්යාමි නිස්සපත්නා යථාසුඛම් ॥ 16 ॥
ඉත්යුක්ත්වා මෘගශාබාක්ෂීමලාතසදෘශේක්ෂණා ।
අභ්යධාවත්සුසංකෘද්ධා මහෝල්කාං රෝහිණීමිව ॥ 17 ॥
තාං මෘත්යුපාශප්රතිමාමාපතංතීං මහාබලඃ ।
නිගෘහ්ය රාමඃ කුපිත ස්තතෝ ලක්ෂ්මණමබ්රවීත් ॥ 18 ॥
ක්රූරෛරනාර්යෛ ස්සෞමිත්රේ පරිහාසඃ කථංචන ।
න කාර්යඃ පශ්යවෛදේහීං කථංචිත්සෞම්ය ජීවතීම් ॥ 19 ॥
ඉමාං විරූපාමසතීමතිමත්තාං මහෝදරීම් ।
රාක්ෂසීං පුරුෂව්යාඝ්ර විරූපයිතුමර්හසි ॥ 20 ॥
ඉත්යුක්තෝ ලක්ෂ්මණස්තස්යාඃ ක්රුද්ධෝ රාමස්ය පාර්ශ්වතඃ ।
උද්ධෘත්ය ඛංගං චිච්ඡේද කර්ණනාසං මහාබලඃ ॥ 21 ॥
නිකෘත්තකර්ණනාසා තු විස්වරං සා විනද්ය ච ।
යථාගතං ප්රදුද්රාව ඝෝරා ශූර්පණඛා වනම් ॥ 22 ॥
සා විරූපා මහාඝෝරා රාක්ෂසී ශෝණිතෝක්ෂිතා ।
නනාද විවිධාන්නාදාන්යථා ප්රාවෘෂි තෝයදඃ ॥ 23 ॥
සා වික්ෂරංතී රුධිරං බහුධා ඝෝරදර්ශනා ।
ප්රගෘහ්ය බාහූ ගර්ජංතී ප්රවිවේශ මහාවනම් ॥ 24 ॥
තතස්තු සා රාක්ෂසසංඝසංවෘතං ඛරං ජනස්ථානගතං විරූපිතා ।
උපේත්ය තං භ්රාතරමුග්රදර්ශනං පපාත භූමෞ ගගනාද්යථාऽශනිඃ ॥ 25 ॥
තතස්සභාර්යං භයමෝහමූර්ඡිතා සලක්ෂ්මණං රාඝවමාගතං වනම් ।
විරූපණං චාත්මනි ශෝණිතෝක්ෂිතා ශශංස සර්වං භගිනී ඛරස්ය සා ॥ 26 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ අෂ්ටාදශස්සර්ගඃ ॥
