ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ପଂଚଷଷ୍ଟିତମସ୍ସର୍ଗଃ ।
ଅଥାଂଗଦଵଚଶ୍ଶ୍ରୁତ୍ଵା ତେ ସର୍ଵେ ଵାନରର୍ଷଭାଃ ।
ସ୍ଵଂ ସ୍ଵଂ ଗତୌ ସମୁତ୍ସାହମୂଚୁସ୍ତତ୍ର ୟଥାକ୍ରମମ୍ ॥ 1 ॥
ଗଜୋ ଗଵାକ୍ଷୋ ଗଵୟଶ୍ଶରଭୋ ଗଂଧମାଦନଃ ।
ମୈଂଦଶ୍ଚ ଦ୍ଵିଵିଦଶ୍ଚୈଵ ସୁଷେଣୋ ଜାଂବଵାଂ ସ୍ତଥା ॥ 2 ॥
ଆବଭାଷେ ଗଜସ୍ତତ୍ର ପ୍ଲଵେୟଂ ଦଶୟୋଜନମ୍ ।
ଗଵାକ୍ଷୋ ୟୋଜନନାନ୍ୟାହ ଗମିଷ୍ୟାମୀତି ଵିଂଶତିମ୍ ॥ 3 ॥
ଗଵୟୋ ଵାନରସ୍ତତ୍ର ଵାନରାଂ ସ୍ତାନୁଵାଚ ହ ।
ତ୍ରିଂଶତଂ ତୁ ଗମିଷ୍ୟାମି ୟୋଜନାନାଂ ପ୍ଲଵଂଗମାଃ ॥ 4 ॥
ଶରଭସ୍ତାନୁଵାଚାଥ ଵାନରାନ୍ ଵାନରର୍ଷଭଃ ।
ଚତ୍ଵାରିଂଶଦ୍ଗମିଷ୍ୟାମି ୟୋଜନାନାଂ ପ୍ଲଵଂଗମାଃ ॥ 5 ॥
ଵାନରସ୍ତୁ ମହାତେଜା ଅବ୍ରଵୀଦ୍ଗଂଧମାଦନଃ ।
ୟୋଜନାନାଂ ଗମିଷ୍ୟାମି ପଂଚାଶତ୍ତୁ ନ ସଂଶୟଃ ॥ 6 ॥
ମୈଂଦସ୍ତୁ ଵାନରସ୍ତତ୍ର ଵାନରାଂସ୍ତାନୁଵାଚ ହ ।
ୟୋଜନାନାଂ ପରଂ ଷଷ୍ଟିମହଂ ପ୍ଲଵିତୁମୁତ୍ସହେ ॥ 7 ॥
ତତସ୍ତତ୍ର ମହାତେଜା ଦ୍ଵିଵିଦଃ ପ୍ରତ୍ୟଭାଷତ ।
ଗମିଷ୍ୟାମି ନ ସଂଦେହସ୍ସପ୍ତତିଂ ୟୋଜନାନ୍ୟହମ୍ ॥ 8 ॥
ସୁଷେଣସ୍ତୁ ମହାତେଜାଃପ୍ରୋକ୍ତଵାନ୍ହରିସତ୍ତମାନ୍ ।
ଅଶୀତିଂ ୟୋଜନାନାଂ ତୁ ପ୍ଲଵେୟଂ ପ୍ଲଵଗେଶ୍ଵରାଃ ॥ 9 ॥
ତେଷାଂ କଥୟତାଂ ତତ୍ର ସର୍ଵାଂସ୍ତାନନୁମାନ୍ୟ ଚ ।
ତତୋ ଵୃଦ୍ଧତମସ୍ତେଷାଂ ଜାଂବଵାନ୍ପ୍ରତ୍ୟଭାଷତ ॥ 10 ॥
ପୂର୍ଵମସ୍ମାକମପ୍ୟାସୀତ୍କଶ୍ଚିଦ୍ଗତିପରାକ୍ରମଃ ।
ତେ ଵୟଂ ଵୟସଃ ପାରମନୁପ୍ରାପ୍ତାସ୍ସ୍ମ ସାଂପ୍ରତମ୍ ॥ 11 ॥
କିଂତୁ ନୈଵଂ ଗତେ ଶକ୍ୟମିଦଂ କାର୍ୟମୁପେକ୍ଷିତୁମ୍ ।
