ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଷଟ୍ଚତ୍ଵାରିଂଶସ୍ସର୍ଗଃ ।
ହତେଷୁ ତେଷୁ ପୁତ୍ରେଷୁ ଦିତିଃ ପରମଦୁଃଖିତା ।
ମାରୀଚଂ କାଶ୍ୟପଂ ରାମ ଭର୍ତାରମିଦମବ୍ରଵୀତ୍ ॥ 1 ॥
ହତପୁତ୍ରାଽସ୍ମି ଭଗଵଂସ୍ତଵ ପୁତ୍ରୈର୍ମହାବଲୈଃ ।
ଶକ୍ରହଂତାରମିଚ୍ଛାମି ପୁତ୍ରଂ ଦୀର୍ଘତପୋଽର୍ଜିତମ୍ ॥ 2 ॥
ସାଽହଂ ତପଶ୍ଚରିଷ୍ୟାମି ଗର୍ଭଂ ମେ ଦାତୁମର୍ହସି ।
ଈଶ୍ଵରଂ ଶକ୍ରହଂତାରଂ ତ୍ଵମନୁଜ୍ଞାତୁମର୍ହସି ॥ 3 ॥
ତସ୍ୟାସ୍ତଦ୍ଵଚନଂ ଶ୍ରୁତ୍ଵା ମାରୀଚଃ କାଶ୍ୟପସ୍ତଦା ।
ପ୍ରତ୍ୟୁଵାଚ ମହାତେଜା ଦିତିଂ ପରମଦୁଃଖିତାମ୍ ॥ 4 ॥
ଏଵଂ ଭଵତୁ, ଭଦ୍ରଂ ତେ ଶୁଚିର୍ଭଵ ତପୋଧନେ ।
ଜନୟିଷ୍ୟସି ପୁତ୍ରଂ ତ୍ଵଂ ଶକ୍ରହଂତାରମାହଵେ ॥ 5 ॥
ପୂର୍ଣେ ଵର୍ଷସହସ୍ରେ ତୁ ଶୁଚିର୍ୟଦି ଭଵିଷ୍ୟସି ।
ପୁତ୍ରଂ ତ୍ରୈଲୋକ୍ୟଭର୍ତାରଂ ମତ୍ତସ୍ତ୍ଵଂ ଜନୟିଷ୍ୟସି ॥ 6 ॥
ଏଵମୁକ୍ତ୍ଵା ମହାତେଜାଃ ପାଣିନା ସ ମମାର୍ଜ ତାମ୍ ।
ସମାଲଭ୍ୟ ତତସ୍ସ୍ଵସ୍ତୀତ୍ୟୁକ୍ତ୍ଵା ସ ତପସେ ୟୟୌ ॥ 7 ॥
ଗତେ ତସ୍ମିନ୍ନରଶ୍ଶ୍ରେଷ୍ଠ ଦିତିଃ ପରମହର୍ଷିତା ।
କୁଶପ୍ଲଵନମାସାଦ୍ୟ ତପସ୍ତେପେ ସୁଦାରୁଣମ୍ ॥ 8 ॥
ତପସ୍ତସ୍ୟାଂ ହି କୁର୍ଵଂତ୍ୟାଂ ପରିଚର୍ୟାଂ ଚକାର ହ ।
ସହସ୍ରାକ୍ଷୋ ନରଶ୍ଶ୍ରେଷ୍ଠ ପରୟା ଗୁଣସଂପଦା ॥ 9 ॥
ଅଗ୍ନିଂ କୁଶାନ୍ କାଷ୍ଠମପଃ ଫଲଂ ମୂଲଂ ତଥୈଵ ଚ ।
ନ୍ୟଵେଦୟତ୍ସହସ୍ରାକ୍ଷୋ ୟଚ୍ଚାନ୍ୟଦପି କାଂକ୍ଷିତମ୍ ॥ 10 ॥
ଗାତ୍ରସଂଵହନଶ୍ଚୈଵ ଶ୍ରମାପନୟନୈସ୍ତଥା ।
ଶକ୍ରସ୍ସର୍ଵେଷୁ କାଲେଷୁ ଦିତିଂ ପରିଚଚାର ହ ॥ 11 ॥
ଅଥ ଵର୍ଷସହସ୍ରେ ତୁ ଦଶୋନେ ରଘୁନଂଦନ ।
