𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌪𑌂𑌚𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ।
𑌅𑌥𑌾𑌂𑌗𑌦𑌵𑌚𑌶𑍍𑌶𑍍𑌰𑍁𑌤𑍍𑌵𑌾 𑌤𑍇 𑌸𑌰𑍍𑌵𑍇 𑌵𑌾𑌨𑌰𑌰𑍍𑌷𑌭𑌾𑌃 ।
𑌸𑍍𑌵𑌂 𑌸𑍍𑌵𑌂 𑌗𑌤𑍌 𑌸𑌮𑍁𑌤𑍍𑌸𑌾𑌹𑌮𑍂𑌚𑍁𑌸𑍍𑌤𑌤𑍍𑌰 𑌯𑌥𑌾𑌕𑍍𑌰𑌮𑌮𑍍 ॥ 1 ॥
𑌗𑌜𑍋 𑌗𑌵𑌾𑌕𑍍𑌷𑍋 𑌗𑌵𑌯𑌶𑍍𑌶𑌰𑌭𑍋 𑌗𑌂𑌧𑌮𑌾𑌦𑌨𑌃 ।
𑌮𑍈𑌂𑌦𑌶𑍍𑌚 𑌦𑍍𑌵𑌿𑌵𑌿𑌦𑌶𑍍𑌚𑍈𑌵 𑌸𑍁𑌷𑍇𑌣𑍋 𑌜𑌾𑌂𑌬𑌵𑌾𑌂 𑌸𑍍𑌤𑌥𑌾 ॥ 2 ॥
𑌆𑌬𑌭𑌾𑌷𑍇 𑌗𑌜𑌸𑍍𑌤𑌤𑍍𑌰 𑌪𑍍𑌲𑌵𑍇𑌯𑌂 𑌦𑌶𑌯𑍋𑌜𑌨𑌮𑍍 ।
𑌗𑌵𑌾𑌕𑍍𑌷𑍋 𑌯𑍋𑌜𑌨𑌨𑌾𑌨𑍍𑌯𑌾𑌹 𑌗𑌮𑌿𑌷𑍍𑌯𑌾𑌮𑍀𑌤𑌿 𑌵𑌿𑌂𑌶𑌤𑌿𑌮𑍍 ॥ 3 ॥
𑌗𑌵𑌯𑍋 𑌵𑌾𑌨𑌰𑌸𑍍𑌤𑌤𑍍𑌰 𑌵𑌾𑌨𑌰𑌾𑌂 𑌸𑍍𑌤𑌾𑌨𑍁𑌵𑌾𑌚 𑌹 ।
𑌤𑍍𑌰𑌿𑌂𑌶𑌤𑌂 𑌤𑍁 𑌗𑌮𑌿𑌷𑍍𑌯𑌾𑌮𑌿 𑌯𑍋𑌜𑌨𑌾𑌨𑌾𑌂 𑌪𑍍𑌲𑌵𑌂𑌗𑌮𑌾𑌃 ॥ 4 ॥
𑌶𑌰𑌭𑌸𑍍𑌤𑌾𑌨𑍁𑌵𑌾𑌚𑌾𑌥 𑌵𑌾𑌨𑌰𑌾𑌨𑍍 𑌵𑌾𑌨𑌰𑌰𑍍𑌷𑌭𑌃 ।
𑌚𑌤𑍍𑌵𑌾𑌰𑌿𑌂𑌶𑌦𑍍𑌗𑌮𑌿𑌷𑍍𑌯𑌾𑌮𑌿 𑌯𑍋𑌜𑌨𑌾𑌨𑌾𑌂 𑌪𑍍𑌲𑌵𑌂𑌗𑌮𑌾𑌃 ॥ 5 ॥
