ශ්රීමද්වාල්මීකීය රාමායණේ බාලකාංඩම් ।
අථ ද්විතීයස්සර්ගඃ ।
නාරදස්ය තු තද්වාක්යං ශ්රුත්වා වාක්යවිශාරදඃ ।
පූජයාමාස ධර්මාත්මා සහශිෂ්යෝ මහාමුනිඃ ॥ 1 ॥
යථාවත්පූජිතස්තේන දේවර්ෂිර්නාරදස්තදා ।
ආපෘෂ්ට්වෛවාභ්යනුජ්ඤාතස්ස ජගාම විහායසම් ॥ 2 ॥
ස මුහූර්තං ගතේ තස්මිංදේවලෝකං මුනිස්තදා ।
ජගාම තමසාතීරං ජාහ්නව්යාස්ත්වවිදූරතඃ ॥ 3 ॥
ස තු තීරං සමාසාද්ය තමසායා මහාමුනිඃ ।
ශිෂ්යමාහ ස්ථිතං පාර්ශ්වේ දෘෂ්ට්වා තීර්ථමකර්දමම් ॥ 4 ॥
අකර්දමමිදං තීර්ථං භරද්වාජ නිශාමය ।
රමණීයං ප්රසන්නාංබු සන්මනුෂ්යමනෝ යථා ॥ 5 ॥
න්යස්යතාං කලශස්තාත දීයතාං වල්කලං මම ।
ඉදමේවාවගාහිෂ්යේ තමසාතීර්ථමුත්තමම් ॥ 6 ॥
ඒවමුක්තෝ භරද්වාජෝ වාල්මීකේන මහාත්මනා ।
ප්රායච්ඡත මුනේස්තස්ය වල්කලං නියතෝ ගුරෝඃ ॥ 7 ॥
ස ශිෂ්යහස්තාදාදාය වල්කලං නියතේංද්රියඃ ।
විචචාර හ පශ්යංස්තත්සර්වතෝ විපුලං වනම් ॥ 8 ॥
තස්යාභ්යාශේ තු මිථුනං චරංතමනපායිනම් ।
දදර්ශ භගවාංස්තත්ර ක්රෞංචයෝශ්චාරුනිස්වනම් ॥ 9 ॥
තස්මාත්තු මිථුනාදේකං පුමාංසං පාපනිශ්චයඃ ।
ජඝාන වෛරනිලයෝ නිෂාදස්තස්ය පශ්යතඃ ॥ 10 ॥
තං ශෝණිතපරීතාංගං වේෂ්ටමානං මහීතලේ ।
භාර්යා තු නිහතං දෘෂ්ට්වා රුරාව කරුණාං ගිරම් ॥ 11 ॥
වියුක්තා පතිනා තේන ද්විජේන සහචාරිණා ।
තාම්රශීර්ෂේණ මත්තේන පත්රිණා සහිතේන වෛ ॥ 12 ॥
තදා තු තං ද්විජං දෘෂ්ට්වා නිෂාදේන නිපාතිතම් ।
ඍෂේර්ධර්මාත්මනස්තස්ය කාරුණ්යං සමපද්යත ॥ 13 ॥
තතඃ කරුණවේදිත්වාදධර්මෝऽයමිති ද්විජඃ ।
නිශාම්ය රුදතීං ක්රෞංචීමිදං වචනමබ්රවීත් ॥ 14 ॥
මා නිෂාද ප්රතිෂ්ඨාං ත්වමගමශ්ශාශ්වතීස්සමාඃ ।
යත්ක්රෞංචමිථුනාදේකමවධීඃ කාමමෝහිතම් ॥ 15 ॥
15 තස්යෛවං බ්රුවතශ්චිංතා බභූව හෘදි වීක්ෂතඃ ।
ශෝකාර්තේනාස්ය ශකුනේඃ කිමිදං ව්යාහෘතං මයා ॥ 16 ॥
චිංතයන්ස මහාප්රාජ්ඤශ්චකාර මතිමාන්මතිම් ।
ශිෂ්යං චෛවාऽබ්රවීද්වාක්යමිදං ස මුනිපුංගවඃ ॥ 17 ॥
පාදබද්ධෝऽක්ෂරසමස්තංත්රීලයසමන්විතඃ ।
ශෝකාර්තස්ය ප්රවෘත්තෝ මේ ශ්ලෝකෝ භවතු නාන්යථා ॥ 18 ॥
ශිෂ්යස්තු තස්ය බ්රුවතෝ මුනේර්වාක්යමනුත්තමම් ।
ප්රතිජග්රාහ සංහෘෂ්ටස්තස්ය තුෂ්ටෝऽභවද්ගුරුඃ ॥ 19 ॥
සෝऽභිෂේකං තතඃ කෘත්වා තීර්ථේ තස්මින්යථාවිධි ।
තමේව චිංතයන්නර්ථමුපාවර්තත වෛ මුනිඃ ॥ 20 ॥
භරද්වාජස්තතශ්ශිෂ්යෝ විනීතශ්ශ්රුතවාන්මුනේඃ ।
කලශං පූර්ණමාදාය පෘෂ්ඨතෝऽනුජගාම හ ॥ 21 ॥
ස ප්රවිශ්යාශ්රමපදං ශිෂ්යේණ සහ ධර්මවිත් ।
උපවිෂ්ටඃ කථාශ්චාන්යාශ්චකාර ධ්යානමාස්ථිතඃ ॥ 22 ॥
ආජගාම තතෝ බ්රහ්මා ලෝකකර්තා ස්වයං ප්රභුඃ ।
