ශ්රීමද්වාල්මීකීය රාමායණේ සුංදරකාංඩම් ।
අථ ෂට්ත්රිංශස්සර්ගඃ ।
භූය ඒව මහාතේජා හනූමාන්පවනාත්මජඃ ।
අබ්රවීත්ප්රශ්රිතං වාක්යං සීතාප්රත්යයකාරණාත් ॥ 1 ॥
වානරෝऽහං මහාභාගේ දූතෝ රාමස්ය ධීමතඃ ।
රාමනාමාංකිතං චේදං පශ්ය දේව්යංගුලීයකම් ॥ 2 ॥
ප්රත්යයාර්ථං තවාऽනීතං තේන දත්තං මහාත්මනා ।
සමාශ්වසිහි භද්රං තේ ක්ෂීණදුඃඛඵලා හ්යසි ॥ 3 ॥
ගෘහීත්වා ප්රේක්ෂමාණා සා භර්තුඃ කරවිභූෂණම් ।
භර්තාරමිව සංප්රාප්තා ජානකී මුදිතාऽභවත් ॥ 4 ॥
චාරු තද්වදනං තස්යාස්තාම්රශුක්ලායතේක්ෂණම් ।
අශෝභත විශාලාක්ෂ්යා රාහුමුක්ත ඉවෝඩුරාට් ॥ 5 ॥
තතස්සා හ්රීමතී බාලා භර්තෘසංදේශහර්ෂිතා ।
පරිතුෂ්ටා ප්රියං කෘත්වා ප්රශශංස මහාකපිම් ॥ 6 ॥
වික්රාංතස්ත්වං සමර්ථස්ත්වං ප්රාජ්ඤස්ත්වං වානරෝත්තම ।
යේනේදං රාක්ෂසපදං ත්වයෛකේන ප්රධර්ෂිතම් ॥ 7 ॥
ශතයෝජනවිස්තීර්ණ ස්සාගරෝ මකරාලයඃ ।
වික්රමශ්ලාඝනීයේන ක්රමතා ගෝෂ්පදීකෘතඃ ॥ 8 ॥
න හි ත්වාං ප්රාකෘතං මන්යේ වානරං වානරර්ෂභ ।
යස්ය තේ නාස්ති සංත්රාසෝ රාවණාන්නාපි සංභ්රමඃ ॥ 9 ॥
අර්හසේ ච කපිශ්රේෂ්ඨ මයා සමභිභාෂිතුම් ।
යද්යසි ප්රේෂිතස්තේන රාමේණ විදිතාත්මනා ॥ 10 ॥
ප්රේෂයිෂ්යති දුර්ධර්ෂෝ රාමෝ න හ්යපරීක්ෂිතම් ।
පරාක්රමමවිජ්ඤාය මත්සකාශං විශේෂතඃ ॥ 11 ॥
දිෂ්ට්යා ච කුශලී රාමෝ ධර්මාත්මා සත්යසංගරඃ ।
ලක්ෂ්මණශ්ච මහාතේජාස්සුමිත්රානංදවර්ධනඃ ॥ 12 ॥
කුශලී යදි කාකුත්ස්ථඃ කිං නු සාගරමේඛලාම් ।
මහීං දහති කෝපේන යුගාංතාග්නිරිවෝත්ථිතඃ ॥ 13 ॥
අථවා ශක්තිමංතෞ තෞ සුරාණාමපි නිග්රහේ ।
මමෛව තු න දුඃඛානාමස්ති මන්යේ විපර්යයඃ ॥ 14 ॥
කච්චින්න ව්යථිතෝ රාමඃ කච්චින්න පරිතප්යතේ ।
උත්තරාණි ච කාර්යාණි කුරුතේ පුරුෂෝත්තමඃ ॥ 15 ॥
කච්චින්න දීන ස්සංභ්රාංතඃ කාර්යේෂු න ච මුහ්යති ।
කච්චිත්පුරුෂකාර්යාණි කුරුතේ නෘපතේස්සුතඃ ॥ 16 ॥
ද්විවිධං ත්රිවිධෝපායමුපායමපි සේවතේ ।
