શ્રીમદ્વાલ્મીકીય રામાયણે બાલકાંડમ્ ।
અથ ષટ્ત્રિંશસ્સર્ગઃ ।
ઉક્તવાક્યે મુનૌ તસ્મિન્નુભૌ રાઘવલક્ષ્મણૌ ।
પ્રતિનંદ્ય કથાં વીરાવૂચતુર્મુનિપુંગવમ્ ॥ 1 ॥
ધર્મયુક્તમિદં બ્રહ્મન્ કથિતં પરમં ત્વયા ।
દુહિતુશ્શૈલરાજસ્ય જ્યેષ્ઠાયા વક્તુમર્હસિ ॥ 2 ॥
વિસ્તરં વિસ્તરજ્ઞોઽસિ દિવ્યમાનુષસંભવમ્ ।
ત્રીન્ પથો હેતુના કેન પ્લાવયેલ્લોકપાવની ॥ 3 ॥
કથં ગંગા ત્રિપથગા વિશ્રુતા સરિદુત્તમા ।
ત્રિષુ લોકેષુ ધર્મજ્ઞ કર્મભિઃ કૈસ્સમન્વિતા ॥ 4 ॥
તથા બ્રુવતિ કાકુત્સ્થે વિશ્વામિત્રસ્તપોધનઃ ।
નિખિલેન કથાં સર્વામૃષિમધ્યે ન્યવેદયત્ ॥ 5 ॥
પુરા રામ કૃતોદ્વાહો નીલકંઠો મહાતપાઃ ।
દૃષ્ટ્વા ચ સ્પૃહયા દેવીં મૈથુનાયોપચક્રમે ॥ 6 ॥
શિતિકંઠસ્ય દેવસ્ય દિવ્યં વર્ષશતં ગતમ્ ।
ન ચાપિ તનયો રામ તસ્યામાસીત્ પરંતપ ॥ 7 ॥
તતો દેવાસ્સમુદ્વિગ્નાઃ પિતામહપુરોગમાઃ ।
યદિહોત્પદ્યતે ભૂતં કસ્તત્પ્રતિસહિષ્યતે ॥ 8 ॥
અભિગમ્ય સુરાસ્સર્વે પ્રણિપત્યેદમબ્રુવન્ ।
દેવ દેવ મહાદેવ લોકસ્યાસ્ય હિતે રત ॥ 9 ॥
સુરાણાં પ્રણિપાતેન પ્રસાદં કર્તુમર્હસિ ।
ન લોકા ધારયિષ્યંતિ તવ તેજસ્સુરોત્તમ ॥ 10 ॥
બ્રાહ્મેણ તપસા યુક્તો દેવ્યા સહ તપશ્ચર ।
ત્રૈલોક્યહિતકામાર્થં તેજસ્તેજસિ ધારય ॥ 11 ॥
દેવતાનાં વચશ્શ્રુત્વા સર્વલોકમહેશ્વરઃ ।
બાઢમિત્યબ્રવીત્સર્વાન્પુનશ્ચૈવમુવાચ હ ॥ 12 ॥
ધારયિષ્યામ્યહં તેજસ્તેજસ્યેવ સહોમયા ।
ત્રિદશાઃ પૃથિવી ચૈવ નિર્વાણમધિગચ્છતુ ॥ 13 ॥
યદિદં ક્ષુભિતં સ્થાનાન્મમ તેજો હ્યનુત્તમમ્ ।
ધારયિષ્યતિ કસ્તન્મે બ્રુવંતુ સુરસત્તમાઃ ॥ 14 ॥
એવમુક્તાસ્સુરાસ્સર્વે પ્રત્યૂચુર્વૃષભધ્વજમ્ ।
યત્તેજઃ ક્ષુભિતં હ્યેતત્તદ્ધરા ધારયિષ્યતિ ॥ 15 ॥
એવમુક્તસ્સુરપતિઃ પ્રમુમોચ મહીતલે ।
તેજસા પૃથિવી યેન વ્યાપ્તા સગિરિકાનના ॥ 16 ॥
તતો દેવાઃ પુનરિદમૂચુશ્ચાથ હુતાશનમ્ ।
પ્રવિશ ત્વં મહાતેજો રૌદ્રં વાયુસમન્વિતઃ ॥ 17 ॥
તદગ્નિના પુનર્વ્યાપ્તં સંજાતશ્શ્વેતપર્વતઃ ।
દિવ્યં શરવણં ચૈવ પાવકાદિત્યસન્નિભમ્ ॥ 18 ॥
યત્ર જાતો મહાતેજાઃ કાર્તિકેયોઽગ્નિસંભવઃ ।
અથોમાં ચ શિવં ચૈવ દેવાસ્સર્ષિગણાસ્તદા ।
પૂજયામાસુરત્યર્થં સુપ્રીતમનસસ્તતઃ ॥ 19 ॥
અથ શૈલસુતા રામ ત્રિદશાનિદમબ્રવીત્ ।
સમન્યુરશપત્સર્વાન્ ક્રોધસંરક્તલોચના ॥ 20 ॥
યસ્માન્નિવારિતા ચૈવ સંગતિઃ પુત્રકામ્યયા ।
અપત્યં સ્વેષુ દારેષુ તસ્માન્નોત્પાદયિષ્યથ ॥ 21 ॥
અદ્યપ્રભૃતિ યુષ્માકમપ્રજાસ્સંતુ પત્નયઃ ॥ 22 ॥
એવમુક્ત્વાસુરાન્ સર્વાન્ શશાપ પૃથિવીમપિ ।
અવને નૈકરૂપા ત્વં બહુભાર્યા ભવિષ્યસિ ॥ 23 ॥
ન ચ પુત્રકૃતાં પ્રીતિં મત્ક્રોધકલુષીકૃતા ।
પ્રાપ્સ્યસિ ત્વં સુદુર્મેધે મમ પુત્રમનિચ્છતી ॥ 24 ॥
તાન્ સર્વાન્ વ્રીડિતાન્ દૃષ્ટ્વા સુરાન્સુરપતિસ્તદા ।
ગમનાયોપચક્રામ દિશં વરુણપાલિતામ્ ॥ 25 ॥
સ ગત્વા તપ આતિષ્ઠત્પાર્શ્વે તસ્યોત્તરે ગિરૌ ।
હિમવત્પ્રભવે શૃંગે સહ દેવ્યા મહેશ્વરઃ ॥ 26 ॥
એષ તે વિસ્તરો રામ શૈલપુત્ર્યા નિવેદિતઃ ।
ગંગાયાઃ પ્રભવં ચૈવ શૃણુ મે સહલક્ષ્મણઃ ॥ 27 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે ષટ્ત્રિંશસ્સર્ગઃ ॥
