ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଷଟ୍ତ୍ରିଂଶସ୍ସର୍ଗଃ ।
ଉକ୍ତଵାକ୍ୟେ ମୁନୌ ତସ୍ମିନ୍ନୁଭୌ ରାଘଵଲକ୍ଷ୍ମଣୌ ।
ପ୍ରତିନଂଦ୍ୟ କଥାଂ ଵୀରାଵୂଚତୁର୍ମୁନିପୁଂଗଵମ୍ ॥ 1 ॥
ଧର୍ମୟୁକ୍ତମିଦଂ ବ୍ରହ୍ମନ୍ କଥିତଂ ପରମଂ ତ୍ଵୟା ।
ଦୁହିତୁଶ୍ଶୈଲରାଜସ୍ୟ ଜ୍ୟେଷ୍ଠାୟା ଵକ୍ତୁମର୍ହସି ॥ 2 ॥
ଵିସ୍ତରଂ ଵିସ୍ତରଜ୍ଞୋଽସି ଦିଵ୍ୟମାନୁଷସଂଭଵମ୍ ।
ତ୍ରୀନ୍ ପଥୋ ହେତୁନା କେନ ପ୍ଲାଵୟେଲ୍ଲୋକପାଵନୀ ॥ 3 ॥
କଥଂ ଗଂଗା ତ୍ରିପଥଗା ଵିଶ୍ରୁତା ସରିଦୁତ୍ତମା ।
ତ୍ରିଷୁ ଲୋକେଷୁ ଧର୍ମଜ୍ଞ କର୍ମଭିଃ କୈସ୍ସମନ୍ଵିତା ॥ 4 ॥
ତଥା ବ୍ରୁଵତି କାକୁତ୍ସ୍ଥେ ଵିଶ୍ଵାମିତ୍ରସ୍ତପୋଧନଃ ।
ନିଖିଲେନ କଥାଂ ସର୍ଵାମୃଷିମଧ୍ୟେ ନ୍ୟଵେଦୟତ୍ ॥ 5 ॥
ପୁରା ରାମ କୃତୋଦ୍ଵାହୋ ନୀଲକଂଠୋ ମହାତପାଃ ।
ଦୃଷ୍ଟ୍ଵା ଚ ସ୍ପୃହୟା ଦେଵୀଂ ମୈଥୁନାୟୋପଚକ୍ରମେ ॥ 6 ॥
ଶିତିକଂଠସ୍ୟ ଦେଵସ୍ୟ ଦିଵ୍ୟଂ ଵର୍ଷଶତଂ ଗତମ୍ ।
ନ ଚାପି ତନୟୋ ରାମ ତସ୍ୟାମାସୀତ୍ ପରଂତପ ॥ 7 ॥
ତତୋ ଦେଵାସ୍ସମୁଦ୍ଵିଗ୍ନାଃ ପିତାମହପୁରୋଗମାଃ ।
ୟଦିହୋତ୍ପଦ୍ୟତେ ଭୂତଂ କସ୍ତତ୍ପ୍ରତିସହିଷ୍ୟତେ ॥ 8 ॥
ଅଭିଗମ୍ୟ ସୁରାସ୍ସର୍ଵେ ପ୍ରଣିପତ୍ୟେଦମବ୍ରୁଵନ୍ ।
ଦେଵ ଦେଵ ମହାଦେଵ ଲୋକସ୍ୟାସ୍ୟ ହିତେ ରତ ॥ 9 ॥
ସୁରାଣାଂ ପ୍ରଣିପାତେନ ପ୍ରସାଦଂ କର୍ତୁମର୍ହସି ।
ନ ଲୋକା ଧାରୟିଷ୍ୟଂତି ତଵ ତେଜସ୍ସୁରୋତ୍ତମ ॥ 10 ॥
ବ୍ରାହ୍ମେଣ ତପସା ୟୁକ୍ତୋ ଦେଵ୍ୟା ସହ ତପଶ୍ଚର ।
ତ୍ରୈଲୋକ୍ୟହିତକାମାର୍ଥଂ ତେଜସ୍ତେଜସି ଧାରୟ ॥ 11 ॥
ଦେଵତାନାଂ ଵଚଶ୍ଶ୍ରୁତ୍ଵା ସର୍ଵଲୋକମହେଶ୍ଵରଃ ।
ବାଢମିତ୍ୟବ୍ରଵୀତ୍ସର୍ଵାନ୍ପୁନଶ୍ଚୈଵମୁଵାଚ ହ ॥ 12 ॥
ଧାରୟିଷ୍ୟାମ୍ୟହଂ ତେଜସ୍ତେଜସ୍ୟେଵ ସହୋମୟା ।
ତ୍ରିଦଶାଃ ପୃଥିଵୀ ଚୈଵ ନିର୍ଵାଣମଧିଗଚ୍ଛତୁ ॥ 13 ॥
ୟଦିଦଂ କ୍ଷୁଭିତଂ ସ୍ଥାନାନ୍ମମ ତେଜୋ ହ୍ୟନୁତ୍ତମମ୍ ।
