ஶ்ரீமத்³வால்மீகீய ராமாயணே ஸுந்த³ரகாண்ட³ம் ।
அத² த்³வாத³ஶஸ்ஸர்க:³ ।
ஸ தஸ்ய மத்⁴யே ப⁴வனஸ்ய மாருதி ர்லதாக்³ருஹாம்ஶ்சித்ரக்³ருஹான்னிஶாக்³ருஹான் ।
ஜகா³ம ஸீதாம் ப்ரதி த³ர்ஶனோத்ஸுகோ ந சைவ தாம் பஶ்யதி சாருத³ர்ஶனாம் ॥ 1 ॥
ஸ சிந்தயாமாஸ ததோ மஹாகபி: ப்ரியாமபஶ்யன்ரகு⁴னந்த³னஸ்ய தாம் ।
த்⁴ருவம் ஹி ஸீதா ம்ரியதே யதா² ந மே விசின்வதோ த³ர்ஶனமேதி மைதி²லீ ॥ 2 ॥
ஸா ராக்ஷஸானாம் ப்ரவரேண ஜானகீ ஸ்வஶீலஸம்ரக்ஷ்ணதத்பரா ஸதீ ।
அனேன நூனம் ப்ரதி து³ஷ்டகர்மணா ஹதா ப⁴வேதா³ர்யபதே² பரே ஸ்தி²தா ॥ 3 ॥
விரூபரூபா விக்ருதா விவர்சஸோ மஹானநா தீ³ர்க⁴விரூபத³ர்ஶனா: ।
ஸமீக்ஷ்ய ஸா ராக்ஷஸராஜயோஷிதோ ப⁴யாத்³வினஷ்டா ஜனகேஶ்வராத்மஜா ॥ 4 ॥
ஸீதாமத்³ருஷ்ட்வா ஹ்யனவாப்ய பௌருஷம் விஹ்ருத்ய காலம் ஸஹ வானரைஶ்சிரம் ।
ந மேஸ்தி ஸுக்³ரீவஸமீபகா³ க³தி: ஸுதீக்ஷ்ணத³ண்டோ³ ப³லவாம்ஶ்ச வானர: ॥ 5 ॥
த்³ருஷ்டமந்த:புரம் ஸர்வம் த்³ருஷ்டா ராவணயோஷித: ।
ந ஸீதா த்³ருஶ்யதே ஸாத்⁴வீவ்ருதா² ஜாதோ மம ஶ்ரம: ॥ 6 ॥
கிம் நு மாம் வானரா: ஸர்வே க³தம் வக்ஷ்யந்தி ஸங்க³தா: ।
க³த்வா தத்ர த்வயா வீர கிம் க்ருதம் தத்³வத³ஸ்வ ந: ॥ 7 ॥
அத்³ருஷ்ட்வா கிம் ப்ரவக்ஷ்யாமி தாமஹம் ஜனகாத்மஜாம் ।
த்⁴ருவம் ப்ராயமுபைஷ்யந்தி காலஸ்ய வ்யதிவர்தனே ॥ 8 ॥
கிம் வா வக்ஷ்யதி வ்ருத்³த⁴ஶ்ச ஜாம்ப³வானாங்க³த³ஶ்ச ஸ: ।
க³தம் பாரம் ஸமுத்³ரஸ்ய வானராஶ்ச ஸமாக³தா: ॥ 9 ॥
அனிர்வேத:³ ஶ்ரியோ மூலமனிர்வேத:³ பரம் ஸுக²ம் ।
அனிர்வேதோ³ ஹி ஸததம் ஸர்வார்தே²ஷு ப்ரவர்தக: ॥ 1௦ ॥
கரோதி ஸப²லம் ஜந்தோ: கர்ம யத்தத்கரோதி ஸ: ।
தஸ்மாத³னிர்வேத³க்ருதம் யத்னம் சேஷ்டேஹமுத்தமம் ॥ 11 ॥
பூ⁴யஸ்தாவத்³விசேஷ்யாமி தே³ஶான்ராவணபாலிதான் ।
