𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌚𑌤𑍁𑌰𑍍𑌵𑌿𑌂𑌶𑌸𑍍𑌸𑌰𑍍𑌗𑌃 ।
𑌆𑌶𑍍𑌰𑌮𑌂 𑌪𑍍𑌰𑌤𑌿 𑌯𑌾𑌤𑍇 𑌤𑍁 𑌖𑌰𑍇 𑌖𑌰𑌪𑌰𑌾𑌕𑍍𑌰𑌮𑍇 ।
𑌤𑌾𑌨𑍇𑌵𑍌𑌤𑍍𑌪𑌾𑌤𑌿𑌕𑌾𑌨𑍍𑌰𑌾𑌮𑌸𑍍𑌸𑌹 𑌭𑍍𑌰𑌾𑌤𑍍𑌰𑌾 𑌦𑌦𑌰𑍍𑌶 𑌹 ॥ 1 ॥
𑌤𑌾𑌨𑍁𑌤𑍍𑌪𑌾𑌤𑌾𑌨𑍍𑌮𑌹𑍋𑌘𑍋𑌰𑌾𑌨𑍁𑌤𑍍𑌥𑌿𑌤𑌾𑌨𑍍𑌰𑍋𑌮𑌹𑌰𑍍𑌷𑌣𑌾𑌨𑍍 ।
𑌪𑍍𑌰𑌜𑌾𑌨𑌾𑌮𑌹𑌿𑌤𑌾𑌂𑌦𑍃𑌷𑍍𑌟𑍍𑌵𑌾 𑌰𑌾𑌮𑍋 𑌲𑌕𑍍𑌷𑍍𑌮𑌣𑌮𑌬𑍍𑌰𑌵𑍀𑌤𑍍 ॥ 2 ॥
𑌇𑌮𑌾𑌨𑍍𑌪𑌶𑍍𑌯 𑌮𑌹𑌾𑌬𑌾𑌹𑍋 𑌸𑌰𑍍𑌵𑌭𑍂𑌤𑌾𑌪𑌹𑌾𑌰𑌿𑌣𑌃 ।
𑌸𑌮𑍁𑌤𑍍𑌥𑌿𑌤𑌾𑌨𑍍𑌮𑌹𑍋𑌤𑍍𑌪𑌾𑌤𑌾𑌨𑍍𑌸𑌂𑌹𑌰𑍍𑌤𑍁𑌂 𑌸𑌰𑍍𑌵𑌰𑌾𑌕𑍍𑌷𑌸𑌾𑌨𑍍 ॥ 3 ॥
𑌅𑌮𑍀 𑌰𑍁𑌧𑌿𑌰𑌧𑌾𑌰𑌾𑌸𑍍𑌤𑍁 𑌵𑌿𑌸𑍃𑌜𑌂𑌤𑌃 𑌖𑌰𑌸𑍍𑌵𑌨𑌾𑌃 ।
𑌵𑍍𑌯𑍋𑌮𑍍𑌨𑌿 𑌮𑍇𑌘𑌾 𑌵𑌿𑌵𑌰𑍍𑌤𑌂𑌤𑍇 𑌪𑌰𑍁𑌷𑌾 𑌗𑌰𑍍𑌦𑌭𑌾𑌰𑍁𑌣𑌾𑌃 ॥ 4 ॥
𑌸𑌧𑍂𑌮𑌾𑌶𑍍𑌚 𑌶𑌰𑌾𑌸𑍍𑌸𑌰𑍍𑌵𑍇 𑌮𑌮 𑌯𑍁𑌦𑍍𑌧𑌾𑌭𑌿𑌨𑌂𑌦𑌿𑌨𑌃 ।
𑌰𑍁𑌕𑍍𑌮𑌪𑍃𑌷𑍍𑌠𑌾𑌨𑌿 𑌚𑌾𑌪𑌾𑌨𑌿 𑌵𑌿𑌚𑍇𑌷𑍍𑌟𑌂𑌤𑍇 𑌚 𑌲𑌕𑍍𑌷𑍍𑌮𑌣 ॥ 5 ॥
