śrīmadvālmīkīya rāmāyaṇē ayōdhyākāṇḍam ।
atha chatuḥpañchāśassargaḥ ।
tē tu tasminmahāvṛkṣē uṣitvā rajanīṃ śivām ।
vimalē'bhyuditē sūryē tasmāddēśātpratasthirē ॥ 1 ॥
yatra bhāgīrathīṃ gaṅgāṃ yamunābhipravartatē ।
jagmustaṃ dēśamuddiśya vigāhya sumahadvanam ॥ 2 ॥
tē bhūmibhāgānvividhān dēśāṃśchāpi manōramān ।
adṛṣṭapūrvān paśyantastatra tatra yaśaśvinaḥ ॥ 3 ॥
yathā kṣēmēṇa gachChan sa paśyaṃścha vividhān drumān ।
nivṛttamātrē divasē rāmaḥ saumitrimabravīt ॥ 4 ॥
prayāgamabhitaḥ paśya saumitrē dhūmamunnatam ।
agnērbhagavataḥ kētuṃ manyē sannihitō muniḥ ॥ 5 ॥
nūnaṃ prāptāḥ sma sambhēdaṃ gaṅgāyamunayōrvayam ।
tathā hi śrūyatē śabdō vāriṇō vārighaṭṭitaḥ ॥ 6 ॥
dārūṇi paribhinnāni vanajairupajīvibhiḥ ।
bharadvājāśramē chaitē dṛśyantē vividhā drumāḥ ॥ 7 ॥
dhanvinau tau sukhaṃ gatvā lambamānē divākarē ।
gaṅgāyamunayōssandhau prāpaturnilayaṃ munēḥ ॥ 8 ॥
rāmastvāśramamāsādya trāsayanmṛgapakṣiṇaḥ ।
gatvā muhūrtamadhvānaṃ bharadvājamupāgamat ॥ 9 ॥
tatastvāśramāsādya munērdarśanakāṅkṣiṇau ।
sītayānugatau vīrau dūrādēvāvatasthatuḥ ॥ 10 ॥
sa praviśya mahātmānamṛṣiṃ śiṣyagaṇairvṛtam ।
saṃśitavratamēkāgraṃ tapasā labdhachakṣuṣam ॥ 11 ॥
hutāgnihōtraṃ dṛṣṭvaiva mahābhāgaṃ kṛtāñjaliḥ ।
rāmaḥ saumitriṇā sārdhaṃ sītayā chābhyavādayat ॥ 12 ॥
nyavēdayata chātmānaṃ tasmai lakṣmaṇapūrvajaḥ ।
putrau daśarathasyāvāṃ bhagavan rāmalakṣmaṇau ॥ 13 ॥
bhāryā mamēyaṃ vaidēhī kalyāṇī janakātmajā ।
māṃ chānuyātā vijanaṃ tapōvanamaninditā ॥ 14 ॥
pitrā pravrājyamānaṃ māṃ saumitriranuja priyaḥ ।
ayamanvagamadbhrātā vanamēva dṛḍhavrataḥ ॥ 15 ॥
pitrā niyuktā bhagavan pravēkṣyāmastapōvanam ।
dharmamēva chariṣyāma statra mūlaphalāśanāḥ ॥ 16 ॥
tasya tadvachanaṃ śrutvā rājaputrasya dhīmataḥ ।
upānayata dharmātmā gāmarghyamudakaṃ tataḥ ॥ 17 ॥
nānāvidhānannarasān vanyamūlaphalāśrayān ।
tēbhyō dadau taptatapā vāsaṃ chaivābhyakalpayat ॥ 18 ॥
mṛgapakṣibhirāsīnō munibhiścha samantataḥ ।
rāmamāgatamabhyarchya svāgatēnāhataṃ muniḥ ॥ 19 ॥
pratigṛhya cha tāmarchāmupaviṣṭaṃ sa rāghavam ।
bharadvājō'bravīdvākyaṃ dharmayuktamidaṃ tadā ॥ 20 ॥
chirasya khalu kākutstha paśyāmi tvāmihāgatam ।
śrutaṃ tava mayā chēdaṃ vivāsanamakāraṇam ॥ 21 ॥
avakāśō viviktō'yaṃ mahānadyōssamāgamē ।
puṇyaścha ramaṇīyaścha vasatviha bhavān sukham ॥ 22 ॥