𑌵𑌾𑌨𑌰𑌸𑍍𑌤𑍁 𑌮𑌹𑌾𑌤𑍇𑌜𑌾 𑌅𑌬𑍍𑌰𑌵𑍀𑌦𑍍𑌗𑌂𑌧𑌮𑌾𑌦𑌨𑌃 ।
𑌯𑍋𑌜𑌨𑌾𑌨𑌾𑌂 𑌗𑌮𑌿𑌷𑍍𑌯𑌾𑌮𑌿 𑌪𑌂𑌚𑌾𑌶𑌤𑍍𑌤𑍁 𑌨 𑌸𑌂𑌶𑌯𑌃 ॥ 6 ॥
𑌮𑍈𑌂𑌦𑌸𑍍𑌤𑍁 𑌵𑌾𑌨𑌰𑌸𑍍𑌤𑌤𑍍𑌰 𑌵𑌾𑌨𑌰𑌾𑌂𑌸𑍍𑌤𑌾𑌨𑍁𑌵𑌾𑌚 𑌹 ।
𑌯𑍋𑌜𑌨𑌾𑌨𑌾𑌂 𑌪𑌰𑌂 𑌷𑌷𑍍𑌟𑌿𑌮𑌹𑌂 𑌪𑍍𑌲𑌵𑌿𑌤𑍁𑌮𑍁𑌤𑍍𑌸𑌹𑍇 ॥ ॥
𑌤𑌤𑌸𑍍𑌤𑌤𑍍𑌰 𑌮𑌹𑌾𑌤𑍇𑌜𑌾 𑌦𑍍𑌵𑌿𑌵𑌿𑌦𑌃 𑌪𑍍𑌰𑌤𑍍𑌯𑌭𑌾𑌷𑌤 ।
𑌗𑌮𑌿𑌷𑍍𑌯𑌾𑌮𑌿 𑌨 𑌸𑌂𑌦𑍇𑌹𑌸𑍍𑌸𑌪𑍍𑌤𑌤𑌿𑌂 𑌯𑍋𑌜𑌨𑌾𑌨𑍍𑌯𑌹𑌮𑍍 ॥ ॥
𑌸𑍁𑌷𑍇𑌣𑌸𑍍𑌤𑍁 𑌮𑌹𑌾𑌤𑍇𑌜𑌾𑌃𑌪𑍍𑌰𑍋𑌕𑍍𑌤𑌵𑌾𑌨𑍍𑌹𑌰𑌿𑌸𑌤𑍍𑌤𑌮𑌾𑌨𑍍 ।
𑌅𑌶𑍀𑌤𑌿𑌂 𑌯𑍋𑌜𑌨𑌾𑌨𑌾𑌂 𑌤𑍁 𑌪𑍍𑌲𑌵𑍇𑌯𑌂 𑌪𑍍𑌲𑌵𑌗𑍇𑌶𑍍𑌵𑌰𑌾𑌃 ॥ ॥
𑌤𑍇𑌷𑌾𑌂 𑌕𑌥𑌯𑌤𑌾𑌂 𑌤𑌤𑍍𑌰 𑌸𑌰𑍍𑌵𑌾𑌂𑌸𑍍𑌤𑌾𑌨𑌨𑍁𑌮𑌾𑌨𑍍𑌯 𑌚 ।
𑌤𑌤𑍋 𑌵𑍃𑌦𑍍𑌧𑌤𑌮𑌸𑍍𑌤𑍇𑌷𑌾𑌂 𑌜𑌾𑌂𑌬𑌵𑌾𑌨𑍍𑌪𑍍𑌰𑌤𑍍𑌯𑌭𑌾𑌷𑌤 ॥ 10 ॥
𑌪𑍂𑌰𑍍𑌵𑌮𑌸𑍍𑌮𑌾𑌕𑌮𑌪𑍍𑌯𑌾𑌸𑍀𑌤𑍍𑌕𑌶𑍍𑌚𑌿𑌦𑍍𑌗𑌤𑌿𑌪𑌰𑌾𑌕𑍍𑌰𑌮𑌃 ।
𑌤𑍇 𑌵𑌯𑌂 𑌵𑌯𑌸𑌃 𑌪𑌾𑌰𑌮𑌨𑍁𑌪𑍍𑌰𑌾𑌪𑍍𑌤𑌾𑌸𑍍𑌸𑍍𑌮 𑌸𑌾𑌂𑌪𑍍𑌰𑌤𑌮𑍍 ॥ 11 ॥
𑌕𑌿𑌂𑌤𑍁 𑌨𑍈𑌵𑌂 𑌗𑌤𑍇 𑌶𑌕𑍍𑌯𑌮𑌿𑌦𑌂 𑌕𑌾𑌰𑍍𑌯𑌮𑍁𑌪𑍇𑌕𑍍𑌷𑌿𑌤𑍁𑌮𑍍 ।
