ശ്രീമദ്വാല്മീകീയ രാമായണേ അരണ്യകാംഡമ് ।
അഥ ചതുർവിംശസ്സര്ഗഃ ।
ആശ്രമം പ്രതി യാതേ തു ഖരേ ഖരപരാക്രമേ ।
താനേവൌത്പാതികാന്രാമസ്സഹ ഭ്രാത്രാ ദദര്ശ ഹ ॥ 1 ॥
താനുത്പാതാന്മഹോഘോരാനുത്ഥിതാന്രോമഹര്ഷണാന് ।
പ്രജാനാമഹിതാംദൃഷ്ട്വാ രാമോ ലക്ഷ്മണമബ്രവീത് ॥ 2 ॥
ഇമാന്പശ്യ മഹാബാഹോ സർവഭൂതാപഹാരിണഃ ।
സമുത്ഥിതാന്മഹോത്പാതാന്സംഹര്തും സർവരാക്ഷസാന് ॥ 3 ॥
അമീ രുധിരധാരാസ്തു വിസൃജംതഃ ഖരസ്വനാഃ ।
വ്യോമ്നി മേഘാ വിവര്തംതേ പരുഷാ ഗര്ദഭാരുണാഃ ॥ 4 ॥
സധൂമാശ്ച ശരാസ്സർവേ മമ യുദ്ധാഭിനംദിനഃ ।
രുക്മപൃഷ്ഠാനി ചാപാനി വിചേഷ്ടംതേ ച ലക്ഷ്മണ ॥ 5 ॥
യാദൃശാ ഇഹ കൂജംതി പക്ഷിണഃ വനചാരിണഃ ।
അഗ്രതോ നോ ഭയം പ്രാപ്തം സംശയോ ജീവിതസ്യ ച ॥ 6 ॥
സംപ്രഹാരസ്തു സുമഹാന്ഭവിഷ്യതി ന സംശയഃ ।
അയമാഖ്യാതി മേ ബാഹുസ്സ്ഫുരമാണോ മുഹുര്മുഹുഃ ॥ 7 ॥
സന്നികര്ഷേ തു ന ശ്ശൂര ജയം ശത്രോഃ പരാജയമ് ।
സപ്രഭം ച പ്രസന്നം ച തവ വക്ത്രം ഹി ലക്ഷ്യതേ ॥ 8 ॥
ഉദ്യതാനാം ഹി യുദ്ധാര്ഥം യേഷാം ഭവതി ലക്ഷ്മണ ।
നിഷ്പ്രഭം വദനം തേഷാം ഭവത്യായുഃ പരിക്ഷയഃ ॥ 9 ॥
രക്ഷസാം നര്ദതാം ഘോരശ്ശ്രൂയതേ ച മഹാധ്വനിഃ ।
ആഹതാനാം ച ഭേരീണാം രാക്ഷസൈഃ ക്രൂരകര്മഭിഃ ॥ 10 ॥
അനാഗതവിധാനം തു കര്തവ്യം ശുഭമിച്ഛതാ ।
ആപദം ശംകമാനേന പുരുഷേണ വിപശ്ചിതാ ॥ 11 ॥
തസ്മാദ്ഗൃഹീത്വാ വൈദേഹീം ശരപാണിര്ധനുര്ധരഃ ।
ഗുഹാമാശ്രയ ശൈലസ്യ ദുര്ഗാം പാദപസംകുലാമ് ॥ 12 ॥
പ്രതികൂലിതുമിച്ഛാമി ന ഹി വാക്യമിദം ത്വയാ ।
ശാപിതോ മമ പാദാഭ്യാം ഗമ്യതാം വത്സ മാ ചിരമ് ॥ 13 ॥
ത്വം ഹി ശൂരശ്ച ബലവാന്ഹന്യാഹ്യേതാന്ന സംശയഃ ।
സ്വയം തു ഹംതുമിച്ഛാമി സർവാനേവ നിശാചരാന് ॥ 14 ॥
ഏവമുക്തസ്തു രാമേണ ലക്ഷ്മണസ്സഹ സീതായാ ।
ശരാനാദായ ചാപം ച ഗുഹാം ദുര്ഗാം സമാശ്രയത് ॥ 15 ॥
തസ്മിന്പ്രവിഷ്ടേ തു ഗുഹാം ലക്ഷ്മണേ സഹ സീതയാ ।
ഹംത നിര്യുക്തമിത്യുക്ത്വാ രാമഃ കവചമാവിശത് ॥ 16 ॥
സ തേനാഗ്നി നികാശേന കവചേന വിഭൂഷിതഃ ।
ബഭൂവ രാമ സ്തിമിരേ വിധൂമോഽഗ്നിരിവോത്ഥിതഃ ॥ 17 ॥
സ ചാപമുദ്യമ്യ മഹച്ഛരാനാദായ വീര്യവാന് ।
ബഭൂവാവസ്ഥിതസ്തത്ര ജ്യാസ്വനൈഃ പൂരയംദിശഃ ॥ 18 ॥
തതോ ദേവാസ്സഗംധർവാസ്സിദ്ധാശ്ച സഹ ചാരണൈഃ ।
സമേയുശ്ച മഹാത്മാനോ യുദ്ധദര്ശനകാംക്ഷിണഃ ॥ 19 ॥