ୟଦର୍ଥଂ କପିରାଜଶ୍ଚ ରାମଶ୍ଚ କୃତନିଶ୍ଚୟୌ ॥ 12 ॥
ସାଂପ୍ରତଂ କାଲଭେଦେନ ୟା ଗତିସ୍ତାଂ ନିବୋଧତ ।
ନଵତିଂ ୟୋଜନାନାଂ ତୁ ଗମିଷ୍ୟାମି ନ ସଂଶୟଃ ॥ 13 ॥
ତାଂଶ୍ଚ ସର୍ଵାନ୍ହରିଶ୍ରେଷ୍ଠାଂଜାଂବଵାନ୍ପୁନରବ୍ରଵୀତ୍ ।
ନ ଖଲ୍ଵେତାଵଦେଵାସୀଦ୍ଗମନେ ମେ ପରାକ୍ରମଃ ॥ 14 ॥
ମୟା ମହାବଲେଶ୍ଚୈଵ ୟଜ୍ଞେ ଵିଷ୍ଣୁସ୍ସନାତନଃ ।
ପ୍ରଦକ୍ଷିଣୀକୃତଃ ପୂର୍ଵଂ କ୍ରମମାଣସ୍ତ୍ରିଵିକ୍ରମମ୍ ॥ 15 ॥
ସ ଇଦାନୀମହଂ ଵୃଦ୍ଧଃ ପ୍ଲଵନେ ମଂଦଵିକ୍ରମଃ ।
ୟୌଵନେ ଚ ତଦାଽସୀନ୍ମେ ବଲମପ୍ରତିମଂ ପରୈଃ ॥ 16 ॥
ସଂପ୍ରତ୍ୟେତାଵତୀଂ ଶକ୍ତିଂ ଗମନେ ତର୍କୟାମ୍ୟହମ୍ ।
ନୈତାଵତା ହି ସଂସିଦ୍ଧିଃ କାର୍ୟସ୍ୟାସ୍ୟ ଭଵିଷ୍ୟତି ॥ 17 ॥
ଅଥୋତ୍ତରମୁଦାରାର୍ଥମବ୍ରଵୀଦଂଗଦସ୍ତଦା ।
ଅନୁମାନ୍ୟ ତଥା ପ୍ରାଜ୍ଞୋ ଜାଂବଵଂତଂ ମହାକପିମ୍ ॥ 18 ॥
ଅହମେତଦ୍ଗମିଷ୍ୟାମି ୟୋଜନାନାଂ ଶତଂ ମହତ୍ ।
ନିଵର୍ତନେ ତୁ ମେ ଶକ୍ତିସ୍ସ୍ୟାନ୍ନ ଵେତି ନ ନିଶ୍ଚିତମ୍ ॥ 19 ॥
ତମୁଵାଚ ହରିଶ୍ରେଷ୍ଠଂ ଜାଂବଵାନ୍ଵାକ୍ୟକୋଵିଦଃ ।
ଜ୍ଞାୟତେ ଗମନେ ଶକ୍ତିସ୍ତଵ ହର୍ୟୃକ୍ଷସତ୍ତମ ॥ 20 ॥
କାମଂ ଶତଂ ସହସ୍ରଂ ଵା ନ ହ୍ୟେଷ ଵିଧିରୁଚ୍ୟତେ ।
ୟୋଜନାନାଂ ଭଵାନ୍ ଶକ୍ତୋ ଗଂତୁଂ ପ୍ରତିନିଵର୍ତିତୁମ୍ ॥ 21 ॥
ନ ହି ପ୍ରେଷୟିତା ତାତ ସ୍ଵାମୀ ପ୍ରେଷ୍ୟଃ କଥଂଚନ ।
ଭଵତାଽୟଂ ଜନସ୍ସର୍ଵଃ ପ୍ରେଷ୍ୟଃ ପ୍ଲଵଗସତ୍ତମ ॥ 22 ॥
ଭଵାନ୍ କଲତ୍ରଂ ଅସ୍ମାକଂ ସ୍ଵାମି ଭାଵେ ଵ୍ୟଵସ୍ଥିତଃ ।
ସ୍ଵାମୀ କଲତ୍ରଂ ସୈନ୍ୟସ୍ୟ ଗତିଃ ଏଷା ପରଂତପ ॥ 23 ॥
ଅପି ଵୈ ଏତସ୍ୟ କାର୍ୟସ୍ୟ ଭଵାନ୍ ମୂଲଂ ଅରିଂ ଦମ ।
ତସ୍ମାତ୍ କଲତ୍ରଵତ୍ ତାତ ପ୍ରତିପାଲ୍ୟଃ ସଦା ଭଵାନ୍ ॥ 24 ॥
