ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ସପ୍ତମସ୍ସର୍ଗଃ ।
. ତସ୍ୟାମାତ୍ୟା ଗୁଣୈରାସନ୍ନିକ୍ଷ୍ଵାକୋସ୍ତୁ ମହାତ୍ମନଃ ।
ମଂତ୍ରଜ୍ଞାଶ୍ଚେଂଗିତଜ୍ଞାଶ୍ଚ ନିତ୍ୟଂ ପ୍ରିୟହିତେ ରତାଃ ॥ 1 ॥
ଅଷ୍ଟୌ ବଭୂଵୁର୍ଵୀରସ୍ୟ ତସ୍ୟାମାତ୍ୟା ୟଶସ୍ଵିନଃ ।
ଶୁଚୟଶ୍ଚାନୁରକ୍ତାଶ୍ଚ ରାଜକୃତ୍ୟେଷୁ ନିତ୍ୟଶଃ ॥ 2 ॥
ଧୃଷ୍ଟିର୍ଜୟଂତୋ ଵିଜୟସ୍ସିଦ୍ଧାର୍ଥୋ ହ୍ୟର୍ଥସାଧକଃ ।
ଅଶୋକୋ ମଂତ୍ରପାଲଶ୍ଚ ସୁମଂତ୍ରଶ୍ଚାଷ୍ଟମୋଽଭଵତ୍ ॥ 3 ॥
ଋତ୍ଵିଜୌ ଦ୍ଵାଵଭିମତୌ ତସ୍ୟାଽଽସ୍ତାମୃଷିସତ୍ତମୌ ।
ଵସିଷ୍ଠୋ ଵାମଦେଵଶ୍ଚ ମଂତ୍ରିଣଶ୍ଚ ତଥାପରେ ॥ 4 ॥
ଵିଦ୍ୟାଵିନୀତା ହ୍ରୀମଂତଃ କୁଶଲା ନିୟତେଂଦ୍ରିୟାଃ ।
ଶ୍ରୀମଂତଶ୍ଚ ମହାତ୍ମାନଶ୍ଶାସ୍ତ୍ରଜ୍ଞା ଦୃଢଵିକ୍ରମାଃ ॥ 5 ॥
କୀର୍ତିମଂତଃ ପ୍ରଣିହିତାଃ ୟଥାଵଚନକାରିଣଃ ।
ତେଜଃ କ୍ଷମାୟଶଃପ୍ରାପ୍ତା ସ୍ମିତପୂର୍ଵାଭିଭାଷିଣଃ ॥ 6 ॥
କ୍ରୋଧାତ୍କାମାର୍ଥହେତୋର୍ଵା ନ ବ୍ରୂୟୁରନୃତଂ ଵଚଃ ।
ତେଷାମଵିଦିତଂ କିଂଚିତ୍ସ୍ଵେଷୁ ନାସ୍ତି ପରେଷୁ ଵା ।
କ୍ରିୟମାଣଂ କୃତଂ ଵାପି ଚାରେଣାପି ଚିକୀର୍ଷିତମ୍ ॥ 7 ॥
କୁଶଲା ଵ୍ୟଵହାରେଷୁ ସୌହୃଦେଷୁ ପରୀକ୍ଷିତାଃ ।
ପ୍ରାପ୍ତକାଲଂ ତୁ ତେ ଦଂଡଂ ଧାରୟେୟୁସ୍ସୁତେଷ୍ଵପି ॥ 8 ॥
କୋଶସଂଗ୍ରହଣେ ୟୁକ୍ତା ବଲସ୍ୟ ଚ ପରିଗ୍ରହେ ।
ଅହିତଂ ଚାପି ପୁରୁଷଂ ନ ଵିହିଂସ୍ୟୁରଦୂଷକମ୍ ॥ 9 ॥
ଵୀରାଶ୍ଚ ନିୟତୋତ୍ସାହା ରାଜଶାସ୍ତ୍ରମନୁଷ୍ଠିତାଃ ।
ଶୁଚୀନାଂ ରକ୍ଷିତାରଶ୍ଚ ନିତ୍ୟଂ ଵିଷୟଵାସିନାମ୍ ॥ 10 ॥
ବ୍ରହ୍ମ କ୍ଷତ୍ରମହିଂସଂତସ୍ତେ କୋଶଂ ସମପୂରୟନ୍ ।
ସୁତୀକ୍ଷ୍ଣଦଂଡାସ୍ସଂପ୍ରେକ୍ଷ୍ୟ ପୁରୁଷସ୍ୟ ବଲାବଲମ୍ ॥ 11 ॥
