𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌸𑌪𑍍𑌤𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।
𑌸 𑌚𑌂𑌦𑍍𑌰𑌕𑍁𑌮𑍁𑌦𑌂 𑌰𑌮𑍍𑌯𑌂 𑌸𑌾𑌰𑍍𑌕𑌕𑌾𑌰𑌂𑌡𑌵𑌂 𑌶𑍁𑌭𑌮𑍍 ।
𑌤𑌿𑌷𑍍𑌯𑌶𑍍𑌰𑌵𑌣𑌕𑌾𑌦𑌂𑌬𑌮𑌭𑍍𑌰𑌶𑍈𑌵𑌾𑌲𑌶𑌾𑌦𑍍𑌵𑌲𑌮𑍍 ॥ 1 ॥
𑌪𑍁𑌨𑌰𑍍𑌵𑌸𑍁𑌮𑌹𑌾𑌮𑍀𑌨𑌂 𑌲𑍋𑌹𑌿𑌤𑌾𑌂𑌗𑌮𑌹𑌾𑌗𑍍𑌰𑌹𑌮𑍍 ।
𑌐𑌰𑌾𑌵𑌤𑌮𑌹𑌾𑌦𑍍𑌵𑍀𑌪𑌂 𑌸𑍍𑌵𑌾𑌤𑌿𑌹𑌂𑌸𑌵𑌿𑌲𑍋𑌲𑌿𑌤𑌮𑍍 ॥ 2 ॥
𑌵𑌾𑌤𑌸𑌂𑌘𑌾𑌤𑌜𑌾𑌤𑍋𑌰𑍍𑌮𑌿 𑌚𑌂𑌦𑍍𑌰𑌾𑌂𑌶𑍁𑌶𑌿𑌶𑌿𑌰𑌾𑌂𑌬𑍁𑌮𑌤𑍍 ।
𑌭𑍁𑌜𑌂𑌗𑌯𑌕𑍍𑌷𑌗𑌂𑌧𑌰𑍍𑌵𑌪𑍍𑌰𑌬𑍁𑌦𑍍𑌧𑌕𑌮𑌲𑍋𑌤𑍍𑌪𑌲𑌮𑍍 ॥ 3 ॥
𑌹𑌨𑍁𑌮𑌾𑌨𑍍𑌮𑌾𑌰𑍁𑌤𑌗𑌤𑌿𑌰𑍍𑌮𑌹𑌾𑌨𑍌𑌰𑌿𑌵 𑌸𑌾𑌗𑌰𑌮𑍍 ।
𑌅𑌪𑌾𑌰𑌮𑌪𑌰𑌿𑌶𑍍𑌰𑌾𑌂𑌤𑌃 𑌪𑍁𑌪𑍍𑌲𑍁𑌵𑍇 𑌗𑌗𑌨𑌾𑌰𑍍𑌣𑌵𑌮𑍍 ॥ 4 ॥
𑌗𑍍𑌰𑌸𑌮𑌾𑌨 𑌇𑌵𑌾𑌕𑌾𑌶𑌂 𑌤𑌾𑌰𑌾𑌧𑌿𑌪𑌮𑌿𑌵𑍋𑌲𑍍𑌲𑌿𑌖𑌨𑍍 ।
𑌹𑌰𑌨𑍍𑌨𑌿𑌵 𑌸𑌨𑌕𑍍𑌷𑌤𑍍𑌰𑌂 𑌗𑌗𑌨𑌂 𑌸𑌾𑌰𑍍𑌕𑌮𑌂𑌡𑌲𑌮𑍍 ॥ 5 ॥
𑌮𑌾𑌰𑍁𑌤𑌸𑍍𑌯𑌾𑌤𑍍𑌮𑌜𑌃 𑌶𑍍𑌰𑍀𑌮𑌾𑌨𑍍𑌕𑌪𑌿𑌰𑍍𑌵𑍍𑌯𑍋𑌮𑌚𑌰𑍋 𑌮𑌹𑌾𑌨𑍍 ।
𑌹𑌨𑍁𑌮𑌾𑌨𑍍𑌮𑍇𑌘𑌜𑌾𑌲𑌾𑌨𑌿 𑌵𑌿𑌕𑌰𑍍𑌷𑌨𑍍𑌨𑌿𑌵 𑌗𑌚𑍍𑌛𑌤𑌿 ॥ 6 ॥