ēvamuktastu vachanaṃ bharadvājēna rāghavaḥ ।
pratyuvācha śubhaṃ vākyaṃ rāmaḥ sarvahitē rataḥ ॥ 23 ॥
bhagavannita āsannaḥ paurajānapadō janaḥ ।
sudarśamiha māṃ prēkṣya manyē'hamimamāśramam ॥ 24 ॥
āgamiṣyati vaidēhīṃ māṃ chāpi prēkṣakō janaḥ ।
anēna kāraṇēnāhamiha vāsaṃ na rōchayē ॥ 25 ॥
ēkāntē paśya bhagavannāśramasthānamuttamam ।
ramēta yatra vaidēhī sukhārhā janakātmajā ॥ 26 ॥
ētaChrutvā śubhaṃ vākyaṃ bharadvājō mahāmuniḥ ।
rāghavasya tatō vākyamarthagrāhakamabravīt ॥ 27 ॥
daśakrōśa itastāta giriryatranivatsyasi ।
maharṣisēvitaḥ puṇyaḥ sarvataḥ sukhadarśanaḥ ॥ 28 ॥
gōlāṅgūlānucharitō vānararkṣaniṣēvitaḥ ।
chitrakūṭa iti khyātō gandhamādanasannibhaḥ ॥ 29 ॥
yāvatā chitrakūṭasya naraśṛṅgānyavēkṣatē ।
kalyāṇāni samādhattē na pāpē kurutē manaḥ ॥ 30 ॥
ṛṣayastatra bahavō vihṛtya śaradāṃ śatam ।
tapasā divamārūḍhāḥ kapālaśirasā saha ॥ 31 ॥
praviviktamahaṃ manyē taṃ vāsaṃ bhavatassukham ।
iha vā vanavāsāya vasa rāma mayā saha ॥ 32 ॥
sa rāmaṃ sarvakāmaistaṃ bharadvājaḥ priyātithim ।
sabhāryaṃ saha cha bhrātrā pratijagrāha dharmavit ॥ 33 ॥
tasya prayāgē rāmasya taṃ maharṣimupēyuṣaḥ ।
prapannā rajanī puṇyāḥ chitrāḥ kathayataḥ kathāḥ ॥ 34 ॥
sītātṛtīyaḥ kākutsthaḥ pariśrāntaḥ sukhōchitaḥ ।
bharadvājāśramē ramyē tāṃ rātrimavasatsukham ॥ 35 ॥
prabhātāyāṃ rajanyāṃ tu bharadvājamupāgamat ।
uvācha naraśārdūlō muniṃ jvalitatējasam ॥ 36 ॥
śarvarīṃ bhagavannadya satyaśīla tavāśramē ।
uṣitāḥ smēha vasatimanujānātu nō bhavān ॥ 37 ॥
rātryāṃ tu tasyāṃ vyuṣṭāyāṃ bharadvājō'bravīdidam ।
madhumūlaphalōpētaṃ chitrakūṭaṃ vrajēti ha ॥ 38 ॥
vāsamaupayikaṃ manyē tava rāma mahābala nānānagagaṇōpētaḥ kinnarōragasēvitaḥ ।
mayūranādābhirutō gajarājaniṣēvitaḥ ॥ 39 ॥
gamyatāṃ bhavatā śaila śchitrakūṭaḥ sa viśrutaḥ ।
puṇyaścha ramaṇīyaścha bahumūlaphalāyutaḥ ॥ 40 ॥
tatra kuñjarayūthāni mṛgayūthāni chābhitaḥ ।
vicharanti vanāntēsmin tāni drakṣyasi rāghava ॥ 41 ॥
saritprasravaṇaprasthān darīkandaranirjharān ।
charataḥ sītayā sārdhaṃ nandiṣyati manastava ॥ 42 ॥
prahṛṣṭakōyaṣṭikakōkilasvanairvināditaṃ taṃ vasudhādharaṃ śivam ।
mṛgaiścha mattairbahubhiścha kuñjaraiḥ suramyamāsādya samāvasāśramam ॥ 43 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē chatuḥpañchāśassargaḥ ॥
