ශ්රීමද්වාල්මීකීය රාමායණේ සුංදරකාංඩම් ।
අථ ද්වාදශස්සර්ගඃ ।
ස තස්ය මධ්යේ භවනස්ය මාරුති ර්ලතාගෘහාංශ්චිත්රගෘහාන්නිශාගෘහාන් ।
ජගාම සීතාං ප්රති දර්ශනෝත්සුකෝ න චෛව තාං පශ්යති චාරුදර්ශනාම් ॥ 1 ॥
ස චිංතයාමාස තතෝ මහාකපිඃ ප්රියාමපශ්යන්රඝුනංදනස්ය තාම් ।
ධ්රුවං හි සීතා ම්රියතේ යථා න මේ විචින්වතෝ දර්ශනමේති මෛථිලී ॥ 2 ॥
සා රාක්ෂසානාං ප්රවරේණ ජානකී ස්වශීලසංරක්ෂ්ණතත්පරා සතී ।
අනේන නූනං ප්රති දුෂ්ටකර්මණා හතා භවේදාර්යපථේ පරේ ස්ථිතා ॥ 3 ॥
විරූපරූපා විකෘතා විවර්චසෝ මහානනා දීර්ඝවිරූපදර්ශනාඃ ।
සමීක්ෂ්ය සා රාක්ෂසරාජයෝෂිතෝ භයාද්විනෂ්ටා ජනකේශ්වරාත්මජා ॥ 4 ॥
සීතාමදෘෂ්ට්වා හ්යනවාප්ය පෞරුෂං විහෘත්ය කාලං සහ වානරෛශ්චිරම් ।
න මේऽස්ති සුග්රීවසමීපගා ගතිඃ සුතීක්ෂ්ණදංඩෝ බලවාංශ්ච වානරඃ ॥ 5 ॥
දෘෂ්ටමංතඃපුරං සර්වං දෘෂ්ටා රාවණයෝෂිතඃ ।
න සීතා දෘශ්යතේ සාධ්වීවෘථා ජාතෝ මම ශ්රමඃ ॥ 6 ॥
කිං නු මාං වානරාඃ සර්වේ ගතං වක්ෂ්යංති සංගතාඃ ।
ගත්වා තත්ර ත්වයා වීර කිං කෘතං තද්වදස්ව නඃ ॥ 7 ॥
අදෘෂ්ට්වා කිං ප්රවක්ෂ්යාමි තාමහං ජනකාත්මජාම් ।
ධ්රුවං ප්රායමුපෛෂ්යංති කාලස්ය ව්යතිවර්තනේ ॥ 8 ॥
කිං වා වක්ෂ්යති වෘද්ධශ්ච ජාංබවානාංගදශ්ච සඃ ।
ගතං පාරං සමුද්රස්ය වානරාශ්ච සමාගතාඃ ॥ 9 ॥
අනිර්වේදඃ ශ්රියෝ මූලමනිර්වේදඃ පරං සුඛම් ।
අනිර්වේදෝ හි සතතං සර්වාර්ථේෂු ප්රවර්තකඃ ॥ 10 ॥
කරෝති සඵලං ජංතෝඃ කර්ම යත්තත්කරෝති සඃ ।
තස්මාදනිර්වේදකෘතං යත්නං චේෂ්ටේऽහමුත්තමම් ॥ 11 ॥
භූයස්තාවද්විචේෂ්යාමි දේශාන්රාවණපාලිතාන් ।
ආපානශාලා විචිතාස්තථා පුෂ්පගෘහාණි ච ॥ 12 ॥
චිත්රශාලාශ්ච විචිතා භූයඃ ක්රීඩාගෘහාණි ච ।
නිෂ්කුටාංතරරථ්යාශ්ච විමානානි ච සර්වශඃ ॥ 13 ॥
ඉති සංචිංත්ය භූයෝऽපි විචේතුමුපචක්රමේ ।
භූමීගෘහාංශ්චෛත්යගෘහාන් ගෘහාතිගෘහකානපි ॥ 14 ॥
උත්පතන්නිෂ්පතංශ්චාපි තිෂ්ඨන්ගච්ඡන් පුනඃ පුනඃ ।
අපාවෘණ්වංශ්ච ද්වාරාණි කවාටාන්යවඝාටයන් ॥ 15 ॥
ප්රවිශන්නිෂ්පතංශ්චාපි ප්රපතන්නුත්පතන්නපි ।
සර්වමප්යවකාශං ස විචචාර මහාකපිඃ ॥ 16 ॥
චතුරංගුලමාත්රෝऽපි නාවකාශඃ ස විද්යතේ ।
රාවණාංතඃපුරේ තස්මින් යං කපිර්න ජගාම සඃ ॥ 17 ॥
ප්රාකාරාංතරරථ්යාශ්ච වේදිකාශ්චෛත්යසංශ්රයාඃ ।
දීර්ඝිකාඃ පුෂ්කරිණ්යශ්ච සර්වං තේනාවලෝකිතම් ॥ 18 ॥
රාක්ෂස්යෝ විවිධාකාරා විරූපා විකෘතාස්තථා ।
දෘෂ්ටා හනුමතා තත්ර න තු සා ජනකාත්මජා ॥ 19 ॥
රූපේණාප්රතිමා ලෝකේ වරා විද්යාධරස්ත්රියඃ ।
දෘෂ්ටා හනුමතා තත්ර න තු රාඝවනංදිනී ॥ 20 ॥
නාගකන්යා වරාරෝහාඃ පූර්ණචන්ර්දනිභානනාඃ ।
දෘෂ්ටා හනුමතා තත්ර න තු සීතා සුමධ්යමා ॥ 21 ॥
ප්රමථ්ය රාක්ෂසේංද්රේණ නාගකන්යා බලාද්ධෘතාඃ ।
දෘෂ්ටා හනුමතා තත්ර න සා ජනකනංදිනී ॥ 22 ॥
සෝऽපශ්යංස්තාං මහාබාහුඃ පශ්යංශ්චාන්යා වරස්ත්රියඃ ।
විෂසාද මුහුර්ධීමාන් හනුමාන් මාරුතාත්මජඃ ॥ 23 ॥
උද්යෝගං වානරේංද්රාණාං ප්ලවනං සාගරස්ය ච ।
ව්යර්ථං වීක්ෂ්යානිලසුතශ්චිංතාං පුනරුපාගමත් ॥ 24 ॥
අවතීර්ය විමානාච්ච හනුමාන් මාරුතාත්මජඃ ।
චිංතාමුපජගාමාථ ශෝකෝපහතචේතනඃ ॥ 25 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ද්වාදශස්සර්ගඃ ॥