𑌪𑌾𑌂𑌡𑍁𑌰𑌾𑌰𑍁𑌣𑌵𑌰𑍍𑌣𑌾𑌨𑌿 𑌨𑍀𑌲𑌮𑌾𑌂𑌜𑌿𑌷𑍍𑌠𑌕𑌾𑌨𑌿 𑌚 ।
𑌹𑌰𑌿𑌤𑌾𑌰𑍁𑌣𑌵𑌰𑍍𑌣𑌾𑌨𑌿 𑌮𑌹𑌾𑌭𑍍𑌰𑌾𑌣𑌿 𑌚𑌕𑌾𑌶𑌿𑌰𑍇 ॥ ॥
𑌪𑍍𑌰𑌵𑌿𑌶𑌨𑍍𑌨𑌭𑍍𑌰𑌜𑌾𑌲𑌾𑌨𑌿 𑌨𑌿𑌷𑍍𑌪𑌤𑌂𑌶𑍍𑌚 𑌪𑍁𑌨𑌃 𑌪𑍁𑌨𑌃 ।
𑌪𑍍𑌰𑌚𑍍𑌛𑌨𑍍𑌨𑌶𑍍𑌚 𑌪𑍍𑌰𑌕𑌾𑌶𑌶𑍍𑌚 𑌚𑌂𑌦𑍍𑌰𑌮𑌾 𑌇𑌵 𑌲𑌕𑍍𑌷𑍍𑌯𑌤𑍇 ॥ ॥
𑌵𑌿𑌵𑌿𑌧𑌾𑌭𑍍𑌰𑌘𑌨𑌾𑌪𑌨𑍍𑌨𑌗𑍋𑌚𑌰𑍋 𑌧𑌵𑌲𑌾𑌂𑌬𑌰𑌃 ।
𑌦𑍃𑌶𑍍𑌯𑌾𑌦𑍃𑌶𑍍𑌯𑌤𑌨𑍁𑌰𑍍𑌵𑍀𑌰𑌸𑍍𑌤𑌦𑌾 𑌚𑌂𑌦𑍍𑌰𑌾𑌯𑌤𑍇𑌽𑌂𑌬𑌰𑍇 ॥ ॥
𑌤𑌾𑌰𑍍𑌕𑍍𑌷𑍍𑌯𑌾𑌯𑌮𑌾𑌣𑍋 𑌗𑌗𑌨𑍇 𑌬𑌭𑌾𑌸𑍇 𑌵𑌾𑌯𑍁𑌨𑌂𑌦𑌨𑌃 ।
𑌦𑌾𑌰𑌯𑌨𑍍𑌮𑍇𑌘𑌬𑍃𑌂𑌦𑌾𑌨𑌿 𑌨𑌿𑌷𑍍𑌪𑌤𑌂𑌶𑍍𑌚 𑌪𑍁𑌨𑌃 𑌪𑍁𑌨𑌃 ॥ 10 ॥
𑌨𑌦𑌨𑍍𑌨𑌾𑌦𑍇𑌨 𑌮𑌹𑌤𑌾 𑌮𑍇𑌘𑌸𑍍𑌵𑌨𑌮𑌹𑌾𑌸𑍍𑌵𑌨𑌃 ।
𑌪𑍍𑌰𑌵𑌰𑌾𑌨𑍍𑌰𑌾𑌕𑍍𑌷𑌸𑌾𑌨𑍍 𑌹𑌤𑍍𑌵𑌾 𑌨𑌾𑌮 𑌵𑌿𑌶𑍍𑌰𑌾𑌵𑍍𑌯 𑌚𑌾𑌤𑍍𑌮𑌨𑌃 ॥ 11 ॥
𑌆𑌕𑍁𑌲𑌾𑌂 𑌨𑌗𑌰𑍀𑌂 𑌕𑍃𑌤𑍍𑌵𑌾 𑌵𑍍𑌯𑌥𑌯𑌿𑌤𑍍𑌵𑌾 𑌚 𑌰𑌾𑌵𑌣𑌮𑍍 ।
𑌅𑌰𑍍𑌦𑌯𑌿𑌤𑍍𑌵𑌾 𑌬𑌲𑌂 𑌘𑍋𑌰𑌂 𑌵𑍈𑌦𑍇𑌹𑍀𑌮𑌭𑌿𑌵𑌾𑌦𑍍𑌯 𑌚 ॥ 12 ॥
𑌆𑌜𑌗𑌾𑌮 𑌮𑌹𑌾𑌤𑍇𑌜𑌾𑌃 𑌪𑍁𑌨𑌰𑍍𑌮𑌧𑍍𑌯𑍇𑌨 𑌸𑌾𑌗𑌰𑌮𑍍 ।
