śrīmadvālmīkīya rāmāyaṇē bālakāṇḍam ।
atha saptamassargaḥ ।
. tasyāmātyā guṇairāsannikṣvākōstu mahātmanaḥ ।
mantrajñāśchēṅgitajñāścha nityaṃ priyahitē ratāḥ ॥ 1 ॥
aṣṭau babhūvurvīrasya tasyāmātyā yaśasvinaḥ ।
śuchayaśchānuraktāścha rājakṛtyēṣu nityaśaḥ ॥ 2 ॥
dhṛṣṭirjayantō vijayassiddhārthō hyarthasādhakaḥ ।
aśōkō mantrapālaścha sumantraśchāṣṭamō'bhavat ॥ 3 ॥
ṛtvijau dvāvabhimatau tasyā''stāmṛṣisattamau ।
vasiṣṭhō vāmadēvaścha mantriṇaścha tathāparē ॥ 4 ॥
vidyāvinītā hrīmantaḥ kuśalā niyatēndriyāḥ ।
śrīmantaścha mahātmānaśśāstrajñā dṛḍhavikramāḥ ॥ 5 ॥
kīrtimantaḥ praṇihitāḥ yathāvachanakāriṇaḥ ।
tējaḥ kṣamāyaśaḥprāptā smitapūrvābhibhāṣiṇaḥ ॥ 6 ॥
krōdhātkāmārthahētōrvā na brūyuranṛtaṃ vachaḥ ।
tēṣāmaviditaṃ kiñchitsvēṣu nāsti parēṣu vā ।
kriyamāṇaṃ kṛtaṃ vāpi chārēṇāpi chikīrṣitam ॥ 7 ॥
kuśalā vyavahārēṣu sauhṛdēṣu parīkṣitāḥ ।
prāptakālaṃ tu tē daṇḍaṃ dhārayēyussutēṣvapi ॥ 8 ॥
kōśasaṅgrahaṇē yuktā balasya cha parigrahē ।
ahitaṃ chāpi puruṣaṃ na vihiṃsyuradūṣakam ॥ 9 ॥
vīrāścha niyatōtsāhā rājaśāstramanuṣṭhitāḥ ।
śuchīnāṃ rakṣitāraścha nityaṃ viṣayavāsinām ॥ 10 ॥
brahma kṣatramahiṃsantastē kōśaṃ samapūrayan ।
sutīkṣṇadaṇḍāssamprēkṣya puruṣasya balābalam ॥ 11 ॥
śuchīnāmēkabuddhīnāṃ sarvēṣāṃ samprajānatām ।
nāsītpurē vā rāṣṭrē vā mṛṣāvādī naraḥ kvachit ॥ 12 ॥
kaśchinna duṣṭastatrāsītparadāraratō naraḥ ।
praśāntaṃ sarvamēvāsīdrāṣṭraṃ puravaraṃ cha tat ॥ 13 ॥
suvāsasassuvēṣāścha tē cha sarvē suśīlinaḥ ।
hitārthaṃ cha narēndrasya jāgratō nayachakṣuṣā ॥ 14 ॥
gurōrguṇagṛhītāścha prakhyātāścha parākramē ।
vidēśēṣvapi vijñātāssarvatō buddhiniśchayāt ॥ 15 ॥
sandhivigrahatattvajñāḥ prakṛtyā sampadānvitāḥ ॥ 16 ॥
mantrasaṃvaraṇē śaktāśślakṣṇāssūkṣmāsu buddhiṣu ।
nītiśāstraviśēṣajñāssatataṃ priyavādinaḥ ॥ 17 ॥
īdṛśaistairamātyaistu rājā daśarathō'naghaḥ ।
upapannō guṇōpētairanvaśāsadvasundharām ॥ 18 ॥
avēkṣamāṇaśchārēṇa prajā dharmēṇa rañjayan ।
prajānāṃ pālanaṃ kurvannadharmānparivarjayan ॥ 19 ॥
viśrutastriṣu lōkēṣu vadānyassatyasaṅgaraḥ ।
sa tatra puruṣavyāghraśśaśāsa pṛthivīmimām ॥ 20 ॥
nādhyagachChadviśiṣṭaṃ vā tulyaṃ vā śatrumātmanaḥ ।
mitravānnatasāmantaḥ pratāpahatakaṇṭakaḥ ॥ 21 ॥
sa śaśāsa jagadrājā divaṃ dēvapatiryathā ।
tairmantribhirmantrahitē niyuktai rvṛtō'nuraktaiḥ kuśalaissamarthaiḥ ।
sa pārthivō dīptimavāpa yukta stējōmayairgōbhirivōditō'rkaḥ ॥ 22 ॥
ityārṣē śrīmadrāmāyaṇē vālmīkīya ādikāvyē bālakāṇḍē saptamassargaḥ ॥