ଦିତିଃ ପରମସଂପ୍ରୀତା ସହସ୍ରାକ୍ଷମଥାବ୍ରଵୀତ୍ ॥ 12 ॥
ୟାଚିତେନ ସୁରଶ୍ରେଷ୍ଠ ତଵ ପିତ୍ରା ମହାତ୍ମନା ।
ଵରୋ ଵର୍ଷସହସ୍ରାଂତେ ଦତ୍ତୋ ମମ ସୁତଂ ପ୍ରତି ॥ 13 ॥
ତପଶ୍ଚରଂତ୍ୟା ଵର୍ଷାଣି ଦଶ ଵୀର୍ୟଵତାଂ ଵର ।
ଅଵଶିଷ୍ଟାନି ଭଦ୍ରଂ ତେ ଭ୍ରାତରଂ ଦ୍ରକ୍ଷ୍ୟସେ ତତଃ ॥ 14 ॥
ତମହଂ ତ୍ଵତ୍କୃତେ ପୁତ୍ର ସମାଧାସ୍ୟେ ଜୟୋତ୍ସୁକମ୍ ।
ତ୍ରୈଲୋକ୍ୟଵିଜୟଂ ପୁତ୍ର ସହ ଭୋକ୍ଷ୍ୟସି ଵିଜ୍ଵରଃ ॥ 15 ॥
ଏଵମୁକ୍ତ୍ଵା ଦିତିଶ୍ଶକ୍ରଂ ପ୍ରାପ୍ତେ ମଧ୍ୟଂ ଦିଵାକରେ ।
ନିଦ୍ରୟାଽପହୃତା ଦେଵୀ ପାଦୌ କୃତ୍ଵାଽଥ ଶୀର୍ଷତଃ ॥ 16 ॥
ଦୃଷ୍ଟ୍ଵା ତାମଶୁଚିଂ ଶକ୍ରଃ ପାଦତଃ କୃତମୂର୍ଧଜାମ୍ ।
ଶିରସ୍ସ୍ଥାନେ କୃତୌ ପାଦୌ ଜହାସ ଚ ମୁମୋଦ ଚ ॥ 17 ॥
ତସ୍ୟାଶ୍ଶରୀରଵିଵରଂ ଵିଵେଶ ଚ ପୁରଂଦରଃ ।
ଗର୍ଭଂ ଚ ସପ୍ତଧା ରାମ ବିଭେଦ ପରମାତ୍ମଵାନ୍ ॥ 18 ॥
ଭିଦ୍ୟମାନସ୍ତତୋ ଗର୍ଭୋ ଵଜ୍ରେଣ ଶତପର୍ଵଣା ।
ରୁରୋଦ ସୁସ୍ଵରଂ ରାମ ତତୋ ଦିତିରବୁଧ୍ୟତ ॥ 19 ॥
ମା ରୁଦୋ ମା ରୁଦଶ୍ଚେତି ଗର୍ଭଂ ଶକ୍ରୋଽଭ୍ୟଭାଷତ ।
ବିଭେଦ ଚ ମହାତେଜା ରୁଦଂତମପି ଵାସଵଃ ॥ 20 ॥
ନ ହଂତଵ୍ୟୋ ନ ହଂତଵ୍ୟ ଇତ୍ୟେଵଂ ଦିତିରବ୍ରଵୀତ୍ ।
ନିଷ୍ପପାତ ତତଶ୍ଶକ୍ରୋ ମାତୁର୍ଵଚନଗୌରଵାତ୍ ॥ 21 ॥
ପ୍ରାଂଜଲିର୍ଵଜ୍ରସହିତୋ ଦିତିଂ ଶକ୍ରୋଽଭ୍ୟଭାଷତ ।
ଅଶୁଚିର୍ଦେଵି ସୁପ୍ତାଽସି ପାଦୟୋଃ କୃତମୂର୍ଧଜା ॥ 22 ॥
ତଦଂତରମହଂ ଲବ୍ଧ୍ଵା ଶକ୍ରହଂତାରମାହଵେ ।
ଅଭିଦଂ ସପ୍ତଧା ଦେଵି ତନ୍ମେ ତ୍ଵଂ କ୍ଷଂତୁମର୍ହସି ॥ 23 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଷଟ୍ଚତ୍ଵାରିଂଶସ୍ସର୍ଗଃ ॥