චතුර්මුඛෝ මහාතේජා ද්රෂ්ටුං තං මුනිපුංගවම් ॥ 23 ॥
වාල්මීකිරථ තං දෘෂ්ට්වා සහසෝත්ථාය වාග්යතඃ ।
ප්රාංජලිඃ ප්රයතෝ භූත්වා තස්ථෞ පරමවිස්මිතඃ ॥ 24 ॥
පූජයාමාස තං දේවං පාද්යාර්ඝ්යාසනවංදනෛඃ ।
ප්රණම්ය විධිවච්චෛනං පෘෂ්ට්වාऽනාමයමව්යයම් ॥ 25 ॥
අථෝපවිශ්ය භගවානාසනේ පරමාර්චිතේ ।
වාල්මීකයේ මහර්ෂයේ සංදිදේශාසනං තතඃ ॥ 26 ॥
බ්රහ්මණා සමනුජ්ඤාතස්සෝऽප්යුපාවිශදාසනේ ।
උපවිෂ්ටේ තදා තස්මින්සර්වලෝකපිතාමහේ ।
තද්ගතේනෛව මනසා වාල්මීකිර්ධ්යානමාස්ථිතඃ ॥ 27 ॥
පාපාත්මනා කෘතං කෂ්ටං වෛරග්රහණබුද්ධිනා ।
යස්තාදෘශං චාරුරවං ක්රෞංචං හන්යාදකාරණාත් ॥ 28 ॥
ශෝචන්නේව මුහුඃ ක්රෞංචීමුපශ්ලෝකමිමං පුනඃ ।
ජගාවංතර්ගතමනා භූත්වා ශෝකපරායණඃ ॥ 29 ॥
තමුවාච තතෝ බ්රහ්මා ප්රහසන්මුනිපුංගවම් ।
ශ්ලෝක ඒව ත්වයා බද්ධෝ නාත්ර කාර්යා විචාරණා ॥ 30 ॥
මච්ඡංදාදේව තේ බ්රහ්මන් ප්රවෘත්තේයං සරස්වතී ।
රාමස්ය චරිතං සර්වං කුරු ත්වමෘෂිසත්තම ॥ 31 ॥
ධර්මාත්මනෝ ගුණවතෝ ලෝකේ රාමස්ය ධීමතඃ ।
වෘත්තං කථය ධීරස්ය යථා තේ නාරදාච්ඡ්රුතම් ॥ 32 ॥
රහස්යං ච ප්රකාශං ච යද්වෘත්තං තස්ය ධීමතඃ ।
රාමස්ය සහසෞමිත්රේඃ රාක්ෂසානාං ච සර්වශඃ ॥ 33 ॥
වෛදේහ්යාශ්චෛව යද්වෘත්තං ප්රකාශං යදි වා රහඃ ।
තච්චාප්යවිදිතං සර්වං විදිතං තේ භවිෂ්යති ॥ 34 ॥
න තේ වාගනෘතා කාව්යේ කාචිදත්ර භවිෂ්යති ।
කුරු රාමකථාං පුණ්යාං ශ්ලෝකබද්ධාං මනෝරමාම් ॥ 35 ॥
යාවත් ස්ථාස්යංති ගිරයස්සරිතශ්ච මහීතලේ ।
තාවද්රාමායණකථා ලෝකේෂු ප්රචරිෂ්යති ॥ 36 ॥
යාවද්රාමායණකථා ත්වත්කෘතා ප්රචරිෂ්යති ।
තාවදූර්ධ්වමධශ්ච ත්වං මල්ලෝකේෂු නිවත්ස්යසි ॥ 37 ॥
ඉත්යුක්ත්වා භගවාන්බ්රහ්මා තත්රෛවාංතරධීයත ।
තතස්සශිෂ්යෝ භගවාන්මුනිර්විස්මයමායයෞ ॥ 38 ॥
තස්ය ශිෂ්යාස්තතස්සර්වේ ජගුශ්ශ්ලෝකමිමං පුනඃ ।
මුහුර්මුහුඃ ප්රීයමාණාඃ ප්රාහුශ්ච භෘශවිස්මිතාඃ ॥ 39 ॥
සමාක්ෂරෛශ්චතුර්භිර්යඃ පාදෛර්ගීතෝ මහර්ෂිණා ।
සෝऽනුව්යාහරණාද්භූයශ්ශ්ලෝකශ්ශ්ලෝකත්වමාගතඃ ॥ 40 ॥
තස්ය බුද්ධිරියං ජාතා වාල්මීකේර්භාවිතාත්මනඃ ।
කෘත්ස්නං රාමායණං කාව්යමීදෘශෛඃ කරවාණ්යහම් ॥ 41 ॥
උදාරවෘත්තාර්ථපදෛර්මනෝරමෛඃ තදාස්ය රාමස්ය චකාරකීර්තිමාන් ।
සමාක්ෂරෛශ්ශ්ලෝකශතෛර්යශස්විනෝ යශස්කරං කාව්යමුදාරධීර්මුනිඃ ॥ 42 ॥
තදුපගතසමාසසංධියෝගං සමමධුරෝපනතාර්ථවාක්යබද්ධම් ।
රඝුවරචරිතං මුනිප්රණීතං දශශිරසශ්ච වධං නිශාමයධ්වම් ॥ 43 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ද්විතීයස්සර්ගඃ ॥