𑌪𑌰𑍍𑌵𑌤𑍇𑌂𑌦𑍍𑌰𑌂 𑌸𑍁𑌨𑌾𑌭𑌂 𑌚 𑌸𑌮𑍁𑌪𑌸𑍍𑌪𑍃𑌶𑍍𑌯 𑌵𑍀𑌰𑍍𑌯𑌵𑌾𑌨𑍍 ॥ 13 ॥
𑌜𑍍𑌯𑌾𑌮𑍁𑌕𑍍𑌤 𑌇𑌵 𑌨𑌾𑌰𑌾𑌚𑍋 𑌮𑌹𑌾𑌵𑍇𑌗𑍋𑌽𑌭𑍍𑌯𑍁𑌪𑌾𑌗𑌤𑌃 ।
𑌸 𑌕𑌿𑌂𑌚𑌿𑌦𑌨𑍁𑌸𑌂𑌪𑍍𑌰𑌾𑌪𑍍𑌤𑌃 𑌸𑌮𑌾𑌲𑍋𑌕𑍍𑌯 𑌮𑌹𑌾𑌗𑌿𑌰𑌿𑌮𑍍 ॥ 14 ॥
𑌮𑌹𑍇𑌂𑌦𑍍𑌰𑌂 𑌮𑍇𑌘𑌸𑌂𑌕𑌾𑌶𑌂 𑌨𑌨𑌾𑌦 𑌹𑌰𑌿𑌪𑍁𑌂𑌗𑌵𑌃 ।
𑌸 𑌪𑍂𑌰𑌯𑌾𑌮𑌾𑌸 𑌕𑌪𑌿𑌰𑍍𑌦𑌿𑌶𑍋 𑌦𑌶 𑌸𑌮𑌂𑌤𑌤𑌃 ॥ 15 ॥
𑌨𑌦𑌨𑍍𑌨𑌾𑌦𑍇𑌨 𑌮𑌹𑌤𑌾 𑌮𑍇𑌘𑌸𑍍𑌵𑌨𑌮𑌹𑌾𑌸𑍍𑌵𑌨𑌃 ।
𑌸 𑌤𑌂 𑌦𑍇𑌶𑌮𑌨𑍁𑌪𑍍𑌰𑌾𑌪𑍍𑌤𑌃 𑌸𑍁𑌹𑍃𑌦𑍍𑌧𑌰𑍍𑌶𑌨𑌲𑌾𑌲𑌸𑌃 ॥ 16 ॥
𑌨𑌨𑌾𑌦 𑌹𑌰𑌿𑌶𑌾𑌰𑍍𑌦𑍂𑌲𑍋 𑌲𑌾𑌂𑌗𑍂𑌲𑌂 𑌚𑌾𑌪𑍍𑌯𑌕𑌂𑌪𑌯𑌤𑍍 ।
𑌤𑌸𑍍𑌯 𑌨𑌾𑌨𑌦𑍍𑌯𑌮𑌾𑌨𑌸𑍍𑌯 𑌸𑍁𑌪𑌰𑍍𑌣𑌚𑌰𑌿𑌤𑍇 𑌪𑌥𑌿 ॥ 1 ॥
𑌫𑌲𑌤𑍀𑌵𑌾𑌸𑍍𑌯 𑌘𑍋𑌷𑍇𑌣 𑌗𑌗𑌨𑌂 𑌸𑌾𑌰𑍍𑌕𑌮𑌂𑌡𑌲𑌮𑍍 ।
𑌯𑍇 𑌤𑍁 𑌤𑌤𑍍𑌰𑍋𑌤𑍍𑌤𑌰𑍇 𑌤𑍀𑌰𑍇 𑌸𑌮𑍁𑌦𑍍𑌰𑌸𑍍𑌯 𑌮𑌹𑌾𑌬𑌲𑌾𑌃 ॥ 1 ॥
𑌪𑍂𑌰𑍍𑌵𑌂 𑌸𑌂𑌵𑌿𑌷𑍍𑌠𑌿𑌤𑌾𑌶𑍍𑌶𑍂𑌰𑌾 𑌵𑌾𑌯𑍁𑌪𑍁𑌤𑍍𑌰𑌦𑌿𑌦𑍃𑌕𑍍𑌷𑌵𑌃 ।
𑌮𑌹𑌤𑍋 𑌵𑌾𑌤𑌨𑍁𑌨𑍍𑌨𑌸𑍍𑌯 𑌤𑍋𑌯𑌦𑌸𑍍𑌯𑍇𑌵 𑌗𑌰𑍍𑌜𑌿𑌤𑌮𑍍 ॥ 1 ॥
𑌶𑍁𑌶𑍍𑌰𑍁𑌵𑍁𑌸𑍍𑌤𑍇 𑌤𑌦𑌾 𑌘𑍋𑌷𑌮𑍂𑌰𑍁𑌵𑍇𑌗𑌂 𑌹𑌨𑍂𑌮𑌤𑌃 ।