𑌯𑌾𑌦𑍃𑌶𑌾 𑌇𑌹 𑌕𑍂𑌜𑌂𑌤𑌿 𑌪𑌕𑍍𑌷𑌿𑌣𑌃 𑌵𑌨𑌚𑌾𑌰𑌿𑌣𑌃 ।
𑌅𑌗𑍍𑌰𑌤𑍋 𑌨𑍋 𑌭𑌯𑌂 𑌪𑍍𑌰𑌾𑌪𑍍𑌤𑌂 𑌸𑌂𑌶𑌯𑍋 𑌜𑍀𑌵𑌿𑌤𑌸𑍍𑌯 𑌚 ॥ 6 ॥
𑌸𑌂𑌪𑍍𑌰𑌹𑌾𑌰𑌸𑍍𑌤𑍁 𑌸𑍁𑌮𑌹𑌾𑌨𑍍𑌭𑌵𑌿𑌷𑍍𑌯𑌤𑌿 𑌨 𑌸𑌂𑌶𑌯𑌃 ।
𑌅𑌯𑌮𑌾𑌖𑍍𑌯𑌾𑌤𑌿 𑌮𑍇 𑌬𑌾𑌹𑍁𑌸𑍍𑌸𑍍𑌫𑍁𑌰𑌮𑌾𑌣𑍋 𑌮𑍁𑌹𑍁𑌰𑍍𑌮𑍁𑌹𑍁𑌃 ॥ ॥
𑌸𑌨𑍍𑌨𑌿𑌕𑌰𑍍𑌷𑍇 𑌤𑍁 𑌨 𑌶𑍍𑌶𑍂𑌰 𑌜𑌯𑌂 𑌶𑌤𑍍𑌰𑍋𑌃 𑌪𑌰𑌾𑌜𑌯𑌮𑍍 ।
𑌸𑌪𑍍𑌰𑌭𑌂 𑌚 𑌪𑍍𑌰𑌸𑌨𑍍𑌨𑌂 𑌚 𑌤𑌵 𑌵𑌕𑍍𑌤𑍍𑌰𑌂 𑌹𑌿 𑌲𑌕𑍍𑌷𑍍𑌯𑌤𑍇 ॥ ॥
𑌉𑌦𑍍𑌯𑌤𑌾𑌨𑌾𑌂 𑌹𑌿 𑌯𑍁𑌦𑍍𑌧𑌾𑌰𑍍𑌥𑌂 𑌯𑍇𑌷𑌾𑌂 𑌭𑌵𑌤𑌿 𑌲𑌕𑍍𑌷𑍍𑌮𑌣 ।
𑌨𑌿𑌷𑍍𑌪𑍍𑌰𑌭𑌂 𑌵𑌦𑌨𑌂 𑌤𑍇𑌷𑌾𑌂 𑌭𑌵𑌤𑍍𑌯𑌾𑌯𑍁𑌃 𑌪𑌰𑌿𑌕𑍍𑌷𑌯𑌃 ॥ ॥
𑌰𑌕𑍍𑌷𑌸𑌾𑌂 𑌨𑌰𑍍𑌦𑌤𑌾𑌂 𑌘𑍋𑌰𑌶𑍍𑌶𑍍𑌰𑍂𑌯𑌤𑍇 𑌚 𑌮𑌹𑌾𑌧𑍍𑌵𑌨𑌿𑌃 ।
𑌆𑌹𑌤𑌾𑌨𑌾𑌂 𑌚 𑌭𑍇𑌰𑍀𑌣𑌾𑌂 𑌰𑌾𑌕𑍍𑌷𑌸𑍈𑌃 𑌕𑍍𑌰𑍂𑌰𑌕𑌰𑍍𑌮𑌭𑌿𑌃 ॥ 10 ॥
𑌅𑌨𑌾𑌗𑌤𑌵𑌿𑌧𑌾𑌨𑌂 𑌤𑍁 𑌕𑌰𑍍𑌤𑌵𑍍𑌯𑌂 𑌶𑍁𑌭𑌮𑌿𑌚𑍍𑌛𑌤𑌾 ।