𑌯𑌦𑌰𑍍𑌥𑌂 𑌕𑌪𑌿𑌰𑌾𑌜𑌶𑍍𑌚 𑌰𑌾𑌮𑌶𑍍𑌚 𑌕𑍃𑌤𑌨𑌿𑌶𑍍𑌚𑌯𑍌 ॥ 12 ॥
𑌸𑌾𑌂𑌪𑍍𑌰𑌤𑌂 𑌕𑌾𑌲𑌭𑍇𑌦𑍇𑌨 𑌯𑌾 𑌗𑌤𑌿𑌸𑍍𑌤𑌾𑌂 𑌨𑌿𑌬𑍋𑌧𑌤 ।
𑌨𑌵𑌤𑌿𑌂 𑌯𑍋𑌜𑌨𑌾𑌨𑌾𑌂 𑌤𑍁 𑌗𑌮𑌿𑌷𑍍𑌯𑌾𑌮𑌿 𑌨 𑌸𑌂𑌶𑌯𑌃 ॥ 13 ॥
𑌤𑌾𑌂𑌶𑍍𑌚 𑌸𑌰𑍍𑌵𑌾𑌨𑍍𑌹𑌰𑌿𑌶𑍍𑌰𑍇𑌷𑍍𑌠𑌾𑌂𑌜𑌾𑌂𑌬𑌵𑌾𑌨𑍍𑌪𑍁𑌨𑌰𑌬𑍍𑌰𑌵𑍀𑌤𑍍 ।
𑌨 𑌖𑌲𑍍𑌵𑍇𑌤𑌾𑌵𑌦𑍇𑌵𑌾𑌸𑍀𑌦𑍍𑌗𑌮𑌨𑍇 𑌮𑍇 𑌪𑌰𑌾𑌕𑍍𑌰𑌮𑌃 ॥ 14 ॥
𑌮𑌯𑌾 𑌮𑌹𑌾𑌬𑌲𑍇𑌶𑍍𑌚𑍈𑌵 𑌯𑌜𑍍𑌞𑍇 𑌵𑌿𑌷𑍍𑌣𑍁𑌸𑍍𑌸𑌨𑌾𑌤𑌨𑌃 ।
𑌪𑍍𑌰𑌦𑌕𑍍𑌷𑌿𑌣𑍀𑌕𑍃𑌤𑌃 𑌪𑍂𑌰𑍍𑌵𑌂 𑌕𑍍𑌰𑌮𑌮𑌾𑌣𑌸𑍍𑌤𑍍𑌰𑌿𑌵𑌿𑌕𑍍𑌰𑌮𑌮𑍍 ॥ 15 ॥
𑌸 𑌇𑌦𑌾𑌨𑍀𑌮𑌹𑌂 𑌵𑍃𑌦𑍍𑌧𑌃 𑌪𑍍𑌲𑌵𑌨𑍇 𑌮𑌂𑌦𑌵𑌿𑌕𑍍𑌰𑌮𑌃 ।
𑌯𑍌𑌵𑌨𑍇 𑌚 𑌤𑌦𑌾𑌽𑌸𑍀𑌨𑍍𑌮𑍇 𑌬𑌲𑌮𑌪𑍍𑌰𑌤𑌿𑌮𑌂 𑌪𑌰𑍈𑌃 ॥ 16 ॥
𑌸𑌂𑌪𑍍𑌰𑌤𑍍𑌯𑍇𑌤𑌾𑌵𑌤𑍀𑌂 𑌶𑌕𑍍𑌤𑌿𑌂 𑌗𑌮𑌨𑍇 𑌤𑌰𑍍𑌕𑌯𑌾𑌮𑍍𑌯𑌹𑌮𑍍 ।
𑌨𑍈𑌤𑌾𑌵𑌤𑌾 𑌹𑌿 𑌸𑌂𑌸𑌿𑌦𑍍𑌧𑌿𑌃 𑌕𑌾𑌰𑍍𑌯𑌸𑍍𑌯𑌾𑌸𑍍𑌯 𑌭𑌵𑌿𑌷𑍍𑌯𑌤𑌿 ॥ 1 ॥
𑌅𑌥𑍋𑌤𑍍𑌤𑌰𑌮𑍁𑌦𑌾𑌰𑌾𑌰𑍍𑌥𑌮𑌬𑍍𑌰𑌵𑍀𑌦𑌂𑌗𑌦𑌸𑍍𑌤𑌦𑌾 ।
𑌅𑌨𑍁𑌮𑌾𑌨𑍍𑌯 𑌤𑌥𑌾 𑌪𑍍𑌰𑌾𑌜𑍍𑌞𑍋 𑌜𑌾𑌂𑌬𑌵𑌂𑌤𑌂 𑌮𑌹𑌾𑌕𑌪𑌿𑌮𑍍 ॥ 1 ॥
𑌅𑌹𑌮𑍇𑌤𑌦𑍍𑌗𑌮𑌿𑌷𑍍𑌯𑌾𑌮𑌿 𑌯𑍋𑌜𑌨𑌾𑌨𑌾𑌂 𑌶𑌤𑌂 𑌮𑌹𑌤𑍍 ।
𑌨𑌿𑌵𑌰𑍍𑌤𑌨𑍇 𑌤𑍁 𑌮𑍇 𑌶𑌕𑍍𑌤𑌿𑌸𑍍𑌸𑍍𑌯𑌾𑌨𑍍𑌨 𑌵𑍇𑌤𑌿 𑌨 𑌨𑌿𑌶𑍍𑌚𑌿𑌤𑌮𑍍 ॥ 1 ॥
𑌤𑌮𑍁𑌵𑌾𑌚 𑌹𑌰𑌿𑌶𑍍𑌰𑍇𑌷𑍍𑌠𑌂 𑌜𑌾𑌂𑌬𑌵𑌾𑌨𑍍𑌵𑌾𑌕𑍍𑌯𑌕𑍋𑌵𑌿𑌦𑌃 ।
𑌜𑍍𑌞𑌾𑌯𑌤𑍇 𑌗𑌮𑌨𑍇 𑌶𑌕𑍍𑌤𑌿𑌸𑍍𑌤𑌵 𑌹𑌰𑍍𑌯𑍃𑌕𑍍𑌷𑌸𑌤𑍍𑌤𑌮 ॥ 20 ॥
𑌕𑌾𑌮𑌂 𑌶𑌤𑌂 𑌸𑌹𑌸𑍍𑌰𑌂 𑌵𑌾 𑌨 𑌹𑍍𑌯𑍇𑌷 𑌵𑌿𑌧𑌿𑌰𑍁𑌚𑍍𑌯𑌤𑍇 ।
𑌯𑍋𑌜𑌨𑌾𑌨𑌾𑌂 𑌭𑌵𑌾𑌨𑍍 𑌶𑌕𑍍𑌤𑍋 𑌗𑌂𑌤𑍁𑌂 𑌪𑍍𑌰𑌤𑌿𑌨𑌿𑌵𑌰𑍍𑌤𑌿𑌤𑍁𑌮𑍍 ॥ 21 ॥
𑌨 𑌹𑌿 𑌪𑍍𑌰𑍇𑌷𑌯𑌿𑌤𑌾 𑌤𑌾𑌤 𑌸𑍍𑌵𑌾𑌮𑍀 𑌪𑍍𑌰𑍇𑌷𑍍𑌯𑌃 𑌕𑌥𑌂𑌚𑌨 ।
𑌭𑌵𑌤𑌾𑌽𑌯𑌂 𑌜𑌨𑌸𑍍𑌸𑌰𑍍𑌵𑌃 𑌪𑍍𑌰𑍇𑌷𑍍𑌯𑌃 𑌪𑍍𑌲𑌵𑌗𑌸𑌤𑍍𑌤𑌮 ॥ 22 ॥
𑌭𑌵𑌾𑌨𑍍 𑌕𑌲𑌤𑍍𑌰𑌂 𑌅𑌸𑍍𑌮𑌾𑌕𑌂 𑌸𑍍𑌵𑌾𑌮𑌿 𑌭𑌾𑌵𑍇 𑌵𑍍𑌯𑌵𑌸𑍍𑌥𑌿𑌤𑌃 ।
𑌸𑍍𑌵𑌾𑌮𑍀 𑌕𑌲𑌤𑍍𑌰𑌂 𑌸𑍈𑌨𑍍𑌯𑌸𑍍𑌯 𑌗𑌤𑌿𑌃 𑌏𑌷𑌾 𑌪𑌰𑌂𑌤𑌪 ॥ 23 ॥
𑌅𑌪𑌿 𑌵𑍈 𑌏𑌤𑌸𑍍𑌯 𑌕𑌾𑌰𑍍𑌯𑌸𑍍𑌯 𑌭𑌵𑌾𑌨𑍍 𑌮𑍂𑌲𑌂 𑌅𑌰𑌿𑌂 𑌦𑌮 ।
𑌤𑌸𑍍𑌮𑌾𑌤𑍍 𑌕𑌲𑌤𑍍𑌰𑌵𑌤𑍍 𑌤𑌾𑌤 𑌪𑍍𑌰𑌤𑌿𑌪𑌾𑌲𑍍𑌯𑌃 𑌸𑌦𑌾 𑌭𑌵𑌾𑌨𑍍 ॥ 24 ॥
𑌮𑍂𑌲𑌮𑌰𑍍𑌥𑌸𑍍𑌯 𑌸𑌂𑌰𑌕𑍍𑌷𑍍𑌯𑌮𑍇𑌷 𑌕𑌾𑌰𑍍𑌯𑌵𑌿𑌦𑌾𑌂 𑌨𑌯𑌃 ।
𑌮𑍂𑌲𑍇 𑌸𑌤𑌿 𑌹𑌿 𑌸𑌿𑌦𑍍𑌧𑍍𑌯𑌂𑌤𑌿 𑌗𑍁𑌣𑌾 𑌫𑌲𑍋 𑌪𑍁𑌷𑍍𑌪𑍋𑌦𑌯𑌾𑌃 ॥ 25 ॥
𑌤𑌦𑍍𑌭𑌵𑌾𑌨𑌸𑍍𑌯 𑌕𑌾𑌰𑍍𑌯𑌸𑍍𑌯 𑌸𑌾𑌧𑌨𑍇 𑌸𑌤𑍍𑌯𑌵𑌿𑌕𑍍𑌰𑌮 ।
𑌬𑍁𑌦𑍍𑌧𑌿𑌵𑌿𑌕𑍍𑌰𑌮𑌸𑌂𑌪𑌨𑍍𑌨𑍋 𑌹𑍇𑌤𑍁𑌰𑌤𑍍𑌰 𑌪𑌰𑌂𑌤𑌪 ॥ 26 ॥
𑌗𑍁𑌰𑍁𑌶𑍍𑌚 𑌗𑍁𑌰𑍁𑌪𑍁𑌤𑍍𑌰𑌶𑍍𑌚 𑌤𑍍𑌵𑌂 𑌹𑌿 𑌨𑌃 𑌕𑌪𑌿𑌸𑌤𑍍𑌤𑌮 ।
𑌭𑌵𑌂𑌤𑌮𑌾𑌶𑍍𑌰𑌿𑌤𑍍𑌯 𑌵𑌯𑌂 𑌸𑌮𑌰𑍍𑌥𑌾 𑌹𑍍𑌯𑌰𑍍𑌥𑌸𑌾𑌧𑌨𑍇 ॥ 2 ॥
𑌉𑌕𑍍𑌤𑌵𑌾𑌕𑍍𑌯𑌂 𑌮𑌹𑌾𑌪𑍍𑌰𑌾𑌜𑍍𑌞𑌂 𑌜𑌾𑌂𑌬𑌵𑌂𑌤𑌂 𑌮𑌹𑌾𑌕𑌪𑌿𑌃 ।
𑌪𑍍𑌰𑌤𑍍𑌯𑍁𑌵𑌾𑌚𑍋𑌤𑍍𑌤𑌰𑌂 𑌵𑌾𑌕𑍍𑌯𑌂 𑌵𑌾𑌲𑌿𑌸𑍂𑌨𑍁𑌰𑌥𑌾𑌂𑌗𑌦𑌃 ॥ 2 ॥
𑌯𑌦𑌿 𑌨𑌾𑌹𑌂 𑌗𑌮𑌿𑌷𑍍𑌯𑌾𑌮𑌿 𑌨𑌾𑌨𑍍𑌯𑍋 𑌵𑌾𑌨𑌰𑌪𑍁𑌂𑌗𑌵𑌃 ।
𑌪𑍁𑌨𑌃 𑌖𑌲𑍍𑌵𑌿𑌦𑌮𑌸𑍍𑌮𑌾𑌭𑌿𑌃 𑌕𑌾𑌰𑍍𑌯𑌂 𑌪𑍍𑌰𑌾𑌯𑍋𑌪𑌵𑍇𑌶𑌨𑌮𑍍 ॥ 2 ॥
𑌨 𑌹𑍍𑌯𑌕𑍃𑌤𑍍𑌵𑌾 𑌹𑌰𑌿𑌪𑌤𑍇𑌸𑍍𑌸𑌂𑌦𑍇𑌶𑌂 𑌤𑌸𑍍𑌯 𑌧𑍀𑌮𑌤𑌃 ।
𑌤𑌤𑍍𑌰𑌾𑌪𑌿 𑌗𑌤𑍍𑌵𑌾 𑌪𑍍𑌰𑌾𑌣𑌾𑌨𑌾𑌂 𑌪𑌶𑍍𑌯𑌾𑌮𑌿 𑌪𑌰𑌿𑌰𑌕𑍍𑌷𑌣𑌮𑍍 ॥ 30 ॥
𑌸 𑌹𑌿 𑌪𑍍𑌰𑌸𑌾𑌦𑍇 𑌚𑌾𑌤𑍍𑌯𑌰𑍍𑌥𑌂 𑌕𑍋𑌪𑍇 𑌚 𑌹𑌰𑌿𑌰𑍀𑌶𑍍𑌵𑌰𑌃 ।
