śrīmadvālmīkīya rāmāyaṇē bālakāṇḍam ।
atha ṣaṭchatvāriṃśassargaḥ ।
hatēṣu tēṣu putrēṣu ditiḥ paramaduḥkhitā ।
mārīchaṃ kāśyapaṃ rāma bhartāramidamabravīt ॥ 1 ॥
hataputrā'smi bhagavaṃstava putrairmahābalaiḥ ।
śakrahantāramichChāmi putraṃ dīrghatapō'rjitam ॥ 2 ॥
sā'haṃ tapaśchariṣyāmi garbhaṃ mē dātumarhasi ।
īśvaraṃ śakrahantāraṃ tvamanujñātumarhasi ॥ 3 ॥
tasyāstadvachanaṃ śrutvā mārīchaḥ kāśyapastadā ।
pratyuvācha mahātējā ditiṃ paramaduḥkhitām ॥ 4 ॥
ēvaṃ bhavatu, bhadraṃ tē śuchirbhava tapōdhanē ।
janayiṣyasi putraṃ tvaṃ śakrahantāramāhavē ॥ 5 ॥
pūrṇē varṣasahasrē tu śuchiryadi bhaviṣyasi ।
putraṃ trailōkyabhartāraṃ mattastvaṃ janayiṣyasi ॥ 6 ॥
ēvamuktvā mahātējāḥ pāṇinā sa mamārja tām ।
samālabhya tatassvastītyuktvā sa tapasē yayau ॥ 7 ॥
gatē tasminnaraśśrēṣṭha ditiḥ paramaharṣitā ।
kuśaplavanamāsādya tapastēpē sudāruṇam ॥ 8 ॥
tapastasyāṃ hi kurvantyāṃ paricharyāṃ chakāra ha ।
sahasrākṣō naraśśrēṣṭha parayā guṇasampadā ॥ 9 ॥
agniṃ kuśān kāṣṭhamapaḥ phalaṃ mūlaṃ tathaiva cha ।
nyavēdayatsahasrākṣō yachchānyadapi kāṅkṣitam ॥ 10 ॥
gātrasaṃvahanaśchaiva śramāpanayanaistathā ।
śakrassarvēṣu kālēṣu ditiṃ parichachāra ha ॥ 11 ॥
atha varṣasahasrē tu daśōnē raghunandana ।
ditiḥ paramasamprītā sahasrākṣamathābravīt ॥ 12 ॥
yāchitēna suraśrēṣṭha tava pitrā mahātmanā ।
varō varṣasahasrāntē dattō mama sutaṃ prati ॥ 13 ॥
tapaścharantyā varṣāṇi daśa vīryavatāṃ vara ।
avaśiṣṭāni bhadraṃ tē bhrātaraṃ drakṣyasē tataḥ ॥ 14 ॥
tamahaṃ tvatkṛtē putra samādhāsyē jayōtsukam ।
trailōkyavijayaṃ putra saha bhōkṣyasi vijvaraḥ ॥ 15 ॥
ēvamuktvā ditiśśakraṃ prāptē madhyaṃ divākarē ।
nidrayā'pahṛtā dēvī pādau kṛtvā'tha śīrṣataḥ ॥ 16 ॥
dṛṣṭvā tāmaśuchiṃ śakraḥ pādataḥ kṛtamūrdhajām ।
śirassthānē kṛtau pādau jahāsa cha mumōda cha ॥ 17 ॥
tasyāśśarīravivaraṃ vivēśa cha purandaraḥ ।
garbhaṃ cha saptadhā rāma bibhēda paramātmavān ॥ 18 ॥
bhidyamānastatō garbhō vajrēṇa śataparvaṇā ।
rurōda susvaraṃ rāma tatō ditirabudhyata ॥ 19 ॥
mā rudō mā rudaśchēti garbhaṃ śakrō'bhyabhāṣata ।
bibhēda cha mahātējā rudantamapi vāsavaḥ ॥ 20 ॥
na hantavyō na hantavya ityēvaṃ ditirabravīt ।
niṣpapāta tataśśakrō māturvachanagauravāt ॥ 21 ॥
prāñjalirvajrasahitō ditiṃ śakrō'bhyabhāṣata ।
aśuchirdēvi suptā'si pādayōḥ kṛtamūrdhajā ॥ 22 ॥
tadantaramahaṃ labdhvā śakrahantāramāhavē ।
abhidaṃ saptadhā dēvi tanmē tvaṃ kṣantumarhasi ॥ 23 ॥
ityārṣē śrīmadrāmāyaṇē vālmīkīya ādikāvyē bālakāṇḍē ṣaṭchatvāriṃśassargaḥ ॥
