śrīmadvālmīkīya rāmāyaṇē araṇyakāṇḍam ।
atha pañchatriṃśassargaḥ ।
tataśśūrpaṇakhāvākyaṃ tachChrutvā rōmaharṣaṇam ।
sachivānabhyanujñāya kāryaṃ buddhvā jagāma ha ॥ 1 ॥
tatkāryamanugamyātha yathāvadupalabhya cha ।
dōṣāṇāṃ cha guṇānāṃ cha sampradhārya balābalam ॥ 2 ॥
iti kartavyamityēva kṛtvā niśchayamātmanaḥ ।
sthirabuddhistatō ramyāṃ yānaśālāṃ jagāma ha ॥ 3 ॥
yānaśālāṃ tatō gatvā prachChannō rākṣasādhipaḥ ।
sūtaṃ sañchōdayāmāsa rathassaṃyōjyatāmiti ॥ 4 ॥
ēvamuktaḥ kṣēṇēnaiva sārathirlaghuvikramaḥ ।
rathaṃ saṃyōjayāmāsa tasyābhimatamuttamam ॥ 5 ॥
kāñchanaṃ rathamāsthāya kāmagaṃ ratnabhūṣitam ।
piśāchavadanairyuktaṃ kharaiḥ kāñchanabhūṣaṇaiḥ ॥ 6 ॥
mēghapratimanādēna sa tēna dhanadānujaḥ ।
rākṣasādhipatiśśrīmānyayau nadanadīpatim ॥ 7 ॥
sa śvētavālavyajanaḥ śvētachChatrō daśānanaḥ ।
snigdhavaidūryasaṅkāśa staptakāñchanakuṇḍalaḥ ॥ 8 ॥
viṃśadbhujō daśagrīvō darśanīyaparichChadaḥ ।
tridaśārirmunīndraghnō daśaśīrṣa ivādrirāṭ ॥ 9 ॥
kāmagaṃ rathamāsthāya śuśubhē rākṣasēśvaraḥ ।
vidyunmaṇḍalavānmēghassabalāka ivāmbarē ॥ 10 ॥
sa śailaṃ sāgarānūpaṃ vīryavānavalōkayan ।
nānāpuṣpaphalairvṛkṣairanukīrṇaṃ sahasraśaḥ ॥ 11 ॥
śītamaṅgalatōyābhiḥ padminībhissamantataḥ ।
viśālairāśramapadairvēdimadbhissamāvṛtam ॥ 12 ॥
kadalyāḍhakisambādhaṃ nārikēlōpaśōbhitam ।
sālaistālaistamālaiścha puṣpitaistarubhirvṛtam ॥ 13 ॥
nāgaissuparṇairgandhairvaiḥ kinnaraiścha sahasraśaḥ ।
ajairvaikhānasairmāṣairvālakhilyairmarīchipaiḥ ॥ 14 ॥
atyantaniyatāhāraiśśōbhitaṃ paramarṣibhiḥ ।
jitakāmaiścha siddhaiścha chāraṇairupaśōbhitam ॥ 15 ॥
divyābharaṇamālyābhirdivyarūpābhirāvṛtam ।
krīḍāratividhijñābhirapsarōbhissahasraśaḥ ॥ 16 ॥
sēvitaṃ dēvapantībhiśśrīmatībhiśśriyā''vṛtam ।
dēvadānavasaṅghaiścha charitaṃ tvamṛtāśibhiḥ ॥ 17 ॥
haṃsakrauñchaplavākīrṇaṃ sārasaissampraṇāditam ।
vaiḍhūryaprastaraṃ ramyaṃ snigdhaṃ sāgaratējasā ॥ 18 ॥
pāṇḍurāṇi viśālāni divyamālyayutāni cha ।
tūryagītābhijuṣṭāni vimānāni samantataḥ ॥ 19 ॥
tapasā jitalōkānāṃ kāmagānyabhisampatan ।
gandharvāpsarasaśchaiva dadarśa dhanadānujaḥ ॥ 20 ॥
niryāsarasamūlānāṃ chandanānāṃ sahasraśaḥ ।
vanāni paśyansaumyāni ghrāṇatṛptikarāṇi cha ॥ 21 ॥
agarūṇāṃ cha mukhyānāṃ vanānyupavanāni cha ।
takkōlānāṃ cha jātyānāṃ phalānāṃ cha sugandhinām ॥ 22 ॥
puṣpāṇi cha tamālasya gulmāni marichasya cha ।
muktānāṃ cha samūhāni śuṣyamāṇāni tīrataḥ ॥ 23 ॥
śaṅkhānāṃ prasaraṃ chaiva pravālanichayaṃ tathā ।
kāñchanāni cha śailāni rājatāni cha sarvaśaḥ ॥ 24 ॥
prasravāṇi manōjñāni prasannāni hradāni cha ।
dhanadhānyōpapannāni strīratnaiśśōbhitāni cha ॥ 25 ॥
hastyaśvarathagāḍhāni nagarāṇyavalōkayan ।
taṃ samaṃ sarvatasnigdhaṃ mṛdusaṃsparśamārutam ।
anūpaṃ sindhurājasya dadarśa tridivōpamam ॥ 26 ॥
tatrāpaśyatsa mēghābhaṃ nyagrōdhamṛṣibhirvṛtam ॥ 27 ॥
samantādyasya tāśśākhāśśatayōjanamāyatāḥ ।
yasya hastinamādāya mahākāyaṃ cha kachChapam ॥ 28 ॥
bhakṣārthaṃ garuḍaśśākhāmājagāma mahābalaḥ ।
tasya tāṃ sahasā śākhāṃ bhārēṇa patagōttamaḥ ॥ 29 ॥
suparṇaḥ parṇabahulāṃ babhañja cha mahābalaḥ ।
tatra vaikhānasā māṣā vālakhilyā marīchipāḥ ॥ 30 ॥
ajā babhūvurdhūmrāścha saṅgatāḥ paramarṣayaḥ ।
tēṣāṃ dayārthaṃ garuḍastāṃ śākhāṃ śatayōjanām ॥ 31 ॥
jagāmādāya vēgēna tau chōbhau gajakachChapau ।
ēkapādēna dharmātmā bhakṣayitvā tadāmiṣam ॥ 32 ॥
niṣādaviṣayaṃ hatvā śākhayā patagōttamaḥ ।
praharṣamatulaṃ lēbhē mōkṣayitvā mahāmunīn ॥ 33 ॥
sa tēnaiva praharṣēṇa dviguṇīkṛtavikramaḥ ।
amṛtānayanārthaṃ vai chakāra matimānmatim ॥ 34 ॥
ayōjālāni nirmathya bhitvā ratnamayaṃ gṛham ।
mahēndrabhavanādguptamājahārāmṛtaṃ tataḥ ॥ 35 ॥
taṃ maharṣigaṇairjuṣṭaṃ suparṇakṛtalakṣaṇam ।
nāmnā subhadraṃ nyagrōdhaṃ dadarśa dhanadānujaḥ ॥ 36 ॥
taṃ tu gatvā paraṃ pāraṃ samudrasya nadīpatēḥ ।
dadarśāśramamēkāntē ramyē puṇyē vanāntarē ॥ 37 ॥
tatra kṛṣṇājinadharaṃ jaṭāvalkaladhāriṇam ।
dadarśa niyatāhāraṃ mārīchaṃ nāma rākṣasām ॥ 38 ॥
sa rāvaṇassamāgamya vidhivattēna rakṣasā ।
mārīchēnārchitō rājā sarvakāmairamānuṣaiḥ ॥ 39 ॥
taṃ svayaṃ pūjayitvā tu bhōjanēnōdakēna cha ।
arthōpahitayā vāchā mārīchō vākyamabravīt ॥ 40 ॥
kachchitsukuśalaṃ rājanlaṅkāyāṃ rākṣasēśvara ।
kēnārthēna punastvaṃ vai tūrṇamēvamihāgataḥ ॥ 41 ॥
ēvamuktō mahātējā mārīchēna sa rāvaṇaḥ ।
tataḥ paśchādidaṃ vākyamabravīdvākyakōvidaḥ ॥ 42 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē pañchatriṃśassargaḥ ॥