විජිගීෂුස්සුහෘත්කච්චින්මිත්රේෂු ච පරංතපඃ ॥ 17 ॥
කච්චින්මිත්රාණි ලභතේ මිත්රෛශ්චාප්යභිගම්යතේ ।
කච්චිත්කල්යාණමිත්ත්රශ්ච මිත්රත්ත්රෛශ්චාපි පුරස්කෘතඃ ॥ 18 ॥
කච්චිදාශාස්ති දේවානාං ප්රසාදං පාර්ථිවාත්මජඃ ।
කච්චිත්පුරුෂකාරං ච දෛවං ච ප්රතිපද්යතේ ॥ 19 ॥
කච්චින්න විගතස්නේහඃ ප්රවාසාන්මයි රාඝවඃ ।
කච්චින්මාං ව්යසනාදස්මාන්මෝක්ෂයිෂ්යති වානර ॥ 20 ॥
සුඛානාමුචිතෝ නිත්යමසුඛානාමනෞචිතඃ ।
දුඃඛමුත්තරමාසාද්ය කච්චිද්රාමෝ න සීදති ॥ 21 ॥
කෞසල්යායාස්තථා කච්චිත්සුමිත්රායාස්තථෛව ච ।
අභීක්ෂ්ණං ශ්රූයතේ කච්චිත්කුශලං භරතස්ය ච ॥ 22 ॥
මන්නිමිත්තේන මානාර්හඃ කච්චිච්ඡෝකේන රාඝවඃ ।
කච්චින්නාන්යමනා රාමඃ කච්චින්මාං තාරයිෂ්යති ॥ 23 ॥
කච්චිදක්ෂෞහිණීං භීමාං භරතෝ භ්රාතෘවත්සලඃ ।
ධ්වජිනීං මංත්රිභිර්ගුප්තාං ප්රේෂයිෂ්යති මත්කෘතේ ॥ 24 ॥
වානරාධිපතිශ්ශීමාන්සුග්රීවඃ කච්චිදේෂ්යති ।
මත්කෘතේ හරිභිර්වීරෛර්වෘතෝ දංතනඛායුධෛඃ ॥ 25 ॥
කච්චිච්ඡ ලක්ෂ්මණශ්ශූරස්සුමිත්රානංදවර්ධනඃ ।
අස්ත්රවිච්ඡරජාලේන රාක්ෂසාන්විධමිෂ්යති ॥ 26 ॥
රෞද්රේණ කච්චිදස්ත්රේණ ජ්වලතා නිහතං රණේ ।
ද්රක්ෂ්යාම්යල්පේන කාලේන රාවණං සසුහෘජ්ජනම් ॥ 27 ॥
කච්චින්න තද්ධේමසමානවර්ණං තස්යානනං පද්මසමානගංධි ।
මයා විනා ශුෂ්යති ශෝකදීනං ජලක්ෂයේ පද්මමිවාතපේන ॥ 28 ॥
ධර්මාපදේශාත්ත්යජතශ්ච රාජ්යං මාං චාප්යරණ්යං නයතඃ පදාතිම් ।
නාසීද්ව්යථා යස්ය න භීර්න ශෝකඃ කච්චිත්ස ධෛර්යං හෘදයේ කරෝති ॥ 29 ॥
න චාස්ය මාතා න පිතා ච නාන්යඃ ස්නේහාද්විශිෂ්ටෝऽස්ති මයා සමෝ වා ।
තාවත්ත්වහං දූත ජිජීවිෂේයං යාවත්ප්රවෘත්තිං ශෘණුයාං ප්රියස්ය ॥ 30 ॥
ඉතීව දේවී වචනං මහාර්ථං තං වානරේංද්රං මධුරාර්ථමුක්ත්වා ।
ශ්රෝතුං පුනස්තස්ය වචෝऽභිරාමං රාමාර්ථයුක්තං විරරාම රාමා ॥ 31 ॥
සීතායා වචනං ශ්රුත්වා මාරුතිර්භීමවික්රමඃ ।