𑌅𑌤𑍀𑌤𑍍𑌯 𑌤𑌸𑍍𑌯 𑌸𑌂𑌦𑍇𑌶𑌂 𑌵𑌿𑌨𑌾𑌶𑍋 𑌗𑌮𑌨𑍇 𑌭𑌵𑍇𑌤𑍍 ॥ 31 ॥
𑌤𑌦𑍍𑌯𑌥𑌾 𑌹𑍍𑌯𑌸𑍍𑌯 𑌕𑌾𑌰𑍍𑌯𑌸𑍍𑌯 𑌨 𑌭𑌵𑌤𑍍𑌯𑌨𑍍𑌯𑌥𑌾 𑌗𑌤𑌿𑌃 ।
𑌤𑌦𑍍𑌭𑌵𑌾𑌨𑍇𑌵 𑌦𑍃𑌷𑍍𑌟𑌾𑌰𑍍𑌥𑌸𑍍𑌸𑌂𑌚𑌿𑌂𑌤𑌯𑌿𑌤𑍁 𑌮𑌰𑍍𑌹𑌤𑌿 ॥ 32 ॥
𑌸𑍋𑌽𑌂𑌗𑌦𑍇𑌨 𑌤𑌦𑌾 𑌵𑍀𑌰𑌃 𑌪𑍍𑌰𑌤𑍍𑌯𑍁𑌕𑍍𑌤𑌃 𑌪𑍍𑌲𑌵𑌗𑌰𑍍𑌷𑌭𑌃 ।
𑌜𑌾𑌂𑌬𑌵𑌾𑌨𑍁𑌤𑍍𑌤𑌰𑌂 𑌵𑌾𑌕𑍍𑌯𑌂 𑌪𑍍𑌰𑍋𑌵𑌾𑌚𑍇𑌦𑌂 𑌤𑌤𑍋𑌽𑌂𑌗𑌦𑌮𑍍 ॥ 33 ॥
𑌅𑌸𑍍𑌯 𑌤𑍇 𑌵𑍀𑌰 𑌕𑌾𑌰𑍍𑌯𑌸𑍍𑌯 𑌨 𑌕𑌿𑌂𑌚𑌿𑌤𑍍𑌪𑌰𑌿𑌹𑍀𑌯𑌤𑍇 ।
𑌏𑌷 𑌸𑌂𑌚𑍋𑌦𑌯𑌾𑌮𑍍𑌯𑍇𑌨𑌂 𑌯𑌃 𑌕𑌾𑌰𑍍𑌯𑌂 𑌸𑌾𑌧𑌯𑌿𑌷𑍍𑌯𑌤𑌿 ॥ 34 ॥
𑌤𑌤𑌃𑌪𑍍𑌰𑌤𑍀𑌤𑌂 𑌪𑍍𑌲𑌵𑌤𑌾𑌂𑌵𑌰𑌿𑌷𑍍𑌠𑌂 𑌏𑌕𑌾𑌂𑌤𑌮𑌾𑌶𑍍𑌰𑌿𑌤𑍍𑌯 𑌸𑍁𑌸𑍁𑌖𑍇𑌪𑌵𑌿𑌷𑍍𑌠𑌂 𑌸𑌂𑌚𑍋𑌦𑌯𑌾𑌮𑌾𑌸 𑌹𑌰𑌿𑌪𑍍𑌰𑌵𑍀𑌰𑍋 𑌹𑌰𑌿𑌪𑍍𑌰𑌵𑍀𑌰𑌂 𑌹𑌨𑍁𑌮𑌂𑌤𑌮𑍇𑌵 ॥ 35 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌪𑌂𑌚𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ॥
