ශ්රීමද්වාල්මීකීය රාමායණේ බාලකාංඩම් ।
අථ සප්තමස්සර්ගඃ ।
. තස්යාමාත්යා ගුණෛරාසන්නික්ෂ්වාකෝස්තු මහාත්මනඃ ।
මංත්රජ්ඤාශ්චේංගිතජ්ඤාශ්ච නිත්යං ප්රියහිතේ රතාඃ ॥ 1 ॥
අෂ්ටෞ බභූවුර්වීරස්ය තස්යාමාත්යා යශස්විනඃ ।
ශුචයශ්චානුරක්තාශ්ච රාජකෘත්යේෂු නිත්යශඃ ॥ 2 ॥
ධෘෂ්ටිර්ජයංතෝ විජයස්සිද්ධාර්ථෝ හ්යර්ථසාධකඃ ।
අශෝකෝ මංත්රපාලශ්ච සුමංත්රශ්චාෂ්ටමෝऽභවත් ॥ 3 ॥
ඍත්විජෞ ද්වාවභිමතෞ තස්යාऽऽස්තාමෘෂිසත්තමෞ ।
වසිෂ්ඨෝ වාමදේවශ්ච මංත්රිණශ්ච තථාපරේ ॥ 4 ॥
විද්යාවිනීතා හ්රීමංතඃ කුශලා නියතේංද්රියාඃ ।
ශ්රීමංතශ්ච මහාත්මානශ්ශාස්ත්රජ්ඤා දෘඪවික්රමාඃ ॥ 5 ॥
කීර්තිමංතඃ ප්රණිහිතාඃ යථාවචනකාරිණඃ ।
තේජඃ ක්ෂමායශඃප්රාප්තා ස්මිතපූර්වාභිභාෂිණඃ ॥ 6 ॥
ක්රෝධාත්කාමාර්ථහේතෝර්වා න බ්රූයුරනෘතං වචඃ ।
තේෂාමවිදිතං කිංචිත්ස්වේෂු නාස්ති පරේෂු වා ।
ක්රියමාණං කෘතං වාපි චාරේණාපි චිකීර්ෂිතම් ॥ 7 ॥
කුශලා ව්යවහාරේෂු සෞහෘදේෂු පරීක්ෂිතාඃ ।
ප්රාප්තකාලං තු තේ දංඩං ධාරයේයුස්සුතේෂ්වපි ॥ 8 ॥
කෝශසංග්රහණේ යුක්තා බලස්ය ච පරිග්රහේ ।
අහිතං චාපි පුරුෂං න විහිංස්යුරදූෂකම් ॥ 9 ॥
වීරාශ්ච නියතෝත්සාහා රාජශාස්ත්රමනුෂ්ඨිතාඃ ।
ශුචීනාං රක්ෂිතාරශ්ච නිත්යං විෂයවාසිනාම් ॥ 10 ॥
බ්රහ්ම ක්ෂත්රමහිංසංතස්තේ කෝශං සමපූරයන් ।
සුතීක්ෂ්ණදංඩාස්සංප්රේක්ෂ්ය පුරුෂස්ය බලාබලම් ॥ 11 ॥
ශුචීනාමේකබුද්ධීනාං සර්වේෂාං සංප්රජානතාම් ।
නාසීත්පුරේ වා රාෂ්ට්රේ වා මෘෂාවාදී නරඃ ක්වචිත් ॥ 12 ॥
කශ්චින්න දුෂ්ටස්තත්රාසීත්පරදාරරතෝ නරඃ ।
ප්රශාංතං සර්වමේවාසීද්රාෂ්ට්රං පුරවරං ච තත් ॥ 13 ॥
සුවාසසස්සුවේෂාශ්ච තේ ච සර්වේ සුශීලිනඃ ।
හිතාර්ථං ච නරේංද්රස්ය ජාග්රතෝ නයචක්ෂුෂා ॥ 14 ॥
ගුරෝර්ගුණගෘහීතාශ්ච ප්රඛ්යාතාශ්ච පරාක්රමේ ।
විදේශේෂ්වපි විජ්ඤාතාස්සර්වතෝ බුද්ධිනිශ්චයාත් ॥ 15 ॥
සංධිවිග්රහතත්ත්වජ්ඤාඃ ප්රකෘත්යා සංපදාන්විතාඃ ॥ 16 ॥
මංත්රසංවරණේ ශක්තාශ්ශ්ලක්ෂ්ණාස්සූක්ෂ්මාසු බුද්ධිෂු ।
නීතිශාස්ත්රවිශේෂජ්ඤාස්සතතං ප්රියවාදිනඃ ॥ 17 ॥
ඊදෘශෛස්තෛරමාත්යෛස්තු රාජා දශරථෝऽනඝඃ ।
උපපන්නෝ ගුණෝපේතෛරන්වශාසද්වසුංධරාම් ॥ 18 ॥
අවේක්ෂමාණශ්චාරේණ ප්රජා ධර්මේණ රංජයන් ।
ප්රජානාං පාලනං කුර්වන්නධර්මාන්පරිවර්ජයන් ॥ 19 ॥
විශ්රුතස්ත්රිෂු ලෝකේෂු වදාන්යස්සත්යසංගරඃ ।
ස තත්ර පුරුෂව්යාඝ්රශ්ශශාස පෘථිවීමිමාම් ॥ 20 ॥
නාධ්යගච්ඡද්විශිෂ්ටං වා තුල්යං වා ශත්රුමාත්මනඃ ।
මිත්රවාන්නතසාමංතඃ ප්රතාපහතකංටකඃ ॥ 21 ॥
ස ශශාස ජගද්රාජා දිවං දේවපතිර්යථා ।
තෛර්මංත්රිභිර්මංත්රහිතේ නියුක්තෛ ර්වෘතෝऽනුරක්තෛඃ කුශලෛස්සමර්ථෛඃ ।
ස පාර්ථිවෝ දීප්තිමවාප යුක්ත ස්තේජෝමයෛර්ගෝභිරිවෝදිතෝऽර්කඃ ॥ 22 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ සප්තමස්සර්ගඃ ॥
