𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌪𑌂𑌚𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌤𑌤𑌶𑍍𑌶𑍂𑌰𑍍𑌪𑌣𑌖𑌾𑌵𑌾𑌕𑍍𑌯𑌂 𑌤𑌚𑍍𑌛𑍍𑌰𑍁𑌤𑍍𑌵𑌾 𑌰𑍋𑌮𑌹𑌰𑍍𑌷𑌣𑌮𑍍 ।
𑌸𑌚𑌿𑌵𑌾𑌨𑌭𑍍𑌯𑌨𑍁𑌜𑍍𑌞𑌾𑌯 𑌕𑌾𑌰𑍍𑌯𑌂 𑌬𑍁𑌦𑍍𑌧𑍍𑌵𑌾 𑌜𑌗𑌾𑌮 𑌹 ॥ 1 ॥
𑌤𑌤𑍍𑌕𑌾𑌰𑍍𑌯𑌮𑌨𑍁𑌗𑌮𑍍𑌯𑌾𑌥 𑌯𑌥𑌾𑌵𑌦𑍁𑌪𑌲𑌭𑍍𑌯 𑌚 ।
𑌦𑍋𑌷𑌾𑌣𑌾𑌂 𑌚 𑌗𑍁𑌣𑌾𑌨𑌾𑌂 𑌚 𑌸𑌂𑌪𑍍𑌰𑌧𑌾𑌰𑍍𑌯 𑌬𑌲𑌾𑌬𑌲𑌮𑍍 ॥ 2 ॥
𑌇𑌤𑌿 𑌕𑌰𑍍𑌤𑌵𑍍𑌯𑌮𑌿𑌤𑍍𑌯𑍇𑌵 𑌕𑍃𑌤𑍍𑌵𑌾 𑌨𑌿𑌶𑍍𑌚𑌯𑌮𑌾𑌤𑍍𑌮𑌨𑌃 ।
𑌸𑍍𑌥𑌿𑌰𑌬𑍁𑌦𑍍𑌧𑌿𑌸𑍍𑌤𑌤𑍋 𑌰𑌮𑍍𑌯𑌾𑌂 𑌯𑌾𑌨𑌶𑌾𑌲𑌾𑌂 𑌜𑌗𑌾𑌮 𑌹 ॥ 3 ॥
𑌯𑌾𑌨𑌶𑌾𑌲𑌾𑌂 𑌤𑌤𑍋 𑌗𑌤𑍍𑌵𑌾 𑌪𑍍𑌰𑌚𑍍𑌛𑌨𑍍𑌨𑍋 𑌰𑌾𑌕𑍍𑌷𑌸𑌾𑌧𑌿𑌪𑌃 ।
𑌸𑍂𑌤𑌂 𑌸𑌂𑌚𑍋𑌦𑌯𑌾𑌮𑌾𑌸 𑌰𑌥𑌸𑍍𑌸𑌂𑌯𑍋𑌜𑍍𑌯𑌤𑌾𑌮𑌿𑌤𑌿 ॥ 4 ॥
𑌏𑌵𑌮𑍁𑌕𑍍𑌤𑌃 𑌕𑍍𑌷𑍇𑌣𑍇𑌨𑍈𑌵 𑌸𑌾𑌰𑌥𑌿𑌰𑍍𑌲𑌘𑍁𑌵𑌿𑌕𑍍𑌰𑌮𑌃 ।
𑌰𑌥𑌂 𑌸𑌂𑌯𑍋𑌜𑌯𑌾𑌮𑌾𑌸 𑌤𑌸𑍍𑌯𑌾𑌭𑌿𑌮𑌤𑌮𑍁𑌤𑍍𑌤𑌮𑌮𑍍 ॥ 5 ॥
𑌕𑌾𑌂𑌚𑌨𑌂 𑌰𑌥𑌮𑌾𑌸𑍍𑌥𑌾𑌯 𑌕𑌾𑌮𑌗𑌂 𑌰𑌤𑍍𑌨𑌭𑍂𑌷𑌿𑌤𑌮𑍍 ।
𑌪𑌿𑌶𑌾𑌚𑌵𑌦𑌨𑍈𑌰𑍍𑌯𑍁𑌕𑍍𑌤𑌂 𑌖𑌰𑍈𑌃 𑌕𑌾𑌂𑌚𑌨𑌭𑍂𑌷𑌣𑍈𑌃 ॥ 6 ॥
𑌮𑍇𑌘𑌪𑍍𑌰𑌤𑌿𑌮𑌨𑌾𑌦𑍇𑌨 𑌸 𑌤𑍇𑌨 𑌧𑌨𑌦𑌾𑌨𑍁𑌜𑌃 ।
𑌰𑌾𑌕𑍍𑌷𑌸𑌾𑌧𑌿𑌪𑌤𑌿𑌶𑍍𑌶𑍍𑌰𑍀𑌮𑌾𑌨𑍍𑌯𑌯𑍌 𑌨𑌦𑌨𑌦𑍀𑌪𑌤𑌿𑌮𑍍 ॥ ॥
𑌸 𑌶𑍍𑌵𑍇𑌤𑌵𑌾𑌲𑌵𑍍𑌯𑌜𑌨𑌃 𑌶𑍍𑌵𑍇𑌤𑌚𑍍𑌛𑌤𑍍𑌰𑍋 𑌦𑌶𑌾𑌨𑌨𑌃 ।
𑌸𑍍𑌨𑌿𑌗𑍍𑌧𑌵𑍈𑌦𑍂𑌰𑍍𑌯𑌸𑌂𑌕𑌾𑌶 𑌸𑍍𑌤𑌪𑍍𑌤𑌕𑌾𑌂𑌚𑌨𑌕𑍁𑌂𑌡𑌲𑌃 ॥ ॥
𑌵𑌿𑌂𑌶𑌦𑍍𑌭𑍁𑌜𑍋 𑌦𑌶𑌗𑍍𑌰𑍀𑌵𑍋 𑌦𑌰𑍍𑌶𑌨𑍀𑌯𑌪𑌰𑌿𑌚𑍍𑌛𑌦𑌃 ।
𑌤𑍍𑌰𑌿𑌦𑌶𑌾𑌰𑌿𑌰𑍍𑌮𑍁𑌨𑍀𑌂𑌦𑍍𑌰𑌘𑍍𑌨𑍋 𑌦𑌶𑌶𑍀𑌰𑍍𑌷 𑌇𑌵𑌾𑌦𑍍𑌰𑌿𑌰𑌾𑌟𑍍 ॥ ॥
𑌕𑌾𑌮𑌗𑌂 𑌰𑌥𑌮𑌾𑌸𑍍𑌥𑌾𑌯 𑌶𑍁𑌶𑍁𑌭𑍇 𑌰𑌾𑌕𑍍𑌷𑌸𑍇𑌶𑍍𑌵𑌰𑌃 ।
𑌵𑌿𑌦𑍍𑌯𑍁𑌨𑍍𑌮𑌂𑌡𑌲𑌵𑌾𑌨𑍍𑌮𑍇𑌘𑌸𑍍𑌸𑌬𑌲𑌾𑌕 𑌇𑌵𑌾𑌂𑌬𑌰𑍇 ॥ 10 ॥
𑌸 𑌶𑍈𑌲𑌂 𑌸𑌾𑌗𑌰𑌾𑌨𑍂𑌪𑌂 𑌵𑍀𑌰𑍍𑌯𑌵𑌾𑌨𑌵𑌲𑍋𑌕𑌯𑌨𑍍 ।
𑌨𑌾𑌨𑌾𑌪𑍁𑌷𑍍𑌪𑌫𑌲𑍈𑌰𑍍𑌵𑍃𑌕𑍍𑌷𑍈𑌰𑌨𑍁𑌕𑍀𑌰𑍍𑌣𑌂 𑌸𑌹𑌸𑍍𑌰𑌶𑌃 ॥ 11 ॥
𑌶𑍀𑌤𑌮𑌂𑌗𑌲𑌤𑍋𑌯𑌾𑌭𑌿𑌃 𑌪𑌦𑍍𑌮𑌿𑌨𑍀𑌭𑌿𑌸𑍍𑌸𑌮𑌂𑌤𑌤𑌃 ।
𑌵𑌿𑌶𑌾𑌲𑍈𑌰𑌾𑌶𑍍𑌰𑌮𑌪𑌦𑍈𑌰𑍍𑌵𑍇𑌦𑌿𑌮𑌦𑍍𑌭𑌿𑌸𑍍𑌸𑌮𑌾𑌵𑍃𑌤𑌮𑍍 ॥ 12 ॥
𑌕𑌦𑌲𑍍𑌯𑌾𑌢𑌕𑌿𑌸𑌂𑌬𑌾𑌧𑌂 𑌨𑌾𑌰𑌿𑌕𑍇𑌲𑍋𑌪𑌶𑍋𑌭𑌿𑌤𑌮𑍍 ।
𑌸𑌾𑌲𑍈𑌸𑍍𑌤𑌾𑌲𑍈𑌸𑍍𑌤𑌮𑌾𑌲𑍈𑌶𑍍𑌚 𑌪𑍁𑌷𑍍𑌪𑌿𑌤𑍈𑌸𑍍𑌤𑌰𑍁𑌭𑌿𑌰𑍍𑌵𑍃𑌤𑌮𑍍 ॥ 13 ॥
𑌨𑌾𑌗𑍈𑌸𑍍𑌸𑍁𑌪𑌰𑍍𑌣𑍈𑌰𑍍𑌗𑌂𑌧𑍈𑌰𑍍𑌵𑍈𑌃 𑌕𑌿𑌨𑍍𑌨𑌰𑍈𑌶𑍍𑌚 𑌸𑌹𑌸𑍍𑌰𑌶𑌃 ।
𑌅𑌜𑍈𑌰𑍍𑌵𑍈𑌖𑌾𑌨𑌸𑍈𑌰𑍍𑌮𑌾𑌷𑍈𑌰𑍍𑌵𑌾𑌲𑌖𑌿𑌲𑍍𑌯𑍈𑌰𑍍𑌮𑌰𑍀𑌚𑌿𑌪𑍈𑌃 ॥ 14 ॥
𑌅𑌤𑍍𑌯𑌂𑌤𑌨𑌿𑌯𑌤𑌾𑌹𑌾𑌰𑍈𑌶𑍍𑌶𑍋𑌭𑌿𑌤𑌂 𑌪𑌰𑌮𑌰𑍍𑌷𑌿𑌭𑌿𑌃 ।
𑌜𑌿𑌤𑌕𑌾𑌮𑍈𑌶𑍍𑌚 𑌸𑌿𑌦𑍍𑌧𑍈𑌶𑍍𑌚 𑌚𑌾𑌰𑌣𑍈𑌰𑍁𑌪𑌶𑍋𑌭𑌿𑌤𑌮𑍍 ॥ 15 ॥
𑌦𑌿𑌵𑍍𑌯𑌾𑌭𑌰𑌣𑌮𑌾𑌲𑍍𑌯𑌾𑌭𑌿𑌰𑍍𑌦𑌿𑌵𑍍𑌯𑌰𑍂𑌪𑌾𑌭𑌿𑌰𑌾𑌵𑍃𑌤𑌮𑍍 ।
𑌕𑍍𑌰𑍀𑌡𑌾𑌰𑌤𑌿𑌵𑌿𑌧𑌿𑌜𑍍𑌞𑌾𑌭𑌿𑌰𑌪𑍍𑌸𑌰𑍋𑌭𑌿𑌸𑍍𑌸𑌹𑌸𑍍𑌰𑌶𑌃 ॥ 16 ॥
𑌸𑍇𑌵𑌿𑌤𑌂 𑌦𑍇𑌵𑌪𑌂𑌤𑍀𑌭𑌿𑌶𑍍𑌶𑍍𑌰𑍀𑌮𑌤𑍀𑌭𑌿𑌶𑍍𑌶𑍍𑌰𑌿𑌯𑌾𑌽𑌽𑌵𑍃𑌤𑌮𑍍 ।
𑌦𑍇𑌵𑌦𑌾𑌨𑌵𑌸𑌂𑌘𑍈𑌶𑍍𑌚 𑌚𑌰𑌿𑌤𑌂 𑌤𑍍𑌵𑌮𑍃𑌤𑌾𑌶𑌿𑌭𑌿𑌃 ॥ 1 ॥
𑌹𑌂𑌸𑌕𑍍𑌰𑍌𑌂𑌚𑌪𑍍𑌲𑌵𑌾𑌕𑍀𑌰𑍍𑌣𑌂 𑌸𑌾𑌰𑌸𑍈𑌸𑍍𑌸𑌂𑌪𑍍𑌰𑌣𑌾𑌦𑌿𑌤𑌮𑍍 ।
𑌵𑍈𑌢𑍂𑌰𑍍𑌯𑌪𑍍𑌰𑌸𑍍𑌤𑌰𑌂 𑌰𑌮𑍍𑌯𑌂 𑌸𑍍𑌨𑌿𑌗𑍍𑌧𑌂 𑌸𑌾𑌗𑌰𑌤𑍇𑌜𑌸𑌾 ॥ 1 ॥
𑌪𑌾𑌂𑌡𑍁𑌰𑌾𑌣𑌿 𑌵𑌿𑌶𑌾𑌲𑌾𑌨𑌿 𑌦𑌿𑌵𑍍𑌯𑌮𑌾𑌲𑍍𑌯𑌯𑍁𑌤𑌾𑌨𑌿 𑌚 ।
𑌤𑍂𑌰𑍍𑌯𑌗𑍀𑌤𑌾𑌭𑌿𑌜𑍁𑌷𑍍𑌟𑌾𑌨𑌿 𑌵𑌿𑌮𑌾𑌨𑌾𑌨𑌿 𑌸𑌮𑌂𑌤𑌤𑌃 ॥ 1 ॥
𑌤𑌪𑌸𑌾 𑌜𑌿𑌤𑌲𑍋𑌕𑌾𑌨𑌾𑌂 𑌕𑌾𑌮𑌗𑌾𑌨𑍍𑌯𑌭𑌿𑌸𑌂𑌪𑌤𑌨𑍍 ।
𑌗𑌂𑌧𑌰𑍍𑌵𑌾𑌪𑍍𑌸𑌰𑌸𑌶𑍍𑌚𑍈𑌵 𑌦𑌦𑌰𑍍𑌶 𑌧𑌨𑌦𑌾𑌨𑍁𑌜𑌃 ॥ 20 ॥
𑌨𑌿𑌰𑍍𑌯𑌾𑌸𑌰𑌸𑌮𑍂𑌲𑌾𑌨𑌾𑌂 𑌚𑌂𑌦𑌨𑌾𑌨𑌾𑌂 𑌸𑌹𑌸𑍍𑌰𑌶𑌃 ।
𑌵𑌨𑌾𑌨𑌿 𑌪𑌶𑍍𑌯𑌨𑍍𑌸𑍌𑌮𑍍𑌯𑌾𑌨𑌿 𑌘𑍍𑌰𑌾𑌣𑌤𑍃𑌪𑍍𑌤𑌿𑌕𑌰𑌾𑌣𑌿 𑌚 ॥ 21 ॥
𑌅𑌗𑌰𑍂𑌣𑌾𑌂 𑌚 𑌮𑍁𑌖𑍍𑌯𑌾𑌨𑌾𑌂 𑌵𑌨𑌾𑌨𑍍𑌯𑍁𑌪𑌵𑌨𑌾𑌨𑌿 𑌚 ।
𑌤𑌕𑍍𑌕𑍋𑌲𑌾𑌨𑌾𑌂 𑌚 𑌜𑌾𑌤𑍍𑌯𑌾𑌨𑌾𑌂 𑌫𑌲𑌾𑌨𑌾𑌂 𑌚 𑌸𑍁𑌗𑌂𑌧𑌿𑌨𑌾𑌮𑍍 ॥ 22 ॥
𑌪𑍁𑌷𑍍𑌪𑌾𑌣𑌿 𑌚 𑌤𑌮𑌾𑌲𑌸𑍍𑌯 𑌗𑍁𑌲𑍍𑌮𑌾𑌨𑌿 𑌮𑌰𑌿𑌚𑌸𑍍𑌯 𑌚 ।
𑌮𑍁𑌕𑍍𑌤𑌾𑌨𑌾𑌂 𑌚 𑌸𑌮𑍂𑌹𑌾𑌨𑌿 𑌶𑍁𑌷𑍍𑌯𑌮𑌾𑌣𑌾𑌨𑌿 𑌤𑍀𑌰𑌤𑌃 ॥ 23 ॥
𑌶𑌂𑌖𑌾𑌨𑌾𑌂 𑌪𑍍𑌰𑌸𑌰𑌂 𑌚𑍈𑌵 𑌪𑍍𑌰𑌵𑌾𑌲𑌨𑌿𑌚𑌯𑌂 𑌤𑌥𑌾 ।
𑌕𑌾𑌂𑌚𑌨𑌾𑌨𑌿 𑌚 𑌶𑍈𑌲𑌾𑌨𑌿 𑌰𑌾𑌜𑌤𑌾𑌨𑌿 𑌚 𑌸𑌰𑍍𑌵𑌶𑌃 ॥ 24 ॥
𑌪𑍍𑌰𑌸𑍍𑌰𑌵𑌾𑌣𑌿 𑌮𑌨𑍋𑌜𑍍𑌞𑌾𑌨𑌿 𑌪𑍍𑌰𑌸𑌨𑍍𑌨𑌾𑌨𑌿 𑌹𑍍𑌰𑌦𑌾𑌨𑌿 𑌚 ।
