śrīmadvālmīkīya rāmāyaṇē araṇyakāṇḍam ।
atha chaturviṃśassargaḥ ।
āśramaṃ prati yātē tu kharē kharaparākramē ।
tānēvautpātikānrāmassaha bhrātrā dadarśa ha ॥ 1 ॥
tānutpātānmahōghōrānutthitānrōmaharṣaṇān ।
prajānāmahitāndṛṣṭvā rāmō lakṣmaṇamabravīt ॥ 2 ॥
imānpaśya mahābāhō sarvabhūtāpahāriṇaḥ ।
samutthitānmahōtpātānsaṃhartuṃ sarvarākṣasān ॥ 3 ॥
amī rudhiradhārāstu visṛjantaḥ kharasvanāḥ ।
vyōmni mēghā vivartantē paruṣā gardabhāruṇāḥ ॥ 4 ॥
sadhūmāścha śarāssarvē mama yuddhābhinandinaḥ ।
rukmapṛṣṭhāni chāpāni vichēṣṭantē cha lakṣmaṇa ॥ 5 ॥
yādṛśā iha kūjanti pakṣiṇaḥ vanachāriṇaḥ ।
agratō nō bhayaṃ prāptaṃ saṃśayō jīvitasya cha ॥ 6 ॥
samprahārastu sumahānbhaviṣyati na saṃśayaḥ ।
ayamākhyāti mē bāhussphuramāṇō muhurmuhuḥ ॥ 7 ॥
sannikarṣē tu na śśūra jayaṃ śatrōḥ parājayam ।
saprabhaṃ cha prasannaṃ cha tava vaktraṃ hi lakṣyatē ॥ 8 ॥
udyatānāṃ hi yuddhārthaṃ yēṣāṃ bhavati lakṣmaṇa ।
niṣprabhaṃ vadanaṃ tēṣāṃ bhavatyāyuḥ parikṣayaḥ ॥ 9 ॥
rakṣasāṃ nardatāṃ ghōraśśrūyatē cha mahādhvaniḥ ।
āhatānāṃ cha bhērīṇāṃ rākṣasaiḥ krūrakarmabhiḥ ॥ 10 ॥
anāgatavidhānaṃ tu kartavyaṃ śubhamichChatā ।
āpadaṃ śaṅkamānēna puruṣēṇa vipaśchitā ॥ 11 ॥
tasmādgṛhītvā vaidēhīṃ śarapāṇirdhanurdharaḥ ।
guhāmāśraya śailasya durgāṃ pādapasaṅkulām ॥ 12 ॥
pratikūlitumichChāmi na hi vākyamidaṃ tvayā ।
śāpitō mama pādābhyāṃ gamyatāṃ vatsa mā chiram ॥ 13 ॥
tvaṃ hi śūraścha balavānhanyāhyētānna saṃśayaḥ ।
svayaṃ tu hantumichChāmi sarvānēva niśācharān ॥ 14 ॥
ēvamuktastu rāmēṇa lakṣmaṇassaha sītāyā ।
śarānādāya chāpaṃ cha guhāṃ durgāṃ samāśrayat ॥ 15 ॥
tasminpraviṣṭē tu guhāṃ lakṣmaṇē saha sītayā ।
hanta niryuktamityuktvā rāmaḥ kavachamāviśat ॥ 16 ॥
sa tēnāgni nikāśēna kavachēna vibhūṣitaḥ ।
babhūva rāma stimirē vidhūmō'gnirivōtthitaḥ ॥ 17 ॥
sa chāpamudyamya mahachCharānādāya vīryavān ।
babhūvāvasthitastatra jyāsvanaiḥ pūrayandiśaḥ ॥ 18 ॥
tatō dēvāssagandharvāssiddhāścha saha chāraṇaiḥ ।
samēyuścha mahātmānō yuddhadarśanakāṅkṣiṇaḥ ॥ 19 ॥
ṛṣayaścha mahātmānō lōkē brahmarṣisattamāḥ ।
samētya chōchussahitā anyōnyaṃ puṇyakarmaṇaḥ ॥ 20 ॥
svasti gōbrāhmaṇēbhyō'stu lōkānāṃ yē'bhisaṅgatāḥ ।
jayatāṃ rāghavō yuddhē paulastyān rajanīcharān ॥ 21 ॥
chakrahastō yathā yuddhē sarvānasura puṅgavān ।
ēvamuktvā punaḥ prōchurālōkya cha parasparam ॥ 22 ॥
chaturdaśa sahasrāṇi rakṣasāṃ bhīmakarmaṇām ।
ēkaścha rāmō dharmātmā kathaṃ yuddhaṃ bhaviṣyati ॥ 23 ॥
iti rājarṣayassiddhāssagaṇāścha dvijarṣabhāḥ ।
jātakautūhalāstasthurvimānasthāścha dēvatāḥ ॥ 24 ॥
āviṣṭaṃ tējasā rāmaṃ saṅgrāmaśirasi sthitam ।
dṛṣṭvā sarvāṇi bhūtāni bhayādvivyathirē tadā ॥ 25 ॥
rūpamapratimaṃ tasya rāmasyākliṣṭakarmaṇaḥ ।
babhūva rūpaṃ kruddhasya rudrasyēva pinākinaḥ ॥ 26 ॥
tatō gambhīranirhrādaṃ ghōravarmāyudhadhvajam ।
anīkaṃ yātudhānānāṃ samantātpratyadṛśyata ॥ 27 ॥
siṃhanādaṃ visṛjatāmanyōnyamabhigarjatām ।
chāpāni visphārayatāṃ jṛmbhatāmapyabhīkṣṇaśaḥ ॥ 28 ॥
vipraghuṣṭasvanānāṃ cha dundhubhīṃśchāpi nighnatām ।
tēṣāṃ sutumulaśśabdaḥ pūrayāmāsa tadvanam ॥ 29 ॥
tēna śabdēna vitrastāśvāpadā vanachāriṇaḥ ।
dudruvuryatra niśśabdaṃ pṛṣṭhatō na vyalōkayan ॥ 30 ॥
tattvanīkaṃ mahāghōraṃ rāmaṃ samupasarpata ।
dhṛtanānāpraharaṇaṃ gambhīraṃ sāgarōpamam ॥ 31 ॥
rāmō'pi chārayaṃśchakṣussarvatō raṇapaṇḍitaḥ ।
dadarśa kharasainyaṃ tadyuddhābhimukhamutthitam ॥ 32 ॥
vitatya cha dhanurbhīmaṃ tūṇyāśchōddhṛtya sāyakān ।
krōdhamāhārayattīvraṃ vadhārthaṃ sarvarakṣasām ॥ 33 ॥
duṣprēkṣyassō'bhavatkṛddhō yugāntāgniriva jvalan ।
taṃ dṛṣṭvā tējasāviṣṭaṃ prādravanvanadēvatāḥ ॥ 34 ॥
tasya kruddhasya rūpaṃ tu rāmasya dadṛśē tadā ।
dakṣasyēva kratuṃ hantumudyatasya pinākinaḥ ॥ 35 ॥
āviṣṭaṃ tējasā rāmaṃ saṅgrāmaśirasi sthitam ।
dṛṣṭvā sarvāṇi bhūtāni bhayārtāni pradudruvuḥ ॥ 36 ॥
tatkārmukairābharaṇairdhvajaiścha tairvarmabhiśchāgnisamānavarṇaiḥ ।
babhūva sainyaṃ piśitāśanānāṃ sūryōdayē nīlamivābhrabṛndam ॥ 37 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē chaturviṃśassargaḥ ॥