ଧାରୟିଷ୍ୟତି କସ୍ତନ୍ମେ ବ୍ରୁଵଂତୁ ସୁରସତ୍ତମାଃ ॥ 14 ॥
ଏଵମୁକ୍ତାସ୍ସୁରାସ୍ସର୍ଵେ ପ୍ରତ୍ୟୂଚୁର୍ଵୃଷଭଧ୍ଵଜମ୍ ।
ୟତ୍ତେଜଃ କ୍ଷୁଭିତଂ ହ୍ୟେତତ୍ତଦ୍ଧରା ଧାରୟିଷ୍ୟତି ॥ 15 ॥
ଏଵମୁକ୍ତସ୍ସୁରପତିଃ ପ୍ରମୁମୋଚ ମହୀତଲେ ।
ତେଜସା ପୃଥିଵୀ ୟେନ ଵ୍ୟାପ୍ତା ସଗିରିକାନନା ॥ 16 ॥
ତତୋ ଦେଵାଃ ପୁନରିଦମୂଚୁଶ୍ଚାଥ ହୁତାଶନମ୍ ।
ପ୍ରଵିଶ ତ୍ଵଂ ମହାତେଜୋ ରୌଦ୍ରଂ ଵାୟୁସମନ୍ଵିତଃ ॥ 17 ॥
ତଦଗ୍ନିନା ପୁନର୍ଵ୍ୟାପ୍ତଂ ସଂଜାତଶ୍ଶ୍ଵେତପର୍ଵତଃ ।
ଦିଵ୍ୟଂ ଶରଵଣଂ ଚୈଵ ପାଵକାଦିତ୍ୟସନ୍ନିଭମ୍ ॥ 18 ॥
ୟତ୍ର ଜାତୋ ମହାତେଜାଃ କାର୍ତିକେୟୋଽଗ୍ନିସଂଭଵଃ ।
ଅଥୋମାଂ ଚ ଶିଵଂ ଚୈଵ ଦେଵାସ୍ସର୍ଷିଗଣାସ୍ତଦା ।
ପୂଜୟାମାସୁରତ୍ୟର୍ଥଂ ସୁପ୍ରୀତମନସସ୍ତତଃ ॥ 19 ॥
ଅଥ ଶୈଲସୁତା ରାମ ତ୍ରିଦଶାନିଦମବ୍ରଵୀତ୍ ।
ସମନ୍ୟୁରଶପତ୍ସର୍ଵାନ୍ କ୍ରୋଧସଂରକ୍ତଲୋଚନା ॥ 20 ॥
ୟସ୍ମାନ୍ନିଵାରିତା ଚୈଵ ସଂଗତିଃ ପୁତ୍ରକାମ୍ୟୟା ।
ଅପତ୍ୟଂ ସ୍ଵେଷୁ ଦାରେଷୁ ତସ୍ମାନ୍ନୋତ୍ପାଦୟିଷ୍ୟଥ ॥ 21 ॥
ଅଦ୍ୟପ୍ରଭୃତି ୟୁଷ୍ମାକମପ୍ରଜାସ୍ସଂତୁ ପତ୍ନୟଃ ॥ 22 ॥
ଏଵମୁକ୍ତ୍ଵାସୁରାନ୍ ସର୍ଵାନ୍ ଶଶାପ ପୃଥିଵୀମପି ।
ଅଵନେ ନୈକରୂପା ତ୍ଵଂ ବହୁଭାର୍ୟା ଭଵିଷ୍ୟସି ॥ 23 ॥
ନ ଚ ପୁତ୍ରକୃତାଂ ପ୍ରୀତିଂ ମତ୍କ୍ରୋଧକଲୁଷୀକୃତା ।
ପ୍ରାପ୍ସ୍ୟସି ତ୍ଵଂ ସୁଦୁର୍ମେଧେ ମମ ପୁତ୍ରମନିଚ୍ଛତୀ ॥ 24 ॥
ତାନ୍ ସର୍ଵାନ୍ ଵ୍ରୀଡିତାନ୍ ଦୃଷ୍ଟ୍ଵା ସୁରାନ୍ସୁରପତିସ୍ତଦା ।
ଗମନାୟୋପଚକ୍ରାମ ଦିଶଂ ଵରୁଣପାଲିତାମ୍ ॥ 25 ॥
ସ ଗତ୍ଵା ତପ ଆତିଷ୍ଠତ୍ପାର୍ଶ୍ଵେ ତସ୍ୟୋତ୍ତରେ ଗିରୌ ।
ହିମଵତ୍ପ୍ରଭଵେ ଶୃଂଗେ ସହ ଦେଵ୍ୟା ମହେଶ୍ଵରଃ ॥ 26 ॥
ଏଷ ତେ ଵିସ୍ତରୋ ରାମ ଶୈଲପୁତ୍ର୍ୟା ନିଵେଦିତଃ ।
ଗଂଗାୟାଃ ପ୍ରଭଵଂ ଚୈଵ ଶୃଣୁ ମେ ସହଲକ୍ଷ୍ମଣଃ ॥ 27 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଷଟ୍ତ୍ରିଂଶସ୍ସର୍ଗଃ ॥