ஆபானஶாலா விசிதாஸ்ததா² புஷ்பக்³ருஹாணி ச ॥ 12 ॥
சித்ரஶாலாஶ்ச விசிதா பூ⁴ய: க்ரீடா³க்³ருஹாணி ச ।
நிஷ்குடாந்தரரத்²யாஶ்ச விமானானி ச ஸர்வஶ: ॥ 13 ॥
இதி ஸஞ்சிந்த்ய பூ⁴யோபி விசேதுமுபசக்ரமே ।
பூ⁴மீக்³ருஹாம்ஶ்சைத்யக்³ருஹான் க்³ருஹாதிக்³ருஹகானபி ॥ 14 ॥
உத்பதன்னிஷ்பதம்ஶ்சாபி திஷ்ட²ன்க³ச்ச²ன் புன: புன: ।
அபாவ்ருண்வம்ஶ்ச த்³வாராணி கவாடான்யவகா⁴டயன் ॥ 15 ॥
ப்ரவிஶன்னிஷ்பதம்ஶ்சாபி ப்ரபதன்னுத்பதன்னபி ।
ஸர்வமப்யவகாஶம் ஸ விசசார மஹாகபி: ॥ 16 ॥
சதுரங்கு³லமாத்ரோபி நாவகாஶ: ஸ வித்³யதே ।
ராவணாந்த:புரே தஸ்மின் யம் கபிர்ன ஜகா³ம ஸ: ॥ 17 ॥
ப்ராகாராந்தரரத்²யாஶ்ச வேதி³காஶ்சைத்யஸம்ஶ்ரயா: ।
தீ³ர்கி⁴கா: புஷ்கரிண்யஶ்ச ஸர்வம் தேனாவலோகிதம் ॥ 18 ॥
ராக்ஷஸ்யோ விவிதா⁴காரா விரூபா விக்ருதாஸ்ததா² ।
த்³ருஷ்டா ஹனுமதா தத்ர ந து ஸா ஜனகாத்மஜா ॥ 19 ॥
ரூபேணாப்ரதிமா லோகே வரா வித்³யாத⁴ரஸ்த்ரிய: ।
த்³ருஷ்டா ஹனுமதா தத்ர ந து ராக⁴வனந்தி³னீ ॥ 2௦ ॥
நாக³கன்யா வராரோஹா: பூர்ணசன்ர்த³னிபா⁴னநா: ।
த்³ருஷ்டா ஹனுமதா தத்ர ந து ஸீதா ஸுமத்⁴யமா ॥ 21 ॥
ப்ரமத்²ய ராக்ஷஸேந்த்³ரேண நாக³கன்யா ப³லாத்³த்⁴ருதா: ।
த்³ருஷ்டா ஹனுமதா தத்ர ந ஸா ஜனகனந்தி³னீ ॥ 22 ॥
ஸோபஶ்யம்ஸ்தாம் மஹாபா³ஹு: பஶ்யம்ஶ்சான்யா வரஸ்த்ரிய: ।
விஷஸாத³ முஹுர்தீ⁴மான் ஹனுமான் மாருதாத்மஜ: ॥ 23 ॥
உத்³யோக³ம் வானரேந்த்³ராணாம் ப்லவனம் ஸாக³ரஸ்ய ச ।
வ்யர்த²ம் வீக்ஷ்யானிலஸுதஶ்சிந்தாம் புனருபாக³மத் ॥ 24 ॥
அவதீர்ய விமானாச்ச ஹனுமான் மாருதாத்மஜ: ।
சிந்தாமுபஜகா³மாத² ஶோகோபஹதசேதன: ॥ 25 ॥
இத்யார்ஷே ஶ்ரீமத்³ராமாயணே வால்மீகீய ஆதி³காவ்யே ஸுந்த³ரகாண்டே³ த்³வாத³ஶஸ்ஸர்க:³ ॥
