ශ්රීමද්වාල්මීකීය රාමායණේ කිෂ්කිංධාකාංඩම් ।
අථ පංචෂෂ්ටිතමස්සර්ගඃ ।
අථාංගදවචශ්ශ්රුත්වා තේ සර්වේ වානරර්ෂභාඃ ।
ස්වං ස්වං ගතෞ සමුත්සාහමූචුස්තත්ර යථාක්රමම් ॥ 1 ॥
ගජෝ ගවාක්ෂෝ ගවයශ්ශරභෝ ගංධමාදනඃ ।
මෛංදශ්ච ද්විවිදශ්චෛව සුෂේණෝ ජාංබවාං ස්තථා ॥ 2 ॥
ආබභාෂේ ගජස්තත්ර ප්ලවේයං දශයෝජනම් ।
ගවාක්ෂෝ යෝජනනාන්යාහ ගමිෂ්යාමීති විංශතිම් ॥ 3 ॥
ගවයෝ වානරස්තත්ර වානරාං ස්තානුවාච හ ।
ත්රිංශතං තු ගමිෂ්යාමි යෝජනානාං ප්ලවංගමාඃ ॥ 4 ॥
ශරභස්තානුවාචාථ වානරාන් වානරර්ෂභඃ ।
චත්වාරිංශද්ගමිෂ්යාමි යෝජනානාං ප්ලවංගමාඃ ॥ 5 ॥
වානරස්තු මහාතේජා අබ්රවීද්ගංධමාදනඃ ।
යෝජනානාං ගමිෂ්යාමි පංචාශත්තු න සංශයඃ ॥ 6 ॥
මෛංදස්තු වානරස්තත්ර වානරාංස්තානුවාච හ ।
යෝජනානාං පරං ෂෂ්ටිමහං ප්ලවිතුමුත්සහේ ॥ 7 ॥
තතස්තත්ර මහාතේජා ද්විවිදඃ ප්රත්යභාෂත ।
ගමිෂ්යාමි න සංදේහස්සප්තතිං යෝජනාන්යහම් ॥ 8 ॥
සුෂේණස්තු මහාතේජාඃප්රෝක්තවාන්හරිසත්තමාන් ।
අශීතිං යෝජනානාං තු ප්ලවේයං ප්ලවගේශ්වරාඃ ॥ 9 ॥
තේෂාං කථයතාං තත්ර සර්වාංස්තානනුමාන්ය ච ।
තතෝ වෘද්ධතමස්තේෂාං ජාංබවාන්ප්රත්යභාෂත ॥ 10 ॥
පූර්වමස්මාකමප්යාසීත්කශ්චිද්ගතිපරාක්රමඃ ।
තේ වයං වයසඃ පාරමනුප්රාප්තාස්ස්ම සාංප්රතම් ॥ 11 ॥
කිංතු නෛවං ගතේ ශක්යමිදං කාර්යමුපේක්ෂිතුම් ।
යදර්ථං කපිරාජශ්ච රාමශ්ච කෘතනිශ්චයෞ ॥ 12 ॥
සාංප්රතං කාලභේදේන යා ගතිස්තාං නිබෝධත ।
නවතිං යෝජනානාං තු ගමිෂ්යාමි න සංශයඃ ॥ 13 ॥
තාංශ්ච සර්වාන්හරිශ්රේෂ්ඨාංජාංබවාන්පුනරබ්රවීත් ।
න ඛල්වේතාවදේවාසීද්ගමනේ මේ පරාක්රමඃ ॥ 14 ॥
මයා මහාබලේශ්චෛව යජ්ඤේ විෂ්ණුස්සනාතනඃ ।
ප්රදක්ෂිණීකෘතඃ පූර්වං ක්රමමාණස්ත්රිවික්රමම් ॥ 15 ॥
ස ඉදානීමහං වෘද්ධඃ ප්ලවනේ මංදවික්රමඃ ।
යෞවනේ ච තදාऽසීන්මේ බලමප්රතිමං පරෛඃ ॥ 16 ॥
සංප්රත්යේතාවතීං ශක්තිං ගමනේ තර්කයාම්යහම් ।
නෛතාවතා හි සංසිද්ධිඃ කාර්යස්යාස්ය භවිෂ්යති ॥ 17 ॥
අථෝත්තරමුදාරාර්ථමබ්රවීදංගදස්තදා ।
අනුමාන්ය තථා ප්රාජ්ඤෝ ජාංබවංතං මහාකපිම් ॥ 18 ॥
අහමේතද්ගමිෂ්යාමි යෝජනානාං ශතං මහත් ।
නිවර්තනේ තු මේ ශක්තිස්ස්යාන්න වේති න නිශ්චිතම් ॥ 19 ॥
තමුවාච හරිශ්රේෂ්ඨං ජාංබවාන්වාක්යකෝවිදඃ ।
ජ්ඤායතේ ගමනේ ශක්තිස්තව හර්යෘක්ෂසත්තම ॥ 20 ॥
කාමං ශතං සහස්රං වා න හ්යේෂ විධිරුච්යතේ ।
යෝජනානාං භවාන් ශක්තෝ ගංතුං ප්රතිනිවර්තිතුම් ॥ 21 ॥
න හි ප්රේෂයිතා තාත ස්වාමී ප්රේෂ්යඃ කථංචන ।
භවතාऽයං ජනස්සර්වඃ ප්රේෂ්යඃ ප්ලවගසත්තම ॥ 22 ॥
භවාන් කලත්රං අස්මාකං ස්වාමි භාවේ ව්යවස්ථිතඃ ।
ස්වාමී කලත්රං සෛන්යස්ය ගතිඃ ඒෂා පරංතප ॥ 23 ॥
අපි වෛ ඒතස්ය කාර්යස්ය භවාන් මූලං අරිං දම ।
තස්මාත් කලත්රවත් තාත ප්රතිපාල්යඃ සදා භවාන් ॥ 24 ॥
මූලමර්ථස්ය සංරක්ෂ්යමේෂ කාර්යවිදාං නයඃ ।
මූලේ සති හි සිද්ධ්යංති ගුණා ඵලෝ පුෂ්පෝදයාඃ ॥ 25 ॥
තද්භවානස්ය කාර්යස්ය සාධනේ සත්යවික්රම ।
බුද්ධිවික්රමසංපන්නෝ හේතුරත්ර පරංතප ॥ 26 ॥
ගුරුශ්ච ගුරුපුත්රශ්ච ත්වං හි නඃ කපිසත්තම ।
භවංතමාශ්රිත්ය වයං සමර්ථා හ්යර්ථසාධනේ ॥ 27 ॥
උක්තවාක්යං මහාප්රාජ්ඤං ජාංබවංතං මහාකපිඃ ।
ප්රත්යුවාචෝත්තරං වාක්යං වාලිසූනුරථාංගදඃ ॥ 28 ॥
යදි නාහං ගමිෂ්යාමි නාන්යෝ වානරපුංගවඃ ।
පුනඃ ඛල්විදමස්මාභිඃ කාර්යං ප්රායෝපවේශනම් ॥ 29 ॥
න හ්යකෘත්වා හරිපතේස්සංදේශං තස්ය ධීමතඃ ।
තත්රාපි ගත්වා ප්රාණානාං පශ්යාමි පරිරක්ෂණම් ॥ 30 ॥
ස හි ප්රසාදේ චාත්යර්ථං කෝපේ ච හරිරීශ්වරඃ ।
අතීත්ය තස්ය සංදේශං විනාශෝ ගමනේ භවේත් ॥ 31 ॥
තද්යථා හ්යස්ය කාර්යස්ය න භවත්යන්යථා ගතිඃ ।
තද්භවානේව දෘෂ්ටාර්ථස්සංචිංතයිතු මර්හති ॥ 32 ॥
සෝऽංගදේන තදා වීරඃ ප්රත්යුක්තඃ ප්ලවගර්ෂභඃ ।
ජාංබවානුත්තරං වාක්යං ප්රෝවාචේදං තතෝऽංගදම් ॥ 33 ॥
අස්ය තේ වීර කාර්යස්ය න කිංචිත්පරිහීයතේ ।
ඒෂ සංචෝදයාම්යේනං යඃ කාර්යං සාධයිෂ්යති ॥ 34 ॥
තතඃප්රතීතං ප්ලවතාංවරිෂ්ඨං ඒකාංතමාශ්රිත්ය සුසුඛේපවිෂ්ඨං සංචෝදයාමාස හරිප්රවීරෝ හරිප්රවීරං හනුමංතමේව ॥ 35 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ පංචෂෂ්ටිතමස්සර්ගඃ ॥