𑌆𑌪𑌦𑌂 𑌶𑌂𑌕𑌮𑌾𑌨𑍇𑌨 𑌪𑍁𑌰𑍁𑌷𑍇𑌣 𑌵𑌿𑌪𑌶𑍍𑌚𑌿𑌤𑌾 ॥ 11 ॥
𑌤𑌸𑍍𑌮𑌾𑌦𑍍𑌗𑍃𑌹𑍀𑌤𑍍𑌵𑌾 𑌵𑍈𑌦𑍇𑌹𑍀𑌂 𑌶𑌰𑌪𑌾𑌣𑌿𑌰𑍍𑌧𑌨𑍁𑌰𑍍𑌧𑌰𑌃 ।
𑌗𑍁𑌹𑌾𑌮𑌾𑌶𑍍𑌰𑌯 𑌶𑍈𑌲𑌸𑍍𑌯 𑌦𑍁𑌰𑍍𑌗𑌾𑌂 𑌪𑌾𑌦𑌪𑌸𑌂𑌕𑍁𑌲𑌾𑌮𑍍 ॥ 12 ॥
𑌪𑍍𑌰𑌤𑌿𑌕𑍂𑌲𑌿𑌤𑍁𑌮𑌿𑌚𑍍𑌛𑌾𑌮𑌿 𑌨 𑌹𑌿 𑌵𑌾𑌕𑍍𑌯𑌮𑌿𑌦𑌂 𑌤𑍍𑌵𑌯𑌾 ।
𑌶𑌾𑌪𑌿𑌤𑍋 𑌮𑌮 𑌪𑌾𑌦𑌾𑌭𑍍𑌯𑌾𑌂 𑌗𑌮𑍍𑌯𑌤𑌾𑌂 𑌵𑌤𑍍𑌸 𑌮𑌾 𑌚𑌿𑌰𑌮𑍍 ॥ 13 ॥
𑌤𑍍𑌵𑌂 𑌹𑌿 𑌶𑍂𑌰𑌶𑍍𑌚 𑌬𑌲𑌵𑌾𑌨𑍍𑌹𑌨𑍍𑌯𑌾𑌹𑍍𑌯𑍇𑌤𑌾𑌨𑍍𑌨 𑌸𑌂𑌶𑌯𑌃 ।
𑌸𑍍𑌵𑌯𑌂 𑌤𑍁 𑌹𑌂𑌤𑍁𑌮𑌿𑌚𑍍𑌛𑌾𑌮𑌿 𑌸𑌰𑍍𑌵𑌾𑌨𑍇𑌵 𑌨𑌿𑌶𑌾𑌚𑌰𑌾𑌨𑍍 ॥ 14 ॥
𑌏𑌵𑌮𑍁𑌕𑍍𑌤𑌸𑍍𑌤𑍁 𑌰𑌾𑌮𑍇𑌣 𑌲𑌕𑍍𑌷𑍍𑌮𑌣𑌸𑍍𑌸𑌹 𑌸𑍀𑌤𑌾𑌯𑌾 ।
𑌶𑌰𑌾𑌨𑌾𑌦𑌾𑌯 𑌚𑌾𑌪𑌂 𑌚 𑌗𑍁𑌹𑌾𑌂 𑌦𑍁𑌰𑍍𑌗𑌾𑌂 𑌸𑌮𑌾𑌶𑍍𑌰𑌯𑌤𑍍 ॥ 15 ॥
𑌤𑌸𑍍𑌮𑌿𑌨𑍍𑌪𑍍𑌰𑌵𑌿𑌷𑍍𑌟𑍇 𑌤𑍁 𑌗𑍁𑌹𑌾𑌂 𑌲𑌕𑍍𑌷𑍍𑌮𑌣𑍇 𑌸𑌹 𑌸𑍀𑌤𑌯𑌾 ।
𑌹𑌂𑌤 𑌨𑌿𑌰𑍍𑌯𑍁𑌕𑍍𑌤𑌮𑌿𑌤𑍍𑌯𑍁𑌕𑍍𑌤𑍍𑌵𑌾 𑌰𑌾𑌮𑌃 𑌕𑌵𑌚𑌮𑌾𑌵𑌿𑌶𑌤𑍍 ॥ 16 ॥
