Meaning, Multimedia
View this in:
| English | Devanagari | Telugu | Tamil | Kannada | Malayalam | Gujarati | Odia | Bengali  |
| Marathi | Assamese | Punjabi | Hindi | Samskritam | Konkani | Nepali | Sinhala | Grantha  |

5.36 𑌸𑍁𑌂𑌦𑌰𑌕𑌾𑌂𑌡 - 𑌷𑌟𑍍𑌤𑍍𑌰𑌿𑌂𑌶 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌷𑌟𑍍𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।

𑌭𑍂𑌯 𑌏𑌵 𑌮𑌹𑌾𑌤𑍇𑌜𑌾 𑌹𑌨𑍂𑌮𑌾𑌨𑍍𑌪𑌵𑌨𑌾𑌤𑍍𑌮𑌜𑌃 ।
𑌅𑌬𑍍𑌰𑌵𑍀𑌤𑍍𑌪𑍍𑌰𑌶𑍍𑌰𑌿𑌤𑌂 𑌵𑌾𑌕𑍍𑌯𑌂 𑌸𑍀𑌤𑌾𑌪𑍍𑌰𑌤𑍍𑌯𑌯𑌕𑌾𑌰𑌣𑌾𑌤𑍍 ॥ 1 ॥

𑌵𑌾𑌨𑌰𑍋𑌽𑌹𑌂 𑌮𑌹𑌾𑌭𑌾𑌗𑍇 𑌦𑍂𑌤𑍋 𑌰𑌾𑌮𑌸𑍍𑌯 𑌧𑍀𑌮𑌤𑌃 ।
𑌰𑌾𑌮𑌨𑌾𑌮𑌾𑌂𑌕𑌿𑌤𑌂 𑌚𑍇𑌦𑌂 𑌪𑌶𑍍𑌯 𑌦𑍇𑌵𑍍𑌯𑌂𑌗𑍁𑌲𑍀𑌯𑌕𑌮𑍍 ॥ 2 ॥

𑌪𑍍𑌰𑌤𑍍𑌯𑌯𑌾𑌰𑍍𑌥𑌂 𑌤𑌵𑌾𑌽𑌨𑍀𑌤𑌂 𑌤𑍇𑌨 𑌦𑌤𑍍𑌤𑌂 𑌮𑌹𑌾𑌤𑍍𑌮𑌨𑌾 ।
𑌸𑌮𑌾𑌶𑍍𑌵𑌸𑌿𑌹𑌿 𑌭𑌦𑍍𑌰𑌂 𑌤𑍇 𑌕𑍍𑌷𑍀𑌣𑌦𑍁𑌃𑌖𑌫𑌲𑌾 𑌹𑍍𑌯𑌸𑌿 ॥ 3 ॥

𑌗𑍃𑌹𑍀𑌤𑍍𑌵𑌾 𑌪𑍍𑌰𑍇𑌕𑍍𑌷𑌮𑌾𑌣𑌾 𑌸𑌾 𑌭𑌰𑍍𑌤𑍁𑌃 𑌕𑌰𑌵𑌿𑌭𑍂𑌷𑌣𑌮𑍍 ।
𑌭𑌰𑍍𑌤𑌾𑌰𑌮𑌿𑌵 𑌸𑌂𑌪𑍍𑌰𑌾𑌪𑍍𑌤𑌾 𑌜𑌾𑌨𑌕𑍀 𑌮𑍁𑌦𑌿𑌤𑌾𑌽𑌭𑌵𑌤𑍍 ॥ 4 ॥

𑌚𑌾𑌰𑍁 𑌤𑌦𑍍𑌵𑌦𑌨𑌂 𑌤𑌸𑍍𑌯𑌾𑌸𑍍𑌤𑌾𑌮𑍍𑌰𑌶𑍁𑌕𑍍𑌲𑌾𑌯𑌤𑍇𑌕𑍍𑌷𑌣𑌮𑍍 ।
𑌅𑌶𑍋𑌭𑌤 𑌵𑌿𑌶𑌾𑌲𑌾𑌕𑍍𑌷𑍍𑌯𑌾 𑌰𑌾𑌹𑍁𑌮𑍁𑌕𑍍𑌤 𑌇𑌵𑍋𑌡𑍁𑌰𑌾𑌟𑍍 ॥ 5 ॥

𑌤𑌤𑌸𑍍𑌸𑌾 𑌹𑍍𑌰𑍀𑌮𑌤𑍀 𑌬𑌾𑌲𑌾 𑌭𑌰𑍍𑌤𑍃𑌸𑌂𑌦𑍇𑌶𑌹𑌰𑍍𑌷𑌿𑌤𑌾 ।
𑌪𑌰𑌿𑌤𑍁𑌷𑍍𑌟𑌾 𑌪𑍍𑌰𑌿𑌯𑌂 𑌕𑍃𑌤𑍍𑌵𑌾 𑌪𑍍𑌰𑌶𑌶𑌂𑌸 𑌮𑌹𑌾𑌕𑌪𑌿𑌮𑍍 ॥ 6 ॥

