శ్రీమద్వాల్మీకీయ రామాయణే బాలకాండమ్ ।
అథ సప్తమస్సర్గః ।
. తస్యామాత్యా గుణైరాసన్నిక్ష్వాకోస్తు మహాత్మనః ।
మంత్రజ్ఞాశ్చేంగితజ్ఞాశ్చ నిత్యం ప్రియహితే రతాః ॥ 1 ॥
అష్టౌ బభూవుర్వీరస్య తస్యామాత్యా యశస్వినః ।
శుచయశ్చానురక్తాశ్చ రాజకృత్యేషు నిత్యశః ॥ 2 ॥
ధృష్టిర్జయంతో విజయస్సిద్ధార్థో హ్యర్థసాధకః ।
అశోకో మంత్రపాలశ్చ సుమంత్రశ్చాష్టమోఽభవత్ ॥ 3 ॥
ఋత్విజౌ ద్వావభిమతౌ తస్యాఽఽస్తామృషిసత్తమౌ ।
వసిష్ఠో వామదేవశ్చ మంత్రిణశ్చ తథాపరే ॥ 4 ॥
విద్యావినీతా హ్రీమంతః కుశలా నియతేంద్రియాః ।
శ్రీమంతశ్చ మహాత్మానశ్శాస్త్రజ్ఞా దృఢవిక్రమాః ॥ 5 ॥
కీర్తిమంతః ప్రణిహితాః యథావచనకారిణః ।
తేజః క్షమాయశఃప్రాప్తా స్మితపూర్వాభిభాషిణః ॥ 6 ॥
క్రోధాత్కామార్థహేతోర్వా న బ్రూయురనృతం వచః ।
తేషామవిదితం కించిత్స్వేషు నాస్తి పరేషు వా ।
క్రియమాణం కృతం వాపి చారేణాపి చికీర్షితమ్ ॥ 7 ॥
కుశలా వ్యవహారేషు సౌహృదేషు పరీక్షితాః ।
ప్రాప్తకాలం తు తే దండం ధారయేయుస్సుతేష్వపి ॥ 8 ॥
కోశసంగ్రహణే యుక్తా బలస్య చ పరిగ్రహే ।
అహితం చాపి పురుషం న విహింస్యురదూషకమ్ ॥ 9 ॥
వీరాశ్చ నియతోత్సాహా రాజశాస్త్రమనుష్ఠితాః ।
శుచీనాం రక్షితారశ్చ నిత్యం విషయవాసినామ్ ॥ 10 ॥
బ్రహ్మ క్షత్రమహింసంతస్తే కోశం సమపూరయన్ ।
సుతీక్ష్ణదండాస్సంప్రేక్ష్య పురుషస్య బలాబలమ్ ॥ 11 ॥
శుచీనామేకబుద్ధీనాం సర్వేషాం సంప్రజానతామ్ ।
నాసీత్పురే వా రాష్ట్రే వా మృషావాదీ నరః క్వచిత్ ॥ 12 ॥
కశ్చిన్న దుష్టస్తత్రాసీత్పరదారరతో నరః ।
ప్రశాంతం సర్వమేవాసీద్రాష్ట్రం పురవరం చ తత్ ॥ 13 ॥
సువాససస్సువేషాశ్చ తే చ సర్వే సుశీలినః ।
హితార్థం చ నరేంద్రస్య జాగ్రతో నయచక్షుషా ॥ 14 ॥
గురోర్గుణగృహీతాశ్చ ప్రఖ్యాతాశ్చ పరాక్రమే ।
విదేశేష్వపి విజ్ఞాతాస్సర్వతో బుద్ధినిశ్చయాత్ ॥ 15 ॥
సంధివిగ్రహతత్త్వజ్ఞాః ప్రకృత్యా సంపదాన్వితాః ॥ 16 ॥
మంత్రసంవరణే శక్తాశ్శ్లక్ష్ణాస్సూక్ష్మాసు బుద్ధిషు ।
నీతిశాస్త్రవిశేషజ్ఞాస్సతతం ప్రియవాదినః ॥ 17 ॥
ఈదృశైస్తైరమాత్యైస్తు రాజా దశరథోఽనఘః ।
ఉపపన్నో గుణోపేతైరన్వశాసద్వసుంధరామ్ ॥ 18 ॥
అవేక్షమాణశ్చారేణ ప్రజా ధర్మేణ రంజయన్ ।
ప్రజానాం పాలనం కుర్వన్నధర్మాన్పరివర్జయన్ ॥ 19 ॥
విశ్రుతస్త్రిషు లోకేషు వదాన్యస్సత్యసంగరః ।
స తత్ర పురుషవ్యాఘ్రశ్శశాస పృథివీమిమామ్ ॥ 20 ॥
నాధ్యగచ్ఛద్విశిష్టం వా తుల్యం వా శత్రుమాత్మనః ।
మిత్రవాన్నతసామంతః ప్రతాపహతకంటకః ॥ 21 ॥
స శశాస జగద్రాజా దివం దేవపతిర్యథా ।
తైర్మంత్రిభిర్మంత్రహితే నియుక్తై ర్వృతోఽనురక్తైః కుశలైస్సమర్థైః ।
స పార్థివో దీప్తిమవాప యుక్త స్తేజోమయైర్గోభిరివోదితోఽర్కః ॥ 22 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే సప్తమస్సర్గః ॥