ශිරස්යංජලිමාධාය වාක්යමුත්තරමබ්රවීත් ॥ 32 ॥
න ත්වාමිහස්ථාං ජානීතේ රාමඃ කමලලෝචනේ ।
තේන ත්වාං නානයත්යාශු ශචීමිව පුරංදරඃ ॥ 33 ॥
ශ්රුත්වෛව තු වචෝ මහ්යං ක්ෂිප්රමේෂ්යති රාඝවඃ ।
චමූං ප්රකර්ෂන්මහතීං හර්යෘක්ෂගණසංකුලාම් ॥ 34 ॥
විෂ්ටංභයිත්වා බාණෞඝෛරක්ෂෝභ්යං වරුණාලයම් ।
කරිෂ්යති පුරීං ලංකාං කාකුත්ස්ථඃ ශාංතරාක්ෂසාම් ॥ 35 ॥
තත්ර යද්යංතරා මෘත්යුර්යදි දේවාස්සහාසුරාඃ ।
ස්ථාස්යංති පථි රාමස්ය ස තානපි වධිෂ්යති ॥ 36 ॥
තවාදර්ශනජේනාර්යේ ශෝකේන ස පරිප්ලුතඃ ।
න ශර්ම ලභතේ රාමස්සිංහාර්දිත ඉව ද්විපඃ ॥ 37 ॥
මලයේන ච විංධ්යේන මේරුණා මංදරේණ ච ।
දර්දුරේණ ච තේ දේවි ශපේ මූලඵලේන ච ॥ 38 ॥
යථා සුනයනං වල්ගු බිංබෝෂ්ඨං චාරු කුංඩලම් ।
මුඛං ද්රක්ෂ්යසි රාමස්ය පූර්ණචංද්රමිවෝදිතම් ॥ 39 ॥
ක්ෂිප්රං ද්රක්ෂ්යසි වෛදේහි රාමං ප්රස්රවණේ ගිරෞ ।
ශතක්රතුමිවාසීනං නාගරාජස්ය මූර්ධනි ॥ 40 ॥
න මාංසං රාඝවෝ භුඞක්තේ න චාऽපි මධු සේවතේ ।
වන්යං සුවිහිතං නිත්යං භක්තමශ්නාති පංචමම් ॥ 41 ॥
නෛව දංශාන්න මශකාන්න කීටාන්න සරීසෘපාන් ।
රාඝවෝऽපනයේද්ගාත්රාත්ත්වද්ගතේනාංතරාත්මනා ॥ 42 ॥
නිත්යං ධ්යානපරෝ රාමෝ නිත්යං ශෝකපරායණඃ ।
නාන්යච්චිංතයතේ කිංචිත්ස තු කාමවශං ගතඃ ॥ 43 ॥
අනිද්රස්සතතං රාමස්සුප්තෝऽපි ච නරෝත්තමඃ ।
සීතේති මධුරාං වාණීං ව්යාහරන්ප්රතිබුධ්යතේ ॥ 44 ॥
දෘෂ්ට්වා ඵලං වා පුෂ්පං වා යද්වාऽන්යත්සුමනෝහරම් ।
බහුශෝ හා ප්රියේත්යේවං ශ්වසංස්ත්වාමභිභාෂතේ ॥ 45 ॥
ස දේවි නිත්යං පරිතප්යමාන ස්ත්වාමේව සීතේත්යභිභාෂමාණඃ ।
ධෘතව්රතෝ රාජසුතෝ මහාත්මා තවෛව ලාභාය කෘතප්රයත්නඃ ॥ 46 ॥
සා රාමසංකීර්තනවීතශෝකා රාමස්ය ශෝකේන සමානශෝකා ।
ශරන්මුඛේ සාංබුදශේෂචංද්රා නිශේව වෛදේහසුතා බභූව ॥ 47 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ෂට්ත්රිංශස්සර්ගඃ ॥