𑌸 𑌤𑍇𑌨𑌾𑌗𑍍𑌨𑌿 𑌨𑌿𑌕𑌾𑌶𑍇𑌨 𑌕𑌵𑌚𑍇𑌨 𑌵𑌿𑌭𑍂𑌷𑌿𑌤𑌃 ।
𑌬𑌭𑍂𑌵 𑌰𑌾𑌮 𑌸𑍍𑌤𑌿𑌮𑌿𑌰𑍇 𑌵𑌿𑌧𑍂𑌮𑍋𑌽𑌗𑍍𑌨𑌿𑌰𑌿𑌵𑍋𑌤𑍍𑌥𑌿𑌤𑌃 ॥ 1 ॥
𑌸 𑌚𑌾𑌪𑌮𑍁𑌦𑍍𑌯𑌮𑍍𑌯 𑌮𑌹𑌚𑍍𑌛𑌰𑌾𑌨𑌾𑌦𑌾𑌯 𑌵𑍀𑌰𑍍𑌯𑌵𑌾𑌨𑍍 ।
𑌬𑌭𑍂𑌵𑌾𑌵𑌸𑍍𑌥𑌿𑌤𑌸𑍍𑌤𑌤𑍍𑌰 𑌜𑍍𑌯𑌾𑌸𑍍𑌵𑌨𑍈𑌃 𑌪𑍂𑌰𑌯𑌂𑌦𑌿𑌶𑌃 ॥ 1 ॥
𑌤𑌤𑍋 𑌦𑍇𑌵𑌾𑌸𑍍𑌸𑌗𑌂𑌧𑌰𑍍𑌵𑌾𑌸𑍍𑌸𑌿𑌦𑍍𑌧𑌾𑌶𑍍𑌚 𑌸𑌹 𑌚𑌾𑌰𑌣𑍈𑌃 ।
𑌸𑌮𑍇𑌯𑍁𑌶𑍍𑌚 𑌮𑌹𑌾𑌤𑍍𑌮𑌾𑌨𑍋 𑌯𑍁𑌦𑍍𑌧𑌦𑌰𑍍𑌶𑌨𑌕𑌾𑌂𑌕𑍍𑌷𑌿𑌣𑌃 ॥ 1 ॥
𑌋𑌷𑌯𑌶𑍍𑌚 𑌮𑌹𑌾𑌤𑍍𑌮𑌾𑌨𑍋 𑌲𑍋𑌕𑍇 𑌬𑍍𑌰𑌹𑍍𑌮𑌰𑍍𑌷𑌿𑌸𑌤𑍍𑌤𑌮𑌾𑌃 ।
𑌸𑌮𑍇𑌤𑍍𑌯 𑌚𑍋𑌚𑍁𑌸𑍍𑌸𑌹𑌿𑌤𑌾 𑌅𑌨𑍍𑌯𑍋𑌨𑍍𑌯𑌂 𑌪𑍁𑌣𑍍𑌯𑌕𑌰𑍍𑌮𑌣𑌃 ॥ 20 ॥
𑌸𑍍𑌵𑌸𑍍𑌤𑌿 𑌗𑍋𑌬𑍍𑌰𑌾𑌹𑍍𑌮𑌣𑍇𑌭𑍍𑌯𑍋𑌽𑌸𑍍𑌤𑍁 𑌲𑍋𑌕𑌾𑌨𑌾𑌂 𑌯𑍇𑌽𑌭𑌿𑌸𑌂𑌗𑌤𑌾𑌃 ।
𑌜𑌯𑌤𑌾𑌂 𑌰𑌾𑌘𑌵𑍋 𑌯𑍁𑌦𑍍𑌧𑍇 𑌪𑍌𑌲𑌸𑍍𑌤𑍍𑌯𑌾𑌨𑍍 𑌰𑌜𑌨𑍀𑌚𑌰𑌾𑌨𑍍 ॥ 21 ॥
𑌚𑌕𑍍𑌰𑌹𑌸𑍍𑌤𑍋 𑌯𑌥𑌾 𑌯𑍁𑌦𑍍𑌧𑍇 𑌸𑌰𑍍𑌵𑌾𑌨𑌸𑍁𑌰 𑌪𑍁𑌂𑌗𑌵𑌾𑌨𑍍 ।
