ශ්රීමද්වාල්මීකීය රාමායණේ බාලකාංඩම් ।
අථ ෂට්චත්වාරිංශස්සර්ගඃ ।
හතේෂු තේෂු පුත්රේෂු දිතිඃ පරමදුඃඛිතා ।
මාරීචං කාශ්යපං රාම භර්තාරමිදමබ්රවීත් ॥ 1 ॥
හතපුත්රාऽස්මි භගවංස්තව පුත්රෛර්මහාබලෛඃ ।
ශක්රහංතාරමිච්ඡාමි පුත්රං දීර්ඝතපෝऽර්ජිතම් ॥ 2 ॥
සාऽහං තපශ්චරිෂ්යාමි ගර්භං මේ දාතුමර්හසි ।
ඊශ්වරං ශක්රහංතාරං ත්වමනුජ්ඤාතුමර්හසි ॥ 3 ॥
තස්යාස්තද්වචනං ශ්රුත්වා මාරීචඃ කාශ්යපස්තදා ।
ප්රත්යුවාච මහාතේජා දිතිං පරමදුඃඛිතාම් ॥ 4 ॥
ඒවං භවතු, භද්රං තේ ශුචිර්භව තපෝධනේ ।
ජනයිෂ්යසි පුත්රං ත්වං ශක්රහංතාරමාහවේ ॥ 5 ॥
පූර්ණේ වර්ෂසහස්රේ තු ශුචිර්යදි භවිෂ්යසි ।
පුත්රං ත්රෛලෝක්යභර්තාරං මත්තස්ත්වං ජනයිෂ්යසි ॥ 6 ॥
ඒවමුක්ත්වා මහාතේජාඃ පාණිනා ස මමාර්ජ තාම් ।
සමාලභ්ය තතස්ස්වස්තීත්යුක්ත්වා ස තපසේ යයෞ ॥ 7 ॥
ගතේ තස්මින්නරශ්ශ්රේෂ්ඨ දිතිඃ පරමහර්ෂිතා ।
කුශප්ලවනමාසාද්ය තපස්තේපේ සුදාරුණම් ॥ 8 ॥
තපස්තස්යාං හි කුර්වංත්යාං පරිචර්යාං චකාර හ ।
සහස්රාක්ෂෝ නරශ්ශ්රේෂ්ඨ පරයා ගුණසංපදා ॥ 9 ॥
අග්නිං කුශාන් කාෂ්ඨමපඃ ඵලං මූලං තථෛව ච ।
න්යවේදයත්සහස්රාක්ෂෝ යච්චාන්යදපි කාංක්ෂිතම් ॥ 10 ॥
ගාත්රසංවහනශ්චෛව ශ්රමාපනයනෛස්තථා ।
ශක්රස්සර්වේෂු කාලේෂු දිතිං පරිචචාර හ ॥ 11 ॥
අථ වර්ෂසහස්රේ තු දශෝනේ රඝුනංදන ।
දිතිඃ පරමසංප්රීතා සහස්රාක්ෂමථාබ්රවීත් ॥ 12 ॥
යාචිතේන සුරශ්රේෂ්ඨ තව පිත්රා මහාත්මනා ।
වරෝ වර්ෂසහස්රාංතේ දත්තෝ මම සුතං ප්රති ॥ 13 ॥
තපශ්චරංත්යා වර්ෂාණි දශ වීර්යවතාං වර ।
අවශිෂ්ටානි භද්රං තේ භ්රාතරං ද්රක්ෂ්යසේ තතඃ ॥ 14 ॥
තමහං ත්වත්කෘතේ පුත්ර සමාධාස්යේ ජයෝත්සුකම් ।
ත්රෛලෝක්යවිජයං පුත්ර සහ භෝක්ෂ්යසි විජ්වරඃ ॥ 15 ॥
ඒවමුක්ත්වා දිතිශ්ශක්රං ප්රාප්තේ මධ්යං දිවාකරේ ।
නිද්රයාऽපහෘතා දේවී පාදෞ කෘත්වාऽථ ශීර්ෂතඃ ॥ 16 ॥
දෘෂ්ට්වා තාමශුචිං ශක්රඃ පාදතඃ කෘතමූර්ධජාම් ।
ශිරස්ස්ථානේ කෘතෞ පාදෞ ජහාස ච මුමෝද ච ॥ 17 ॥
තස්යාශ්ශරීරවිවරං විවේශ ච පුරංදරඃ ।
ගර්භං ච සප්තධා රාම බිභේද පරමාත්මවාන් ॥ 18 ॥
භිද්යමානස්තතෝ ගර්භෝ වජ්රේණ ශතපර්වණා ।
රුරෝද සුස්වරං රාම තතෝ දිතිරබුධ්යත ॥ 19 ॥
මා රුදෝ මා රුදශ්චේති ගර්භං ශක්රෝऽභ්යභාෂත ।
බිභේද ච මහාතේජා රුදංතමපි වාසවඃ ॥ 20 ॥
න හංතව්යෝ න හංතව්ය ඉත්යේවං දිතිරබ්රවීත් ।
නිෂ්පපාත තතශ්ශක්රෝ මාතුර්වචනගෞරවාත් ॥ 21 ॥
ප්රාංජලිර්වජ්රසහිතෝ දිතිං ශක්රෝऽභ්යභාෂත ।
අශුචිර්දේවි සුප්තාऽසි පාදයෝඃ කෘතමූර්ධජා ॥ 22 ॥
තදංතරමහං ලබ්ධ්වා ශක්රහංතාරමාහවේ ।
අභිදං සප්තධා දේවි තන්මේ ත්වං ක්ෂංතුමර්හසි ॥ 23 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ෂට්චත්වාරිංශස්සර්ගඃ ॥