ମୂଲମର୍ଥସ୍ୟ ସଂରକ୍ଷ୍ୟମେଷ କାର୍ୟଵିଦାଂ ନୟଃ ।
ମୂଲେ ସତି ହି ସିଦ୍ଧ୍ୟଂତି ଗୁଣା ଫଲୋ ପୁଷ୍ପୋଦୟାଃ ॥ 25 ॥
ତଦ୍ଭଵାନସ୍ୟ କାର୍ୟସ୍ୟ ସାଧନେ ସତ୍ୟଵିକ୍ରମ ।
ବୁଦ୍ଧିଵିକ୍ରମସଂପନ୍ନୋ ହେତୁରତ୍ର ପରଂତପ ॥ 26 ॥
ଗୁରୁଶ୍ଚ ଗୁରୁପୁତ୍ରଶ୍ଚ ତ୍ଵଂ ହି ନଃ କପିସତ୍ତମ ।
ଭଵଂତମାଶ୍ରିତ୍ୟ ଵୟଂ ସମର୍ଥା ହ୍ୟର୍ଥସାଧନେ ॥ 27 ॥
ଉକ୍ତଵାକ୍ୟଂ ମହାପ୍ରାଜ୍ଞଂ ଜାଂବଵଂତଂ ମହାକପିଃ ।
ପ୍ରତ୍ୟୁଵାଚୋତ୍ତରଂ ଵାକ୍ୟଂ ଵାଲିସୂନୁରଥାଂଗଦଃ ॥ 28 ॥
ୟଦି ନାହଂ ଗମିଷ୍ୟାମି ନାନ୍ୟୋ ଵାନରପୁଂଗଵଃ ।
ପୁନଃ ଖଲ୍ଵିଦମସ୍ମାଭିଃ କାର୍ୟଂ ପ୍ରାୟୋପଵେଶନମ୍ ॥ 29 ॥
ନ ହ୍ୟକୃତ୍ଵା ହରିପତେସ୍ସଂଦେଶଂ ତସ୍ୟ ଧୀମତଃ ।
ତତ୍ରାପି ଗତ୍ଵା ପ୍ରାଣାନାଂ ପଶ୍ୟାମି ପରିରକ୍ଷଣମ୍ ॥ 30 ॥
ସ ହି ପ୍ରସାଦେ ଚାତ୍ୟର୍ଥଂ କୋପେ ଚ ହରିରୀଶ୍ଵରଃ ।
ଅତୀତ୍ୟ ତସ୍ୟ ସଂଦେଶଂ ଵିନାଶୋ ଗମନେ ଭଵେତ୍ ॥ 31 ॥
ତଦ୍ୟଥା ହ୍ୟସ୍ୟ କାର୍ୟସ୍ୟ ନ ଭଵତ୍ୟନ୍ୟଥା ଗତିଃ ।
ତଦ୍ଭଵାନେଵ ଦୃଷ୍ଟାର୍ଥସ୍ସଂଚିଂତୟିତୁ ମର୍ହତି ॥ 32 ॥
ସୋଽଂଗଦେନ ତଦା ଵୀରଃ ପ୍ରତ୍ୟୁକ୍ତଃ ପ୍ଲଵଗର୍ଷଭଃ ।
ଜାଂବଵାନୁତ୍ତରଂ ଵାକ୍ୟଂ ପ୍ରୋଵାଚେଦଂ ତତୋଽଂଗଦମ୍ ॥ 33 ॥
ଅସ୍ୟ ତେ ଵୀର କାର୍ୟସ୍ୟ ନ କିଂଚିତ୍ପରିହୀୟତେ ।
ଏଷ ସଂଚୋଦୟାମ୍ୟେନଂ ୟଃ କାର୍ୟଂ ସାଧୟିଷ୍ୟତି ॥ 34 ॥
ତତଃପ୍ରତୀତଂ ପ୍ଲଵତାଂଵରିଷ୍ଠଂ ଏକାଂତମାଶ୍ରିତ୍ୟ ସୁସୁଖେପଵିଷ୍ଠଂ ସଂଚୋଦୟାମାସ ହରିପ୍ରଵୀରୋ ହରିପ୍ରଵୀରଂ ହନୁମଂତମେଵ ॥ 35 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ପଂଚଷଷ୍ଟିତମସ୍ସର୍ଗଃ ॥