𑌵𑌿𑌕𑍍𑌰𑌾𑌂𑌤𑌸𑍍𑌤𑍍𑌵𑌂 𑌸𑌮𑌰𑍍𑌥𑌸𑍍𑌤𑍍𑌵𑌂 𑌪𑍍𑌰𑌾𑌜𑍍𑌞𑌸𑍍𑌤𑍍𑌵𑌂 𑌵𑌾𑌨𑌰𑍋𑌤𑍍𑌤𑌮 ।
𑌯𑍇𑌨𑍇𑌦𑌂 𑌰𑌾𑌕𑍍𑌷𑌸𑌪𑌦𑌂 𑌤𑍍𑌵𑌯𑍈𑌕𑍇𑌨 𑌪𑍍𑌰𑌧𑌰𑍍𑌷𑌿𑌤𑌮𑍍 ॥ 𑍭 ॥

𑌶𑌤𑌯𑍋𑌜𑌨𑌵𑌿𑌸𑍍𑌤𑍀𑌰𑍍𑌣 𑌸𑍍𑌸𑌾𑌗𑌰𑍋 𑌮𑌕𑌰𑌾𑌲𑌯𑌃 ।
𑌵𑌿𑌕𑍍𑌰𑌮𑌶𑍍𑌲𑌾𑌘𑌨𑍀𑌯𑍇𑌨 𑌕𑍍𑌰𑌮𑌤𑌾 𑌗𑍋𑌷𑍍𑌪𑌦𑍀𑌕𑍃𑌤𑌃 ॥ 𑍮 ॥

𑌨 𑌹𑌿 𑌤𑍍𑌵𑌾𑌂 𑌪𑍍𑌰𑌾𑌕𑍃𑌤𑌂 𑌮𑌨𑍍𑌯𑍇 𑌵𑌾𑌨𑌰𑌂 𑌵𑌾𑌨𑌰𑌰𑍍𑌷𑌭 ।
𑌯𑌸𑍍𑌯 𑌤𑍇 𑌨𑌾𑌸𑍍𑌤𑌿 𑌸𑌂𑌤𑍍𑌰𑌾𑌸𑍋 𑌰𑌾𑌵𑌣𑌾𑌨𑍍𑌨𑌾𑌪𑌿 𑌸𑌂𑌭𑍍𑌰𑌮𑌃 ॥ 𑍯 ॥

𑌅𑌰𑍍𑌹𑌸𑍇 𑌚 𑌕𑌪𑌿𑌶𑍍𑌰𑍇𑌷𑍍𑌠 𑌮𑌯𑌾 𑌸𑌮𑌭𑌿𑌭𑌾𑌷𑌿𑌤𑍁𑌮𑍍 ।
𑌯𑌦𑍍𑌯𑌸𑌿 𑌪𑍍𑌰𑍇𑌷𑌿𑌤𑌸𑍍𑌤𑍇𑌨 𑌰𑌾𑌮𑍇𑌣 𑌵𑌿𑌦𑌿𑌤𑌾𑌤𑍍𑌮𑌨𑌾 ॥ 10 ॥

𑌪𑍍𑌰𑍇𑌷𑌯𑌿𑌷𑍍𑌯𑌤𑌿 𑌦𑍁𑌰𑍍𑌧𑌰𑍍𑌷𑍋 𑌰𑌾𑌮𑍋 𑌨 𑌹𑍍𑌯𑌪𑌰𑍀𑌕𑍍𑌷𑌿𑌤𑌮𑍍 ।
𑌪𑌰𑌾𑌕𑍍𑌰𑌮𑌮𑌵𑌿𑌜𑍍𑌞𑌾𑌯 𑌮𑌤𑍍𑌸𑌕𑌾𑌶𑌂 𑌵𑌿𑌶𑍇𑌷𑌤𑌃 ॥ 11 ॥

𑌦𑌿𑌷𑍍𑌟𑍍𑌯𑌾 𑌚 𑌕𑍁𑌶𑌲𑍀 𑌰𑌾𑌮𑍋 𑌧𑌰𑍍𑌮𑌾𑌤𑍍𑌮𑌾 𑌸𑌤𑍍𑌯𑌸𑌂𑌗𑌰𑌃 ।
𑌲𑌕𑍍𑌷𑍍𑌮𑌣𑌶𑍍𑌚 𑌮𑌹𑌾𑌤𑍇𑌜𑌾𑌸𑍍𑌸𑍁𑌮𑌿𑌤𑍍𑌰𑌾𑌨𑌂𑌦𑌵𑌰𑍍𑌧𑌨𑌃 ॥ 12 ॥

