ශ්රීමද්වාල්මීකීය රාමායණේ අරණ්යකාංඩම් ।
අථ චතුර්විංශස්සර්ගඃ ।
ආශ්රමං ප්රති යාතේ තු ඛරේ ඛරපරාක්රමේ ।
තානේවෞත්පාතිකාන්රාමස්සහ භ්රාත්රා දදර්ශ හ ॥ 1 ॥
තානුත්පාතාන්මහෝඝෝරානුත්ථිතාන්රෝමහර්ෂණාන් ।
ප්රජානාමහිතාංදෘෂ්ට්වා රාමෝ ලක්ෂ්මණමබ්රවීත් ॥ 2 ॥
ඉමාන්පශ්ය මහාබාහෝ සර්වභූතාපහාරිණඃ ।
සමුත්ථිතාන්මහෝත්පාතාන්සංහර්තුං සර්වරාක්ෂසාන් ॥ 3 ॥
අමී රුධිරධාරාස්තු විසෘජංතඃ ඛරස්වනාඃ ।
ව්යෝම්නි මේඝා විවර්තංතේ පරුෂා ගර්දභාරුණාඃ ॥ 4 ॥
සධූමාශ්ච ශරාස්සර්වේ මම යුද්ධාභිනංදිනඃ ।
රුක්මපෘෂ්ඨානි චාපානි විචේෂ්ටංතේ ච ලක්ෂ්මණ ॥ 5 ॥
යාදෘශා ඉහ කූජංති පක්ෂිණඃ වනචාරිණඃ ।
අග්රතෝ නෝ භයං ප්රාප්තං සංශයෝ ජීවිතස්ය ච ॥ 6 ॥
සංප්රහාරස්තු සුමහාන්භවිෂ්යති න සංශයඃ ।
අයමාඛ්යාති මේ බාහුස්ස්ඵුරමාණෝ මුහුර්මුහුඃ ॥ 7 ॥
සන්නිකර්ෂේ තු න ශ්ශූර ජයං ශත්රෝඃ පරාජයම් ।
සප්රභං ච ප්රසන්නං ච තව වක්ත්රං හි ලක්ෂ්යතේ ॥ 8 ॥
උද්යතානාං හි යුද්ධාර්ථං යේෂාං භවති ලක්ෂ්මණ ।
නිෂ්ප්රභං වදනං තේෂාං භවත්යායුඃ පරික්ෂයඃ ॥ 9 ॥
රක්ෂසාං නර්දතාං ඝෝරශ්ශ්රූයතේ ච මහාධ්වනිඃ ।
ආහතානාං ච භේරීණාං රාක්ෂසෛඃ ක්රූරකර්මභිඃ ॥ 10 ॥
අනාගතවිධානං තු කර්තව්යං ශුභමිච්ඡතා ।
ආපදං ශංකමානේන පුරුෂේණ විපශ්චිතා ॥ 11 ॥
තස්මාද්ගෘහීත්වා වෛදේහීං ශරපාණිර්ධනුර්ධරඃ ।
ගුහාමාශ්රය ශෛලස්ය දුර්ගාං පාදපසංකුලාම් ॥ 12 ॥
ප්රතිකූලිතුමිච්ඡාමි න හි වාක්යමිදං ත්වයා ।
ශාපිතෝ මම පාදාභ්යාං ගම්යතාං වත්ස මා චිරම් ॥ 13 ॥
ත්වං හි ශූරශ්ච බලවාන්හන්යාහ්යේතාන්න සංශයඃ ।
ස්වයං තු හංතුමිච්ඡාමි සර්වානේව නිශාචරාන් ॥ 14 ॥
ඒවමුක්තස්තු රාමේණ ලක්ෂ්මණස්සහ සීතායා ।
ශරානාදාය චාපං ච ගුහාං දුර්ගාං සමාශ්රයත් ॥ 15 ॥
තස්මින්ප්රවිෂ්ටේ තු ගුහාං ලක්ෂ්මණේ සහ සීතයා ।
හංත නිර්යුක්තමිත්යුක්ත්වා රාමඃ කවචමාවිශත් ॥ 16 ॥
ස තේනාග්නි නිකාශේන කවචේන විභූෂිතඃ ।
බභූව රාම ස්තිමිරේ විධූමෝऽග්නිරිවෝත්ථිතඃ ॥ 17 ॥
ස චාපමුද්යම්ය මහච්ඡරානාදාය වීර්යවාන් ।
බභූවාවස්ථිතස්තත්ර ජ්යාස්වනෛඃ පූරයංදිශඃ ॥ 18 ॥
තතෝ දේවාස්සගංධර්වාස්සිද්ධාශ්ච සහ චාරණෛඃ ।
සමේයුශ්ච මහාත්මානෝ යුද්ධදර්ශනකාංක්ෂිණඃ ॥ 19 ॥