𑌏𑌵𑌮𑍁𑌕𑍍𑌤𑍍𑌵𑌾 𑌪𑍁𑌨𑌃 𑌪𑍍𑌰𑍋𑌚𑍁𑌰𑌾𑌲𑍋𑌕𑍍𑌯 𑌚 𑌪𑌰𑌸𑍍𑌪𑌰𑌮𑍍 ॥ 22 ॥
𑌚𑌤𑍁𑌰𑍍𑌦𑌶 𑌸𑌹𑌸𑍍𑌰𑌾𑌣𑌿 𑌰𑌕𑍍𑌷𑌸𑌾𑌂 𑌭𑍀𑌮𑌕𑌰𑍍𑌮𑌣𑌾𑌮𑍍 ।
𑌏𑌕𑌶𑍍𑌚 𑌰𑌾𑌮𑍋 𑌧𑌰𑍍𑌮𑌾𑌤𑍍𑌮𑌾 𑌕𑌥𑌂 𑌯𑍁𑌦𑍍𑌧𑌂 𑌭𑌵𑌿𑌷𑍍𑌯𑌤𑌿 ॥ 23 ॥
𑌇𑌤𑌿 𑌰𑌾𑌜𑌰𑍍𑌷𑌯𑌸𑍍𑌸𑌿𑌦𑍍𑌧𑌾𑌸𑍍𑌸𑌗𑌣𑌾𑌶𑍍𑌚 𑌦𑍍𑌵𑌿𑌜𑌰𑍍𑌷𑌭𑌾𑌃 ।
𑌜𑌾𑌤𑌕𑍌𑌤𑍂𑌹𑌲𑌾𑌸𑍍𑌤𑌸𑍍𑌥𑍁𑌰𑍍𑌵𑌿𑌮𑌾𑌨𑌸𑍍𑌥𑌾𑌶𑍍𑌚 𑌦𑍇𑌵𑌤𑌾𑌃 ॥ 24 ॥
𑌆𑌵𑌿𑌷𑍍𑌟𑌂 𑌤𑍇𑌜𑌸𑌾 𑌰𑌾𑌮𑌂 𑌸𑌂𑌗𑍍𑌰𑌾𑌮𑌶𑌿𑌰𑌸𑌿 𑌸𑍍𑌥𑌿𑌤𑌮𑍍 ।
𑌦𑍃𑌷𑍍𑌟𑍍𑌵𑌾 𑌸𑌰𑍍𑌵𑌾𑌣𑌿 𑌭𑍂𑌤𑌾𑌨𑌿 𑌭𑌯𑌾𑌦𑍍𑌵𑌿𑌵𑍍𑌯𑌥𑌿𑌰𑍇 𑌤𑌦𑌾 ॥ 25 ॥
𑌰𑍂𑌪𑌮𑌪𑍍𑌰𑌤𑌿𑌮𑌂 𑌤𑌸𑍍𑌯 𑌰𑌾𑌮𑌸𑍍𑌯𑌾𑌕𑍍𑌲𑌿𑌷𑍍𑌟𑌕𑌰𑍍𑌮𑌣𑌃 ।
𑌬𑌭𑍂𑌵 𑌰𑍂𑌪𑌂 𑌕𑍍𑌰𑍁𑌦𑍍𑌧𑌸𑍍𑌯 𑌰𑍁𑌦𑍍𑌰𑌸𑍍𑌯𑍇𑌵 𑌪𑌿𑌨𑌾𑌕𑌿𑌨𑌃 ॥ 26 ॥
𑌤𑌤𑍋 𑌗𑌂𑌭𑍀𑌰𑌨𑌿𑌰𑍍𑌹𑍍𑌰𑌾𑌦𑌂 𑌘𑍋𑌰𑌵𑌰𑍍𑌮𑌾𑌯𑍁𑌧𑌧𑍍𑌵𑌜𑌮𑍍 ।
𑌅𑌨𑍀𑌕𑌂 𑌯𑌾𑌤𑍁𑌧𑌾𑌨𑌾𑌨𑌾𑌂 𑌸𑌮𑌂𑌤𑌾𑌤𑍍𑌪𑍍𑌰𑌤𑍍𑌯𑌦𑍃𑌶𑍍𑌯𑌤 ॥ 2 ॥
𑌸𑌿𑌂𑌹𑌨𑌾𑌦𑌂 𑌵𑌿𑌸𑍃𑌜𑌤𑌾𑌮𑌨𑍍𑌯𑍋𑌨𑍍𑌯𑌮𑌭𑌿𑌗𑌰𑍍𑌜𑌤𑌾𑌮𑍍 ।
𑌚𑌾𑌪𑌾𑌨𑌿 𑌵𑌿𑌸𑍍𑌫𑌾𑌰𑌯𑌤𑌾𑌂 𑌜𑍃𑌂𑌭𑌤𑌾𑌮𑌪𑍍𑌯𑌭𑍀𑌕𑍍𑌷𑍍𑌣𑌶𑌃 ॥ 2 ॥
𑌵𑌿𑌪𑍍𑌰𑌘𑍁𑌷𑍍𑌟𑌸𑍍𑌵𑌨𑌾𑌨𑌾𑌂 𑌚 𑌦𑍁𑌂𑌧𑍁𑌭𑍀𑌂𑌶𑍍𑌚𑌾𑌪𑌿 𑌨𑌿𑌘𑍍𑌨𑌤𑌾𑌮𑍍 ।
𑌤𑍇𑌷𑌾𑌂 𑌸𑍁𑌤𑍁𑌮𑍁𑌲𑌶𑍍𑌶𑌬𑍍𑌦𑌃 𑌪𑍂𑌰𑌯𑌾𑌮𑌾𑌸 𑌤𑌦𑍍𑌵𑌨𑌮𑍍 ॥ 2 ॥
𑌤𑍇𑌨 𑌶𑌬𑍍𑌦𑍇𑌨 𑌵𑌿𑌤𑍍𑌰𑌸𑍍𑌤𑌾𑌶𑍍𑌵𑌾𑌪𑌦𑌾 𑌵𑌨𑌚𑌾𑌰𑌿𑌣𑌃 ।
𑌦𑍁𑌦𑍍𑌰𑍁𑌵𑍁𑌰𑍍𑌯𑌤𑍍𑌰 𑌨𑌿𑌶𑍍𑌶𑌬𑍍𑌦𑌂 𑌪𑍃𑌷𑍍𑌠𑌤𑍋 𑌨 𑌵𑍍𑌯𑌲𑍋𑌕𑌯𑌨𑍍 ॥ 30 ॥
𑌤𑌤𑍍𑌤𑍍𑌵𑌨𑍀𑌕𑌂 𑌮𑌹𑌾𑌘𑍋𑌰𑌂 𑌰𑌾𑌮𑌂 𑌸𑌮𑍁𑌪𑌸𑌰𑍍𑌪𑌤 ।
𑌧𑍃𑌤𑌨𑌾𑌨𑌾𑌪𑍍𑌰𑌹𑌰𑌣𑌂 𑌗𑌂𑌭𑍀𑌰𑌂 𑌸𑌾𑌗𑌰𑍋𑌪𑌮𑌮𑍍 ॥ 31 ॥
𑌰𑌾𑌮𑍋𑌽𑌪𑌿 𑌚𑌾𑌰𑌯𑌂𑌶𑍍𑌚𑌕𑍍𑌷𑍁𑌸𑍍𑌸𑌰𑍍𑌵𑌤𑍋 𑌰𑌣𑌪𑌂𑌡𑌿𑌤𑌃 ।
𑌦𑌦𑌰𑍍𑌶 𑌖𑌰𑌸𑍈𑌨𑍍𑌯𑌂 𑌤𑌦𑍍𑌯𑍁𑌦𑍍𑌧𑌾𑌭𑌿𑌮𑍁𑌖𑌮𑍁𑌤𑍍𑌥𑌿𑌤𑌮𑍍 ॥ 32 ॥
𑌵𑌿𑌤𑌤𑍍𑌯 𑌚 𑌧𑌨𑍁𑌰𑍍𑌭𑍀𑌮𑌂 𑌤𑍂𑌣𑍍𑌯𑌾𑌶𑍍𑌚𑍋𑌦𑍍𑌧𑍃𑌤𑍍𑌯 𑌸𑌾𑌯𑌕𑌾𑌨𑍍 ।
𑌕𑍍𑌰𑍋𑌧𑌮𑌾𑌹𑌾𑌰𑌯𑌤𑍍𑌤𑍀𑌵𑍍𑌰𑌂 𑌵𑌧𑌾𑌰𑍍𑌥𑌂 𑌸𑌰𑍍𑌵𑌰𑌕𑍍𑌷𑌸𑌾𑌮𑍍 ॥ 33 ॥
𑌦𑍁𑌷𑍍𑌪𑍍𑌰𑍇𑌕𑍍𑌷𑍍𑌯𑌸𑍍𑌸𑍋𑌽𑌭𑌵𑌤𑍍𑌕𑍃𑌦𑍍𑌧𑍋 𑌯𑍁𑌗𑌾𑌂𑌤𑌾𑌗𑍍𑌨𑌿𑌰𑌿𑌵 𑌜𑍍𑌵𑌲𑌨𑍍 ।
𑌤𑌂 𑌦𑍃𑌷𑍍𑌟𑍍𑌵𑌾 𑌤𑍇𑌜𑌸𑌾𑌵𑌿𑌷𑍍𑌟𑌂 𑌪𑍍𑌰𑌾𑌦𑍍𑌰𑌵𑌨𑍍𑌵𑌨𑌦𑍇𑌵𑌤𑌾𑌃 ॥ 34 ॥
𑌤𑌸𑍍𑌯 𑌕𑍍𑌰𑍁𑌦𑍍𑌧𑌸𑍍𑌯 𑌰𑍂𑌪𑌂 𑌤𑍁 𑌰𑌾𑌮𑌸𑍍𑌯 𑌦𑌦𑍃𑌶𑍇 𑌤𑌦𑌾 ।
𑌦𑌕𑍍𑌷𑌸𑍍𑌯𑍇𑌵 𑌕𑍍𑌰𑌤𑍁𑌂 𑌹𑌂𑌤𑍁𑌮𑍁𑌦𑍍𑌯𑌤𑌸𑍍𑌯 𑌪𑌿𑌨𑌾𑌕𑌿𑌨𑌃 ॥ 35 ॥
𑌆𑌵𑌿𑌷𑍍𑌟𑌂 𑌤𑍇𑌜𑌸𑌾 𑌰𑌾𑌮𑌂 𑌸𑌂𑌗𑍍𑌰𑌾𑌮𑌶𑌿𑌰𑌸𑌿 𑌸𑍍𑌥𑌿𑌤𑌮𑍍 ।
𑌦𑍃𑌷𑍍𑌟𑍍𑌵𑌾 𑌸𑌰𑍍𑌵𑌾𑌣𑌿 𑌭𑍂𑌤𑌾𑌨𑌿 𑌭𑌯𑌾𑌰𑍍𑌤𑌾𑌨𑌿 𑌪𑍍𑌰𑌦𑍁𑌦𑍍𑌰𑍁𑌵𑍁𑌃 ॥ 36 ॥
𑌤𑌤𑍍𑌕𑌾𑌰𑍍𑌮𑍁𑌕𑍈𑌰𑌾𑌭𑌰𑌣𑍈𑌰𑍍𑌧𑍍𑌵𑌜𑍈𑌶𑍍𑌚 𑌤𑍈𑌰𑍍𑌵𑌰𑍍𑌮𑌭𑌿𑌶𑍍𑌚𑌾𑌗𑍍𑌨𑌿𑌸𑌮𑌾𑌨𑌵𑌰𑍍𑌣𑍈𑌃 ।
𑌬𑌭𑍂𑌵 𑌸𑍈𑌨𑍍𑌯𑌂 𑌪𑌿𑌶𑌿𑌤𑌾𑌶𑌨𑌾𑌨𑌾𑌂 𑌸𑍂𑌰𑍍𑌯𑍋𑌦𑌯𑍇 𑌨𑍀𑌲𑌮𑌿𑌵𑌾𑌭𑍍𑌰𑌬𑍃𑌂𑌦𑌮𑍍 ॥ 3 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌚𑌤𑍁𑌰𑍍𑌵𑌿𑌂𑌶𑌸𑍍𑌸𑌰𑍍𑌗𑌃 ॥