𑌕𑍁𑌶𑌲𑍀 𑌯𑌦𑌿 𑌕𑌾𑌕𑍁𑌤𑍍𑌸𑍍𑌥𑌃 𑌕𑌿𑌂 𑌨𑍁 𑌸𑌾𑌗𑌰𑌮𑍇𑌖𑌲𑌾𑌮𑍍 ।
𑌮𑌹𑍀𑌂 𑌦𑌹𑌤𑌿 𑌕𑍋𑌪𑍇𑌨 𑌯𑍁𑌗𑌾𑌂𑌤𑌾𑌗𑍍𑌨𑌿𑌰𑌿𑌵𑍋𑌤𑍍𑌥𑌿𑌤𑌃 ॥ 13 ॥

𑌅𑌥𑌵𑌾 𑌶𑌕𑍍𑌤𑌿𑌮𑌂𑌤𑍌 𑌤𑍌 𑌸𑍁𑌰𑌾𑌣𑌾𑌮𑌪𑌿 𑌨𑌿𑌗𑍍𑌰𑌹𑍇 ।
𑌮𑌮𑍈𑌵 𑌤𑍁 𑌨 𑌦𑍁𑌃𑌖𑌾𑌨𑌾𑌮𑌸𑍍𑌤𑌿 𑌮𑌨𑍍𑌯𑍇 𑌵𑌿𑌪𑌰𑍍𑌯𑌯𑌃 ॥ 14 ॥

𑌕𑌚𑍍𑌚𑌿𑌨𑍍𑌨 𑌵𑍍𑌯𑌥𑌿𑌤𑍋 𑌰𑌾𑌮𑌃 𑌕𑌚𑍍𑌚𑌿𑌨𑍍𑌨 𑌪𑌰𑌿𑌤𑌪𑍍𑌯𑌤𑍇 ।
𑌉𑌤𑍍𑌤𑌰𑌾𑌣𑌿 𑌚 𑌕𑌾𑌰𑍍𑌯𑌾𑌣𑌿 𑌕𑍁𑌰𑍁𑌤𑍇 𑌪𑍁𑌰𑍁𑌷𑍋𑌤𑍍𑌤𑌮𑌃 ॥ 15 ॥

𑌕𑌚𑍍𑌚𑌿𑌨𑍍𑌨 𑌦𑍀𑌨 𑌸𑍍𑌸𑌂𑌭𑍍𑌰𑌾𑌂𑌤𑌃 𑌕𑌾𑌰𑍍𑌯𑍇𑌷𑍁 𑌨 𑌚 𑌮𑍁𑌹𑍍𑌯𑌤𑌿 ।
𑌕𑌚𑍍𑌚𑌿𑌤𑍍𑌪𑍁𑌰𑍁𑌷𑌕𑌾𑌰𑍍𑌯𑌾𑌣𑌿 𑌕𑍁𑌰𑍁𑌤𑍇 𑌨𑍃𑌪𑌤𑍇𑌸𑍍𑌸𑍁𑌤𑌃 ॥ 16 ॥

𑌦𑍍𑌵𑌿𑌵𑌿𑌧𑌂 𑌤𑍍𑌰𑌿𑌵𑌿𑌧𑍋𑌪𑌾𑌯𑌮𑍁𑌪𑌾𑌯𑌮𑌪𑌿 𑌸𑍇𑌵𑌤𑍇 ।
𑌵𑌿𑌜𑌿𑌗𑍀𑌷𑍁𑌸𑍍𑌸𑍁𑌹𑍃𑌤𑍍𑌕𑌚𑍍𑌚𑌿𑌨𑍍𑌮𑌿𑌤𑍍𑌰𑍇𑌷𑍁 𑌚 𑌪𑌰𑌂𑌤𑌪𑌃 ॥ 1𑍭 ॥

𑌕𑌚𑍍𑌚𑌿𑌨𑍍𑌮𑌿𑌤𑍍𑌰𑌾𑌣𑌿 𑌲𑌭𑌤𑍇 𑌮𑌿𑌤𑍍𑌰𑍈𑌶𑍍𑌚𑌾𑌪𑍍𑌯𑌭𑌿𑌗𑌮𑍍𑌯𑌤𑍇 ।
𑌕𑌚𑍍𑌚𑌿𑌤𑍍𑌕𑌲𑍍𑌯𑌾𑌣𑌮𑌿𑌤𑍍𑌤𑍍𑌰𑌶𑍍𑌚 𑌮𑌿𑌤𑍍𑌰𑌤𑍍𑌤𑍍𑌰𑍈𑌶𑍍𑌚𑌾𑌪𑌿 𑌪𑍁𑌰𑌸𑍍𑌕𑍃𑌤𑌃 ॥ 1𑍮 ॥