𑌤𑍇 𑌦𑍀𑌨𑌮𑌨𑌸𑌸𑍍𑌸𑌰𑍍𑌵𑍇 𑌶𑍁𑌶𑍍𑌰𑍁𑌵𑍁𑌃 𑌕𑌾𑌨𑌨𑍌𑌕𑌸𑌃 ॥ 20 ॥
𑌵𑌾𑌨𑌰𑍇𑌂𑌦𑍍𑌰𑌸𑍍𑌯 𑌨𑌿𑌰𑍍𑌘𑍋𑌷𑌂 𑌪𑌰𑍍𑌜𑌨𑍍𑌯𑌨𑌿𑌨𑌦𑍋𑌪𑌮𑌮𑍍 ।
𑌨𑌿𑌶𑌮𑍍𑌯 𑌨𑌦𑌤𑍋 𑌨𑌾𑌦𑌂 𑌵𑌾𑌨𑌰𑌾𑌸𑍍𑌤𑍇 𑌸𑌮𑌂𑌤𑌤𑌃 ॥ 21 ॥
𑌬𑌭𑍂𑌵𑍁𑌰𑍁𑌤𑍍𑌸𑍁𑌕𑌾𑌸𑍍𑌸𑌰𑍍𑌵𑍇 𑌸𑍁𑌹𑍃𑌦𑍍𑌧𑌰𑍍𑌶𑌨𑌕𑌾𑌂𑌕𑍍𑌷𑌿𑌣𑌃 ।
𑌜𑌾𑌂𑌬𑌵𑌾𑌨𑍍 𑌸 𑌹𑌰𑌿𑌶𑍍𑌰𑍇𑌷𑍍𑌠𑌃 𑌪𑍍𑌰𑍀𑌤𑌿𑌸𑌂𑌹𑍃𑌷𑍍𑌟𑌮𑌾𑌨𑌸𑌃 ॥ 22 ॥
𑌉𑌪𑌾𑌮𑌂𑌤𑍍𑌰𑍍𑌯 𑌹𑌰𑍀𑌨𑍍 𑌸𑌰𑍍𑌵𑌾𑌨𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ।
𑌸𑌰𑍍𑌵𑌥𑌾 𑌕𑍃𑌤𑌕𑌾𑌰𑍍𑌯𑍋𑌽𑌸𑍌 𑌹𑌨𑍁𑌮𑌾𑌨𑍍𑌨𑌾𑌤𑍍𑌰 𑌸𑌂𑌶𑌯𑌃 ॥ 23 ॥
𑌨 𑌹𑍍𑌯𑌸𑍍𑌯𑌾𑌕𑍃𑌤𑌕𑌾𑌰𑍍𑌯𑌸𑍍𑌯 𑌨𑌾𑌦 𑌏𑌵𑌂𑌵𑌿𑌧𑍋 𑌭𑌵𑍇𑌤𑍍 ।
𑌤𑌸𑍍𑌯 𑌬𑌾𑌹𑍂𑌰𑍁𑌵𑍇𑌗𑌂 𑌚 𑌨𑌿𑌨𑌾𑌦𑌂 𑌚 𑌮𑌹𑌾𑌤𑍍𑌮𑌨𑌃 ॥ 24 ॥
𑌨𑌿𑌶𑌮𑍍𑌯 𑌹𑌰𑌯𑍋 𑌹𑍃𑌷𑍍𑌟𑌾𑌃 𑌸𑌮𑍁𑌤𑍍𑌪𑍇𑌤𑍁𑌸𑍍𑌤𑌤𑌸𑍍𑌤𑌤𑌃 ।
𑌤𑍇 𑌨𑌗𑌾𑌗𑍍𑌰𑌾𑌨𑍍𑌨𑌗𑌾𑌗𑍍𑌰𑌾𑌣𑌿 𑌶𑌿𑌖𑌰𑌾𑌚𑍍𑌛𑌿𑌖𑌰𑌾𑌣𑌿 𑌚 ॥ 25 ॥
𑌪𑍍𑌰𑌹𑍃𑌷𑍍𑌟𑌾𑌃 𑌸𑌮𑌪𑌦𑍍𑌯𑌂𑌤 𑌹𑌨𑍂𑌮𑌂𑌤𑌂 𑌦𑌿𑌦𑍃𑌕𑍍𑌷𑌵𑌃 ।
𑌤𑍇 𑌪𑍍𑌰𑍀𑌤𑌾𑌃 𑌪𑌾𑌦𑌪𑌾𑌗𑍍𑌰𑍇𑌷𑍁 𑌗𑍃𑌹𑍍𑌯 𑌶𑌾𑌖𑌾𑌃 𑌸𑍁𑌵𑌿𑌷𑍍𑌠𑌿𑌤𑌾𑌃 ॥ 26 ॥