𑌧𑌨𑌧𑌾𑌨𑍍𑌯𑍋𑌪𑌪𑌨𑍍𑌨𑌾𑌨𑌿 𑌸𑍍𑌤𑍍𑌰𑍀𑌰𑌤𑍍𑌨𑍈𑌶𑍍𑌶𑍋𑌭𑌿𑌤𑌾𑌨𑌿 𑌚 ॥ 25 ॥
𑌹𑌸𑍍𑌤𑍍𑌯𑌶𑍍𑌵𑌰𑌥𑌗𑌾𑌢𑌾𑌨𑌿 𑌨𑌗𑌰𑌾𑌣𑍍𑌯𑌵𑌲𑍋𑌕𑌯𑌨𑍍 ।
𑌤𑌂 𑌸𑌮𑌂 𑌸𑌰𑍍𑌵𑌤𑌸𑍍𑌨𑌿𑌗𑍍𑌧𑌂 𑌮𑍃𑌦𑍁𑌸𑌂𑌸𑍍𑌪𑌰𑍍𑌶𑌮𑌾𑌰𑍁𑌤𑌮𑍍 ।
𑌅𑌨𑍂𑌪𑌂 𑌸𑌿𑌂𑌧𑍁𑌰𑌾𑌜𑌸𑍍𑌯 𑌦𑌦𑌰𑍍𑌶 𑌤𑍍𑌰𑌿𑌦𑌿𑌵𑍋𑌪𑌮𑌮𑍍 ॥ 26 ॥
𑌤𑌤𑍍𑌰𑌾𑌪𑌶𑍍𑌯𑌤𑍍𑌸 𑌮𑍇𑌘𑌾𑌭𑌂 𑌨𑍍𑌯𑌗𑍍𑌰𑍋𑌧𑌮𑍃𑌷𑌿𑌭𑌿𑌰𑍍𑌵𑍃𑌤𑌮𑍍 ॥ 2 ॥
𑌸𑌮𑌂𑌤𑌾𑌦𑍍𑌯𑌸𑍍𑌯 𑌤𑌾𑌶𑍍𑌶𑌾𑌖𑌾𑌶𑍍𑌶𑌤𑌯𑍋𑌜𑌨𑌮𑌾𑌯𑌤𑌾𑌃 ।
𑌯𑌸𑍍𑌯 𑌹𑌸𑍍𑌤𑌿𑌨𑌮𑌾𑌦𑌾𑌯 𑌮𑌹𑌾𑌕𑌾𑌯𑌂 𑌚 𑌕𑌚𑍍𑌛𑌪𑌮𑍍 ॥ 2 ॥
𑌭𑌕𑍍𑌷𑌾𑌰𑍍𑌥𑌂 𑌗𑌰𑍁𑌡𑌶𑍍𑌶𑌾𑌖𑌾𑌮𑌾𑌜𑌗𑌾𑌮 𑌮𑌹𑌾𑌬𑌲𑌃 ।
𑌤𑌸𑍍𑌯 𑌤𑌾𑌂 𑌸𑌹𑌸𑌾 𑌶𑌾𑌖𑌾𑌂 𑌭𑌾𑌰𑍇𑌣 𑌪𑌤𑌗𑍋𑌤𑍍𑌤𑌮𑌃 ॥ 2 ॥
𑌸𑍁𑌪𑌰𑍍𑌣𑌃 𑌪𑌰𑍍𑌣𑌬𑌹𑍁𑌲𑌾𑌂 𑌬𑌭𑌂𑌜 𑌚 𑌮𑌹𑌾𑌬𑌲𑌃 ।
𑌤𑌤𑍍𑌰 𑌵𑍈𑌖𑌾𑌨𑌸𑌾 𑌮𑌾𑌷𑌾 𑌵𑌾𑌲𑌖𑌿𑌲𑍍𑌯𑌾 𑌮𑌰𑍀𑌚𑌿𑌪𑌾𑌃 ॥ 30 ॥
𑌅𑌜𑌾 𑌬𑌭𑍂𑌵𑍁𑌰𑍍𑌧𑍂𑌮𑍍𑌰𑌾𑌶𑍍𑌚 𑌸𑌂𑌗𑌤𑌾𑌃 𑌪𑌰𑌮𑌰𑍍𑌷𑌯𑌃 ।
𑌤𑍇𑌷𑌾𑌂 𑌦𑌯𑌾𑌰𑍍𑌥𑌂 𑌗𑌰𑍁𑌡𑌸𑍍𑌤𑌾𑌂 𑌶𑌾𑌖𑌾𑌂 𑌶𑌤𑌯𑍋𑌜𑌨𑌾𑌮𑍍 ॥ 31 ॥
𑌜𑌗𑌾𑌮𑌾𑌦𑌾𑌯 𑌵𑍇𑌗𑍇𑌨 𑌤𑍌 𑌚𑍋𑌭𑍌 𑌗𑌜𑌕𑌚𑍍𑌛𑌪𑍌 ।
𑌏𑌕𑌪𑌾𑌦𑍇𑌨 𑌧𑌰𑍍𑌮𑌾𑌤𑍍𑌮𑌾 𑌭𑌕𑍍𑌷𑌯𑌿𑌤𑍍𑌵𑌾 𑌤𑌦𑌾𑌮𑌿𑌷𑌮𑍍 ॥ 32 ॥
𑌨𑌿𑌷𑌾𑌦𑌵𑌿𑌷𑌯𑌂 𑌹𑌤𑍍𑌵𑌾 𑌶𑌾𑌖𑌯𑌾 𑌪𑌤𑌗𑍋𑌤𑍍𑌤𑌮𑌃 ।
𑌪𑍍𑌰𑌹𑌰𑍍𑌷𑌮𑌤𑍁𑌲𑌂 𑌲𑍇𑌭𑍇 𑌮𑍋𑌕𑍍𑌷𑌯𑌿𑌤𑍍𑌵𑌾 𑌮𑌹𑌾𑌮𑍁𑌨𑍀𑌨𑍍 ॥ 33 ॥
𑌸 𑌤𑍇𑌨𑍈𑌵 𑌪𑍍𑌰𑌹𑌰𑍍𑌷𑍇𑌣 𑌦𑍍𑌵𑌿𑌗𑍁𑌣𑍀𑌕𑍃𑌤𑌵𑌿𑌕𑍍𑌰𑌮𑌃 ।
𑌅𑌮𑍃𑌤𑌾𑌨𑌯𑌨𑌾𑌰𑍍𑌥𑌂 𑌵𑍈 𑌚𑌕𑌾𑌰 𑌮𑌤𑌿𑌮𑌾𑌨𑍍𑌮𑌤𑌿𑌮𑍍 ॥ 34 ॥
𑌅𑌯𑍋𑌜𑌾𑌲𑌾𑌨𑌿 𑌨𑌿𑌰𑍍𑌮𑌥𑍍𑌯 𑌭𑌿𑌤𑍍𑌵𑌾 𑌰𑌤𑍍𑌨𑌮𑌯𑌂 𑌗𑍃𑌹𑌮𑍍 ।
𑌮𑌹𑍇𑌂𑌦𑍍𑌰𑌭𑌵𑌨𑌾𑌦𑍍𑌗𑍁𑌪𑍍𑌤𑌮𑌾𑌜𑌹𑌾𑌰𑌾𑌮𑍃𑌤𑌂 𑌤𑌤𑌃 ॥ 35 ॥
𑌤𑌂 𑌮𑌹𑌰𑍍𑌷𑌿𑌗𑌣𑍈𑌰𑍍𑌜𑍁𑌷𑍍𑌟𑌂 𑌸𑍁𑌪𑌰𑍍𑌣𑌕𑍃𑌤𑌲𑌕𑍍𑌷𑌣𑌮𑍍 ।
𑌨𑌾𑌮𑍍𑌨𑌾 𑌸𑍁𑌭𑌦𑍍𑌰𑌂 𑌨𑍍𑌯𑌗𑍍𑌰𑍋𑌧𑌂 𑌦𑌦𑌰𑍍𑌶 𑌧𑌨𑌦𑌾𑌨𑍁𑌜𑌃 ॥ 36 ॥
𑌤𑌂 𑌤𑍁 𑌗𑌤𑍍𑌵𑌾 𑌪𑌰𑌂 𑌪𑌾𑌰𑌂 𑌸𑌮𑍁𑌦𑍍𑌰𑌸𑍍𑌯 𑌨𑌦𑍀𑌪𑌤𑍇𑌃 ।
𑌦𑌦𑌰𑍍𑌶𑌾𑌶𑍍𑌰𑌮𑌮𑍇𑌕𑌾𑌂𑌤𑍇 𑌰𑌮𑍍𑌯𑍇 𑌪𑍁𑌣𑍍𑌯𑍇 𑌵𑌨𑌾𑌂𑌤𑌰𑍇 ॥ 3 ॥
𑌤𑌤𑍍𑌰 𑌕𑍃𑌷𑍍𑌣𑌾𑌜𑌿𑌨𑌧𑌰𑌂 𑌜𑌟𑌾𑌵𑌲𑍍𑌕𑌲𑌧𑌾𑌰𑌿𑌣𑌮𑍍 ।
𑌦𑌦𑌰𑍍𑌶 𑌨𑌿𑌯𑌤𑌾𑌹𑌾𑌰𑌂 𑌮𑌾𑌰𑍀𑌚𑌂 𑌨𑌾𑌮 𑌰𑌾𑌕𑍍𑌷𑌸𑌾𑌮𑍍 ॥ 3 ॥
𑌸 𑌰𑌾𑌵𑌣𑌸𑍍𑌸𑌮𑌾𑌗𑌮𑍍𑌯 𑌵𑌿𑌧𑌿𑌵𑌤𑍍𑌤𑍇𑌨 𑌰𑌕𑍍𑌷𑌸𑌾 ।
𑌮𑌾𑌰𑍀𑌚𑍇𑌨𑌾𑌰𑍍𑌚𑌿𑌤𑍋 𑌰𑌾𑌜𑌾 𑌸𑌰𑍍𑌵𑌕𑌾𑌮𑍈𑌰𑌮𑌾𑌨𑍁𑌷𑍈𑌃 ॥ 3 ॥
𑌤𑌂 𑌸𑍍𑌵𑌯𑌂 𑌪𑍂𑌜𑌯𑌿𑌤𑍍𑌵𑌾 𑌤𑍁 𑌭𑍋𑌜𑌨𑍇𑌨𑍋𑌦𑌕𑍇𑌨 𑌚 ।
𑌅𑌰𑍍𑌥𑍋𑌪𑌹𑌿𑌤𑌯𑌾 𑌵𑌾𑌚𑌾 𑌮𑌾𑌰𑍀𑌚𑍋 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ॥ 40 ॥
𑌕𑌚𑍍𑌚𑌿𑌤𑍍𑌸𑍁𑌕𑍁𑌶𑌲𑌂 𑌰𑌾𑌜𑌨𑍍𑌲𑌂𑌕𑌾𑌯𑌾𑌂 𑌰𑌾𑌕𑍍𑌷𑌸𑍇𑌶𑍍𑌵𑌰 ।
𑌕𑍇𑌨𑌾𑌰𑍍𑌥𑍇𑌨 𑌪𑍁𑌨𑌸𑍍𑌤𑍍𑌵𑌂 𑌵𑍈 𑌤𑍂𑌰𑍍𑌣𑌮𑍇𑌵𑌮𑌿𑌹𑌾𑌗𑌤𑌃 ॥ 41 ॥
𑌏𑌵𑌮𑍁𑌕𑍍𑌤𑍋 𑌮𑌹𑌾𑌤𑍇𑌜𑌾 𑌮𑌾𑌰𑍀𑌚𑍇𑌨 𑌸 𑌰𑌾𑌵𑌣𑌃 ।
𑌤𑌤𑌃 𑌪𑌶𑍍𑌚𑌾𑌦𑌿𑌦𑌂 𑌵𑌾𑌕𑍍𑌯𑌮𑌬𑍍𑌰𑌵𑍀𑌦𑍍𑌵𑌾𑌕𑍍𑌯𑌕𑍋𑌵𑌿𑌦𑌃 ॥ 42 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌪𑌂𑌚𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥
