𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌷𑌟𑍍𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌹𑌤𑍇𑌷𑍁 𑌤𑍇𑌷𑍁 𑌪𑍁𑌤𑍍𑌰𑍇𑌷𑍁 𑌦𑌿𑌤𑌿𑌃 𑌪𑌰𑌮𑌦𑍁𑌃𑌖𑌿𑌤𑌾 ।
𑌮𑌾𑌰𑍀𑌚𑌂 𑌕𑌾𑌶𑍍𑌯𑌪𑌂 𑌰𑌾𑌮 𑌭𑌰𑍍𑌤𑌾𑌰𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 1 ॥
𑌹𑌤𑌪𑍁𑌤𑍍𑌰𑌾𑌽𑌸𑍍𑌮𑌿 𑌭𑌗𑌵𑌂𑌸𑍍𑌤𑌵 𑌪𑍁𑌤𑍍𑌰𑍈𑌰𑍍𑌮𑌹𑌾𑌬𑌲𑍈𑌃 ।
𑌶𑌕𑍍𑌰𑌹𑌂𑌤𑌾𑌰𑌮𑌿𑌚𑍍𑌛𑌾𑌮𑌿 𑌪𑍁𑌤𑍍𑌰𑌂 𑌦𑍀𑌰𑍍𑌘𑌤𑌪𑍋𑌽𑌰𑍍𑌜𑌿𑌤𑌮𑍍 ॥ 2 ॥
𑌸𑌾𑌽𑌹𑌂 𑌤𑌪𑌶𑍍𑌚𑌰𑌿𑌷𑍍𑌯𑌾𑌮𑌿 𑌗𑌰𑍍𑌭𑌂 𑌮𑍇 𑌦𑌾𑌤𑍁𑌮𑌰𑍍𑌹𑌸𑌿 ।
𑌈𑌶𑍍𑌵𑌰𑌂 𑌶𑌕𑍍𑌰𑌹𑌂𑌤𑌾𑌰𑌂 𑌤𑍍𑌵𑌮𑌨𑍁𑌜𑍍𑌞𑌾𑌤𑍁𑌮𑌰𑍍𑌹𑌸𑌿 ॥ 3 ॥
𑌤𑌸𑍍𑌯𑌾𑌸𑍍𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌮𑌾𑌰𑍀𑌚𑌃 𑌕𑌾𑌶𑍍𑌯𑌪𑌸𑍍𑌤𑌦𑌾 ।
𑌪𑍍𑌰𑌤𑍍𑌯𑍁𑌵𑌾𑌚 𑌮𑌹𑌾𑌤𑍇𑌜𑌾 𑌦𑌿𑌤𑌿𑌂 𑌪𑌰𑌮𑌦𑍁𑌃𑌖𑌿𑌤𑌾𑌮𑍍 ॥ 4 ॥
𑌏𑌵𑌂 𑌭𑌵𑌤𑍁, 𑌭𑌦𑍍𑌰𑌂 𑌤𑍇 𑌶𑍁𑌚𑌿𑌰𑍍𑌭𑌵 𑌤𑌪𑍋𑌧𑌨𑍇 ।
𑌜𑌨𑌯𑌿𑌷𑍍𑌯𑌸𑌿 𑌪𑍁𑌤𑍍𑌰𑌂 𑌤𑍍𑌵𑌂 𑌶𑌕𑍍𑌰𑌹𑌂𑌤𑌾𑌰𑌮𑌾𑌹𑌵𑍇 ॥ 5 ॥
𑌪𑍂𑌰𑍍𑌣𑍇 𑌵𑌰𑍍𑌷𑌸𑌹𑌸𑍍𑌰𑍇 𑌤𑍁 𑌶𑍁𑌚𑌿𑌰𑍍𑌯𑌦𑌿 𑌭𑌵𑌿𑌷𑍍𑌯𑌸𑌿 ।
𑌪𑍁𑌤𑍍𑌰𑌂 𑌤𑍍𑌰𑍈𑌲𑍋𑌕𑍍𑌯𑌭𑌰𑍍𑌤𑌾𑌰𑌂 𑌮𑌤𑍍𑌤𑌸𑍍𑌤𑍍𑌵𑌂 𑌜𑌨𑌯𑌿𑌷𑍍𑌯𑌸𑌿 ॥ 6 ॥
𑌏𑌵𑌮𑍁𑌕𑍍𑌤𑍍𑌵𑌾 𑌮𑌹𑌾𑌤𑍇𑌜𑌾𑌃 𑌪𑌾𑌣𑌿𑌨𑌾 𑌸 𑌮𑌮𑌾𑌰𑍍𑌜 𑌤𑌾𑌮𑍍 ।
𑌸𑌮𑌾𑌲𑌭𑍍𑌯 𑌤𑌤𑌸𑍍𑌸𑍍𑌵𑌸𑍍𑌤𑍀𑌤𑍍𑌯𑍁𑌕𑍍𑌤𑍍𑌵𑌾 𑌸 𑌤𑌪𑌸𑍇 𑌯𑌯𑍌 ॥ ॥
𑌗𑌤𑍇 𑌤𑌸𑍍𑌮𑌿𑌨𑍍𑌨𑌰𑌶𑍍𑌶𑍍𑌰𑍇𑌷𑍍𑌠 𑌦𑌿𑌤𑌿𑌃 𑌪𑌰𑌮𑌹𑌰𑍍𑌷𑌿𑌤𑌾 ।
𑌕𑍁𑌶𑌪𑍍𑌲𑌵𑌨𑌮𑌾𑌸𑌾𑌦𑍍𑌯 𑌤𑌪𑌸𑍍𑌤𑍇𑌪𑍇 𑌸𑍁𑌦𑌾𑌰𑍁𑌣𑌮𑍍 ॥ ॥
𑌤𑌪𑌸𑍍𑌤𑌸𑍍𑌯𑌾𑌂 𑌹𑌿 𑌕𑍁𑌰𑍍𑌵𑌂𑌤𑍍𑌯𑌾𑌂 𑌪𑌰𑌿𑌚𑌰𑍍𑌯𑌾𑌂 𑌚𑌕𑌾𑌰 𑌹 ।
𑌸𑌹𑌸𑍍𑌰𑌾𑌕𑍍𑌷𑍋 𑌨𑌰𑌶𑍍𑌶𑍍𑌰𑍇𑌷𑍍𑌠 𑌪𑌰𑌯𑌾 𑌗𑍁𑌣𑌸𑌂𑌪𑌦𑌾 ॥ ॥
𑌅𑌗𑍍𑌨𑌿𑌂 𑌕𑍁𑌶𑌾𑌨𑍍 𑌕𑌾𑌷𑍍𑌠𑌮𑌪𑌃 𑌫𑌲𑌂 𑌮𑍂𑌲𑌂 𑌤𑌥𑍈𑌵 𑌚 ।
𑌨𑍍𑌯𑌵𑍇𑌦𑌯𑌤𑍍𑌸𑌹𑌸𑍍𑌰𑌾𑌕𑍍𑌷𑍋 𑌯𑌚𑍍𑌚𑌾𑌨𑍍𑌯𑌦𑌪𑌿 𑌕𑌾𑌂𑌕𑍍𑌷𑌿𑌤𑌮𑍍 ॥ 10 ॥
𑌗𑌾𑌤𑍍𑌰𑌸𑌂𑌵𑌹𑌨𑌶𑍍𑌚𑍈𑌵 𑌶𑍍𑌰𑌮𑌾𑌪𑌨𑌯𑌨𑍈𑌸𑍍𑌤𑌥𑌾 ।
𑌶𑌕𑍍𑌰𑌸𑍍𑌸𑌰𑍍𑌵𑍇𑌷𑍁 𑌕𑌾𑌲𑍇𑌷𑍁 𑌦𑌿𑌤𑌿𑌂 𑌪𑌰𑌿𑌚𑌚𑌾𑌰 𑌹 ॥ 11 ॥