𑌵𑌾𑌸𑌾𑌂𑌸𑍀𑌵 𑌪𑍍𑌰𑌶𑌾𑌖𑌾𑌶𑍍𑌚 𑌸𑌮𑌾𑌵𑌿𑌧𑍍𑌯𑌂𑌤 𑌵𑌾𑌨𑌰𑌾𑌃 ।
𑌗𑌿𑌰𑌿𑌗𑌹𑍍𑌵𑌰𑌸𑌂𑌲𑍀𑌨𑍋 𑌯𑌥𑌾 𑌗𑌰𑍍𑌜𑌤𑌿 𑌮𑌾𑌰𑍁𑌤𑌃 ॥ 2 ॥
𑌏𑌵𑌂 𑌜𑌗𑌰𑍍𑌜 𑌬𑌲𑌵𑌾𑌨𑍍 𑌹𑌨𑍁𑌮𑌾𑌨𑍍𑌮𑌾𑌰𑍁𑌤𑌾𑌤𑍍𑌮𑌜𑌃 ।
𑌤𑌮𑌭𑍍𑌰𑌘𑌨𑌸𑌂𑌕𑌾𑌶𑌮𑌾𑌪𑌤𑌂𑌤𑌂 𑌮𑌹𑌾𑌕𑌪𑌿𑌮𑍍 ॥ 2 ॥
𑌦𑍃𑌷𑍍𑌟𑍍𑌵𑌾 𑌤𑍇 𑌵𑌾𑌨𑌰𑌾𑌸𑍍𑌸𑌰𑍍𑌵𑍇 𑌤𑌸𑍍𑌥𑍁𑌃 𑌪𑍍𑌰𑌾𑌂𑌜𑌲𑌯𑌸𑍍𑌤𑌦𑌾 ।
𑌤𑌤𑌸𑍍𑌤𑍁 𑌵𑍇𑌗𑌵𑌾𑌂𑌸𑍍𑌤𑌸𑍍𑌯 𑌗𑌿𑌰𑍇𑌰𑍍𑌗𑌿𑌰𑌿𑌨𑌿𑌭𑌃 𑌕𑌪𑌿𑌃 ॥ 2 ॥
𑌨𑌿𑌪𑌪𑌾𑌤 𑌮𑌹𑍇𑌂𑌦𑍍𑌰𑌸𑍍𑌯 𑌶𑌿𑌖𑌰𑍇 𑌪𑌾𑌦𑌪𑌾𑌕𑍁𑌲𑍇 ।
𑌹𑌰𑍍𑌷𑍇𑌣𑌾𑌪𑍂𑌰𑍍𑌯𑌮𑌾𑌣𑍋𑌽𑌸𑍌 𑌰𑌮𑍍𑌯𑍇 𑌪𑌰𑍍𑌵𑌤𑌨𑌿𑌰𑍍𑌝𑌰𑍇 ॥ 30 ॥
𑌛𑌿𑌨𑍍𑌨𑌪𑌕𑍍𑌷 𑌇𑌵𑌾𑌽𑌕𑌾𑌶𑌾𑌤𑍍𑌪𑌪𑌾𑌤 𑌧𑌰𑌣𑍀𑌧𑌰𑌃 ।
𑌤𑌤𑌸𑍍𑌤𑍇 𑌪𑍍𑌰𑍀𑌤𑌮𑌨𑌸𑌸𑍍𑌸𑌰𑍍𑌵𑍇 𑌵𑌾𑌨𑌰𑌪𑍁𑌂𑌗𑌵𑌾𑌃 ॥ 31 ॥
𑌹𑌨𑍁𑌮𑌂𑌤𑌂 𑌮𑌹𑌾𑌤𑍍𑌮𑌾𑌨𑌂 𑌪𑌰𑌿𑌵𑌾𑌰𑍍𑌯𑍋𑌪𑌤𑌸𑍍𑌥𑌿𑌰𑍇 ।
𑌪𑌰𑌿𑌵𑌾𑌰𑍍𑌯 𑌚 𑌤𑍇 𑌸𑌰𑍍𑌵𑍇 𑌪𑌰𑌾𑌂 𑌪𑍍𑌰𑍀𑌤𑌿𑌮𑍁𑌪𑌾𑌗𑌤𑌾𑌃 ॥ 32 ॥
𑌪𑍍𑌰𑌹𑍃𑌷𑍍𑌟𑌵𑌦𑌨𑌾 𑌸𑍍𑌸𑌰𑍍𑌵𑍇 𑌤𑌮𑌰𑍋𑌗𑌮𑍁𑌪𑌾𑌗𑌤𑌮𑍍 ।
𑌉𑌪𑌾𑌯𑌨𑌾𑌨𑌿 𑌚𑌾𑌦𑌾𑌯 𑌮𑍂𑌲𑌾𑌨𑌿 𑌚 𑌫𑌲𑌾𑌨𑌿 𑌚 ॥ 33 ॥
