શ્રીમદ્વાલ્મીકીય રામાયણે બાલકાંડમ્ ।
અથ ષટ્ચત્વારિંશસ્સર્ગઃ ।
હતેષુ તેષુ પુત્રેષુ દિતિઃ પરમદુઃખિતા ।
મારીચં કાશ્યપં રામ ભર્તારમિદમબ્રવીત્ ॥ 1 ॥
હતપુત્રાઽસ્મિ ભગવંસ્તવ પુત્રૈર્મહાબલૈઃ ।
શક્રહંતારમિચ્છામિ પુત્રં દીર્ઘતપોઽર્જિતમ્ ॥ 2 ॥
સાઽહં તપશ્ચરિષ્યામિ ગર્ભં મે દાતુમર્હસિ ।
ઈશ્વરં શક્રહંતારં ત્વમનુજ્ઞાતુમર્હસિ ॥ 3 ॥
તસ્યાસ્તદ્વચનં શ્રુત્વા મારીચઃ કાશ્યપસ્તદા ।
પ્રત્યુવાચ મહાતેજા દિતિં પરમદુઃખિતામ્ ॥ 4 ॥
એવં ભવતુ, ભદ્રં તે શુચિર્ભવ તપોધને ।
જનયિષ્યસિ પુત્રં ત્વં શક્રહંતારમાહવે ॥ 5 ॥
પૂર્ણે વર્ષસહસ્રે તુ શુચિર્યદિ ભવિષ્યસિ ।
પુત્રં ત્રૈલોક્યભર્તારં મત્તસ્ત્વં જનયિષ્યસિ ॥ 6 ॥
એવમુક્ત્વા મહાતેજાઃ પાણિના સ મમાર્જ તામ્ ।
સમાલભ્ય તતસ્સ્વસ્તીત્યુક્ત્વા સ તપસે યયૌ ॥ 7 ॥
ગતે તસ્મિન્નરશ્શ્રેષ્ઠ દિતિઃ પરમહર્ષિતા ।
કુશપ્લવનમાસાદ્ય તપસ્તેપે સુદારુણમ્ ॥ 8 ॥
તપસ્તસ્યાં હિ કુર્વંત્યાં પરિચર્યાં ચકાર હ ।
સહસ્રાક્ષો નરશ્શ્રેષ્ઠ પરયા ગુણસંપદા ॥ 9 ॥
અગ્નિં કુશાન્ કાષ્ઠમપઃ ફલં મૂલં તથૈવ ચ ।
ન્યવેદયત્સહસ્રાક્ષો યચ્ચાન્યદપિ કાંક્ષિતમ્ ॥ 10 ॥
ગાત્રસંવહનશ્ચૈવ શ્રમાપનયનૈસ્તથા ।
શક્રસ્સર્વેષુ કાલેષુ દિતિં પરિચચાર હ ॥ 11 ॥
અથ વર્ષસહસ્રે તુ દશોને રઘુનંદન ।
દિતિઃ પરમસંપ્રીતા સહસ્રાક્ષમથાબ્રવીત્ ॥ 12 ॥
યાચિતેન સુરશ્રેષ્ઠ તવ પિત્રા મહાત્મના ।
વરો વર્ષસહસ્રાંતે દત્તો મમ સુતં પ્રતિ ॥ 13 ॥
તપશ્ચરંત્યા વર્ષાણિ દશ વીર્યવતાં વર ।
અવશિષ્ટાનિ ભદ્રં તે ભ્રાતરં દ્રક્ષ્યસે તતઃ ॥ 14 ॥
તમહં ત્વત્કૃતે પુત્ર સમાધાસ્યે જયોત્સુકમ્ ।
ત્રૈલોક્યવિજયં પુત્ર સહ ભોક્ષ્યસિ વિજ્વરઃ ॥ 15 ॥
એવમુક્ત્વા દિતિશ્શક્રં પ્રાપ્તે મધ્યં દિવાકરે ।
નિદ્રયાઽપહૃતા દેવી પાદૌ કૃત્વાઽથ શીર્ષતઃ ॥ 16 ॥
દૃષ્ટ્વા તામશુચિં શક્રઃ પાદતઃ કૃતમૂર્ધજામ્ ।
શિરસ્સ્થાને કૃતૌ પાદૌ જહાસ ચ મુમોદ ચ ॥ 17 ॥
તસ્યાશ્શરીરવિવરં વિવેશ ચ પુરંદરઃ ।
ગર્ભં ચ સપ્તધા રામ બિભેદ પરમાત્મવાન્ ॥ 18 ॥
ભિદ્યમાનસ્તતો ગર્ભો વજ્રેણ શતપર્વણા ।
રુરોદ સુસ્વરં રામ તતો દિતિરબુધ્યત ॥ 19 ॥
મા રુદો મા રુદશ્ચેતિ ગર્ભં શક્રોઽભ્યભાષત ।
બિભેદ ચ મહાતેજા રુદંતમપિ વાસવઃ ॥ 20 ॥
ન હંતવ્યો ન હંતવ્ય ઇત્યેવં દિતિરબ્રવીત્ ।
નિષ્પપાત તતશ્શક્રો માતુર્વચનગૌરવાત્ ॥ 21 ॥
પ્રાંજલિર્વજ્રસહિતો દિતિં શક્રોઽભ્યભાષત ।
અશુચિર્દેવિ સુપ્તાઽસિ પાદયોઃ કૃતમૂર્ધજા ॥ 22 ॥
તદંતરમહં લબ્ધ્વા શક્રહંતારમાહવે ।
અભિદં સપ્તધા દેવિ તન્મે ત્વં ક્ષંતુમર્હસિ ॥ 23 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે ષટ્ચત્વારિંશસ્સર્ગઃ ॥