𑌕𑌚𑍍𑌚𑌿𑌦𑌾𑌶𑌾𑌸𑍍𑌤𑌿 𑌦𑍇𑌵𑌾𑌨𑌾𑌂 𑌪𑍍𑌰𑌸𑌾𑌦𑌂 𑌪𑌾𑌰𑍍𑌥𑌿𑌵𑌾𑌤𑍍𑌮𑌜𑌃 ।
𑌕𑌚𑍍𑌚𑌿𑌤𑍍𑌪𑍁𑌰𑍁𑌷𑌕𑌾𑌰𑌂 𑌚 𑌦𑍈𑌵𑌂 𑌚 𑌪𑍍𑌰𑌤𑌿𑌪𑌦𑍍𑌯𑌤𑍇 ॥ 1𑍯 ॥

𑌕𑌚𑍍𑌚𑌿𑌨𑍍𑌨 𑌵𑌿𑌗𑌤𑌸𑍍𑌨𑍇𑌹𑌃 𑌪𑍍𑌰𑌵𑌾𑌸𑌾𑌨𑍍𑌮𑌯𑌿 𑌰𑌾𑌘𑌵𑌃 ।
𑌕𑌚𑍍𑌚𑌿𑌨𑍍𑌮𑌾𑌂 𑌵𑍍𑌯𑌸𑌨𑌾𑌦𑌸𑍍𑌮𑌾𑌨𑍍𑌮𑍋𑌕𑍍𑌷𑌯𑌿𑌷𑍍𑌯𑌤𑌿 𑌵𑌾𑌨𑌰 ॥ 20 ॥

𑌸𑍁𑌖𑌾𑌨𑌾𑌮𑍁𑌚𑌿𑌤𑍋 𑌨𑌿𑌤𑍍𑌯𑌮𑌸𑍁𑌖𑌾𑌨𑌾𑌮𑌨𑍌𑌚𑌿𑌤𑌃 ।
𑌦𑍁𑌃𑌖𑌮𑍁𑌤𑍍𑌤𑌰𑌮𑌾𑌸𑌾𑌦𑍍𑌯 𑌕𑌚𑍍𑌚𑌿𑌦𑍍𑌰𑌾𑌮𑍋 𑌨 𑌸𑍀𑌦𑌤𑌿 ॥ 21 ॥

𑌕𑍌𑌸𑌲𑍍𑌯𑌾𑌯𑌾𑌸𑍍𑌤𑌥𑌾 𑌕𑌚𑍍𑌚𑌿𑌤𑍍𑌸𑍁𑌮𑌿𑌤𑍍𑌰𑌾𑌯𑌾𑌸𑍍𑌤𑌥𑍈𑌵 𑌚 ।
𑌅𑌭𑍀𑌕𑍍𑌷𑍍𑌣𑌂 𑌶𑍍𑌰𑍂𑌯𑌤𑍇 𑌕𑌚𑍍𑌚𑌿𑌤𑍍𑌕𑍁𑌶𑌲𑌂 𑌭𑌰𑌤𑌸𑍍𑌯 𑌚 ॥ 22 ॥

𑌮𑌨𑍍𑌨𑌿𑌮𑌿𑌤𑍍𑌤𑍇𑌨 𑌮𑌾𑌨𑌾𑌰𑍍𑌹𑌃 𑌕𑌚𑍍𑌚𑌿𑌚𑍍𑌛𑍋𑌕𑍇𑌨 𑌰𑌾𑌘𑌵𑌃 ।
𑌕𑌚𑍍𑌚𑌿𑌨𑍍𑌨𑌾𑌨𑍍𑌯𑌮𑌨𑌾 𑌰𑌾𑌮𑌃 𑌕𑌚𑍍𑌚𑌿𑌨𑍍𑌮𑌾𑌂 𑌤𑌾𑌰𑌯𑌿𑌷𑍍𑌯𑌤𑌿 ॥ 23 ॥

𑌕𑌚𑍍𑌚𑌿𑌦𑌕𑍍𑌷𑍌𑌹𑌿𑌣𑍀𑌂 𑌭𑍀𑌮𑌾𑌂 𑌭𑌰𑌤𑍋 𑌭𑍍𑌰𑌾𑌤𑍃𑌵𑌤𑍍𑌸𑌲𑌃 ।
𑌧𑍍𑌵𑌜𑌿𑌨𑍀𑌂 𑌮𑌂𑌤𑍍𑌰𑌿𑌭𑌿𑌰𑍍𑌗𑍁𑌪𑍍𑌤𑌾𑌂 𑌪𑍍𑌰𑍇𑌷𑌯𑌿𑌷𑍍𑌯𑌤𑌿 𑌮𑌤𑍍𑌕𑍃𑌤𑍇 ॥ 24 ॥