𑌪𑍍𑌰𑌤𑍍𑌯𑌰𑍍𑌚𑌯𑌨𑍍 𑌹𑌰𑌿𑌶𑍍𑌰𑍇𑌷𑍍𑌠𑌂 𑌹𑌰𑌯𑍋 𑌮𑌾𑌰𑍁𑌤𑌾𑌤𑍍𑌮𑌜𑌮𑍍 ।
𑌹𑌨𑍁𑌮𑌾𑌂𑌸𑍍𑌤𑍁 𑌗𑍁𑌰𑍂𑌨𑍍 𑌵𑍃𑌦𑍍𑌧𑌾𑌂𑌜𑌾𑌂𑌬𑌵𑌤𑍍𑌪𑍍𑌰𑌮𑍁𑌖𑌾𑌂𑌸𑍍𑌤𑌦𑌾 ॥ 34 ॥
𑌕𑍁𑌮𑌾𑌰𑌮𑌂𑌗𑌦𑌂 𑌚𑍈𑌵 𑌸𑍋𑌽𑌵𑌂𑌦𑌤 𑌮𑌹𑌾𑌕𑌪𑌿𑌃 ।
𑌸 𑌤𑌾𑌭𑍍𑌯𑌾𑌂 𑌪𑍂𑌜𑌿𑌤𑌃 𑌪𑍂𑌜𑍍𑌯𑌃 𑌕𑌪𑌿𑌭𑌿𑌶𑍍𑌚 𑌪𑍍𑌰𑌸𑌾𑌦𑌿𑌤𑌃 ॥ 35 ॥
𑌦𑍃𑌷𑍍𑌟𑌾 𑌸𑍀𑌤𑍇𑌤𑌿 𑌵𑌿𑌕𑍍𑌰𑌾𑌂𑌤 𑌸𑍍𑌸𑌂𑌕𑍍𑌷𑍇𑌪𑍇𑌣 𑌨𑍍𑌯𑌵𑍇𑌦𑌯𑌤𑍍 ।
𑌨𑌿𑌷𑌸𑌾𑌦 𑌚 𑌹𑌸𑍍𑌤𑍇𑌨 𑌗𑍃𑌹𑍀𑌤𑍍𑌵𑌾 𑌵𑌾𑌲𑌿𑌨𑌸𑍍𑌸𑍁𑌤𑌮𑍍 ॥ 36 ॥
𑌰𑌮𑌣𑍀𑌯𑍇 𑌵𑌨𑍋𑌦𑍍𑌦𑍇𑌶𑍇 𑌮𑌹𑍇𑌂𑌦𑍍𑌰𑌸𑍍𑌯 𑌗𑌿𑌰𑍇𑌸𑍍𑌤𑌦𑌾 ।
𑌹𑌨𑍁𑌮𑌾𑌨𑌬𑍍𑌰𑌵𑍀𑌦𑍍𑌧𑍃𑌷𑍍𑌟𑌸𑍍𑌤𑌦𑌾 𑌤𑌾𑌨𑍍𑌵𑌾𑌨𑌰𑌰𑍍𑌷𑌭𑌾𑌨𑍍 ॥ 3 ॥
𑌅𑌶𑍋𑌕𑌵𑌨𑌿𑌕𑌾𑌸𑌂𑌸𑍍𑌥𑌾 𑌦𑍃𑌷𑍍𑌟𑌾 𑌸𑌾 𑌜𑌨𑌕𑌾𑌤𑍍𑌮𑌜𑌾 ।
𑌰𑌕𑍍𑌷𑌮𑌾𑌣𑌾 𑌸𑍁𑌘𑍋𑌰𑌾𑌭𑍀 𑌰𑌾𑌕𑍍𑌷𑌸𑍀𑌭𑌿𑌰𑌨𑌿𑌂𑌦𑌿𑌤𑌾 ॥ 3 ॥
𑌏𑌕𑌵𑍇𑌣𑍀𑌧𑌰𑌾 𑌬𑌾𑌲𑌾 𑌰𑌾𑌮𑌦𑌰𑍍𑌶𑌨𑌲𑌾𑌲𑌸𑌾 ।
𑌉𑌪𑌵𑌾𑌸𑌪𑌰𑌿𑌶𑍍𑌰𑌾𑌂𑌤𑌾 𑌜𑌟𑌿𑌲𑌾 𑌮𑌲𑌿𑌨𑌾 𑌕𑍃𑌶𑌾 ॥ 3 ॥
𑌤𑌤𑍋 𑌦𑍃𑌷𑍍𑌟𑍇𑌤𑌿 𑌵𑌚𑌨𑌂 𑌮𑌹𑌾𑌰𑍍𑌥𑌮𑌮𑍃𑌤𑍋𑌪𑌮𑌮𑍍 ।
𑌨𑌿𑌶𑌮𑍍𑌯 𑌮𑌾𑌰𑍁𑌤𑍇𑌸𑍍𑌸𑌰𑍍𑌵𑍇 𑌮𑍁𑌦𑌿𑌤𑌾 𑌵𑌾𑌨𑌰𑌾𑌭𑌵𑌨𑍍 ॥ 40 ॥
𑌕𑍍𑌷𑍍𑌵𑍇𑌲𑌂𑌤𑍍𑌯𑌨𑍍𑌯𑍇 𑌨𑌦𑌂𑌤𑍍𑌯𑌨𑍍𑌯𑍇 𑌗𑌰𑍍𑌜𑌂𑌤𑍍𑌯𑌨𑍍𑌯𑍇 𑌮𑌹𑌾𑌬𑌲𑌾𑌃 ।
𑌚𑌕𑍍𑌰𑍁𑌃 𑌕𑌿𑌲𑌕𑌿𑌲𑌾𑌮𑌨𑍍𑌯𑍇 𑌪𑍍𑌰𑌤𑌿𑌗𑌰𑍍𑌜𑌂𑌤𑌿 𑌚𑌾𑌪𑌰𑍇 ॥ 41 ॥
𑌕𑍇𑌚𑌿𑌦𑍁𑌚𑍍𑌛𑍍𑌰𑌿𑌤𑌲𑌾𑌂𑌗𑍂𑌲𑌾𑌃 𑌪𑍍𑌰𑌹𑍃𑌷𑍍𑌟𑌾𑌃 𑌕𑌪𑌿𑌕𑍁𑌂𑌜𑌰𑌾𑌃 ।
𑌆𑌯𑌤𑌾𑌂𑌚𑌿𑌤𑌦𑍀𑌰𑍍𑌘𑌾𑌣𑌿 𑌲𑌾𑌂𑌗𑍂𑌲𑌾𑌨𑌿 𑌪𑍍𑌰𑌵𑌿𑌵𑍍𑌯𑌧𑍁𑌃 ॥ 42 ॥
𑌅𑌪𑌰𑍇 𑌚 𑌹𑌨𑍂𑌮𑌂𑌤𑌂 𑌵𑌾𑌨𑌰𑌾 𑌵𑌾𑌰𑌣𑍋𑌪𑌮𑌮𑍍 ।
𑌆𑌪𑍍𑌲𑍁𑌤𑍍𑌯 𑌗𑌿𑌰𑌿𑌶𑍃𑌂𑌗𑍇𑌭𑍍𑌯𑌸𑍍𑌸𑌂𑌸𑍍𑌪𑍃𑌶𑌂𑌤𑌿 𑌸𑍍𑌮 𑌹𑌰𑍍𑌷𑌿𑌤𑌾𑌃 ॥ 43 ॥
𑌉𑌕𑍍𑌤𑌵𑌾𑌕𑍍𑌯𑌂 𑌹𑌨𑍂𑌮𑌂𑌤𑌮𑌂𑌗𑌦𑌸𑍍𑌤𑌮𑌥𑌾𑌬𑍍𑌰𑌵𑍀𑌤𑍍 ।
𑌸𑌰𑍍𑌵𑍇𑌷𑌾𑌂 𑌹𑌰𑌿𑌵𑍀𑌰𑌾𑌣𑌾𑌂 𑌮𑌧𑍍𑌯𑍇 𑌵𑌚𑌨𑌮𑍁𑌤𑍍𑌤𑌮𑌮𑍍 ॥ 44 ॥
𑌸𑌤𑍍𑌤𑍍𑌵𑍇 𑌵𑍀𑌰𑍍𑌯𑍇 𑌨 𑌤𑍇 𑌕𑌶𑍍𑌚𑌿𑌤𑍍𑌸𑌮𑍋 𑌵𑌾𑌨𑌰 𑌵𑌿𑌦𑍍𑌯𑌤𑍇 ।
𑌯𑌦𑌵𑌪𑍍𑌲𑍁𑌤𑍍𑌯 𑌵𑌿𑌸𑍍𑌤𑍀𑌰𑍍𑌣𑌂 𑌸𑌾𑌗𑌰𑌂 𑌪𑍁𑌨𑌰𑌾𑌗𑌤𑌃 ॥ 45 ॥
𑌅𑌹𑍋 𑌸𑍍𑌵𑌾𑌮𑌿𑌨𑌿 𑌤𑍇 𑌭𑌕𑍍𑌤𑌿𑌰𑌹𑍋 𑌵𑍀𑌰𑍍𑌯𑌮𑌹𑍋 𑌧𑍃𑌤𑌿𑌃 ।
𑌦𑌿𑌷𑍍𑌟𑍍𑌯𑌾 𑌦𑍃𑌷𑍍𑌟𑌾 𑌤𑍍𑌵𑌯𑌾 𑌦𑍇𑌵𑍀 𑌰𑌾𑌮𑌪𑌤𑍍𑌨𑍀 𑌯𑌶𑌸𑍍𑌵𑌿𑌨𑍀 ॥ 46 ॥
𑌦𑌿𑌷𑍍𑌟𑍍𑌯𑌾 𑌤𑍍𑌯𑌕𑍍𑌷𑍍𑌯𑌤𑌿 𑌕𑌾𑌕𑍁𑌤𑍍𑌸𑍍𑌥 𑌶𑍍𑌶𑍋𑌕𑌂 𑌸𑍀𑌤𑌾𑌵𑌿𑌯𑍋𑌗𑌜𑌮𑍍 ।
𑌤𑌤𑍋𑌽𑌂𑌗𑌦𑌂 𑌹𑌨𑍂𑌮𑌂𑌤𑌂 𑌜𑌾𑌂𑌬𑌵𑌂𑌤𑌂 𑌚 𑌵𑌾𑌨𑌰𑌾𑌃 ॥ 4 ॥
𑌪𑌰𑌿𑌵𑌾𑌰𑍍𑌯 𑌪𑍍𑌰𑌮𑍁𑌦𑌿𑌤𑌾 𑌭𑍇𑌜𑌿𑌰𑍇 𑌵𑌿𑌪𑍁𑌲𑌾𑌶𑍍𑌶𑌿𑌲𑌾𑌃 ।
𑌶𑍍𑌰𑍋𑌤𑍁𑌕𑌾𑌮𑌾𑌸𑍍𑌸𑌮𑍁𑌦𑍍𑌰𑌸𑍍𑌯 𑌲𑌂𑌘𑌨𑌂 𑌵𑌾𑌨𑌰𑍋𑌤𑍍𑌤𑌮𑌾𑌃 ॥ 4 ॥
𑌦𑌰𑍍𑌶𑌨𑌂 𑌚𑌾𑌪𑌿 𑌲𑌂𑌕𑌾𑌯𑌾𑌸𑍍𑌸𑍀𑌤𑌾𑌯𑌾 𑌰𑌾𑌵𑌣𑌸𑍍𑌯 𑌚 ।
𑌤𑌸𑍍𑌥𑍁𑌃 𑌪𑍍𑌰𑌾𑌂𑌜𑌲𑌯𑌸𑍍𑌸𑌰𑍍𑌵𑍇 𑌹𑌨𑍁𑌮𑌦𑍍𑌵𑌚𑌨𑍋𑌨𑍍𑌮𑍁𑌖𑌾𑌃 ॥ 4 ॥
𑌤𑌸𑍍𑌥𑍌 𑌤𑌤𑍍𑌰𑌾𑌂𑌗𑌦𑌃 𑌶𑍍𑌰𑍀𑌮𑌾𑌨𑍍 𑌵𑌾𑌨𑌰𑍈𑌰𑍍𑌬𑌹𑍁𑌭𑌿𑌰𑍍𑌵𑍃𑌤𑌃 ।
𑌉𑌪𑌾𑌸𑍍𑌯𑌮𑌾𑌨𑍋 𑌵𑌿𑌬𑍁𑌧𑍈𑌰𑍍𑌦𑌿𑌵𑌿 𑌦𑍇𑌵𑌪𑌤𑌿𑌰𑍍𑌯𑌥𑌾 ॥ 50 ॥
𑌹𑌨𑍂𑌮𑌤𑌾 𑌕𑍀𑌰𑍍𑌤𑌿𑌮𑌤𑌾 𑌯𑌶𑌸𑍍𑌵𑌿𑌨𑌾 𑌤𑌥𑌾𑌂𑌗𑌦𑍇𑌨𑌾𑌂𑌗𑌦𑌬𑌦𑍍𑌧𑌬𑌾𑌹𑍁𑌨𑌾 ।
𑌮𑍁𑌦𑌾 𑌤𑌦𑌾𑌽𑌧𑍍𑌯𑌾𑌸𑌿𑌤𑌮𑍁𑌨𑍍𑌨𑌤𑌂 𑌮𑌹𑌨𑍍𑌮𑌹𑍀𑌧𑌰𑌾𑌗𑍍𑌰𑌂 𑌜𑍍𑌵𑌲𑌿𑌤𑌂 𑌶𑍍𑌰𑌿𑌯𑌾𑌭𑌵𑌤𑍍 ॥ 51 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌸𑌪𑍍𑌤𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥
