ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ പംചഷഷ്ടിതമസ്സര്ഗഃ ।
അഥാംഗദവചശ്ശ്രുത്വാ തേ സർവേ വാനരര്ഷഭാഃ ।
സ്വം സ്വം ഗതൌ സമുത്സാഹമൂചുസ്തത്ര യഥാക്രമമ് ॥ 1 ॥
ഗജോ ഗവാക്ഷോ ഗവയശ്ശരഭോ ഗംധമാദനഃ ।
മൈംദശ്ച ദ്വിവിദശ്ചൈവ സുഷേണോ ജാംബവാം സ്തഥാ ॥ 2 ॥
ആബഭാഷേ ഗജസ്തത്ര പ്ലവേയം ദശയോജനമ് ।
ഗവാക്ഷോ യോജനനാന്യാഹ ഗമിഷ്യാമീതി വിംശതിമ് ॥ 3 ॥
ഗവയോ വാനരസ്തത്ര വാനരാം സ്താനുവാച ഹ ।
ത്രിംശതം തു ഗമിഷ്യാമി യോജനാനാം പ്ലവംഗമാഃ ॥ 4 ॥
ശരഭസ്താനുവാചാഥ വാനരാന് വാനരര്ഷഭഃ ।
ചത്വാരിംശദ്ഗമിഷ്യാമി യോജനാനാം പ്ലവംഗമാഃ ॥ 5 ॥
വാനരസ്തു മഹാതേജാ അബ്രവീദ്ഗംധമാദനഃ ।
യോജനാനാം ഗമിഷ്യാമി പംചാശത്തു ന സംശയഃ ॥ 6 ॥
മൈംദസ്തു വാനരസ്തത്ര വാനരാംസ്താനുവാച ഹ ।
യോജനാനാം പരം ഷഷ്ടിമഹം പ്ലവിതുമുത്സഹേ ॥ 7 ॥
തതസ്തത്ര മഹാതേജാ ദ്വിവിദഃ പ്രത്യഭാഷത ।
ഗമിഷ്യാമി ന സംദേഹസ്സപ്തതിം യോജനാന്യഹമ് ॥ 8 ॥
സുഷേണസ്തു മഹാതേജാഃപ്രോക്തവാന്ഹരിസത്തമാന് ।
അശീതിം യോജനാനാം തു പ്ലവേയം പ്ലവഗേശ്വരാഃ ॥ 9 ॥
തേഷാം കഥയതാം തത്ര സർവാംസ്താനനുമാന്യ ച ।
തതോ വൃദ്ധതമസ്തേഷാം ജാംബവാന്പ്രത്യഭാഷത ॥ 10 ॥
പൂർവമസ്മാകമപ്യാസീത്കശ്ചിദ്ഗതിപരാക്രമഃ ।
തേ വയം വയസഃ പാരമനുപ്രാപ്താസ്സ്മ സാംപ്രതമ് ॥ 11 ॥
കിംതു നൈവം ഗതേ ശക്യമിദം കാര്യമുപേക്ഷിതുമ് ।
യദര്ഥം കപിരാജശ്ച രാമശ്ച കൃതനിശ്ചയൌ ॥ 12 ॥
സാംപ്രതം കാലഭേദേന യാ ഗതിസ്താം നിബോധത ।
നവതിം യോജനാനാം തു ഗമിഷ്യാമി ന സംശയഃ ॥ 13 ॥
താംശ്ച സർവാന്ഹരിശ്രേഷ്ഠാംജാംബവാന്പുനരബ്രവീത് ।
ന ഖല്വേതാവദേവാസീദ്ഗമനേ മേ പരാക്രമഃ ॥ 14 ॥
മയാ മഹാബലേശ്ചൈവ യജ്ഞേ വിഷ്ണുസ്സനാതനഃ ।
പ്രദക്ഷിണീകൃതഃ പൂർവം ക്രമമാണസ്ത്രിവിക്രമമ് ॥ 15 ॥
സ ഇദാനീമഹം വൃദ്ധഃ പ്ലവനേ മംദവിക്രമഃ ।
യൌവനേ ച തദാഽസീന്മേ ബലമപ്രതിമം പരൈഃ ॥ 16 ॥
സംപ്രത്യേതാവതീം ശക്തിം ഗമനേ തര്കയാമ്യഹമ് ।
നൈതാവതാ ഹി സംസിദ്ധിഃ കാര്യസ്യാസ്യ ഭവിഷ്യതി ॥ 17 ॥
അഥോത്തരമുദാരാര്ഥമബ്രവീദംഗദസ്തദാ ।
അനുമാന്യ തഥാ പ്രാജ്ഞോ ജാംബവംതം മഹാകപിമ് ॥ 18 ॥
അഹമേതദ്ഗമിഷ്യാമി യോജനാനാം ശതം മഹത് ।
നിവര്തനേ തു മേ ശക്തിസ്സ്യാന്ന വേതി ന നിശ്ചിതമ് ॥ 19 ॥
തമുവാച ഹരിശ്രേഷ്ഠം ജാംബവാന്വാക്യകോവിദഃ ।
ജ്ഞായതേ ഗമനേ ശക്തിസ്തവ ഹര്യൃക്ഷസത്തമ ॥ 20 ॥
കാമം ശതം സഹസ്രം വാ ന ഹ്യേഷ വിധിരുച്യതേ ।
യോജനാനാം ഭവാന് ശക്തോ ഗംതും പ്രതിനിവര്തിതുമ് ॥ 21 ॥
ന ഹി പ്രേഷയിതാ താത സ്വാമീ പ്രേഷ്യഃ കഥംചന ।
ഭവതാഽയം ജനസ്സർവഃ പ്രേഷ്യഃ പ്ലവഗസത്തമ ॥ 22 ॥
ഭവാന് കലത്രം അസ്മാകം സ്വാമി ഭാവേ വ്യവസ്ഥിതഃ ।
സ്വാമീ കലത്രം സൈന്യസ്യ ഗതിഃ ഏഷാ പരംതപ ॥ 23 ॥
അപി വൈ ഏതസ്യ കാര്യസ്യ ഭവാന് മൂലം അരിം ദമ ।
തസ്മാത് കലത്രവത് താത പ്രതിപാല്യഃ സദാ ഭവാന് ॥ 24 ॥
മൂലമര്ഥസ്യ സംരക്ഷ്യമേഷ കാര്യവിദാം നയഃ ।
മൂലേ സതി ഹി സിദ്ധ്യംതി ഗുണാ ഫലോ പുഷ്പോദയാഃ ॥ 25 ॥
തദ്ഭവാനസ്യ കാര്യസ്യ സാധനേ സത്യവിക്രമ ।
ബുദ്ധിവിക്രമസംപന്നോ ഹേതുരത്ര പരംതപ ॥ 26 ॥
ഗുരുശ്ച ഗുരുപുത്രശ്ച ത്വം ഹി നഃ കപിസത്തമ ।
ഭവംതമാശ്രിത്യ വയം സമര്ഥാ ഹ്യര്ഥസാധനേ ॥ 27 ॥
ഉക്തവാക്യം മഹാപ്രാജ്ഞം ജാംബവംതം മഹാകപിഃ ।
പ്രത്യുവാചോത്തരം വാക്യം വാലിസൂനുരഥാംഗദഃ ॥ 28 ॥
യദി നാഹം ഗമിഷ്യാമി നാന്യോ വാനരപുംഗവഃ ।
പുനഃ ഖല്വിദമസ്മാഭിഃ കാര്യം പ്രായോപവേശനമ് ॥ 29 ॥
ന ഹ്യകൃത്വാ ഹരിപതേസ്സംദേശം തസ്യ ധീമതഃ ।
തത്രാപി ഗത്വാ പ്രാണാനാം പശ്യാമി പരിരക്ഷണമ് ॥ 30 ॥
സ ഹി പ്രസാദേ ചാത്യര്ഥം കോപേ ച ഹരിരീശ്വരഃ ।
അതീത്യ തസ്യ സംദേശം വിനാശോ ഗമനേ ഭവേത് ॥ 31 ॥
തദ്യഥാ ഹ്യസ്യ കാര്യസ്യ ന ഭവത്യന്യഥാ ഗതിഃ ।
തദ്ഭവാനേവ ദൃഷ്ടാര്ഥസ്സംചിംതയിതു മര്ഹതി ॥ 32 ॥
സോഽംഗദേന തദാ വീരഃ പ്രത്യുക്തഃ പ്ലവഗര്ഷഭഃ ।
ജാംബവാനുത്തരം വാക്യം പ്രോവാചേദം തതോഽംഗദമ് ॥ 33 ॥
അസ്യ തേ വീര കാര്യസ്യ ന കിംചിത്പരിഹീയതേ ।
ഏഷ സംചോദയാമ്യേനം യഃ കാര്യം സാധയിഷ്യതി ॥ 34 ॥
തതഃപ്രതീതം പ്ലവതാംവരിഷ്ഠം ഏകാംതമാശ്രിത്യ സുസുഖേപവിഷ്ഠം സംചോദയാമാസ ഹരിപ്രവീരോ ഹരിപ്രവീരം ഹനുമംതമേവ ॥ 35 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ പംചഷഷ്ടിതമസ്സര്ഗഃ ॥
