ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ଅଷ୍ଟାଦଶସ୍ସର୍ଗଃ ।
ତତଶ୍ଶୂର୍ପଣଖାଂ ରାମଃ କାମପାଶାଵପାଶିତାମ୍ ।
ସ୍ଵଚ୍ଛୟା ଶ୍ଲକ୍ଷ୍ଣୟା ଵାଚା ସ୍ମିତପୂର୍ଵମଥାବ୍ରଵୀତ୍ ॥ 1 ॥
କୃତଦାରୋଽସ୍ମି ଭଵତି ଭାର୍ୟେୟଂ ଦୟିତା ମମ ।
ତ୍ଵଦ୍ଵିଧାନାଂ ତୁ ନାରୀଣାଂ ସୁଦୁଃଖା ସସପତ୍ନତା ॥ 2 ॥
ଅନୁଜସ୍ତ୍ଵେଷ ମେ ଭ୍ରାତା ଶୀଲଵାନ୍ପ୍ରିୟଦର୍ଶନଃ ।
ଶ୍ରୀମାନକୃତଦାରଶ୍ଚ ଲକ୍ଷ୍ମଣୋ ନାମ ଵୀର୍ୟଵାନ୍ ॥ 3 ॥
ଅପୂର୍ଵୀ ଭାର୍ୟୟା ଚାର୍ଥୀ ତରୁଣଃ ପ୍ରିୟଦର୍ଶନଃ ।
ଅନୁରୂପଶ୍ଚ ତେ ଭର୍ତା ରୂପସ୍ୟାସ୍ୟ ଭଵିଷ୍ୟତି ॥ 4 ॥
ଏନଂ ଭଜ ଵିଶାଲାକ୍ଷି ଭର୍ତାରଂ ଭ୍ରାତରଂ ମମ ।
ଅସପତ୍ନା ଵରାରୋହେ ମେରୁମର୍କପ୍ରଭା ୟଥା ॥ 5 ॥
ଇତି ରାମେଣ ସା ପ୍ରୋକ୍ତା ରାକ୍ଷସୀ କାମମୋହିତା ।
ଵିସୃଜ୍ୟ ରାମଂ ସହସା ତତୋ ଲକ୍ଷ୍ମଣମବ୍ରଵୀତ୍ ॥ 6 ॥
ଅସ୍ୟ ରୂପସ୍ୟ ତେ ୟୁକ୍ତା ଭାର୍ୟାହଂ ଵରଵର୍ଣିନୀ ।
ମୟା ସହ ସୁଖଂ ସର୍ଵାଂଦଂଡକାନ୍ଵିଚରିଷ୍ୟସି ॥ 7 ॥
ଏଵମୁକ୍ତସ୍ତୁ ସୌମିତ୍ରୀ ରାକ୍ଷସ୍ୟା ଵାକ୍ୟକୋଵିଦଃ ।
ତତଶ୍ଶୂର୍ପଣଖୀଂ ସ୍ମିତ୍ଵା ଲକ୍ଷ୍ମଣୋ ୟୁକ୍ତମବ୍ରଵୀତ୍ ॥ 8 ॥
କଥଂ ଦାସସ୍ୟ ମେ ଦାସୀ ଭାର୍ୟା ଭଵିତୁମିଚ୍ଛସି ।
ସୋଽହମାର୍ୟେଣ ପରଵାନ୍ଭ୍ରାତ୍ରା କମଲଵର୍ଣିନି ॥ 9 ॥
ସମୃଦ୍ଧାର୍ଥସ୍ୟ ସିଦ୍ଧାର୍ଥା ମୁଦିତାମଲଵର୍ଣିନୀ ।
ଆର୍ୟସ୍ୟ ତ୍ଵଂ ଵିଶାଲାକ୍ଷି ଭାର୍ୟା ଭଵ ୟଵୀୟସୀ ॥ 10 ॥
ଏନାଂ ଵିରୂପାମସତୀଂ କରାଲାଂ ନିର୍ଣତୋଦରୀମ୍ ।
ଭାର୍ୟାଂ ଵୃଦ୍ଧାଂ ପରିତ୍ୟଜ୍ୟ ତ୍ଵାମେଵୈଷ ଭଜିଷ୍ୟତି ॥ 11 ॥
କୋ ହି ରୂପମିଦଂ ଶ୍ରେଷ୍ଠଂ ସଂତ୍ୟଜ୍ୟ ଵରଵର୍ଣିନି ।
ମାନୁଷୀଷୁ ଵରାରୋହେ କୁର୍ୟାଦ୍ଭାଵଂ ଵିଚକ୍ଷଣଃ ॥ 12 ॥
ଇତି ସା ଲକ୍ଷ୍ମଣେନୋକ୍ତା କରାଲା ନିର୍ଣତୋଦରୀ ।
ମନ୍ୟତେ ତଦ୍ଵଚସ୍ତଥ୍ୟଂ ପରିହାସାଵିଚକ୍ଷଣା ॥ 13 ॥
ସା ରାମଂ ପର୍ଣଶାଲାୟାମୁପଵିଷ୍ଟଂ ପରଂତପମ୍ ।
ସୀତୟା ସହ ଦୁର୍ଦର୍ଷମବ୍ରଵୀତ୍କାମମୋହିତା ॥ 14 ॥
ଏନାଂ ଵିରୂପାମସତୀଂ କରାଲାଂ ନିର୍ଣତୋଦରୀମ୍ ।
ଵୃଦ୍ଧାଂ ଭାର୍ୟାମଵଷ୍ଟଭ୍ୟ ମାଂ ନ ତ୍ଵଂ ବହୁମନ୍ୟସେ ॥ 15 ॥
ଅଦ୍ୟେମାଂ ଭକ୍ଷୟିଷ୍ୟାମି ପଶ୍ୟତସ୍ତଵ ମାନୁଷୀମ୍ ।
ତ୍ଵୟା ସହ ଚରିଷ୍ୟାମି ନିସ୍ସପତ୍ନା ୟଥାସୁଖମ୍ ॥ 16 ॥
ଇତ୍ୟୁକ୍ତ୍ଵା ମୃଗଶାବାକ୍ଷୀମଲାତସଦୃଶେକ୍ଷଣା ।
ଅଭ୍ୟଧାଵତ୍ସୁସଂକୃଦ୍ଧା ମହୋଲ୍କାଂ ରୋହିଣୀମିଵ ॥ 17 ॥
ତାଂ ମୃତ୍ୟୁପାଶପ୍ରତିମାମାପତଂତୀଂ ମହାବଲଃ ।
ନିଗୃହ୍ୟ ରାମଃ କୁପିତ ସ୍ତତୋ ଲକ୍ଷ୍ମଣମବ୍ରଵୀତ୍ ॥ 18 ॥
କ୍ରୂରୈରନାର୍ୟୈ ସ୍ସୌମିତ୍ରେ ପରିହାସଃ କଥଂଚନ ।
ନ କାର୍ୟଃ ପଶ୍ୟଵୈଦେହୀଂ କଥଂଚିତ୍ସୌମ୍ୟ ଜୀଵତୀମ୍ ॥ 19 ॥
ଇମାଂ ଵିରୂପାମସତୀମତିମତ୍ତାଂ ମହୋଦରୀମ୍ ।
ରାକ୍ଷସୀଂ ପୁରୁଷଵ୍ୟାଘ୍ର ଵିରୂପୟିତୁମର୍ହସି ॥ 20 ॥
ଇତ୍ୟୁକ୍ତୋ ଲକ୍ଷ୍ମଣସ୍ତସ୍ୟାଃ କ୍ରୁଦ୍ଧୋ ରାମସ୍ୟ ପାର୍ଶ୍ଵତଃ ।
ଉଦ୍ଧୃତ୍ୟ ଖଂଗଂ ଚିଚ୍ଛେଦ କର୍ଣନାସଂ ମହାବଲଃ ॥ 21 ॥
ନିକୃତ୍ତକର୍ଣନାସା ତୁ ଵିସ୍ଵରଂ ସା ଵିନଦ୍ୟ ଚ ।
ୟଥାଗତଂ ପ୍ରଦୁଦ୍ରାଵ ଘୋରା ଶୂର୍ପଣଖା ଵନମ୍ ॥ 22 ॥
ସା ଵିରୂପା ମହାଘୋରା ରାକ୍ଷସୀ ଶୋଣିତୋକ୍ଷିତା ।
ନନାଦ ଵିଵିଧାନ୍ନାଦାନ୍ୟଥା ପ୍ରାଵୃଷି ତୋୟଦଃ ॥ 23 ॥
ସା ଵିକ୍ଷରଂତୀ ରୁଧିରଂ ବହୁଧା ଘୋରଦର୍ଶନା ।
ପ୍ରଗୃହ୍ୟ ବାହୂ ଗର୍ଜଂତୀ ପ୍ରଵିଵେଶ ମହାଵନମ୍ ॥ 24 ॥
ତତସ୍ତୁ ସା ରାକ୍ଷସସଂଘସଂଵୃତଂ ଖରଂ ଜନସ୍ଥାନଗତଂ ଵିରୂପିତା ।
ଉପେତ୍ୟ ତଂ ଭ୍ରାତରମୁଗ୍ରଦର୍ଶନଂ ପପାତ ଭୂମୌ ଗଗନାଦ୍ୟଥାଽଶନିଃ ॥ 25 ॥
ତତସ୍ସଭାର୍ୟଂ ଭୟମୋହମୂର୍ଛିତା ସଲକ୍ଷ୍ମଣଂ ରାଘଵମାଗତଂ ଵନମ୍ ।
ଵିରୂପଣଂ ଚାତ୍ମନି ଶୋଣିତୋକ୍ଷିତା ଶଶଂସ ସର୍ଵଂ ଭଗିନୀ ଖରସ୍ୟ ସା ॥ 26 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ଅଷ୍ଟାଦଶସ୍ସର୍ଗଃ ॥