𑌅𑌥 𑌵𑌰𑍍𑌷𑌸𑌹𑌸𑍍𑌰𑍇 𑌤𑍁 𑌦𑌶𑍋𑌨𑍇 𑌰𑌘𑍁𑌨𑌂𑌦𑌨 ।
𑌦𑌿𑌤𑌿𑌃 𑌪𑌰𑌮𑌸𑌂𑌪𑍍𑌰𑍀𑌤𑌾 𑌸𑌹𑌸𑍍𑌰𑌾𑌕𑍍𑌷𑌮𑌥𑌾𑌬𑍍𑌰𑌵𑍀𑌤𑍍 ॥ 12 ॥
𑌯𑌾𑌚𑌿𑌤𑍇𑌨 𑌸𑍁𑌰𑌶𑍍𑌰𑍇𑌷𑍍𑌠 𑌤𑌵 𑌪𑌿𑌤𑍍𑌰𑌾 𑌮𑌹𑌾𑌤𑍍𑌮𑌨𑌾 ।
𑌵𑌰𑍋 𑌵𑌰𑍍𑌷𑌸𑌹𑌸𑍍𑌰𑌾𑌂𑌤𑍇 𑌦𑌤𑍍𑌤𑍋 𑌮𑌮 𑌸𑍁𑌤𑌂 𑌪𑍍𑌰𑌤𑌿 ॥ 13 ॥
𑌤𑌪𑌶𑍍𑌚𑌰𑌂𑌤𑍍𑌯𑌾 𑌵𑌰𑍍𑌷𑌾𑌣𑌿 𑌦𑌶 𑌵𑍀𑌰𑍍𑌯𑌵𑌤𑌾𑌂 𑌵𑌰 ।
𑌅𑌵𑌶𑌿𑌷𑍍𑌟𑌾𑌨𑌿 𑌭𑌦𑍍𑌰𑌂 𑌤𑍇 𑌭𑍍𑌰𑌾𑌤𑌰𑌂 𑌦𑍍𑌰𑌕𑍍𑌷𑍍𑌯𑌸𑍇 𑌤𑌤𑌃 ॥ 14 ॥
𑌤𑌮𑌹𑌂 𑌤𑍍𑌵𑌤𑍍𑌕𑍃𑌤𑍇 𑌪𑍁𑌤𑍍𑌰 𑌸𑌮𑌾𑌧𑌾𑌸𑍍𑌯𑍇 𑌜𑌯𑍋𑌤𑍍𑌸𑍁𑌕𑌮𑍍 ।
𑌤𑍍𑌰𑍈𑌲𑍋𑌕𑍍𑌯𑌵𑌿𑌜𑌯𑌂 𑌪𑍁𑌤𑍍𑌰 𑌸𑌹 𑌭𑍋𑌕𑍍𑌷𑍍𑌯𑌸𑌿 𑌵𑌿𑌜𑍍𑌵𑌰𑌃 ॥ 15 ॥
𑌏𑌵𑌮𑍁𑌕𑍍𑌤𑍍𑌵𑌾 𑌦𑌿𑌤𑌿𑌶𑍍𑌶𑌕𑍍𑌰𑌂 𑌪𑍍𑌰𑌾𑌪𑍍𑌤𑍇 𑌮𑌧𑍍𑌯𑌂 𑌦𑌿𑌵𑌾𑌕𑌰𑍇 ।
𑌨𑌿𑌦𑍍𑌰𑌯𑌾𑌽𑌪𑌹𑍃𑌤𑌾 𑌦𑍇𑌵𑍀 𑌪𑌾𑌦𑍌 𑌕𑍃𑌤𑍍𑌵𑌾𑌽𑌥 𑌶𑍀𑌰𑍍𑌷𑌤𑌃 ॥ 16 ॥
𑌦𑍃𑌷𑍍𑌟𑍍𑌵𑌾 𑌤𑌾𑌮𑌶𑍁𑌚𑌿𑌂 𑌶𑌕𑍍𑌰𑌃 𑌪𑌾𑌦𑌤𑌃 𑌕𑍃𑌤𑌮𑍂𑌰𑍍𑌧𑌜𑌾𑌮𑍍 ।
𑌶𑌿𑌰𑌸𑍍𑌸𑍍𑌥𑌾𑌨𑍇 𑌕𑍃𑌤𑍌 𑌪𑌾𑌦𑍌 𑌜𑌹𑌾𑌸 𑌚 𑌮𑍁𑌮𑍋𑌦 𑌚 ॥ 1 ॥
𑌤𑌸𑍍𑌯𑌾𑌶𑍍𑌶𑌰𑍀𑌰𑌵𑌿𑌵𑌰𑌂 𑌵𑌿𑌵𑍇𑌶 𑌚 𑌪𑍁𑌰𑌂𑌦𑌰𑌃 ।