ଶୁଚୀନାମେକବୁଦ୍ଧୀନାଂ ସର୍ଵେଷାଂ ସଂପ୍ରଜାନତାମ୍ ।
ନାସୀତ୍ପୁରେ ଵା ରାଷ୍ଟ୍ରେ ଵା ମୃଷାଵାଦୀ ନରଃ କ୍ଵଚିତ୍ ॥ 12 ॥
କଶ୍ଚିନ୍ନ ଦୁଷ୍ଟସ୍ତତ୍ରାସୀତ୍ପରଦାରରତୋ ନରଃ ।
ପ୍ରଶାଂତଂ ସର୍ଵମେଵାସୀଦ୍ରାଷ୍ଟ୍ରଂ ପୁରଵରଂ ଚ ତତ୍ ॥ 13 ॥
ସୁଵାସସସ୍ସୁଵେଷାଶ୍ଚ ତେ ଚ ସର୍ଵେ ସୁଶୀଲିନଃ ।
ହିତାର୍ଥଂ ଚ ନରେଂଦ୍ରସ୍ୟ ଜାଗ୍ରତୋ ନୟଚକ୍ଷୁଷା ॥ 14 ॥
ଗୁରୋର୍ଗୁଣଗୃହୀତାଶ୍ଚ ପ୍ରଖ୍ୟାତାଶ୍ଚ ପରାକ୍ରମେ ।
ଵିଦେଶେଷ୍ଵପି ଵିଜ୍ଞାତାସ୍ସର୍ଵତୋ ବୁଦ୍ଧିନିଶ୍ଚୟାତ୍ ॥ 15 ॥
ସଂଧିଵିଗ୍ରହତତ୍ତ୍ଵଜ୍ଞାଃ ପ୍ରକୃତ୍ୟା ସଂପଦାନ୍ଵିତାଃ ॥ 16 ॥
ମଂତ୍ରସଂଵରଣେ ଶକ୍ତାଶ୍ଶ୍ଲକ୍ଷ୍ଣାସ୍ସୂକ୍ଷ୍ମାସୁ ବୁଦ୍ଧିଷୁ ।
ନୀତିଶାସ୍ତ୍ରଵିଶେଷଜ୍ଞାସ୍ସତତଂ ପ୍ରିୟଵାଦିନଃ ॥ 17 ॥
ଈଦୃଶୈସ୍ତୈରମାତ୍ୟୈସ୍ତୁ ରାଜା ଦଶରଥୋଽନଘଃ ।
ଉପପନ୍ନୋ ଗୁଣୋପେତୈରନ୍ଵଶାସଦ୍ଵସୁଂଧରାମ୍ ॥ 18 ॥
ଅଵେକ୍ଷମାଣଶ୍ଚାରେଣ ପ୍ରଜା ଧର୍ମେଣ ରଂଜୟନ୍ ।
ପ୍ରଜାନାଂ ପାଲନଂ କୁର୍ଵନ୍ନଧର୍ମାନ୍ପରିଵର୍ଜୟନ୍ ॥ 19 ॥
ଵିଶ୍ରୁତସ୍ତ୍ରିଷୁ ଲୋକେଷୁ ଵଦାନ୍ୟସ୍ସତ୍ୟସଂଗରଃ ।
ସ ତତ୍ର ପୁରୁଷଵ୍ୟାଘ୍ରଶ୍ଶଶାସ ପୃଥିଵୀମିମାମ୍ ॥ 20 ॥
ନାଧ୍ୟଗଚ୍ଛଦ୍ଵିଶିଷ୍ଟଂ ଵା ତୁଲ୍ୟଂ ଵା ଶତ୍ରୁମାତ୍ମନଃ ।
ମିତ୍ରଵାନ୍ନତସାମଂତଃ ପ୍ରତାପହତକଂଟକଃ ॥ 21 ॥
ସ ଶଶାସ ଜଗଦ୍ରାଜା ଦିଵଂ ଦେଵପତିର୍ୟଥା ।
ତୈର୍ମଂତ୍ରିଭିର୍ମଂତ୍ରହିତେ ନିୟୁକ୍ତୈ ର୍ଵୃତୋଽନୁରକ୍ତୈଃ କୁଶଲୈସ୍ସମର୍ଥୈଃ ।
ସ ପାର୍ଥିଵୋ ଦୀପ୍ତିମଵାପ ୟୁକ୍ତ ସ୍ତେଜୋମୟୈର୍ଗୋଭିରିଵୋଦିତୋଽର୍କଃ ॥ 22 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ସପ୍ତମସ୍ସର୍ଗଃ ॥
