ശ്രീമദ്വാല്മീകീയ രാമായണേ അരണ്യകാംഡമ് ।
അഥ പംചത്രിംശസ്സര്ഗഃ ।
തതശ്ശൂര്പണഖാവാക്യം തച്ഛ്രുത്വാ രോമഹര്ഷണമ് ।
സചിവാനഭ്യനുജ്ഞായ കാര്യം ബുദ്ധ്വാ ജഗാമ ഹ ॥ 1 ॥
തത്കാര്യമനുഗമ്യാഥ യഥാവദുപലഭ്യ ച ।
ദോഷാണാം ച ഗുണാനാം ച സംപ്രധാര്യ ബലാബലമ് ॥ 2 ॥
ഇതി കര്തവ്യമിത്യേവ കൃത്വാ നിശ്ചയമാത്മനഃ ।
സ്ഥിരബുദ്ധിസ്തതോ രമ്യാം യാനശാലാം ജഗാമ ഹ ॥ 3 ॥
യാനശാലാം തതോ ഗത്വാ പ്രച്ഛന്നോ രാക്ഷസാധിപഃ ।
സൂതം സംചോദയാമാസ രഥസ്സംയോജ്യതാമിതി ॥ 4 ॥
ഏവമുക്തഃ ക്ഷേണേനൈവ സാരഥിര്ലഘുവിക്രമഃ ।
രഥം സംയോജയാമാസ തസ്യാഭിമതമുത്തമമ് ॥ 5 ॥
കാംചനം രഥമാസ്ഥായ കാമഗം രത്നഭൂഷിതമ് ।
പിശാചവദനൈര്യുക്തം ഖരൈഃ കാംചനഭൂഷണൈഃ ॥ 6 ॥
മേഘപ്രതിമനാദേന സ തേന ധനദാനുജഃ ।
രാക്ഷസാധിപതിശ്ശ്രീമാന്യയൌ നദനദീപതിമ് ॥ 7 ॥
സ ശ്വേതവാലവ്യജനഃ ശ്വേതച്ഛത്രോ ദശാനനഃ ।
സ്നിഗ്ധവൈദൂര്യസംകാശ സ്തപ്തകാംചനകുംഡലഃ ॥ 8 ॥
വിംശദ്ഭുജോ ദശഗ്രീവോ ദര്ശനീയപരിച്ഛദഃ ।
ത്രിദശാരിര്മുനീംദ്രഘ്നോ ദശശീര്ഷ ഇവാദ്രിരാട് ॥ 9 ॥
കാമഗം രഥമാസ്ഥായ ശുശുഭേ രാക്ഷസേശ്വരഃ ।
വിദ്യുന്മംഡലവാന്മേഘസ്സബലാക ഇവാംബരേ ॥ 10 ॥
സ ശൈലം സാഗരാനൂപം വീര്യവാനവലോകയന് ।
നാനാപുഷ്പഫലൈർവൃക്ഷൈരനുകീര്ണം സഹസ്രശഃ ॥ 11 ॥
ശീതമംഗലതോയാഭിഃ പദ്മിനീഭിസ്സമംതതഃ ।
വിശാലൈരാശ്രമപദൈർവേദിമദ്ഭിസ്സമാവൃതമ് ॥ 12 ॥
കദല്യാഢകിസംബാധം നാരികേലോപശോഭിതമ് ।
സാലൈസ്താലൈസ്തമാലൈശ്ച പുഷ്പിതൈസ്തരുഭിർവൃതമ് ॥ 13 ॥
നാഗൈസ്സുപര്ണൈര്ഗംധൈർവൈഃ കിന്നരൈശ്ച സഹസ്രശഃ ।
അജൈർവൈഖാനസൈര്മാഷൈർവാലഖില്യൈര്മരീചിപൈഃ ॥ 14 ॥
അത്യംതനിയതാഹാരൈശ്ശോഭിതം പരമര്ഷിഭിഃ ।
ജിതകാമൈശ്ച സിദ്ധൈശ്ച ചാരണൈരുപശോഭിതമ് ॥ 15 ॥
ദിവ്യാഭരണമാല്യാഭിര്ദിവ്യരൂപാഭിരാവൃതമ് ।
ക്രീഡാരതിവിധിജ്ഞാഭിരപ്സരോഭിസ്സഹസ്രശഃ ॥ 16 ॥
സേവിതം ദേവപംതീഭിശ്ശ്രീമതീഭിശ്ശ്രിയാഽഽവൃതമ് ।
ദേവദാനവസംഘൈശ്ച ചരിതം ത്വമൃതാശിഭിഃ ॥ 17 ॥
ഹംസക്രൌംചപ്ലവാകീര്ണം സാരസൈസ്സംപ്രണാദിതമ് ।
വൈഢൂര്യപ്രസ്തരം രമ്യം സ്നിഗ്ധം സാഗരതേജസാ ॥ 18 ॥
പാംഡുരാണി വിശാലാനി ദിവ്യമാല്യയുതാനി ച ।
തൂര്യഗീതാഭിജുഷ്ടാനി വിമാനാനി സമംതതഃ ॥ 19 ॥
തപസാ ജിതലോകാനാം കാമഗാന്യഭിസംപതന് ।
ഗംധർവാപ്സരസശ്ചൈവ ദദര്ശ ധനദാനുജഃ ॥ 20 ॥
നിര്യാസരസമൂലാനാം ചംദനാനാം സഹസ്രശഃ ।
വനാനി പശ്യന്സൌമ്യാനി ഘ്രാണതൃപ്തികരാണി ച ॥ 21 ॥
അഗരൂണാം ച മുഖ്യാനാം വനാന്യുപവനാനി ച ।
തക്കോലാനാം ച ജാത്യാനാം ഫലാനാം ച സുഗംധിനാമ് ॥ 22 ॥
പുഷ്പാണി ച തമാലസ്യ ഗുല്മാനി മരിചസ്യ ച ।
മുക്താനാം ച സമൂഹാനി ശുഷ്യമാണാനി തീരതഃ ॥ 23 ॥
ശംഖാനാം പ്രസരം ചൈവ പ്രവാലനിചയം തഥാ ।
കാംചനാനി ച ശൈലാനി രാജതാനി ച സർവശഃ ॥ 24 ॥
പ്രസ്രവാണി മനോജ്ഞാനി പ്രസന്നാനി ഹ്രദാനി ച ।
ധനധാന്യോപപന്നാനി സ്ത്രീരത്നൈശ്ശോഭിതാനി ച ॥ 25 ॥
ഹസ്ത്യശ്വരഥഗാഢാനി നഗരാണ്യവലോകയന് ।
തം സമം സർവതസ്നിഗ്ധം മൃദുസംസ്പര്ശമാരുതമ് ।
അനൂപം സിംധുരാജസ്യ ദദര്ശ ത്രിദിവോപമമ് ॥ 26 ॥
തത്രാപശ്യത്സ മേഘാഭം ന്യഗ്രോധമൃഷിഭിർവൃതമ് ॥ 27 ॥
സമംതാദ്യസ്യ താശ്ശാഖാശ്ശതയോജനമായതാഃ ।
യസ്യ ഹസ്തിനമാദായ മഹാകായം ച കച്ഛപമ് ॥ 28 ॥
ഭക്ഷാര്ഥം ഗരുഡശ്ശാഖാമാജഗാമ മഹാബലഃ ।
തസ്യ താം സഹസാ ശാഖാം ഭാരേണ പതഗോത്തമഃ ॥ 29 ॥
സുപര്ണഃ പര്ണബഹുലാം ബഭംജ ച മഹാബലഃ ।
തത്ര വൈഖാനസാ മാഷാ വാലഖില്യാ മരീചിപാഃ ॥ 30 ॥
അജാ ബഭൂവുര്ധൂമ്രാശ്ച സംഗതാഃ പരമര്ഷയഃ ।
തേഷാം ദയാര്ഥം ഗരുഡസ്താം ശാഖാം ശതയോജനാമ് ॥ 31 ॥
ജഗാമാദായ വേഗേന തൌ ചോഭൌ ഗജകച്ഛപൌ ।
ഏകപാദേന ധര്മാത്മാ ഭക്ഷയിത്വാ തദാമിഷമ് ॥ 32 ॥
നിഷാദവിഷയം ഹത്വാ ശാഖയാ പതഗോത്തമഃ ।
പ്രഹര്ഷമതുലം ലേഭേ മോക്ഷയിത്വാ മഹാമുനീന് ॥ 33 ॥
സ തേനൈവ പ്രഹര്ഷേണ ദ്വിഗുണീകൃതവിക്രമഃ ।
അമൃതാനയനാര്ഥം വൈ ചകാര മതിമാന്മതിമ് ॥ 34 ॥
അയോജാലാനി നിര്മഥ്യ ഭിത്വാ രത്നമയം ഗൃഹമ് ।
മഹേംദ്രഭവനാദ്ഗുപ്തമാജഹാരാമൃതം തതഃ ॥ 35 ॥
തം മഹര്ഷിഗണൈര്ജുഷ്ടം സുപര്ണകൃതലക്ഷണമ് ।
നാമ്നാ സുഭദ്രം ന്യഗ്രോധം ദദര്ശ ധനദാനുജഃ ॥ 36 ॥
തം തു ഗത്വാ പരം പാരം സമുദ്രസ്യ നദീപതേഃ ।
ദദര്ശാശ്രമമേകാംതേ രമ്യേ പുണ്യേ വനാംതരേ ॥ 37 ॥
തത്ര കൃഷ്ണാജിനധരം ജടാവല്കലധാരിണമ് ।
ദദര്ശ നിയതാഹാരം മാരീചം നാമ രാക്ഷസാമ് ॥ 38 ॥
സ രാവണസ്സമാഗമ്യ വിധിവത്തേന രക്ഷസാ ।
മാരീചേനാര്ചിതോ രാജാ സർവകാമൈരമാനുഷൈഃ ॥ 39 ॥
തം സ്വയം പൂജയിത്വാ തു ഭോജനേനോദകേന ച ।
അര്ഥോപഹിതയാ വാചാ മാരീചോ വാക്യമബ്രവീത് ॥ 40 ॥
കച്ചിത്സുകുശലം രാജന്ലംകായാം രാക്ഷസേശ്വര ।
കേനാര്ഥേന പുനസ്ത്വം വൈ തൂര്ണമേവമിഹാഗതഃ ॥ 41 ॥
ഏവമുക്തോ മഹാതേജാ മാരീചേന സ രാവണഃ ।
തതഃ പശ്ചാദിദം വാക്യമബ്രവീദ്വാക്യകോവിദഃ ॥ 42 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ പംചത്രിംശസ്സര്ഗഃ ॥