ඍෂයශ්ච මහාත්මානෝ ලෝකේ බ්රහ්මර්ෂිසත්තමාඃ ।
සමේත්ය චෝචුස්සහිතා අන්යෝන්යං පුණ්යකර්මණඃ ॥ 20 ॥
ස්වස්ති ගෝබ්රාහ්මණේභ්යෝऽස්තු ලෝකානාං යේऽභිසංගතාඃ ।
ජයතාං රාඝවෝ යුද්ධේ පෞලස්ත්යාන් රජනීචරාන් ॥ 21 ॥
චක්රහස්තෝ යථා යුද්ධේ සර්වානසුර පුංගවාන් ।
ඒවමුක්ත්වා පුනඃ ප්රෝචුරාලෝක්ය ච පරස්පරම් ॥ 22 ॥
චතුර්දශ සහස්රාණි රක්ෂසාං භීමකර්මණාම් ।
ඒකශ්ච රාමෝ ධර්මාත්මා කථං යුද්ධං භවිෂ්යති ॥ 23 ॥
ඉති රාජර්ෂයස්සිද්ධාස්සගණාශ්ච ද්විජර්ෂභාඃ ।
ජාතකෞතූහලාස්තස්ථුර්විමානස්ථාශ්ච දේවතාඃ ॥ 24 ॥
ආවිෂ්ටං තේජසා රාමං සංග්රාමශිරසි ස්ථිතම් ।
දෘෂ්ට්වා සර්වාණි භූතානි භයාද්විව්යථිරේ තදා ॥ 25 ॥
රූපමප්රතිමං තස්ය රාමස්යාක්ලිෂ්ටකර්මණඃ ।
බභූව රූපං ක්රුද්ධස්ය රුද්රස්යේව පිනාකිනඃ ॥ 26 ॥
තතෝ ගංභීරනිර්හ්රාදං ඝෝරවර්මායුධධ්වජම් ।
අනීකං යාතුධානානාං සමංතාත්ප්රත්යදෘශ්යත ॥ 27 ॥
සිංහනාදං විසෘජතාමන්යෝන්යමභිගර්ජතාම් ।
චාපානි විස්ඵාරයතාං ජෘංභතාමප්යභීක්ෂ්ණශඃ ॥ 28 ॥
විප්රඝුෂ්ටස්වනානාං ච දුංධුභීංශ්චාපි නිඝ්නතාම් ।
තේෂාං සුතුමුලශ්ශබ්දඃ පූරයාමාස තද්වනම් ॥ 29 ॥
තේන ශබ්දේන විත්රස්තාශ්වාපදා වනචාරිණඃ ।
දුද්රුවුර්යත්ර නිශ්ශබ්දං පෘෂ්ඨතෝ න ව්යලෝකයන් ॥ 30 ॥
තත්ත්වනීකං මහාඝෝරං රාමං සමුපසර්පත ।
ධෘතනානාප්රහරණං ගංභීරං සාගරෝපමම් ॥ 31 ॥
රාමෝऽපි චාරයංශ්චක්ෂුස්සර්වතෝ රණපංඩිතඃ ।
දදර්ශ ඛරසෛන්යං තද්යුද්ධාභිමුඛමුත්ථිතම් ॥ 32 ॥
විතත්ය ච ධනුර්භීමං තූණ්යාශ්චෝද්ධෘත්ය සායකාන් ।
ක්රෝධමාහාරයත්තීව්රං වධාර්ථං සර්වරක්ෂසාම් ॥ 33 ॥
දුෂ්ප්රේක්ෂ්යස්සෝऽභවත්කෘද්ධෝ යුගාංතාග්නිරිව ජ්වලන් ।
තං දෘෂ්ට්වා තේජසාවිෂ්ටං ප්රාද්රවන්වනදේවතාඃ ॥ 34 ॥
තස්ය ක්රුද්ධස්ය රූපං තු රාමස්ය දදෘශේ තදා ।
දක්ෂස්යේව ක්රතුං හංතුමුද්යතස්ය පිනාකිනඃ ॥ 35 ॥
ආවිෂ්ටං තේජසා රාමං සංග්රාමශිරසි ස්ථිතම් ।
දෘෂ්ට්වා සර්වාණි භූතානි භයාර්තානි ප්රදුද්රුවුඃ ॥ 36 ॥
තත්කාර්මුකෛරාභරණෛර්ධ්වජෛශ්ච තෛර්වර්මභිශ්චාග්නිසමානවර්ණෛඃ ।
බභූව සෛන්යං පිශිතාශනානාං සූර්යෝදයේ නීලමිවාභ්රබෘංදම් ॥ 37 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ චතුර්විංශස්සර්ගඃ ॥