𑌵𑌾𑌨𑌰𑌾𑌧𑌿𑌪𑌤𑌿𑌶𑍍𑌶𑍀𑌮𑌾𑌨𑍍𑌸𑍁𑌗𑍍𑌰𑍀𑌵𑌃 𑌕𑌚𑍍𑌚𑌿𑌦𑍇𑌷𑍍𑌯𑌤𑌿 ।
𑌮𑌤𑍍𑌕𑍃𑌤𑍇 𑌹𑌰𑌿𑌭𑌿𑌰𑍍𑌵𑍀𑌰𑍈𑌰𑍍𑌵𑍃𑌤𑍋 𑌦𑌂𑌤𑌨𑌖𑌾𑌯𑍁𑌧𑍈𑌃 ॥ 25 ॥

𑌕𑌚𑍍𑌚𑌿𑌚𑍍𑌛 𑌲𑌕𑍍𑌷𑍍𑌮𑌣𑌶𑍍𑌶𑍂𑌰𑌸𑍍𑌸𑍁𑌮𑌿𑌤𑍍𑌰𑌾𑌨𑌂𑌦𑌵𑌰𑍍𑌧𑌨𑌃 ।
𑌅𑌸𑍍𑌤𑍍𑌰𑌵𑌿𑌚𑍍𑌛𑌰𑌜𑌾𑌲𑍇𑌨 𑌰𑌾𑌕𑍍𑌷𑌸𑌾𑌨𑍍𑌵𑌿𑌧𑌮𑌿𑌷𑍍𑌯𑌤𑌿 ॥ 26 ॥

𑌰𑍌𑌦𑍍𑌰𑍇𑌣 𑌕𑌚𑍍𑌚𑌿𑌦𑌸𑍍𑌤𑍍𑌰𑍇𑌣 𑌜𑍍𑌵𑌲𑌤𑌾 𑌨𑌿𑌹𑌤𑌂 𑌰𑌣𑍇 ।
𑌦𑍍𑌰𑌕𑍍𑌷𑍍𑌯𑌾𑌮𑍍𑌯𑌲𑍍𑌪𑍇𑌨 𑌕𑌾𑌲𑍇𑌨 𑌰𑌾𑌵𑌣𑌂 𑌸𑌸𑍁𑌹𑍃𑌜𑍍𑌜𑌨𑌮𑍍 ॥ 2𑍭 ॥

𑌕𑌚𑍍𑌚𑌿𑌨𑍍𑌨 𑌤𑌦𑍍𑌧𑍇𑌮𑌸𑌮𑌾𑌨𑌵𑌰𑍍𑌣𑌂 𑌤𑌸𑍍𑌯𑌾𑌨𑌨𑌂 𑌪𑌦𑍍𑌮𑌸𑌮𑌾𑌨𑌗𑌂𑌧𑌿 ।
𑌮𑌯𑌾 𑌵𑌿𑌨𑌾 𑌶𑍁𑌷𑍍𑌯𑌤𑌿 𑌶𑍋𑌕𑌦𑍀𑌨𑌂 𑌜𑌲𑌕𑍍𑌷𑌯𑍇 𑌪𑌦𑍍𑌮𑌮𑌿𑌵𑌾𑌤𑌪𑍇𑌨 ॥ 2𑍮 ॥

𑌧𑌰𑍍𑌮𑌾𑌪𑌦𑍇𑌶𑌾𑌤𑍍𑌤𑍍𑌯𑌜𑌤𑌶𑍍𑌚 𑌰𑌾𑌜𑍍𑌯𑌂 𑌮𑌾𑌂 𑌚𑌾𑌪𑍍𑌯𑌰𑌣𑍍𑌯𑌂 𑌨𑌯𑌤𑌃 𑌪𑌦𑌾𑌤𑌿𑌮𑍍 ।
𑌨𑌾𑌸𑍀𑌦𑍍𑌵𑍍𑌯𑌥𑌾 𑌯𑌸𑍍𑌯 𑌨 𑌭𑍀𑌰𑍍𑌨 𑌶𑍋𑌕𑌃 𑌕𑌚𑍍𑌚𑌿𑌤𑍍𑌸 𑌧𑍈𑌰𑍍𑌯𑌂 𑌹𑍃𑌦𑌯𑍇 𑌕𑌰𑍋𑌤𑌿 ॥ 2𑍯 ॥

𑌨 𑌚𑌾𑌸𑍍𑌯 𑌮𑌾𑌤𑌾 𑌨 𑌪𑌿𑌤𑌾 𑌚 𑌨𑌾𑌨𑍍𑌯𑌃 𑌸𑍍𑌨𑍇𑌹𑌾𑌦𑍍𑌵𑌿𑌶𑌿𑌷𑍍𑌟𑍋𑌽𑌸𑍍𑌤𑌿 𑌮𑌯𑌾 𑌸𑌮𑍋 𑌵𑌾 ।
𑌤𑌾𑌵𑌤𑍍𑌤𑍍𑌵𑌹𑌂 𑌦𑍂𑌤 𑌜𑌿𑌜𑍀𑌵𑌿𑌷𑍇𑌯𑌂 𑌯𑌾𑌵𑌤𑍍𑌪𑍍𑌰𑌵𑍃𑌤𑍍𑌤𑌿𑌂 𑌶𑍃𑌣𑍁𑌯𑌾𑌂 𑌪𑍍𑌰𑌿𑌯𑌸𑍍𑌯 ॥ 30 ॥

𑌇𑌤𑍀𑌵 𑌦𑍇𑌵𑍀 𑌵𑌚𑌨𑌂 𑌮𑌹𑌾𑌰𑍍𑌥𑌂 𑌤𑌂 𑌵𑌾𑌨𑌰𑍇𑌂𑌦𑍍𑌰𑌂 𑌮𑌧𑍁𑌰𑌾𑌰𑍍𑌥𑌮𑍁𑌕𑍍𑌤𑍍𑌵𑌾 ।
𑌶𑍍𑌰𑍋𑌤𑍁𑌂 𑌪𑍁𑌨𑌸𑍍𑌤𑌸𑍍𑌯 𑌵𑌚𑍋𑌽𑌭𑌿𑌰𑌾𑌮𑌂 𑌰𑌾𑌮𑌾𑌰𑍍𑌥𑌯𑍁𑌕𑍍𑌤𑌂 𑌵𑌿𑌰𑌰𑌾𑌮 𑌰𑌾𑌮𑌾 ॥ 31 ॥

𑌸𑍀𑌤𑌾𑌯𑌾 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌮𑌾𑌰𑍁𑌤𑌿𑌰𑍍𑌭𑍀𑌮𑌵𑌿𑌕𑍍𑌰𑌮𑌃 ।
𑌶𑌿𑌰𑌸𑍍𑌯𑌂𑌜𑌲𑌿𑌮𑌾𑌧𑌾𑌯 𑌵𑌾𑌕𑍍𑌯𑌮𑍁𑌤𑍍𑌤𑌰𑌮𑌬𑍍𑌰𑌵𑍀𑌤𑍍 ॥ 32 ॥

𑌨 𑌤𑍍𑌵𑌾𑌮𑌿𑌹𑌸𑍍𑌥𑌾𑌂 𑌜𑌾𑌨𑍀𑌤𑍇 𑌰𑌾𑌮𑌃 𑌕𑌮𑌲𑌲𑍋𑌚𑌨𑍇 ।
𑌤𑍇𑌨 𑌤𑍍𑌵𑌾𑌂 𑌨𑌾𑌨𑌯𑌤𑍍𑌯𑌾𑌶𑍁 𑌶𑌚𑍀𑌮𑌿𑌵 𑌪𑍁𑌰𑌂𑌦𑌰𑌃 ॥ 33 ॥

𑌶𑍍𑌰𑍁𑌤𑍍𑌵𑍈𑌵 𑌤𑍁 𑌵𑌚𑍋 𑌮𑌹𑍍𑌯𑌂 𑌕𑍍𑌷𑌿𑌪𑍍𑌰𑌮𑍇𑌷𑍍𑌯𑌤𑌿 𑌰𑌾𑌘𑌵𑌃 ।
𑌚𑌮𑍂𑌂 𑌪𑍍𑌰𑌕𑌰𑍍𑌷𑌨𑍍𑌮𑌹𑌤𑍀𑌂 𑌹𑌰𑍍𑌯𑍃𑌕𑍍𑌷𑌗𑌣𑌸𑌂𑌕𑍁𑌲𑌾𑌮𑍍 ॥ 34 ॥

𑌵𑌿𑌷𑍍𑌟𑌂𑌭𑌯𑌿𑌤𑍍𑌵𑌾 𑌬𑌾𑌣𑍌𑌘𑍈𑌰𑌕𑍍𑌷𑍋𑌭𑍍𑌯𑌂 𑌵𑌰𑍁𑌣𑌾𑌲𑌯𑌮𑍍 ।
𑌕𑌰𑌿𑌷𑍍𑌯𑌤𑌿 𑌪𑍁𑌰𑍀𑌂 𑌲𑌂𑌕𑌾𑌂 𑌕𑌾𑌕𑍁𑌤𑍍𑌸𑍍𑌥𑌃 𑌶𑌾𑌂𑌤𑌰𑌾𑌕𑍍𑌷𑌸𑌾𑌮𑍍 ॥ 35 ॥

𑌤𑌤𑍍𑌰 𑌯𑌦𑍍𑌯𑌂𑌤𑌰𑌾 𑌮𑍃𑌤𑍍𑌯𑍁𑌰𑍍𑌯𑌦𑌿 𑌦𑍇𑌵𑌾𑌸𑍍𑌸𑌹𑌾𑌸𑍁𑌰𑌾𑌃 ।
𑌸𑍍𑌥𑌾𑌸𑍍𑌯𑌂𑌤𑌿 𑌪𑌥𑌿 𑌰𑌾𑌮𑌸𑍍𑌯 𑌸 𑌤𑌾𑌨𑌪𑌿 𑌵𑌧𑌿𑌷𑍍𑌯𑌤𑌿 ॥ 36 ॥

𑌤𑌵𑌾𑌦𑌰𑍍𑌶𑌨𑌜𑍇𑌨𑌾𑌰𑍍𑌯𑍇 𑌶𑍋𑌕𑍇𑌨 𑌸 𑌪𑌰𑌿𑌪𑍍𑌲𑍁𑌤𑌃 ।
𑌨 𑌶𑌰𑍍𑌮 𑌲𑌭𑌤𑍇 𑌰𑌾𑌮𑌸𑍍𑌸𑌿𑌂𑌹𑌾𑌰𑍍𑌦𑌿𑌤 𑌇𑌵 𑌦𑍍𑌵𑌿𑌪𑌃 ॥ 3𑍭 ॥

𑌮𑌲𑌯𑍇𑌨 𑌚 𑌵𑌿𑌂𑌧𑍍𑌯𑍇𑌨 𑌮𑍇𑌰𑍁𑌣𑌾 𑌮𑌂𑌦𑌰𑍇𑌣 𑌚 ।
𑌦𑌰𑍍𑌦𑍁𑌰𑍇𑌣 𑌚 𑌤𑍇 𑌦𑍇𑌵𑌿 𑌶𑌪𑍇 𑌮𑍂𑌲𑌫𑌲𑍇𑌨 𑌚 ॥ 3𑍮 ॥

𑌯𑌥𑌾 𑌸𑍁𑌨𑌯𑌨𑌂 𑌵𑌲𑍍𑌗𑍁 𑌬𑌿𑌂𑌬𑍋𑌷𑍍𑌠𑌂 𑌚𑌾𑌰𑍁 𑌕𑍁𑌂𑌡𑌲𑌮𑍍 ।
𑌮𑍁𑌖𑌂 𑌦𑍍𑌰𑌕𑍍𑌷𑍍𑌯𑌸𑌿 𑌰𑌾𑌮𑌸𑍍𑌯 𑌪𑍂𑌰𑍍𑌣𑌚𑌂𑌦𑍍𑌰𑌮𑌿𑌵𑍋𑌦𑌿𑌤𑌮𑍍 ॥ 3𑍯 ॥

𑌕𑍍𑌷𑌿𑌪𑍍𑌰𑌂 𑌦𑍍𑌰𑌕𑍍𑌷𑍍𑌯𑌸𑌿 𑌵𑍈𑌦𑍇𑌹𑌿 𑌰𑌾𑌮𑌂 𑌪𑍍𑌰𑌸𑍍𑌰𑌵𑌣𑍇 𑌗𑌿𑌰𑍌 ।
𑌶𑌤𑌕𑍍𑌰𑌤𑍁𑌮𑌿𑌵𑌾𑌸𑍀𑌨𑌂 𑌨𑌾𑌗𑌰𑌾𑌜𑌸𑍍𑌯 𑌮𑍂𑌰𑍍𑌧𑌨𑌿 ॥ 40 ॥

𑌨 𑌮𑌾𑌂𑌸𑌂 𑌰𑌾𑌘𑌵𑍋 𑌭𑍁𑌙𑌕𑍍𑌤𑍇 𑌨 𑌚𑌾𑌽𑌪𑌿 𑌮𑌧𑍁 𑌸𑍇𑌵𑌤𑍇 ।
𑌵𑌨𑍍𑌯𑌂 𑌸𑍁𑌵𑌿𑌹𑌿𑌤𑌂 𑌨𑌿𑌤𑍍𑌯𑌂 𑌭𑌕𑍍𑌤𑌮𑌶𑍍𑌨𑌾𑌤𑌿 𑌪𑌂𑌚𑌮𑌮𑍍 ॥ 41 ॥

𑌨𑍈𑌵 𑌦𑌂𑌶𑌾𑌨𑍍𑌨 𑌮𑌶𑌕𑌾𑌨𑍍𑌨 𑌕𑍀𑌟𑌾𑌨𑍍𑌨 𑌸𑌰𑍀𑌸𑍃𑌪𑌾𑌨𑍍 ।
𑌰𑌾𑌘𑌵𑍋𑌽𑌪𑌨𑌯𑍇𑌦𑍍𑌗𑌾𑌤𑍍𑌰𑌾𑌤𑍍𑌤𑍍𑌵𑌦𑍍𑌗𑌤𑍇𑌨𑌾𑌂𑌤𑌰𑌾𑌤𑍍𑌮𑌨𑌾 ॥ 42 ॥

𑌨𑌿𑌤𑍍𑌯𑌂 𑌧𑍍𑌯𑌾𑌨𑌪𑌰𑍋 𑌰𑌾𑌮𑍋 𑌨𑌿𑌤𑍍𑌯𑌂 𑌶𑍋𑌕𑌪𑌰𑌾𑌯𑌣𑌃 ।
𑌨𑌾𑌨𑍍𑌯𑌚𑍍𑌚𑌿𑌂𑌤𑌯𑌤𑍇 𑌕𑌿𑌂𑌚𑌿𑌤𑍍𑌸 𑌤𑍁 𑌕𑌾𑌮𑌵𑌶𑌂 𑌗𑌤𑌃 ॥ 43 ॥

𑌅𑌨𑌿𑌦𑍍𑌰𑌸𑍍𑌸𑌤𑌤𑌂 𑌰𑌾𑌮𑌸𑍍𑌸𑍁𑌪𑍍𑌤𑍋𑌽𑌪𑌿 𑌚 𑌨𑌰𑍋𑌤𑍍𑌤𑌮𑌃 ।
𑌸𑍀𑌤𑍇𑌤𑌿 𑌮𑌧𑍁𑌰𑌾𑌂 𑌵𑌾𑌣𑍀𑌂 𑌵𑍍𑌯𑌾𑌹𑌰𑌨𑍍𑌪𑍍𑌰𑌤𑌿𑌬𑍁𑌧𑍍𑌯𑌤𑍇 ॥ 44 ॥

𑌦𑍃𑌷𑍍𑌟𑍍𑌵𑌾 𑌫𑌲𑌂 𑌵𑌾 𑌪𑍁𑌷𑍍𑌪𑌂 𑌵𑌾 𑌯𑌦𑍍𑌵𑌾𑌽𑌨𑍍𑌯𑌤𑍍𑌸𑍁𑌮𑌨𑍋𑌹𑌰𑌮𑍍 ।
𑌬𑌹𑍁𑌶𑍋 𑌹𑌾 𑌪𑍍𑌰𑌿𑌯𑍇𑌤𑍍𑌯𑍇𑌵𑌂 𑌶𑍍𑌵𑌸𑌂𑌸𑍍𑌤𑍍𑌵𑌾𑌮𑌭𑌿𑌭𑌾𑌷𑌤𑍇 ॥ 45 ॥

𑌸 𑌦𑍇𑌵𑌿 𑌨𑌿𑌤𑍍𑌯𑌂 𑌪𑌰𑌿𑌤𑌪𑍍𑌯𑌮𑌾𑌨 𑌸𑍍𑌤𑍍𑌵𑌾𑌮𑍇𑌵 𑌸𑍀𑌤𑍇𑌤𑍍𑌯𑌭𑌿𑌭𑌾𑌷𑌮𑌾𑌣𑌃 ।
𑌧𑍃𑌤𑌵𑍍𑌰𑌤𑍋 𑌰𑌾𑌜𑌸𑍁𑌤𑍋 𑌮𑌹𑌾𑌤𑍍𑌮𑌾 𑌤𑌵𑍈𑌵 𑌲𑌾𑌭𑌾𑌯 𑌕𑍃𑌤𑌪𑍍𑌰𑌯𑌤𑍍𑌨𑌃 ॥ 46 ॥

𑌸𑌾 𑌰𑌾𑌮𑌸𑌂𑌕𑍀𑌰𑍍𑌤𑌨𑌵𑍀𑌤𑌶𑍋𑌕𑌾 𑌰𑌾𑌮𑌸𑍍𑌯 𑌶𑍋𑌕𑍇𑌨 𑌸𑌮𑌾𑌨𑌶𑍋𑌕𑌾 ।
𑌶𑌰𑌨𑍍𑌮𑍁𑌖𑍇 𑌸𑌾𑌂𑌬𑍁𑌦𑌶𑍇𑌷𑌚𑌂𑌦𑍍𑌰𑌾 𑌨𑌿𑌶𑍇𑌵 𑌵𑍈𑌦𑍇𑌹𑌸𑍁𑌤𑌾 𑌬𑌭𑍂𑌵 ॥ 4𑍭 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌷𑌟𑍍𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥


Browse Related Categories: