శ్రీమద్వాల్మీకీయ రామాయణే బాలకాండమ్ ।
అథ షట్చత్వారింశస్సర్గః ।
హతేషు తేషు పుత్రేషు దితిః పరమదుఃఖితా ।
మారీచం కాశ్యపం రామ భర్తారమిదమబ్రవీత్ ॥ 1 ॥
హతపుత్రాఽస్మి భగవంస్తవ పుత్రైర్మహాబలైః ।
శక్రహంతారమిచ్ఛామి పుత్రం దీర్ఘతపోఽర్జితమ్ ॥ 2 ॥
సాఽహం తపశ్చరిష్యామి గర్భం మే దాతుమర్హసి ।
ఈశ్వరం శక్రహంతారం త్వమనుజ్ఞాతుమర్హసి ॥ 3 ॥
తస్యాస్తద్వచనం శ్రుత్వా మారీచః కాశ్యపస్తదా ।
ప్రత్యువాచ మహాతేజా దితిం పరమదుఃఖితామ్ ॥ 4 ॥
ఏవం భవతు, భద్రం తే శుచిర్భవ తపోధనే ।
జనయిష్యసి పుత్రం త్వం శక్రహంతారమాహవే ॥ 5 ॥
పూర్ణే వర్షసహస్రే తు శుచిర్యది భవిష్యసి ।
పుత్రం త్రైలోక్యభర్తారం మత్తస్త్వం జనయిష్యసి ॥ 6 ॥
ఏవముక్త్వా మహాతేజాః పాణినా స మమార్జ తామ్ ।
సమాలభ్య తతస్స్వస్తీత్యుక్త్వా స తపసే యయౌ ॥ 7 ॥
గతే తస్మిన్నరశ్శ్రేష్ఠ దితిః పరమహర్షితా ।
కుశప్లవనమాసాద్య తపస్తేపే సుదారుణమ్ ॥ 8 ॥
తపస్తస్యాం హి కుర్వంత్యాం పరిచర్యాం చకార హ ।
సహస్రాక్షో నరశ్శ్రేష్ఠ పరయా గుణసంపదా ॥ 9 ॥
అగ్నిం కుశాన్ కాష్ఠమపః ఫలం మూలం తథైవ చ ।
న్యవేదయత్సహస్రాక్షో యచ్చాన్యదపి కాంక్షితమ్ ॥ 10 ॥
గాత్రసంవహనశ్చైవ శ్రమాపనయనైస్తథా ।
శక్రస్సర్వేషు కాలేషు దితిం పరిచచార హ ॥ 11 ॥
అథ వర్షసహస్రే తు దశోనే రఘునందన ।
దితిః పరమసంప్రీతా సహస్రాక్షమథాబ్రవీత్ ॥ 12 ॥
యాచితేన సురశ్రేష్ఠ తవ పిత్రా మహాత్మనా ।
వరో వర్షసహస్రాంతే దత్తో మమ సుతం ప్రతి ॥ 13 ॥
తపశ్చరంత్యా వర్షాణి దశ వీర్యవతాం వర ।
అవశిష్టాని భద్రం తే భ్రాతరం ద్రక్ష్యసే తతః ॥ 14 ॥
తమహం త్వత్కృతే పుత్ర సమాధాస్యే జయోత్సుకమ్ ।
త్రైలోక్యవిజయం పుత్ర సహ భోక్ష్యసి విజ్వరః ॥ 15 ॥
ఏవముక్త్వా దితిశ్శక్రం ప్రాప్తే మధ్యం దివాకరే ।
నిద్రయాఽపహృతా దేవీ పాదౌ కృత్వాఽథ శీర్షతః ॥ 16 ॥
దృష్ట్వా తామశుచిం శక్రః పాదతః కృతమూర్ధజామ్ ।
శిరస్స్థానే కృతౌ పాదౌ జహాస చ ముమోద చ ॥ 17 ॥
తస్యాశ్శరీరవివరం వివేశ చ పురందరః ।
గర్భం చ సప్తధా రామ బిభేద పరమాత్మవాన్ ॥ 18 ॥
భిద్యమానస్తతో గర్భో వజ్రేణ శతపర్వణా ।
రురోద సుస్వరం రామ తతో దితిరబుధ్యత ॥ 19 ॥
మా రుదో మా రుదశ్చేతి గర్భం శక్రోఽభ్యభాషత ।
బిభేద చ మహాతేజా రుదంతమపి వాసవః ॥ 20 ॥
న హంతవ్యో న హంతవ్య ఇత్యేవం దితిరబ్రవీత్ ।
నిష్పపాత తతశ్శక్రో మాతుర్వచనగౌరవాత్ ॥ 21 ॥
ప్రాంజలిర్వజ్రసహితో దితిం శక్రోఽభ్యభాషత ।
అశుచిర్దేవి సుప్తాఽసి పాదయోః కృతమూర్ధజా ॥ 22 ॥
తదంతరమహం లబ్ధ్వా శక్రహంతారమాహవే ।
అభిదం సప్తధా దేవి తన్మే త్వం క్షంతుమర్హసి ॥ 23 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే షట్చత్వారింశస్సర్గః ॥
