ശ്രീമദ്വാല്മീകീയ രാമായണേ ബാലകാംഡമ് ।
അഥ ഷട്ത്രിംശസ്സര്ഗഃ ।
ഉക്തവാക്യേ മുനൌ തസ്മിന്നുഭൌ രാഘവലക്ഷ്മണൌ ।
പ്രതിനംദ്യ കഥാം വീരാവൂചതുര്മുനിപുംഗവമ് ॥ 1 ॥
ധര്മയുക്തമിദം ബ്രഹ്മന് കഥിതം പരമം ത്വയാ ।
ദുഹിതുശ്ശൈലരാജസ്യ ജ്യേഷ്ഠായാ വക്തുമര്ഹസി ॥ 2 ॥
വിസ്തരം വിസ്തരജ്ഞോഽസി ദിവ്യമാനുഷസംഭവമ് ।
ത്രീന് പഥോ ഹേതുനാ കേന പ്ലാവയേല്ലോകപാവനീ ॥ 3 ॥
കഥം ഗംഗാ ത്രിപഥഗാ വിശ്രുതാ സരിദുത്തമാ ।
ത്രിഷു ലോകേഷു ധര്മജ്ഞ കര്മഭിഃ കൈസ്സമന്വിതാ ॥ 4 ॥
തഥാ ബ്രുവതി കാകുത്സ്ഥേ വിശ്വാമിത്രസ്തപോധനഃ ।
നിഖിലേന കഥാം സർവാമൃഷിമധ്യേ ന്യവേദയത് ॥ 5 ॥
പുരാ രാമ കൃതോദ്വാഹോ നീലകംഠോ മഹാതപാഃ ।
ദൃഷ്ട്വാ ച സ്പൃഹയാ ദേവീം മൈഥുനായോപചക്രമേ ॥ 6 ॥
ശിതികംഠസ്യ ദേവസ്യ ദിവ്യം വര്ഷശതം ഗതമ് ।
ന ചാപി തനയോ രാമ തസ്യാമാസീത് പരംതപ ॥ 7 ॥
തതോ ദേവാസ്സമുദ്വിഗ്നാഃ പിതാമഹപുരോഗമാഃ ।
യദിഹോത്പദ്യതേ ഭൂതം കസ്തത്പ്രതിസഹിഷ്യതേ ॥ 8 ॥
അഭിഗമ്യ സുരാസ്സർവേ പ്രണിപത്യേദമബ്രുവന് ।
ദേവ ദേവ മഹാദേവ ലോകസ്യാസ്യ ഹിതേ രത ॥ 9 ॥
സുരാണാം പ്രണിപാതേന പ്രസാദം കര്തുമര്ഹസി ।
ന ലോകാ ധാരയിഷ്യംതി തവ തേജസ്സുരോത്തമ ॥ 10 ॥
ബ്രാഹ്മേണ തപസാ യുക്തോ ദേവ്യാ സഹ തപശ്ചര ।
ത്രൈലോക്യഹിതകാമാര്ഥം തേജസ്തേജസി ധാരയ ॥ 11 ॥
ദേവതാനാം വചശ്ശ്രുത്വാ സർവലോകമഹേശ്വരഃ ।
ബാഢമിത്യബ്രവീത്സർവാന്പുനശ്ചൈവമുവാച ഹ ॥ 12 ॥
ധാരയിഷ്യാമ്യഹം തേജസ്തേജസ്യേവ സഹോമയാ ।
ത്രിദശാഃ പൃഥിവീ ചൈവ നിർവാണമധിഗച്ഛതു ॥ 13 ॥
യദിദം ക്ഷുഭിതം സ്ഥാനാന്മമ തേജോ ഹ്യനുത്തമമ് ।
ധാരയിഷ്യതി കസ്തന്മേ ബ്രുവംതു സുരസത്തമാഃ ॥ 14 ॥
ഏവമുക്താസ്സുരാസ്സർവേ പ്രത്യൂചുർവൃഷഭധ്വജമ് ।
യത്തേജഃ ക്ഷുഭിതം ഹ്യേതത്തദ്ധരാ ധാരയിഷ്യതി ॥ 15 ॥
ഏവമുക്തസ്സുരപതിഃ പ്രമുമോച മഹീതലേ ।
തേജസാ പൃഥിവീ യേന വ്യാപ്താ സഗിരികാനനാ ॥ 16 ॥
തതോ ദേവാഃ പുനരിദമൂചുശ്ചാഥ ഹുതാശനമ് ।
പ്രവിശ ത്വം മഹാതേജോ രൌദ്രം വായുസമന്വിതഃ ॥ 17 ॥
തദഗ്നിനാ പുനർവ്യാപ്തം സംജാതശ്ശ്വേതപർവതഃ ।
ദിവ്യം ശരവണം ചൈവ പാവകാദിത്യസന്നിഭമ് ॥ 18 ॥
യത്ര ജാതോ മഹാതേജാഃ കാര്തികേയോഽഗ്നിസംഭവഃ ।
അഥോമാം ച ശിവം ചൈവ ദേവാസ്സര്ഷിഗണാസ്തദാ ।
പൂജയാമാസുരത്യര്ഥം സുപ്രീതമനസസ്തതഃ ॥ 19 ॥
അഥ ശൈലസുതാ രാമ ത്രിദശാനിദമബ്രവീത് ।
സമന്യുരശപത്സർവാന് ക്രോധസംരക്തലോചനാ ॥ 20 ॥
യസ്മാന്നിവാരിതാ ചൈവ സംഗതിഃ പുത്രകാമ്യയാ ।
അപത്യം സ്വേഷു ദാരേഷു തസ്മാന്നോത്പാദയിഷ്യഥ ॥ 21 ॥
അദ്യപ്രഭൃതി യുഷ്മാകമപ്രജാസ്സംതു പത്നയഃ ॥ 22 ॥
ഏവമുക്ത്വാസുരാന് സർവാന് ശശാപ പൃഥിവീമപി ।
അവനേ നൈകരൂപാ ത്വം ബഹുഭാര്യാ ഭവിഷ്യസി ॥ 23 ॥
ന ച പുത്രകൃതാം പ്രീതിം മത്ക്രോധകലുഷീകൃതാ ।
പ്രാപ്സ്യസി ത്വം സുദുര്മേധേ മമ പുത്രമനിച്ഛതീ ॥ 24 ॥
താന് സർവാന് വ്രീഡിതാന് ദൃഷ്ട്വാ സുരാന്സുരപതിസ്തദാ ।
ഗമനായോപചക്രാമ ദിശം വരുണപാലിതാമ് ॥ 25 ॥
സ ഗത്വാ തപ ആതിഷ്ഠത്പാര്ശ്വേ തസ്യോത്തരേ ഗിരൌ ।
ഹിമവത്പ്രഭവേ ശൃംഗേ സഹ ദേവ്യാ മഹേശ്വരഃ ॥ 26 ॥
ഏഷ തേ വിസ്തരോ രാമ ശൈലപുത്ര്യാ നിവേദിതഃ ।
ഗംഗായാഃ പ്രഭവം ചൈവ ശൃണു മേ സഹലക്ഷ്മണഃ ॥ 27 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ഷട്ത്രിംശസ്സര്ഗഃ ॥
