ශ්රීමද්වාල්මීකීය රාමායණේ සුංදරකාංඩම් ।
අථ ඒකපංචාශස්සර්ගඃ ।
තං සමීක්ෂ්ය මහාසත්ත්වං සත්ත්වවාන්හරිසත්තමඃ ।
වාක්යමර්ථවදව්යග්රස්තමුවාච දශානනම් ॥ 1 ॥
අහං සුග්රීවසංදේශාදිහ ප්රාප්තස්තවාලයම් ।
රාක්ෂසේංද්ර හරීශස්ත්වාං භ්රාතා කුශලමබ්රවීත් ॥ 2 ॥
භ්රාතුශ්ශෘණු සමාදේශං සුග්රීවස්ය මහාත්මනඃ ।
ධර්මාර්ථෝපහිතං වාක්යමිහ චාමුත්ර ච ක්ෂමම් ॥ 3 ॥
රාජා දශරථෝ නාම රථකුංජරවාජිමාන් ।
පිතේව බංධුර්ලෝකස්ය සුරේශ්වරසමද්යුතිඃ ॥ 4 ॥
ජ්යේෂ්ඨස්තස්ය මහාබාහුඃ පුත්රඃ ප්රියකරඃ ප්රභුඃ ।
පිතුර්නිදේශාන්නිෂ්ක්රාංතඃ ප්රවිෂ්ටෝ දංඩකාවනම් ॥ 5 ॥
ලක්ෂ්මණේන සහ භ්රාත්රා සීතයා චාපි භාර්යයා ।
රාමෝ නාම මහාතේජා ධර්ම්යං පංථානමාස්ථිතඃ ॥ 6 ॥
තස්ය භාර්යා වනේ නෂ්ටා සීතා පතිමනුව්රතා ।
වෛදේහස්ය සුතා රාජ්ඤෝ ජනකස්ය මහාත්මනඃ ॥ 7 ॥
ස මාර්ගමාණස්තාං දේවීං රාජපුත්රඃ සහානුජඃ ।
ඍශ්යමූකමනුප්රාප්තඃ සුග්රීවේණ සමාගතඃ ॥ 8 ॥
තස්ය තේන ප්රතිජ්ඤාතං සීතායාඃ පරිමාර්ගණම් ।
සුග්රීවස්යාපි රාමේණ හරිරාජ්යං නිවේදිතම් ॥ 9 ॥
තතස්තේන මෘධේ හත්වා රාජපුත්රේණ වාලිනම් ।
සුග්රීවඃ ස්ථාපිතෝ රාජ්යේ හර්යෘක්ෂාණාං ගණේශ්වරඃ ॥ 10 ॥
ත්වයා විජ්ඤාතපූර්වශ්ච වාලී වානරපුංගවඃ ।
රාමේණ නිහතස්සංඛ්යේ ශරේණෛකේන වානරඃ ॥ 11 ॥
ස සීතාමාර්ගණේ ව්යග්රස්සුග්රීවඃ සත්යසංගරඃ ।
හරීන් සංප්රේෂයාමාස දිශස්සර්වා හරීශ්වරඃ ॥ 12 ॥
තාං හරීණාං සහස්රාණි ශතානි නියුතානි ච ।
දික්ෂු සර්වාසු මාර්ගංතේ හ්යධශ්චෝපරි චාංබරේ ॥ 13 ॥
වෛනතේයසමාඃ කේචිත්කේචිත්තත්රානිලෝපමාඃ ।
අසංගගතයශශීඝ්රා හරිවීරා මහාබලාඃ ॥ 14 ॥
අහං තු හනුමාන්නාම මාරුතස්යෞරසස්සුතඃ ।
සීතායාස්තු කෘතේ තූර්ණං ශතයෝජනමායතම් ॥ 15 ॥
සමුද්රං ලංඝයිත්වෛව තාං දිදෘක්ෂුරිහාගතඃ ।
භ්රමතා ච මයා දෘෂ්ටා ගෘහේ තේ ජනකාත්මජා ॥ 16 ॥
තද්භවාන් දෘෂ්ටධර්මාර්ථස්තපඃකෘතපරිග්රහඃ ।
පරදාරාන් මහාප්රාජ්ඤ නෝපරෝද්ධුං ත්වමර්හසි ॥ 17 ॥
න හි ධර්මවිරුද්ධේෂු බහ්වපායේෂු කර්මසු ।
මූලඝාතිෂු සජ්ජංතේ බුද්ධිමංතෝ භවද්විධාඃ ॥ 18 ॥
කශ්ච ලක්ෂ්මණමුක්තානාං රාමකෝපානුවර්තිනාම් ।
ශරාණාමග්රතඃ ස්ථාතුං ශක්තෝ දේවාසුරේෂ්වපි ॥ 19 ॥
න චාපි ත්රිෂු ලෝකේෂු රාජන්විද්යේත කශ්චන ।
රාඝවස්ය ව්යලීකං යඃ කෘත්වා සුඛමවාප්නුයාත් ॥ 20 ॥
තත් ත්රිකාලහිතං වාක්යං ධර්ම්යමර්ථානුබංධි ච ।
මන්යස්ව නරදේවාය ජානකී ප්රතිදීයතාම් ॥ 21 ॥
දෘෂ්ටා හීයං මයා දේවී ලබ්ධං යදිහ දුර්ලභම් ।
උත්තරං කර්ම යච්ඡේෂං නිමිත්තං තත්ර රාඝවඃ ॥ 22 ॥
ලක්ෂිතේයං මයා සීතා තථා ශෝකපරායණා ।
ගෘහ්ය යාං නාභිජානාසි පංචාස්යාමිව පන්නගීම් ॥ 23 ॥
නේයං ජරයිතුං ශක්යා සාසුරෛරමරෛරපි ।
විෂසංසෘෂ්ටමත්යර්ථං භුක්තමන්නමිවෞජසා ॥ 24 ॥
තපස්සංතාපලබ්ධස්තේ යෝऽයං ධර්මපරිග්රහඃ ।
න ස නාශයිතුං න්යාය්ය ආත්මප්රාණපරිග්රහඃ ॥ 25 ॥
අවධ්යතාං තපෝභිර්යාං භවාන් සමනුපශ්යති ।
ආත්මනඃ සාසුරෛර්දේවෛර්හේතුස්තත්රාප්යයං මහාන් ॥ 26 ॥
සුග්රීවෝ න හි දේවෝऽයං නාසුරෝ න ච රාක්ෂසඃ ।
න දානවෝ න ගංධර්වෝ න යක්ෂෝ න ච පන්නගඃ ॥ 27 ॥
තස්මාත්ප්රාණපරිත්රාණං කථං රාජන්කරිෂ්යසි ।
න තු ධර්මෝපසංහාරමධර්මඵලසංහිතම් ॥ 28 ॥
තදේව ඵලමන්වේති ධර්මශ්චාධර්මනාශනඃ ।
ප්රාප්තං ධර්මඵලං තාවද්භවතා නාත්ර සංශයඃ ।
ඵලමස්යාප්යධර්මස්ය ක්ෂිප්රමේව ප්රපත්ස්යසේ ॥ 29 ॥
ජනස්ථානවධං බුද්ධ්වා බුද්ධ්වා වාලිවධං තථා ॥ 30 ॥
රාමසුග්රීවසඛ්යං ච බුධ්යස්ව හිතමාත්මනඃ ।
කාමං ඛල්වහමප්යේකස්සවාජිරථකුංජරාම් ॥ 31 ॥
ලංකාං නාශයිතුං ශක්තස්තස්යෛෂ තු න නිශ්චයඃ ।
රාමේණ හි ප්රතිජ්ඤාතං හර්යෘක්ෂගණසන්නිධෞ ॥ 32 ॥
උත්සාදනමමිත්රාණාං සීතා යෛස්තු ප්රධර්ෂිතා ।
අපකුර්වන් හි රාමස්ය සාක්ෂාදපි පුරංදරඃ ॥ 33 ॥
න සුඛං ප්රාප්නුයාදන්යඃ කිං පුනස්ත්වද්විධෝ ජනඃ ।
යාං සීතේත්යභිජානාසි යේයං තිෂ්ඨති තේ වශේ ॥ 34 ॥
කාලරාත්රීති තාං විද්ධි සර්වලංකාවිනාශිනීම් ।
තදලං කාලපාශේන සීතාවිග්රහරූපිණා ॥ 35 ॥
ස්වයං ස්කංධාවසක්තේන ක්ෂේමමාත්මනි චිංත්යතාම් ।
සීතායාස්තේජසා දග්ධාං රාමකෝපප්රපීඩිතාම් ॥ 36 ॥
දහ්යමානාමිමාං පශ්ය පුරීං සාට්ටප්රතෝලිකාම් ।
ස්වානි මිත්රාණි මංත්රීංශ්ච ජ්ඤාතීන් භ්රාත්රූන් සුතාන් හිතාන් ॥ 37 ॥
භෝගාංදාරාංශ්ච ලංකාං ච මා විනාශමුපානය ।
සත්යං රාක්ෂසරාජේංද්ර ශෘණුෂ්ව වචනං මම ॥ 38 ॥
රාමදාසස්ය දූතස්ය වානරස්ය විශේෂතඃ ।
සර්වාන් ලෝකාන් සුසංහෘත්ය සභූතාන් සචරාචරාන් ॥ 39 ॥
පුනරේව තථා ස්රෂ්ටුං ශක්තෝ රාමෝ මහායශාඃ ।
දේවාසුරනරේංද්රේෂු යක්ෂරක්ෂෝගණේෂු ච ॥ 40 ॥
විද්යාධරේෂු සර්වේෂු ගංධර්වේෂූරගේෂු ච ।
සිද්ධේෂු කින්නරේංද්රේෂු පතත්රිෂු ච සර්වතඃ ॥ 41 ॥
සර්වභූතේෂු සර්වත්ර සර්වකාලේෂු නාස්ති සඃ ।
යෝ රාමං ප්රතියුධ්යේත විෂ්ණුතුල්යපරාක්රමම් ॥ 42 ॥
සර්වලෝකේශ්වරස්යෛවං කෘත්වා විප්රියමුත්තමම් ।
රාමස්ය රාජසිංහස්ය දුර්ලභං තව ජීවිතම් ॥ 43 ॥
දේවාශ්ච දෛත්යාශ්ච නිශාචරේංද්ර ගංධර්වවිද්යාධරනාගයක්ෂාඃ ।
රාමස්ය ලෝකත්රයනායකස්ය ස්ථාතුං න ශක්තාස්සමරේෂු සර්වේ ॥ 44 ॥
බ්රහ්මා ස්වයංභූශ්චතුරානනෝ වා රුද්රස්ත්රිණේත්රස්ත්රිපුරාංතකෝ වා ।
ඉංද්රෝ මහේංද්රස්සුරනායකෝ වා ත්රාතුං න ශක්තා යුධි රාමවධ්යම් ॥ 45 ॥
ස සෞෂ්ඨවෝපේතමදීනවාදිනඃ කපේර්නිශම්යාප්රතිමෝऽප්රියං වචඃ ।
දශානනඃ කෝපවිවෘත්තලෝචනඃ සමාදිශත්තස්ය වධං මහාකපේඃ ॥ 46 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ඒකපංචාශස්සර්ගඃ ॥