ഋഷയശ്ച മഹാത്മാനോ ലോകേ ബ്രഹ്മര്ഷിസത്തമാഃ ।
സമേത്യ ചോചുസ്സഹിതാ അന്യോന്യം പുണ്യകര്മണഃ ॥ 20 ॥
സ്വസ്തി ഗോബ്രാഹ്മണേഭ്യോഽസ്തു ലോകാനാം യേഽഭിസംഗതാഃ ।
ജയതാം രാഘവോ യുദ്ധേ പൌലസ്ത്യാന് രജനീചരാന് ॥ 21 ॥
ചക്രഹസ്തോ യഥാ യുദ്ധേ സർവാനസുര പുംഗവാന് ।
ഏവമുക്ത്വാ പുനഃ പ്രോചുരാലോക്യ ച പരസ്പരമ് ॥ 22 ॥
ചതുര്ദശ സഹസ്രാണി രക്ഷസാം ഭീമകര്മണാമ് ।
ഏകശ്ച രാമോ ധര്മാത്മാ കഥം യുദ്ധം ഭവിഷ്യതി ॥ 23 ॥
ഇതി രാജര്ഷയസ്സിദ്ധാസ്സഗണാശ്ച ദ്വിജര്ഷഭാഃ ।
ജാതകൌതൂഹലാസ്തസ്ഥുർവിമാനസ്ഥാശ്ച ദേവതാഃ ॥ 24 ॥
ആവിഷ്ടം തേജസാ രാമം സംഗ്രാമശിരസി സ്ഥിതമ് ।
ദൃഷ്ട്വാ സർവാണി ഭൂതാനി ഭയാദ്വിവ്യഥിരേ തദാ ॥ 25 ॥
രൂപമപ്രതിമം തസ്യ രാമസ്യാക്ലിഷ്ടകര്മണഃ ।
ബഭൂവ രൂപം ക്രുദ്ധസ്യ രുദ്രസ്യേവ പിനാകിനഃ ॥ 26 ॥
തതോ ഗംഭീരനിര്ഹ്രാദം ഘോരവര്മായുധധ്വജമ് ।
അനീകം യാതുധാനാനാം സമംതാത്പ്രത്യദൃശ്യത ॥ 27 ॥
സിംഹനാദം വിസൃജതാമന്യോന്യമഭിഗര്ജതാമ് ।
ചാപാനി വിസ്ഫാരയതാം ജൃംഭതാമപ്യഭീക്ഷ്ണശഃ ॥ 28 ॥
വിപ്രഘുഷ്ടസ്വനാനാം ച ദുംധുഭീംശ്ചാപി നിഘ്നതാമ് ।
തേഷാം സുതുമുലശ്ശബ്ദഃ പൂരയാമാസ തദ്വനമ് ॥ 29 ॥
തേന ശബ്ദേന വിത്രസ്താശ്വാപദാ വനചാരിണഃ ।
ദുദ്രുവുര്യത്ര നിശ്ശബ്ദം പൃഷ്ഠതോ ന വ്യലോകയന് ॥ 30 ॥
തത്ത്വനീകം മഹാഘോരം രാമം സമുപസര്പത ।
ധൃതനാനാപ്രഹരണം ഗംഭീരം സാഗരോപമമ് ॥ 31 ॥
രാമോഽപി ചാരയംശ്ചക്ഷുസ്സർവതോ രണപംഡിതഃ ।
ദദര്ശ ഖരസൈന്യം തദ്യുദ്ധാഭിമുഖമുത്ഥിതമ് ॥ 32 ॥
വിതത്യ ച ധനുര്ഭീമം തൂണ്യാശ്ചോദ്ധൃത്യ സായകാന് ।
ക്രോധമാഹാരയത്തീവ്രം വധാര്ഥം സർവരക്ഷസാമ് ॥ 33 ॥
ദുഷ്പ്രേക്ഷ്യസ്സോഽഭവത്കൃദ്ധോ യുഗാംതാഗ്നിരിവ ജ്വലന് ।
തം ദൃഷ്ട്വാ തേജസാവിഷ്ടം പ്രാദ്രവന്വനദേവതാഃ ॥ 34 ॥
തസ്യ ക്രുദ്ധസ്യ രൂപം തു രാമസ്യ ദദൃശേ തദാ ।
ദക്ഷസ്യേവ ക്രതും ഹംതുമുദ്യതസ്യ പിനാകിനഃ ॥ 35 ॥
ആവിഷ്ടം തേജസാ രാമം സംഗ്രാമശിരസി സ്ഥിതമ് ।
ദൃഷ്ട്വാ സർവാണി ഭൂതാനി ഭയാര്താനി പ്രദുദ്രുവുഃ ॥ 36 ॥
തത്കാര്മുകൈരാഭരണൈര്ധ്വജൈശ്ച തൈർവര്മഭിശ്ചാഗ്നിസമാനവര്ണൈഃ ।
ബഭൂവ സൈന്യം പിശിതാശനാനാം സൂര്യോദയേ നീലമിവാഭ്രബൃംദമ് ॥ 37 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ചതുർവിംശസ്സര്ഗഃ ॥
