ശ്രീമദ്വാല്മീകീയ രാമായണേ ബാലകാംഡമ് ।
അഥ ഷട്ചത്വാരിംശസ്സര്ഗഃ ।
ഹതേഷു തേഷു പുത്രേഷു ദിതിഃ പരമദുഃഖിതാ ।
മാരീചം കാശ്യപം രാമ ഭര്താരമിദമബ്രവീത് ॥ 1 ॥
ഹതപുത്രാഽസ്മി ഭഗവംസ്തവ പുത്രൈര്മഹാബലൈഃ ।
ശക്രഹംതാരമിച്ഛാമി പുത്രം ദീര്ഘതപോഽര്ജിതമ് ॥ 2 ॥
സാഽഹം തപശ്ചരിഷ്യാമി ഗര്ഭം മേ ദാതുമര്ഹസി ।
ഈശ്വരം ശക്രഹംതാരം ത്വമനുജ്ഞാതുമര്ഹസി ॥ 3 ॥
തസ്യാസ്തദ്വചനം ശ്രുത്വാ മാരീചഃ കാശ്യപസ്തദാ ।
പ്രത്യുവാച മഹാതേജാ ദിതിം പരമദുഃഖിതാമ് ॥ 4 ॥
ഏവം ഭവതു, ഭദ്രം തേ ശുചിര്ഭവ തപോധനേ ।
ജനയിഷ്യസി പുത്രം ത്വം ശക്രഹംതാരമാഹവേ ॥ 5 ॥
പൂര്ണേ വര്ഷസഹസ്രേ തു ശുചിര്യദി ഭവിഷ്യസി ।
പുത്രം ത്രൈലോക്യഭര്താരം മത്തസ്ത്വം ജനയിഷ്യസി ॥ 6 ॥
ഏവമുക്ത്വാ മഹാതേജാഃ പാണിനാ സ മമാര്ജ താമ് ।
സമാലഭ്യ തതസ്സ്വസ്തീത്യുക്ത്വാ സ തപസേ യയൌ ॥ 7 ॥
ഗതേ തസ്മിന്നരശ്ശ്രേഷ്ഠ ദിതിഃ പരമഹര്ഷിതാ ।
കുശപ്ലവനമാസാദ്യ തപസ്തേപേ സുദാരുണമ് ॥ 8 ॥
തപസ്തസ്യാം ഹി കുർവംത്യാം പരിചര്യാം ചകാര ഹ ।
സഹസ്രാക്ഷോ നരശ്ശ്രേഷ്ഠ പരയാ ഗുണസംപദാ ॥ 9 ॥
അഗ്നിം കുശാന് കാഷ്ഠമപഃ ഫലം മൂലം തഥൈവ ച ।
ന്യവേദയത്സഹസ്രാക്ഷോ യച്ചാന്യദപി കാംക്ഷിതമ് ॥ 10 ॥
ഗാത്രസംവഹനശ്ചൈവ ശ്രമാപനയനൈസ്തഥാ ।
ശക്രസ്സർവേഷു കാലേഷു ദിതിം പരിചചാര ഹ ॥ 11 ॥
അഥ വര്ഷസഹസ്രേ തു ദശോനേ രഘുനംദന ।
ദിതിഃ പരമസംപ്രീതാ സഹസ്രാക്ഷമഥാബ്രവീത് ॥ 12 ॥
യാചിതേന സുരശ്രേഷ്ഠ തവ പിത്രാ മഹാത്മനാ ।
വരോ വര്ഷസഹസ്രാംതേ ദത്തോ മമ സുതം പ്രതി ॥ 13 ॥
തപശ്ചരംത്യാ വര്ഷാണി ദശ വീര്യവതാം വര ।
അവശിഷ്ടാനി ഭദ്രം തേ ഭ്രാതരം ദ്രക്ഷ്യസേ തതഃ ॥ 14 ॥
തമഹം ത്വത്കൃതേ പുത്ര സമാധാസ്യേ ജയോത്സുകമ് ।
ത്രൈലോക്യവിജയം പുത്ര സഹ ഭോക്ഷ്യസി വിജ്വരഃ ॥ 15 ॥
ഏവമുക്ത്വാ ദിതിശ്ശക്രം പ്രാപ്തേ മധ്യം ദിവാകരേ ।
നിദ്രയാഽപഹൃതാ ദേവീ പാദൌ കൃത്വാഽഥ ശീര്ഷതഃ ॥ 16 ॥
ദൃഷ്ട്വാ താമശുചിം ശക്രഃ പാദതഃ കൃതമൂര്ധജാമ് ।
ശിരസ്സ്ഥാനേ കൃതൌ പാദൌ ജഹാസ ച മുമോദ ച ॥ 17 ॥
തസ്യാശ്ശരീരവിവരം വിവേശ ച പുരംദരഃ ।
ഗര്ഭം ച സപ്തധാ രാമ ബിഭേദ പരമാത്മവാന് ॥ 18 ॥
ഭിദ്യമാനസ്തതോ ഗര്ഭോ വജ്രേണ ശതപർവണാ ।
രുരോദ സുസ്വരം രാമ തതോ ദിതിരബുധ്യത ॥ 19 ॥
മാ രുദോ മാ രുദശ്ചേതി ഗര്ഭം ശക്രോഽഭ്യഭാഷത ।
ബിഭേദ ച മഹാതേജാ രുദംതമപി വാസവഃ ॥ 20 ॥
ന ഹംതവ്യോ ന ഹംതവ്യ ഇത്യേവം ദിതിരബ്രവീത് ।
നിഷ്പപാത തതശ്ശക്രോ മാതുർവചനഗൌരവാത് ॥ 21 ॥
പ്രാംജലിർവജ്രസഹിതോ ദിതിം ശക്രോഽഭ്യഭാഷത ।
അശുചിര്ദേവി സുപ്താഽസി പാദയോഃ കൃതമൂര്ധജാ ॥ 22 ॥
തദംതരമഹം ലബ്ധ്വാ ശക്രഹംതാരമാഹവേ ।
അഭിദം സപ്തധാ ദേവി തന്മേ ത്വം ക്ഷംതുമര്ഹസി ॥ 23 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ഷട്ചത്വാരിംശസ്സര്ഗഃ ॥