𑌗𑌰𑍍𑌭𑌂 𑌚 𑌸𑌪𑍍𑌤𑌧𑌾 𑌰𑌾𑌮 𑌬𑌿𑌭𑍇𑌦 𑌪𑌰𑌮𑌾𑌤𑍍𑌮𑌵𑌾𑌨𑍍 ॥ 1 ॥
𑌭𑌿𑌦𑍍𑌯𑌮𑌾𑌨𑌸𑍍𑌤𑌤𑍋 𑌗𑌰𑍍𑌭𑍋 𑌵𑌜𑍍𑌰𑍇𑌣 𑌶𑌤𑌪𑌰𑍍𑌵𑌣𑌾 ।
𑌰𑍁𑌰𑍋𑌦 𑌸𑍁𑌸𑍍𑌵𑌰𑌂 𑌰𑌾𑌮 𑌤𑌤𑍋 𑌦𑌿𑌤𑌿𑌰𑌬𑍁𑌧𑍍𑌯𑌤 ॥ 1 ॥
𑌮𑌾 𑌰𑍁𑌦𑍋 𑌮𑌾 𑌰𑍁𑌦𑌶𑍍𑌚𑍇𑌤𑌿 𑌗𑌰𑍍𑌭𑌂 𑌶𑌕𑍍𑌰𑍋𑌽𑌭𑍍𑌯𑌭𑌾𑌷𑌤 ।
𑌬𑌿𑌭𑍇𑌦 𑌚 𑌮𑌹𑌾𑌤𑍇𑌜𑌾 𑌰𑍁𑌦𑌂𑌤𑌮𑌪𑌿 𑌵𑌾𑌸𑌵𑌃 ॥ 20 ॥
𑌨 𑌹𑌂𑌤𑌵𑍍𑌯𑍋 𑌨 𑌹𑌂𑌤𑌵𑍍𑌯 𑌇𑌤𑍍𑌯𑍇𑌵𑌂 𑌦𑌿𑌤𑌿𑌰𑌬𑍍𑌰𑌵𑍀𑌤𑍍 ।
𑌨𑌿𑌷𑍍𑌪𑌪𑌾𑌤 𑌤𑌤𑌶𑍍𑌶𑌕𑍍𑌰𑍋 𑌮𑌾𑌤𑍁𑌰𑍍𑌵𑌚𑌨𑌗𑍌𑌰𑌵𑌾𑌤𑍍 ॥ 21 ॥
𑌪𑍍𑌰𑌾𑌂𑌜𑌲𑌿𑌰𑍍𑌵𑌜𑍍𑌰𑌸𑌹𑌿𑌤𑍋 𑌦𑌿𑌤𑌿𑌂 𑌶𑌕𑍍𑌰𑍋𑌽𑌭𑍍𑌯𑌭𑌾𑌷𑌤 ।
𑌅𑌶𑍁𑌚𑌿𑌰𑍍𑌦𑍇𑌵𑌿 𑌸𑍁𑌪𑍍𑌤𑌾𑌽𑌸𑌿 𑌪𑌾𑌦𑌯𑍋𑌃 𑌕𑍃𑌤𑌮𑍂𑌰𑍍𑌧𑌜𑌾 ॥ 22 ॥
𑌤𑌦𑌂𑌤𑌰𑌮𑌹𑌂 𑌲𑌬𑍍𑌧𑍍𑌵𑌾 𑌶𑌕𑍍𑌰𑌹𑌂𑌤𑌾𑌰𑌮𑌾𑌹𑌵𑍇 ।
𑌅𑌭𑌿𑌦𑌂 𑌸𑌪𑍍𑌤𑌧𑌾 𑌦𑍇𑌵𑌿 𑌤𑌨𑍍𑌮𑍇 𑌤𑍍𑌵𑌂 𑌕𑍍𑌷𑌂𑌤𑍁𑌮𑌰𑍍𑌹𑌸𑌿 ॥ 23 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌷𑌟𑍍𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
