𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌦𑍍𑌵𑌿𑌤𑍀𑌯𑌸𑍍𑌸𑌰𑍍𑌗𑌃 ।
𑌨𑌾𑌰𑌦𑌸𑍍𑌯 𑌤𑍁 𑌤𑌦𑍍𑌵𑌾𑌕𑍍𑌯𑌂 𑌶𑍍𑌰𑍁𑌤𑍍𑌵𑌾 𑌵𑌾𑌕𑍍𑌯𑌵𑌿𑌶𑌾𑌰𑌦𑌃 ।
𑌪𑍂𑌜𑌯𑌾𑌮𑌾𑌸 𑌧𑌰𑍍𑌮𑌾𑌤𑍍𑌮𑌾 𑌸𑌹𑌶𑌿𑌷𑍍𑌯𑍋 𑌮𑌹𑌾𑌮𑍁𑌨𑌿𑌃 ॥ 1 ॥
𑌯𑌥𑌾𑌵𑌤𑍍𑌪𑍂𑌜𑌿𑌤𑌸𑍍𑌤𑍇𑌨 𑌦𑍇𑌵𑌰𑍍𑌷𑌿𑌰𑍍𑌨𑌾𑌰𑌦𑌸𑍍𑌤𑌦𑌾 ।
𑌆𑌪𑍃𑌷𑍍𑌟𑍍𑌵𑍈𑌵𑌾𑌭𑍍𑌯𑌨𑍁𑌜𑍍𑌞𑌾𑌤𑌸𑍍𑌸 𑌜𑌗𑌾𑌮 𑌵𑌿𑌹𑌾𑌯𑌸𑌮𑍍 ॥ 2 ॥
𑌸 𑌮𑍁𑌹𑍂𑌰𑍍𑌤𑌂 𑌗𑌤𑍇 𑌤𑌸𑍍𑌮𑌿𑌂𑌦𑍇𑌵𑌲𑍋𑌕𑌂 𑌮𑍁𑌨𑌿𑌸𑍍𑌤𑌦𑌾 ।
𑌜𑌗𑌾𑌮 𑌤𑌮𑌸𑌾𑌤𑍀𑌰𑌂 𑌜𑌾𑌹𑍍𑌨𑌵𑍍𑌯𑌾𑌸𑍍𑌤𑍍𑌵𑌵𑌿𑌦𑍂𑌰𑌤𑌃 ॥ 3 ॥
𑌸 𑌤𑍁 𑌤𑍀𑌰𑌂 𑌸𑌮𑌾𑌸𑌾𑌦𑍍𑌯 𑌤𑌮𑌸𑌾𑌯𑌾 𑌮𑌹𑌾𑌮𑍁𑌨𑌿𑌃 ।
𑌶𑌿𑌷𑍍𑌯𑌮𑌾𑌹 𑌸𑍍𑌥𑌿𑌤𑌂 𑌪𑌾𑌰𑍍𑌶𑍍𑌵𑍇 𑌦𑍃𑌷𑍍𑌟𑍍𑌵𑌾 𑌤𑍀𑌰𑍍𑌥𑌮𑌕𑌰𑍍𑌦𑌮𑌮𑍍 ॥ 4 ॥
𑌅𑌕𑌰𑍍𑌦𑌮𑌮𑌿𑌦𑌂 𑌤𑍀𑌰𑍍𑌥𑌂 𑌭𑌰𑌦𑍍𑌵𑌾𑌜 𑌨𑌿𑌶𑌾𑌮𑌯 ।
𑌰𑌮𑌣𑍀𑌯𑌂 𑌪𑍍𑌰𑌸𑌨𑍍𑌨𑌾𑌂𑌬𑍁 𑌸𑌨𑍍𑌮𑌨𑍁𑌷𑍍𑌯𑌮𑌨𑍋 𑌯𑌥𑌾 ॥ 5 ॥
𑌨𑍍𑌯𑌸𑍍𑌯𑌤𑌾𑌂 𑌕𑌲𑌶𑌸𑍍𑌤𑌾𑌤 𑌦𑍀𑌯𑌤𑌾𑌂 𑌵𑌲𑍍𑌕𑌲𑌂 𑌮𑌮 ।
𑌇𑌦𑌮𑍇𑌵𑌾𑌵𑌗𑌾𑌹𑌿𑌷𑍍𑌯𑍇 𑌤𑌮𑌸𑌾𑌤𑍀𑌰𑍍𑌥𑌮𑍁𑌤𑍍𑌤𑌮𑌮𑍍 ॥ 6 ॥
𑌏𑌵𑌮𑍁𑌕𑍍𑌤𑍋 𑌭𑌰𑌦𑍍𑌵𑌾𑌜𑍋 𑌵𑌾𑌲𑍍𑌮𑍀𑌕𑍇𑌨 𑌮𑌹𑌾𑌤𑍍𑌮𑌨𑌾 ।
𑌪𑍍𑌰𑌾𑌯𑌚𑍍𑌛𑌤 𑌮𑍁𑌨𑍇𑌸𑍍𑌤𑌸𑍍𑌯 𑌵𑌲𑍍𑌕𑌲𑌂 𑌨𑌿𑌯𑌤𑍋 𑌗𑍁𑌰𑍋𑌃 ॥ ॥
𑌸 𑌶𑌿𑌷𑍍𑌯𑌹𑌸𑍍𑌤𑌾𑌦𑌾𑌦𑌾𑌯 𑌵𑌲𑍍𑌕𑌲𑌂 𑌨𑌿𑌯𑌤𑍇𑌂𑌦𑍍𑌰𑌿𑌯𑌃 ।
𑌵𑌿𑌚𑌚𑌾𑌰 𑌹 𑌪𑌶𑍍𑌯𑌂𑌸𑍍𑌤𑌤𑍍𑌸𑌰𑍍𑌵𑌤𑍋 𑌵𑌿𑌪𑍁𑌲𑌂 𑌵𑌨𑌮𑍍 ॥ ॥
𑌤𑌸𑍍𑌯𑌾𑌭𑍍𑌯𑌾𑌶𑍇 𑌤𑍁 𑌮𑌿𑌥𑍁𑌨𑌂 𑌚𑌰𑌂𑌤𑌮𑌨𑌪𑌾𑌯𑌿𑌨𑌮𑍍 ।
𑌦𑌦𑌰𑍍𑌶 𑌭𑌗𑌵𑌾𑌂𑌸𑍍𑌤𑌤𑍍𑌰 𑌕𑍍𑌰𑍌𑌂𑌚𑌯𑍋𑌶𑍍𑌚𑌾𑌰𑍁𑌨𑌿𑌸𑍍𑌵𑌨𑌮𑍍 ॥ ॥
𑌤𑌸𑍍𑌮𑌾𑌤𑍍𑌤𑍁 𑌮𑌿𑌥𑍁𑌨𑌾𑌦𑍇𑌕𑌂 𑌪𑍁𑌮𑌾𑌂𑌸𑌂 𑌪𑌾𑌪𑌨𑌿𑌶𑍍𑌚𑌯𑌃 ।
𑌜𑌘𑌾𑌨 𑌵𑍈𑌰𑌨𑌿𑌲𑌯𑍋 𑌨𑌿𑌷𑌾𑌦𑌸𑍍𑌤𑌸𑍍𑌯 𑌪𑌶𑍍𑌯𑌤𑌃 ॥ 10 ॥
𑌤𑌂 𑌶𑍋𑌣𑌿𑌤𑌪𑌰𑍀𑌤𑌾𑌂𑌗𑌂 𑌵𑍇𑌷𑍍𑌟𑌮𑌾𑌨𑌂 𑌮𑌹𑍀𑌤𑌲𑍇 ।
𑌭𑌾𑌰𑍍𑌯𑌾 𑌤𑍁 𑌨𑌿𑌹𑌤𑌂 𑌦𑍃𑌷𑍍𑌟𑍍𑌵𑌾 𑌰𑍁𑌰𑌾𑌵 𑌕𑌰𑍁𑌣𑌾𑌂 𑌗𑌿𑌰𑌮𑍍 ॥ 11 ॥
𑌵𑌿𑌯𑍁𑌕𑍍𑌤𑌾 𑌪𑌤𑌿𑌨𑌾 𑌤𑍇𑌨 𑌦𑍍𑌵𑌿𑌜𑍇𑌨 𑌸𑌹𑌚𑌾𑌰𑌿𑌣𑌾 ।
𑌤𑌾𑌮𑍍𑌰𑌶𑍀𑌰𑍍𑌷𑍇𑌣 𑌮𑌤𑍍𑌤𑍇𑌨 𑌪𑌤𑍍𑌰𑌿𑌣𑌾 𑌸𑌹𑌿𑌤𑍇𑌨 𑌵𑍈 ॥ 12 ॥
𑌤𑌦𑌾 𑌤𑍁 𑌤𑌂 𑌦𑍍𑌵𑌿𑌜𑌂 𑌦𑍃𑌷𑍍𑌟𑍍𑌵𑌾 𑌨𑌿𑌷𑌾𑌦𑍇𑌨 𑌨𑌿𑌪𑌾𑌤𑌿𑌤𑌮𑍍 ।
𑌋𑌷𑍇𑌰𑍍𑌧𑌰𑍍𑌮𑌾𑌤𑍍𑌮𑌨𑌸𑍍𑌤𑌸𑍍𑌯 𑌕𑌾𑌰𑍁𑌣𑍍𑌯𑌂 𑌸𑌮𑌪𑌦𑍍𑌯𑌤 ॥ 13 ॥
𑌤𑌤𑌃 𑌕𑌰𑍁𑌣𑌵𑍇𑌦𑌿𑌤𑍍𑌵𑌾𑌦𑌧𑌰𑍍𑌮𑍋𑌽𑌯𑌮𑌿𑌤𑌿 𑌦𑍍𑌵𑌿𑌜𑌃 ।
𑌨𑌿𑌶𑌾𑌮𑍍𑌯 𑌰𑍁𑌦𑌤𑍀𑌂 𑌕𑍍𑌰𑍌𑌂𑌚𑍀𑌮𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 14 ॥
𑌮𑌾 𑌨𑌿𑌷𑌾𑌦 𑌪𑍍𑌰𑌤𑌿𑌷𑍍𑌠𑌾𑌂 𑌤𑍍𑌵𑌮𑌗𑌮𑌶𑍍𑌶𑌾𑌶𑍍𑌵𑌤𑍀𑌸𑍍𑌸𑌮𑌾𑌃 ।
𑌯𑌤𑍍𑌕𑍍𑌰𑍌𑌂𑌚𑌮𑌿𑌥𑍁𑌨𑌾𑌦𑍇𑌕𑌮𑌵𑌧𑍀𑌃 𑌕𑌾𑌮𑌮𑍋𑌹𑌿𑌤𑌮𑍍 ॥ 15 ॥
15 𑌤𑌸𑍍𑌯𑍈𑌵𑌂 𑌬𑍍𑌰𑍁𑌵𑌤𑌶𑍍𑌚𑌿𑌂𑌤𑌾 𑌬𑌭𑍂𑌵 𑌹𑍃𑌦𑌿 𑌵𑍀𑌕𑍍𑌷𑌤𑌃 ।
𑌶𑍋𑌕𑌾𑌰𑍍𑌤𑍇𑌨𑌾𑌸𑍍𑌯 𑌶𑌕𑍁𑌨𑍇𑌃 𑌕𑌿𑌮𑌿𑌦𑌂 𑌵𑍍𑌯𑌾𑌹𑍃𑌤𑌂 𑌮𑌯𑌾 ॥ 16 ॥
𑌚𑌿𑌂𑌤𑌯𑌨𑍍𑌸 𑌮𑌹𑌾𑌪𑍍𑌰𑌾𑌜𑍍𑌞𑌶𑍍𑌚𑌕𑌾𑌰 𑌮𑌤𑌿𑌮𑌾𑌨𑍍𑌮𑌤𑌿𑌮𑍍 ।
𑌶𑌿𑌷𑍍𑌯𑌂 𑌚𑍈𑌵𑌾𑌽𑌬𑍍𑌰𑌵𑍀𑌦𑍍𑌵𑌾𑌕𑍍𑌯𑌮𑌿𑌦𑌂 𑌸 𑌮𑍁𑌨𑌿𑌪𑍁𑌂𑌗𑌵𑌃 ॥ 1 ॥
𑌪𑌾𑌦𑌬𑌦𑍍𑌧𑍋𑌽𑌕𑍍𑌷𑌰𑌸𑌮𑌸𑍍𑌤𑌂𑌤𑍍𑌰𑍀𑌲𑌯𑌸𑌮𑌨𑍍𑌵𑌿𑌤𑌃 ।
𑌶𑍋𑌕𑌾𑌰𑍍𑌤𑌸𑍍𑌯 𑌪𑍍𑌰𑌵𑍃𑌤𑍍𑌤𑍋 𑌮𑍇 𑌶𑍍𑌲𑍋𑌕𑍋 𑌭𑌵𑌤𑍁 𑌨𑌾𑌨𑍍𑌯𑌥𑌾 ॥ 1 ॥
𑌶𑌿𑌷𑍍𑌯𑌸𑍍𑌤𑍁 𑌤𑌸𑍍𑌯 𑌬𑍍𑌰𑍁𑌵𑌤𑍋 𑌮𑍁𑌨𑍇𑌰𑍍𑌵𑌾𑌕𑍍𑌯𑌮𑌨𑍁𑌤𑍍𑌤𑌮𑌮𑍍 ।
𑌪𑍍𑌰𑌤𑌿𑌜𑌗𑍍𑌰𑌾𑌹 𑌸𑌂𑌹𑍃𑌷𑍍𑌟𑌸𑍍𑌤𑌸𑍍𑌯 𑌤𑍁𑌷𑍍𑌟𑍋𑌽𑌭𑌵𑌦𑍍𑌗𑍁𑌰𑍁𑌃 ॥ 1 ॥
𑌸𑍋𑌽𑌭𑌿𑌷𑍇𑌕𑌂 𑌤𑌤𑌃 𑌕𑍃𑌤𑍍𑌵𑌾 𑌤𑍀𑌰𑍍𑌥𑍇 𑌤𑌸𑍍𑌮𑌿𑌨𑍍𑌯𑌥𑌾𑌵𑌿𑌧𑌿 ।
𑌤𑌮𑍇𑌵 𑌚𑌿𑌂𑌤𑌯𑌨𑍍𑌨𑌰𑍍𑌥𑌮𑍁𑌪𑌾𑌵𑌰𑍍𑌤𑌤 𑌵𑍈 𑌮𑍁𑌨𑌿𑌃 ॥ 20 ॥
𑌭𑌰𑌦𑍍𑌵𑌾𑌜𑌸𑍍𑌤𑌤𑌶𑍍𑌶𑌿𑌷𑍍𑌯𑍋 𑌵𑌿𑌨𑍀𑌤𑌶𑍍𑌶𑍍𑌰𑍁𑌤𑌵𑌾𑌨𑍍𑌮𑍁𑌨𑍇𑌃 ।
𑌕𑌲𑌶𑌂 𑌪𑍂𑌰𑍍𑌣𑌮𑌾𑌦𑌾𑌯 𑌪𑍃𑌷𑍍𑌠𑌤𑍋𑌽𑌨𑍁𑌜𑌗𑌾𑌮 𑌹 ॥ 21 ॥
𑌸 𑌪𑍍𑌰𑌵𑌿𑌶𑍍𑌯𑌾𑌶𑍍𑌰𑌮𑌪𑌦𑌂 𑌶𑌿𑌷𑍍𑌯𑍇𑌣 𑌸𑌹 𑌧𑌰𑍍𑌮𑌵𑌿𑌤𑍍 ।
𑌉𑌪𑌵𑌿𑌷𑍍𑌟𑌃 𑌕𑌥𑌾𑌶𑍍𑌚𑌾𑌨𑍍𑌯𑌾𑌶𑍍𑌚𑌕𑌾𑌰 𑌧𑍍𑌯𑌾𑌨𑌮𑌾𑌸𑍍𑌥𑌿𑌤𑌃 ॥ 22 ॥
𑌆𑌜𑌗𑌾𑌮 𑌤𑌤𑍋 𑌬𑍍𑌰𑌹𑍍𑌮𑌾 𑌲𑍋𑌕𑌕𑌰𑍍𑌤𑌾 𑌸𑍍𑌵𑌯𑌂 𑌪𑍍𑌰𑌭𑍁𑌃 ।
𑌚𑌤𑍁𑌰𑍍𑌮𑍁𑌖𑍋 𑌮𑌹𑌾𑌤𑍇𑌜𑌾 𑌦𑍍𑌰𑌷𑍍𑌟𑍁𑌂 𑌤𑌂 𑌮𑍁𑌨𑌿𑌪𑍁𑌂𑌗𑌵𑌮𑍍 ॥ 23 ॥
𑌵𑌾𑌲𑍍𑌮𑍀𑌕𑌿𑌰𑌥 𑌤𑌂 𑌦𑍃𑌷𑍍𑌟𑍍𑌵𑌾 𑌸𑌹𑌸𑍋𑌤𑍍𑌥𑌾𑌯 𑌵𑌾𑌗𑍍𑌯𑌤𑌃 ।
𑌪𑍍𑌰𑌾𑌂𑌜𑌲𑌿𑌃 𑌪𑍍𑌰𑌯𑌤𑍋 𑌭𑍂𑌤𑍍𑌵𑌾 𑌤𑌸𑍍𑌥𑍌 𑌪𑌰𑌮𑌵𑌿𑌸𑍍𑌮𑌿𑌤𑌃 ॥ 24 ॥
𑌪𑍂𑌜𑌯𑌾𑌮𑌾𑌸 𑌤𑌂 𑌦𑍇𑌵𑌂 𑌪𑌾𑌦𑍍𑌯𑌾𑌰𑍍𑌘𑍍𑌯𑌾𑌸𑌨𑌵𑌂𑌦𑌨𑍈𑌃 ।
𑌪𑍍𑌰𑌣𑌮𑍍𑌯 𑌵𑌿𑌧𑌿𑌵𑌚𑍍𑌚𑍈𑌨𑌂 𑌪𑍃𑌷𑍍𑌟𑍍𑌵𑌾𑌽𑌨𑌾𑌮𑌯𑌮𑌵𑍍𑌯𑌯𑌮𑍍 ॥ 25 ॥
𑌅𑌥𑍋𑌪𑌵𑌿𑌶𑍍𑌯 𑌭𑌗𑌵𑌾𑌨𑌾𑌸𑌨𑍇 𑌪𑌰𑌮𑌾𑌰𑍍𑌚𑌿𑌤𑍇 ।
𑌵𑌾𑌲𑍍𑌮𑍀𑌕𑌯𑍇 𑌮𑌹𑌰𑍍𑌷𑌯𑍇 𑌸𑌂𑌦𑌿𑌦𑍇𑌶𑌾𑌸𑌨𑌂 𑌤𑌤𑌃 ॥ 26 ॥
𑌬𑍍𑌰𑌹𑍍𑌮𑌣𑌾 𑌸𑌮𑌨𑍁𑌜𑍍𑌞𑌾𑌤𑌸𑍍𑌸𑍋𑌽𑌪𑍍𑌯𑍁𑌪𑌾𑌵𑌿𑌶𑌦𑌾𑌸𑌨𑍇 ।
𑌉𑌪𑌵𑌿𑌷𑍍𑌟𑍇 𑌤𑌦𑌾 𑌤𑌸𑍍𑌮𑌿𑌨𑍍𑌸𑌰𑍍𑌵𑌲𑍋𑌕𑌪𑌿𑌤𑌾𑌮𑌹𑍇 ।
𑌤𑌦𑍍𑌗𑌤𑍇𑌨𑍈𑌵 𑌮𑌨𑌸𑌾 𑌵𑌾𑌲𑍍𑌮𑍀𑌕𑌿𑌰𑍍𑌧𑍍𑌯𑌾𑌨𑌮𑌾𑌸𑍍𑌥𑌿𑌤𑌃 ॥ 2 ॥
𑌪𑌾𑌪𑌾𑌤𑍍𑌮𑌨𑌾 𑌕𑍃𑌤𑌂 𑌕𑌷𑍍𑌟𑌂 𑌵𑍈𑌰𑌗𑍍𑌰𑌹𑌣𑌬𑍁𑌦𑍍𑌧𑌿𑌨𑌾 ।
𑌯𑌸𑍍𑌤𑌾𑌦𑍃𑌶𑌂 𑌚𑌾𑌰𑍁𑌰𑌵𑌂 𑌕𑍍𑌰𑍌𑌂𑌚𑌂 𑌹𑌨𑍍𑌯𑌾𑌦𑌕𑌾𑌰𑌣𑌾𑌤𑍍 ॥ 2 ॥
𑌶𑍋𑌚𑌨𑍍𑌨𑍇𑌵 𑌮𑍁𑌹𑍁𑌃 𑌕𑍍𑌰𑍌𑌂𑌚𑍀𑌮𑍁𑌪𑌶𑍍𑌲𑍋𑌕𑌮𑌿𑌮𑌂 𑌪𑍁𑌨𑌃 ।
𑌜𑌗𑌾𑌵𑌂𑌤𑌰𑍍𑌗𑌤𑌮𑌨𑌾 𑌭𑍂𑌤𑍍𑌵𑌾 𑌶𑍋𑌕𑌪𑌰𑌾𑌯𑌣𑌃 ॥ 2 ॥
𑌤𑌮𑍁𑌵𑌾𑌚 𑌤𑌤𑍋 𑌬𑍍𑌰𑌹𑍍𑌮𑌾 𑌪𑍍𑌰𑌹𑌸𑌨𑍍𑌮𑍁𑌨𑌿𑌪𑍁𑌂𑌗𑌵𑌮𑍍 ।
𑌶𑍍𑌲𑍋𑌕 𑌏𑌵 𑌤𑍍𑌵𑌯𑌾 𑌬𑌦𑍍𑌧𑍋 𑌨𑌾𑌤𑍍𑌰 𑌕𑌾𑌰𑍍𑌯𑌾 𑌵𑌿𑌚𑌾𑌰𑌣𑌾 ॥ 30 ॥
𑌮𑌚𑍍𑌛𑌂𑌦𑌾𑌦𑍇𑌵 𑌤𑍇 𑌬𑍍𑌰𑌹𑍍𑌮𑌨𑍍 𑌪𑍍𑌰𑌵𑍃𑌤𑍍𑌤𑍇𑌯𑌂 𑌸𑌰𑌸𑍍𑌵𑌤𑍀 ।
𑌰𑌾𑌮𑌸𑍍𑌯 𑌚𑌰𑌿𑌤𑌂 𑌸𑌰𑍍𑌵𑌂 𑌕𑍁𑌰𑍁 𑌤𑍍𑌵𑌮𑍃𑌷𑌿𑌸𑌤𑍍𑌤𑌮 ॥ 31 ॥
𑌧𑌰𑍍𑌮𑌾𑌤𑍍𑌮𑌨𑍋 𑌗𑍁𑌣𑌵𑌤𑍋 𑌲𑍋𑌕𑍇 𑌰𑌾𑌮𑌸𑍍𑌯 𑌧𑍀𑌮𑌤𑌃 ।
𑌵𑍃𑌤𑍍𑌤𑌂 𑌕𑌥𑌯 𑌧𑍀𑌰𑌸𑍍𑌯 𑌯𑌥𑌾 𑌤𑍇 𑌨𑌾𑌰𑌦𑌾𑌚𑍍𑌛𑍍𑌰𑍁𑌤𑌮𑍍 ॥ 32 ॥
𑌰𑌹𑌸𑍍𑌯𑌂 𑌚 𑌪𑍍𑌰𑌕𑌾𑌶𑌂 𑌚 𑌯𑌦𑍍𑌵𑍃𑌤𑍍𑌤𑌂 𑌤𑌸𑍍𑌯 𑌧𑍀𑌮𑌤𑌃 ।
𑌰𑌾𑌮𑌸𑍍𑌯 𑌸𑌹𑌸𑍌𑌮𑌿𑌤𑍍𑌰𑍇𑌃 𑌰𑌾𑌕𑍍𑌷𑌸𑌾𑌨𑌾𑌂 𑌚 𑌸𑌰𑍍𑌵𑌶𑌃 ॥ 33 ॥
𑌵𑍈𑌦𑍇𑌹𑍍𑌯𑌾𑌶𑍍𑌚𑍈𑌵 𑌯𑌦𑍍𑌵𑍃𑌤𑍍𑌤𑌂 𑌪𑍍𑌰𑌕𑌾𑌶𑌂 𑌯𑌦𑌿 𑌵𑌾 𑌰𑌹𑌃 ।
𑌤𑌚𑍍𑌚𑌾𑌪𑍍𑌯𑌵𑌿𑌦𑌿𑌤𑌂 𑌸𑌰𑍍𑌵𑌂 𑌵𑌿𑌦𑌿𑌤𑌂 𑌤𑍇 𑌭𑌵𑌿𑌷𑍍𑌯𑌤𑌿 ॥ 34 ॥
𑌨 𑌤𑍇 𑌵𑌾𑌗𑌨𑍃𑌤𑌾 𑌕𑌾𑌵𑍍𑌯𑍇 𑌕𑌾𑌚𑌿𑌦𑌤𑍍𑌰 𑌭𑌵𑌿𑌷𑍍𑌯𑌤𑌿 ।
𑌕𑍁𑌰𑍁 𑌰𑌾𑌮𑌕𑌥𑌾𑌂 𑌪𑍁𑌣𑍍𑌯𑌾𑌂 𑌶𑍍𑌲𑍋𑌕𑌬𑌦𑍍𑌧𑌾𑌂 𑌮𑌨𑍋𑌰𑌮𑌾𑌮𑍍 ॥ 35 ॥
𑌯𑌾𑌵𑌤𑍍 𑌸𑍍𑌥𑌾𑌸𑍍𑌯𑌂𑌤𑌿 𑌗𑌿𑌰𑌯𑌸𑍍𑌸𑌰𑌿𑌤𑌶𑍍𑌚 𑌮𑌹𑍀𑌤𑌲𑍇 ।
𑌤𑌾𑌵𑌦𑍍𑌰𑌾𑌮𑌾𑌯𑌣𑌕𑌥𑌾 𑌲𑍋𑌕𑍇𑌷𑍁 𑌪𑍍𑌰𑌚𑌰𑌿𑌷𑍍𑌯𑌤𑌿 ॥ 36 ॥
𑌯𑌾𑌵𑌦𑍍𑌰𑌾𑌮𑌾𑌯𑌣𑌕𑌥𑌾 𑌤𑍍𑌵𑌤𑍍𑌕𑍃𑌤𑌾 𑌪𑍍𑌰𑌚𑌰𑌿𑌷𑍍𑌯𑌤𑌿 ।
𑌤𑌾𑌵𑌦𑍂𑌰𑍍𑌧𑍍𑌵𑌮𑌧𑌶𑍍𑌚 𑌤𑍍𑌵𑌂 𑌮𑌲𑍍𑌲𑍋𑌕𑍇𑌷𑍁 𑌨𑌿𑌵𑌤𑍍𑌸𑍍𑌯𑌸𑌿 ॥ 3 ॥
𑌇𑌤𑍍𑌯𑍁𑌕𑍍𑌤𑍍𑌵𑌾 𑌭𑌗𑌵𑌾𑌨𑍍𑌬𑍍𑌰𑌹𑍍𑌮𑌾 𑌤𑌤𑍍𑌰𑍈𑌵𑌾𑌂𑌤𑌰𑌧𑍀𑌯𑌤 ।
𑌤𑌤𑌸𑍍𑌸𑌶𑌿𑌷𑍍𑌯𑍋 𑌭𑌗𑌵𑌾𑌨𑍍𑌮𑍁𑌨𑌿𑌰𑍍𑌵𑌿𑌸𑍍𑌮𑌯𑌮𑌾𑌯𑌯𑍌 ॥ 3 ॥
𑌤𑌸𑍍𑌯 𑌶𑌿𑌷𑍍𑌯𑌾𑌸𑍍𑌤𑌤𑌸𑍍𑌸𑌰𑍍𑌵𑍇 𑌜𑌗𑍁𑌶𑍍𑌶𑍍𑌲𑍋𑌕𑌮𑌿𑌮𑌂 𑌪𑍁𑌨𑌃 ।
𑌮𑍁𑌹𑍁𑌰𑍍𑌮𑍁𑌹𑍁𑌃 𑌪𑍍𑌰𑍀𑌯𑌮𑌾𑌣𑌾𑌃 𑌪𑍍𑌰𑌾𑌹𑍁𑌶𑍍𑌚 𑌭𑍃𑌶𑌵𑌿𑌸𑍍𑌮𑌿𑌤𑌾𑌃 ॥ 3 ॥
𑌸𑌮𑌾𑌕𑍍𑌷𑌰𑍈𑌶𑍍𑌚𑌤𑍁𑌰𑍍𑌭𑌿𑌰𑍍𑌯𑌃 𑌪𑌾𑌦𑍈𑌰𑍍𑌗𑍀𑌤𑍋 𑌮𑌹𑌰𑍍𑌷𑌿𑌣𑌾 ।
𑌸𑍋𑌽𑌨𑍁𑌵𑍍𑌯𑌾𑌹𑌰𑌣𑌾𑌦𑍍𑌭𑍂𑌯𑌶𑍍𑌶𑍍𑌲𑍋𑌕𑌶𑍍𑌶𑍍𑌲𑍋𑌕𑌤𑍍𑌵𑌮𑌾𑌗𑌤𑌃 ॥ 40 ॥
𑌤𑌸𑍍𑌯 𑌬𑍁𑌦𑍍𑌧𑌿𑌰𑌿𑌯𑌂 𑌜𑌾𑌤𑌾 𑌵𑌾𑌲𑍍𑌮𑍀𑌕𑍇𑌰𑍍𑌭𑌾𑌵𑌿𑌤𑌾𑌤𑍍𑌮𑌨𑌃 ।
𑌕𑍃𑌤𑍍𑌸𑍍𑌨𑌂 𑌰𑌾𑌮𑌾𑌯𑌣𑌂 𑌕𑌾𑌵𑍍𑌯𑌮𑍀𑌦𑍃𑌶𑍈𑌃 𑌕𑌰𑌵𑌾𑌣𑍍𑌯𑌹𑌮𑍍 ॥ 41 ॥
𑌉𑌦𑌾𑌰𑌵𑍃𑌤𑍍𑌤𑌾𑌰𑍍𑌥𑌪𑌦𑍈𑌰𑍍𑌮𑌨𑍋𑌰𑌮𑍈𑌃 𑌤𑌦𑌾𑌸𑍍𑌯 𑌰𑌾𑌮𑌸𑍍𑌯 𑌚𑌕𑌾𑌰𑌕𑍀𑌰𑍍𑌤𑌿𑌮𑌾𑌨𑍍 ।
𑌸𑌮𑌾𑌕𑍍𑌷𑌰𑍈𑌶𑍍𑌶𑍍𑌲𑍋𑌕𑌶𑌤𑍈𑌰𑍍𑌯𑌶𑌸𑍍𑌵𑌿𑌨𑍋 𑌯𑌶𑌸𑍍𑌕𑌰𑌂 𑌕𑌾𑌵𑍍𑌯𑌮𑍁𑌦𑌾𑌰𑌧𑍀𑌰𑍍𑌮𑍁𑌨𑌿𑌃 ॥ 42 ॥
𑌤𑌦𑍁𑌪𑌗𑌤𑌸𑌮𑌾𑌸𑌸𑌂𑌧𑌿𑌯𑍋𑌗𑌂 𑌸𑌮𑌮𑌧𑍁𑌰𑍋𑌪𑌨𑌤𑌾𑌰𑍍𑌥𑌵𑌾𑌕𑍍𑌯𑌬𑌦𑍍𑌧𑌮𑍍 ।
𑌰𑌘𑍁𑌵𑌰𑌚𑌰𑌿𑌤𑌂 𑌮𑍁𑌨𑌿𑌪𑍍𑌰𑌣𑍀𑌤𑌂 𑌦𑌶𑌶𑌿𑌰𑌸𑌶𑍍𑌚 𑌵𑌧𑌂 𑌨𑌿𑌶𑌾𑌮𑌯𑌧𑍍𑌵𑌮𑍍 ॥ 43 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌦𑍍𑌵𑌿𑌤𑍀𑌯𑌸𑍍𑌸𑌰𑍍𑌗𑌃 ॥
