ශ්රීමද්වාල්මීකීය රාමායණේ බාලකාංඩම් ।
අථ ෂට්ත්රිංශස්සර්ගඃ ।
උක්තවාක්යේ මුනෞ තස්මින්නුභෞ රාඝවලක්ෂ්මණෞ ।
ප්රතිනංද්ය කථාං වීරාවූචතුර්මුනිපුංගවම් ॥ 1 ॥
ධර්මයුක්තමිදං බ්රහ්මන් කථිතං පරමං ත්වයා ।
දුහිතුශ්ශෛලරාජස්ය ජ්යේෂ්ඨායා වක්තුමර්හසි ॥ 2 ॥
විස්තරං විස්තරජ්ඤෝऽසි දිව්යමානුෂසංභවම් ।
ත්රීන් පථෝ හේතුනා කේන ප්ලාවයේල්ලෝකපාවනී ॥ 3 ॥
කථං ගංගා ත්රිපථගා විශ්රුතා සරිදුත්තමා ।
ත්රිෂු ලෝකේෂු ධර්මජ්ඤ කර්මභිඃ කෛස්සමන්විතා ॥ 4 ॥
තථා බ්රුවති කාකුත්ස්ථේ විශ්වාමිත්රස්තපෝධනඃ ।
නිඛිලේන කථාං සර්වාමෘෂිමධ්යේ න්යවේදයත් ॥ 5 ॥
පුරා රාම කෘතෝද්වාහෝ නීලකංඨෝ මහාතපාඃ ।
දෘෂ්ට්වා ච ස්පෘහයා දේවීං මෛථුනායෝපචක්රමේ ॥ 6 ॥
ශිතිකංඨස්ය දේවස්ය දිව්යං වර්ෂශතං ගතම් ।
න චාපි තනයෝ රාම තස්යාමාසීත් පරංතප ॥ 7 ॥
තතෝ දේවාස්සමුද්විග්නාඃ පිතාමහපුරෝගමාඃ ।
යදිහෝත්පද්යතේ භූතං කස්තත්ප්රතිසහිෂ්යතේ ॥ 8 ॥
අභිගම්ය සුරාස්සර්වේ ප්රණිපත්යේදමබ්රුවන් ।
දේව දේව මහාදේව ලෝකස්යාස්ය හිතේ රත ॥ 9 ॥
සුරාණාං ප්රණිපාතේන ප්රසාදං කර්තුමර්හසි ।
න ලෝකා ධාරයිෂ්යංති තව තේජස්සුරෝත්තම ॥ 10 ॥
බ්රාහ්මේණ තපසා යුක්තෝ දේව්යා සහ තපශ්චර ।
ත්රෛලෝක්යහිතකාමාර්ථං තේජස්තේජසි ධාරය ॥ 11 ॥
දේවතානාං වචශ්ශ්රුත්වා සර්වලෝකමහේශ්වරඃ ।
බාඪමිත්යබ්රවීත්සර්වාන්පුනශ්චෛවමුවාච හ ॥ 12 ॥
ධාරයිෂ්යාම්යහං තේජස්තේජස්යේව සහෝමයා ।
ත්රිදශාඃ පෘථිවී චෛව නිර්වාණමධිගච්ඡතු ॥ 13 ॥
යදිදං ක්ෂුභිතං ස්ථානාන්මම තේජෝ හ්යනුත්තමම් ।
ධාරයිෂ්යති කස්තන්මේ බ්රුවංතු සුරසත්තමාඃ ॥ 14 ॥
ඒවමුක්තාස්සුරාස්සර්වේ ප්රත්යූචුර්වෘෂභධ්වජම් ।
යත්තේජඃ ක්ෂුභිතං හ්යේතත්තද්ධරා ධාරයිෂ්යති ॥ 15 ॥
ඒවමුක්තස්සුරපතිඃ ප්රමුමෝච මහීතලේ ।
තේජසා පෘථිවී යේන ව්යාප්තා සගිරිකානනා ॥ 16 ॥
තතෝ දේවාඃ පුනරිදමූචුශ්චාථ හුතාශනම් ।
ප්රවිශ ත්වං මහාතේජෝ රෞද්රං වායුසමන්විතඃ ॥ 17 ॥
තදග්නිනා පුනර්ව්යාප්තං සංජාතශ්ශ්වේතපර්වතඃ ।
දිව්යං ශරවණං චෛව පාවකාදිත්යසන්නිභම් ॥ 18 ॥
යත්ර ජාතෝ මහාතේජාඃ කාර්තිකේයෝऽග්නිසංභවඃ ।
අථෝමාං ච ශිවං චෛව දේවාස්සර්ෂිගණාස්තදා ।
පූජයාමාසුරත්යර්ථං සුප්රීතමනසස්තතඃ ॥ 19 ॥
අථ ශෛලසුතා රාම ත්රිදශානිදමබ්රවීත් ।
සමන්යුරශපත්සර්වාන් ක්රෝධසංරක්තලෝචනා ॥ 20 ॥
යස්මාන්නිවාරිතා චෛව සංගතිඃ පුත්රකාම්යයා ।
අපත්යං ස්වේෂු දාරේෂු තස්මාන්නෝත්පාදයිෂ්යථ ॥ 21 ॥
අද්යප්රභෘති යුෂ්මාකමප්රජාස්සංතු පත්නයඃ ॥ 22 ॥
ඒවමුක්ත්වාසුරාන් සර්වාන් ශශාප පෘථිවීමපි ।
අවනේ නෛකරූපා ත්වං බහුභාර්යා භවිෂ්යසි ॥ 23 ॥
න ච පුත්රකෘතාං ප්රීතිං මත්ක්රෝධකලුෂීකෘතා ।
ප්රාප්ස්යසි ත්වං සුදුර්මේධේ මම පුත්රමනිච්ඡතී ॥ 24 ॥
තාන් සර්වාන් ව්රීඩිතාන් දෘෂ්ට්වා සුරාන්සුරපතිස්තදා ।
ගමනායෝපචක්රාම දිශං වරුණපාලිතාම් ॥ 25 ॥
ස ගත්වා තප ආතිෂ්ඨත්පාර්ශ්වේ තස්යෝත්තරේ ගිරෞ ।
හිමවත්ප්රභවේ ශෘංගේ සහ දේව්යා මහේශ්වරඃ ॥ 26 ॥
ඒෂ තේ විස්තරෝ රාම ශෛලපුත්ර්යා නිවේදිතඃ ।
ගංගායාඃ ප්රභවං චෛව ශෘණු මේ සහලක්ෂ්මණඃ ॥ 27 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ෂට්ත්රිංශස්සර්ගඃ ॥
