శ్రీమద్వాల్మీకీయ రామాయణే బాలకాండమ్ ।
అథ షట్త్రింశస్సర్గః ।
ఉక్తవాక్యే మునౌ తస్మిన్నుభౌ రాఘవలక్ష్మణౌ ।
ప్రతినంద్య కథాం వీరావూచతుర్మునిపుంగవమ్ ॥ 1 ॥
ధర్మయుక్తమిదం బ్రహ్మన్ కథితం పరమం త్వయా ।
దుహితుశ్శైలరాజస్య జ్యేష్ఠాయా వక్తుమర్హసి ॥ 2 ॥
విస్తరం విస్తరజ్ఞోఽసి దివ్యమానుషసంభవమ్ ।
త్రీన్ పథో హేతునా కేన ప్లావయేల్లోకపావనీ ॥ 3 ॥
కథం గంగా త్రిపథగా విశ్రుతా సరిదుత్తమా ।
త్రిషు లోకేషు ధర్మజ్ఞ కర్మభిః కైస్సమన్వితా ॥ 4 ॥
తథా బ్రువతి కాకుత్స్థే విశ్వామిత్రస్తపోధనః ।
నిఖిలేన కథాం సర్వామృషిమధ్యే న్యవేదయత్ ॥ 5 ॥
పురా రామ కృతోద్వాహో నీలకంఠో మహాతపాః ।
దృష్ట్వా చ స్పృహయా దేవీం మైథునాయోపచక్రమే ॥ 6 ॥
శితికంఠస్య దేవస్య దివ్యం వర్షశతం గతమ్ ।
న చాపి తనయో రామ తస్యామాసీత్ పరంతప ॥ 7 ॥
తతో దేవాస్సముద్విగ్నాః పితామహపురోగమాః ।
యదిహోత్పద్యతే భూతం కస్తత్ప్రతిసహిష్యతే ॥ 8 ॥
అభిగమ్య సురాస్సర్వే ప్రణిపత్యేదమబ్రువన్ ।
దేవ దేవ మహాదేవ లోకస్యాస్య హితే రత ॥ 9 ॥
సురాణాం ప్రణిపాతేన ప్రసాదం కర్తుమర్హసి ।
న లోకా ధారయిష్యంతి తవ తేజస్సురోత్తమ ॥ 10 ॥
బ్రాహ్మేణ తపసా యుక్తో దేవ్యా సహ తపశ్చర ।
త్రైలోక్యహితకామార్థం తేజస్తేజసి ధారయ ॥ 11 ॥
దేవతానాం వచశ్శ్రుత్వా సర్వలోకమహేశ్వరః ।
బాఢమిత్యబ్రవీత్సర్వాన్పునశ్చైవమువాచ హ ॥ 12 ॥
ధారయిష్యామ్యహం తేజస్తేజస్యేవ సహోమయా ।
త్రిదశాః పృథివీ చైవ నిర్వాణమధిగచ్ఛతు ॥ 13 ॥
యదిదం క్షుభితం స్థానాన్మమ తేజో హ్యనుత్తమమ్ ।
ధారయిష్యతి కస్తన్మే బ్రువంతు సురసత్తమాః ॥ 14 ॥
ఏవముక్తాస్సురాస్సర్వే ప్రత్యూచుర్వృషభధ్వజమ్ ।
యత్తేజః క్షుభితం హ్యేతత్తద్ధరా ధారయిష్యతి ॥ 15 ॥
ఏవముక్తస్సురపతిః ప్రముమోచ మహీతలే ।
తేజసా పృథివీ యేన వ్యాప్తా సగిరికాననా ॥ 16 ॥
తతో దేవాః పునరిదమూచుశ్చాథ హుతాశనమ్ ।
ప్రవిశ త్వం మహాతేజో రౌద్రం వాయుసమన్వితః ॥ 17 ॥
తదగ్నినా పునర్వ్యాప్తం సంజాతశ్శ్వేతపర్వతః ।
దివ్యం శరవణం చైవ పావకాదిత్యసన్నిభమ్ ॥ 18 ॥
యత్ర జాతో మహాతేజాః కార్తికేయోఽగ్నిసంభవః ।
అథోమాం చ శివం చైవ దేవాస్సర్షిగణాస్తదా ।
పూజయామాసురత్యర్థం సుప్రీతమనసస్తతః ॥ 19 ॥
అథ శైలసుతా రామ త్రిదశానిదమబ్రవీత్ ।
సమన్యురశపత్సర్వాన్ క్రోధసంరక్తలోచనా ॥ 20 ॥
యస్మాన్నివారితా చైవ సంగతిః పుత్రకామ్యయా ।
అపత్యం స్వేషు దారేషు తస్మాన్నోత్పాదయిష్యథ ॥ 21 ॥
అద్యప్రభృతి యుష్మాకమప్రజాస్సంతు పత్నయః ॥ 22 ॥
ఏవముక్త్వాసురాన్ సర్వాన్ శశాప పృథివీమపి ।
అవనే నైకరూపా త్వం బహుభార్యా భవిష్యసి ॥ 23 ॥
న చ పుత్రకృతాం ప్రీతిం మత్క్రోధకలుషీకృతా ।
ప్రాప్స్యసి త్వం సుదుర్మేధే మమ పుత్రమనిచ్ఛతీ ॥ 24 ॥
తాన్ సర్వాన్ వ్రీడితాన్ దృష్ట్వా సురాన్సురపతిస్తదా ।
గమనాయోపచక్రామ దిశం వరుణపాలితామ్ ॥ 25 ॥
స గత్వా తప ఆతిష్ఠత్పార్శ్వే తస్యోత్తరే గిరౌ ।
హిమవత్ప్రభవే శృంగే సహ దేవ్యా మహేశ్వరః ॥ 26 ॥
ఏష తే విస్తరో రామ శైలపుత్ర్యా నివేదితః ।
గంగాయాః ప్రభవం చైవ శృణు మే సహలక్ష్మణః ॥ 27 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే షట్త్రింశస్సర్గః ॥
