śrīmadvālmīkīya rāmāyaṇē bālakāṇḍam ।
atha ṣaṭtriṃśassargaḥ ।
uktavākyē munau tasminnubhau rāghavalakṣmaṇau ।
pratinandya kathāṃ vīrāvūchaturmunipuṅgavam ॥ 1 ॥
dharmayuktamidaṃ brahman kathitaṃ paramaṃ tvayā ।
duhituśśailarājasya jyēṣṭhāyā vaktumarhasi ॥ 2 ॥
vistaraṃ vistarajñō'si divyamānuṣasambhavam ।
trīn pathō hētunā kēna plāvayēllōkapāvanī ॥ 3 ॥
kathaṃ gaṅgā tripathagā viśrutā sariduttamā ।
triṣu lōkēṣu dharmajña karmabhiḥ kaissamanvitā ॥ 4 ॥
tathā bruvati kākutsthē viśvāmitrastapōdhanaḥ ।
nikhilēna kathāṃ sarvāmṛṣimadhyē nyavēdayat ॥ 5 ॥
purā rāma kṛtōdvāhō nīlakaṇṭhō mahātapāḥ ।
dṛṣṭvā cha spṛhayā dēvīṃ maithunāyōpachakramē ॥ 6 ॥
śitikaṇṭhasya dēvasya divyaṃ varṣaśataṃ gatam ।
na chāpi tanayō rāma tasyāmāsīt parantapa ॥ 7 ॥
tatō dēvāssamudvignāḥ pitāmahapurōgamāḥ ।
yadihōtpadyatē bhūtaṃ kastatpratisahiṣyatē ॥ 8 ॥
abhigamya surāssarvē praṇipatyēdamabruvan ।
dēva dēva mahādēva lōkasyāsya hitē rata ॥ 9 ॥
surāṇāṃ praṇipātēna prasādaṃ kartumarhasi ।
na lōkā dhārayiṣyanti tava tējassurōttama ॥ 10 ॥
brāhmēṇa tapasā yuktō dēvyā saha tapaśchara ।
trailōkyahitakāmārthaṃ tējastējasi dhāraya ॥ 11 ॥
dēvatānāṃ vachaśśrutvā sarvalōkamahēśvaraḥ ।
bāḍhamityabravītsarvānpunaśchaivamuvācha ha ॥ 12 ॥
dhārayiṣyāmyahaṃ tējastējasyēva sahōmayā ।
tridaśāḥ pṛthivī chaiva nirvāṇamadhigachChatu ॥ 13 ॥
yadidaṃ kṣubhitaṃ sthānānmama tējō hyanuttamam ।
dhārayiṣyati kastanmē bruvantu surasattamāḥ ॥ 14 ॥
ēvamuktāssurāssarvē pratyūchurvṛṣabhadhvajam ।
yattējaḥ kṣubhitaṃ hyētattaddharā dhārayiṣyati ॥ 15 ॥
ēvamuktassurapatiḥ pramumōcha mahītalē ।
tējasā pṛthivī yēna vyāptā sagirikānanā ॥ 16 ॥
tatō dēvāḥ punaridamūchuśchātha hutāśanam ।
praviśa tvaṃ mahātējō raudraṃ vāyusamanvitaḥ ॥ 17 ॥
tadagninā punarvyāptaṃ sañjātaśśvētaparvataḥ ।
divyaṃ śaravaṇaṃ chaiva pāvakādityasannibham ॥ 18 ॥
yatra jātō mahātējāḥ kārtikēyō'gnisambhavaḥ ।
athōmāṃ cha śivaṃ chaiva dēvāssarṣigaṇāstadā ।
pūjayāmāsuratyarthaṃ suprītamanasastataḥ ॥ 19 ॥
atha śailasutā rāma tridaśānidamabravīt ।
samanyuraśapatsarvān krōdhasaṃraktalōchanā ॥ 20 ॥
yasmānnivāritā chaiva saṅgatiḥ putrakāmyayā ।
apatyaṃ svēṣu dārēṣu tasmānnōtpādayiṣyatha ॥ 21 ॥
adyaprabhṛti yuṣmākamaprajāssantu patnayaḥ ॥ 22 ॥
ēvamuktvāsurān sarvān śaśāpa pṛthivīmapi ।
avanē naikarūpā tvaṃ bahubhāryā bhaviṣyasi ॥ 23 ॥
na cha putrakṛtāṃ prītiṃ matkrōdhakaluṣīkṛtā ।
prāpsyasi tvaṃ sudurmēdhē mama putramanichChatī ॥ 24 ॥
tān sarvān vrīḍitān dṛṣṭvā surānsurapatistadā ।
gamanāyōpachakrāma diśaṃ varuṇapālitām ॥ 25 ॥
sa gatvā tapa ātiṣṭhatpārśvē tasyōttarē girau ।
himavatprabhavē śṛṅgē saha dēvyā mahēśvaraḥ ॥ 26 ॥
ēṣa tē vistarō rāma śailaputryā nivēditaḥ ।
gaṅgāyāḥ prabhavaṃ chaiva śṛṇu mē sahalakṣmaṇaḥ ॥ 27 ॥
ityārṣē śrīmadrāmāyaṇē vālmīkīya ādikāvyē bālakāṇḍē ṣaṭtriṃśassargaḥ ॥
