શ્રીમદ્વાલ્મીકીય રામાયણે સુંદરકાંડમ્ ।
અથ દ્વાદશસ્સર્ગઃ ।
સ તસ્ય મધ્યે ભવનસ્ય મારુતિ ર્લતાગૃહાંશ્ચિત્રગૃહાન્નિશાગૃહાન્ ।
જગામ સીતાં પ્રતિ દર્શનોત્સુકો ન ચૈવ તાં પશ્યતિ ચારુદર્શનામ્ ॥ 1 ॥
સ ચિંતયામાસ તતો મહાકપિઃ પ્રિયામપશ્યન્રઘુનંદનસ્ય તામ્ ।
ધ્રુવં હિ સીતા મ્રિયતે યથા ન મે વિચિન્વતો દર્શનમેતિ મૈથિલી ॥ 2 ॥
સા રાક્ષસાનાં પ્રવરેણ જાનકી સ્વશીલસંરક્ષ્ણતત્પરા સતી ।
અનેન નૂનં પ્રતિ દુષ્ટકર્મણા હતા ભવેદાર્યપથે પરે સ્થિતા ॥ 3 ॥
વિરૂપરૂપા વિકૃતા વિવર્ચસો મહાનના દીર્ઘવિરૂપદર્શનાઃ ।
સમીક્ષ્ય સા રાક્ષસરાજયોષિતો ભયાદ્વિનષ્ટા જનકેશ્વરાત્મજા ॥ 4 ॥
સીતામદૃષ્ટ્વા હ્યનવાપ્ય પૌરુષં વિહૃત્ય કાલં સહ વાનરૈશ્ચિરમ્ ।
ન મેઽસ્તિ સુગ્રીવસમીપગા ગતિઃ સુતીક્ષ્ણદંડો બલવાંશ્ચ વાનરઃ ॥ 5 ॥
દૃષ્ટમંતઃપુરં સર્વં દૃષ્ટા રાવણયોષિતઃ ।
ન સીતા દૃશ્યતે સાધ્વીવૃથા જાતો મમ શ્રમઃ ॥ 6 ॥
કિં નુ માં વાનરાઃ સર્વે ગતં વક્ષ્યંતિ સંગતાઃ ।
ગત્વા તત્ર ત્વયા વીર કિં કૃતં તદ્વદસ્વ નઃ ॥ 7 ॥
અદૃષ્ટ્વા કિં પ્રવક્ષ્યામિ તામહં જનકાત્મજામ્ ।
ધ્રુવં પ્રાયમુપૈષ્યંતિ કાલસ્ય વ્યતિવર્તને ॥ 8 ॥
કિં વા વક્ષ્યતિ વૃદ્ધશ્ચ જાંબવાનાંગદશ્ચ સઃ ।
ગતં પારં સમુદ્રસ્ય વાનરાશ્ચ સમાગતાઃ ॥ 9 ॥
અનિર્વેદઃ શ્રિયો મૂલમનિર્વેદઃ પરં સુખમ્ ।
અનિર્વેદો હિ સતતં સર્વાર્થેષુ પ્રવર્તકઃ ॥ 10 ॥
કરોતિ સફલં જંતોઃ કર્મ યત્તત્કરોતિ સઃ ।
તસ્માદનિર્વેદકૃતં યત્નં ચેષ્ટેઽહમુત્તમમ્ ॥ 11 ॥
ભૂયસ્તાવદ્વિચેષ્યામિ દેશાન્રાવણપાલિતાન્ ।
આપાનશાલા વિચિતાસ્તથા પુષ્પગૃહાણિ ચ ॥ 12 ॥
ચિત્રશાલાશ્ચ વિચિતા ભૂયઃ ક્રીડાગૃહાણિ ચ ।
નિષ્કુટાંતરરથ્યાશ્ચ વિમાનાનિ ચ સર્વશઃ ॥ 13 ॥
ઇતિ સંચિંત્ય ભૂયોઽપિ વિચેતુમુપચક્રમે ।
ભૂમીગૃહાંશ્ચૈત્યગૃહાન્ ગૃહાતિગૃહકાનપિ ॥ 14 ॥
ઉત્પતન્નિષ્પતંશ્ચાપિ તિષ્ઠન્ગચ્છન્ પુનઃ પુનઃ ।
અપાવૃણ્વંશ્ચ દ્વારાણિ કવાટાન્યવઘાટયન્ ॥ 15 ॥
પ્રવિશન્નિષ્પતંશ્ચાપિ પ્રપતન્નુત્પતન્નપિ ।
સર્વમપ્યવકાશં સ વિચચાર મહાકપિઃ ॥ 16 ॥
ચતુરંગુલમાત્રોઽપિ નાવકાશઃ સ વિદ્યતે ।
રાવણાંતઃપુરે તસ્મિન્ યં કપિર્ન જગામ સઃ ॥ 17 ॥
પ્રાકારાંતરરથ્યાશ્ચ વેદિકાશ્ચૈત્યસંશ્રયાઃ ।
દીર્ઘિકાઃ પુષ્કરિણ્યશ્ચ સર્વં તેનાવલોકિતમ્ ॥ 18 ॥
રાક્ષસ્યો વિવિધાકારા વિરૂપા વિકૃતાસ્તથા ।
દૃષ્ટા હનુમતા તત્ર ન તુ સા જનકાત્મજા ॥ 19 ॥
રૂપેણાપ્રતિમા લોકે વરા વિદ્યાધરસ્ત્રિયઃ ।
દૃષ્ટા હનુમતા તત્ર ન તુ રાઘવનંદિની ॥ 20 ॥
નાગકન્યા વરારોહાઃ પૂર્ણચન્ર્દનિભાનનાઃ ।
દૃષ્ટા હનુમતા તત્ર ન તુ સીતા સુમધ્યમા ॥ 21 ॥
પ્રમથ્ય રાક્ષસેંદ્રેણ નાગકન્યા બલાદ્ધૃતાઃ ।
દૃષ્ટા હનુમતા તત્ર ન સા જનકનંદિની ॥ 22 ॥
સોઽપશ્યંસ્તાં મહાબાહુઃ પશ્યંશ્ચાન્યા વરસ્ત્રિયઃ ।
વિષસાદ મુહુર્ધીમાન્ હનુમાન્ મારુતાત્મજઃ ॥ 23 ॥
ઉદ્યોગં વાનરેંદ્રાણાં પ્લવનં સાગરસ્ય ચ ।
વ્યર્થં વીક્ષ્યાનિલસુતશ્ચિંતાં પુનરુપાગમત્ ॥ 24 ॥
અવતીર્ય વિમાનાચ્ચ હનુમાન્ મારુતાત્મજઃ ।
ચિંતામુપજગામાથ શોકોપહતચેતનઃ ॥ 25 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે સુંદરકાંડે દ્વાદશસ્સર્ગઃ ॥
